Kala moj-aljel jumasaʼ:

Ayxa junuk 2,600 jabʼil, ja aluman Ezequiel yila jun nakʼsat bʼa jel cham yiljel. Yila jun niwan karro ja bʼa satkʼinal bʼa yeʼn yamanyuj ja Ajwalal bʼa yibʼanal ja sutsatkʼinali. Pe ja mas jel cham yiljel sbʼaja karro jaw jani ja jastal wa xnijki. Jach wa x-ajni jastal ja slijpelal ja chawuki. Sok yajni wa stukbʼes ja sbʼeji, wa xbʼobʼ yaʼ bwelta jach mi wa skomo ja yajneli (Ezeq. 1:4, 9, 12, 14, 16-27).

¿Jas wa xya juljkʼujoltik ja nakʼsat jaw? Pes ja xchonabʼ ja Jyoba bʼa sutsatkʼinali mini tʼun xkʼot tekʼan aʼtel. Jastalni ja bʼa satkʼinal mi xkʼot tekʼan ja aʼteli cha jachuk ja bʼa Luʼum mini xcha kʼot tekʼan, pes ti wa xkilatik ja bʼa jastik kʼulaxi ja bʼa jabʼil ekʼi bʼa septiembre man agosto.

Ja bʼa Estados Unidos, jitsan ja matik teye bʼa Beteli aʼtele kongana bʼa oj yaʼekan ja Brooklyn bʼa ti oj wajuke bʼa Warwick (Nueva York), ja bʼa yajkʼachil yechalil wa xkʼelxi ja kaʼteltik bʼa spetsanil ja luʼumi. Sok jujuntik ajita pilan xchole sok elyeta ja bʼa Betel. Jaxa bʼa tuk paisik, ja matik teye bʼa Beteli kongana wane aʼtel bʼa yajel kʼeʼuk, stojbʼesel sok bʼa stsomjel naʼitsik Betel, ma jujuntik tʼilani wajyeta bʼa tuk lugar. Anima jitsan bʼa weʼnlex mini atukbʼesnejukex anajex, pe jelni maʼ wanex aʼtel bʼa tuk modoʼik.

Ja Tsome Tojwanumi jel wa xnikji sok wa stsatsankʼujolaji yiljel ja smoj-aljele bʼa spetsanil ja luʼumi kongana wane aʼtel bʼa snochjel ja jastal wajum ja xchonabʼ ja Jyoba. Pes jitsan bʼa weʼnlex wajelex koltanel bʼa wa xkʼanxi mas cholumanik. Tuk spensaraʼuneje xcholjel bʼa jun pilan kʼumal bʼa mi jaʼuk ja bʼa slugari. Tuk kʼeʼel xchol-e bʼa jun modo mi xcholunejuke ajyi ma mi snaʼunejuke. Sok tuk kongana wane aʼtel bʼa tuk modoʼik. Chomajkil, spetsanil ja tojik yaʼtijumik Dyosi, sok ja matik awelexa ma maloʼayeʼi, wani kuchelyujile ja ajnel yiʼoje bʼa oj kʼotuke ja bʼa sakʼanili. Mini xyaʼawekan yaʼteltajel ja Jyoba sok spensaraʼuneje sjejelyi ja Satanás jun mero leʼa abʼal (1 Cor. 9:24).

Wani xbʼobʼa kʼuʼukex lek ja Jyoba wa xyila ja janekʼ waxa kʼujolanex bʼa skʼulajeli (Heb. 6:10). Jawa modoʼexi jachni jastal ja Abrahán soka Sara. Yajni ayiʼoj 70 jabʼili, pwestoni ajyi bʼa yajelkan ja chonabʼ Ur sok wajel soka spamilya bʼa jun najat lugar, bʼa Canaán. Ja tiw tini ajyi kulan bʼa karpaʼik junuk 100 jabʼil. ¡Jelni chaʼanyabʼalil ja jasa skʼulan ja yeʼn soka yala cheʼumi! (Gén. 11:31; Hech. 7:2, 3).

¿Jach maʼ wana sjejel ja junxta modoʼal jaw ja weʼn? Apetsanilex ja matik toj ayex ja bʼa tsaʼanikxta kʼakʼu it wanexni skʼulajel ja jasa  yala ja Jesús oj jkʼuluktiki. Ja yeʼn yala: «Jaxa huenlexi, caaxic, cax ja ba spetzanil ja lugari ba jachuc oj och jnebumanil ja cristiano jumasa. Ti xa cʼulanex bautizara ja ba sbiil ja Tatali soc ja queni, como yuninon nia, soc ja Espíritu Santo» (Mat. 28:19).

Yajni ja Jesús yala «caaxic», wan yaljel tʼilani oj aʼtijukotik sok mi oj kankotik tekʼan. ¡Jelni wa xyaʼa gustoʼil yiljel ja jasa lajxiyujile ja jabʼil ekʼi spetsanil ja nochumanik bʼa Kristo bʼa kongana wane aʼteli! Mini wokoluk yiljel ja skʼabʼ ja Jyoba soka skoltaneli tini ay ja bʼa xcholjel ja lekil rason bʼa spetsanil ja luʼumi (Mar. 13:10).

Jitsan ixuk winik wane skisjel ja lekil rasoni. Ja jabʼil ekʼi kʼot staʼ ja 8,340,847 cholumaniki, sok jujune ja ixawi kʼulaxi junuk 10,115,264 estudio bʼa Biblia. Ti wa x-ilxi ja skarro ja Jyoba bʼa satkʼinali mini wa xkʼot tekʼan, ¡cha mini ja weʼnlexi! Ja yuj, moka waʼexkan skʼulajel ja lekil aʼtel ja tʼusanxta tyempo wa xkani bʼajtantoyuj oj slut ja Jyoba ja pwerta bʼa wa x-ikʼwani och bʼa sakʼanili.

¡Jelni lek ja wa x-aji juljkʼujoltik ja wego ja teksto bʼa jabʼil 2017! Wa xyala: «Jipa akʼujol bʼa Jyoba sok kʼulan ja bʼa leki» (Sal. 37:3). Yajni waxa kʼuʼan ja yaljelik jaw sok waxa kʼulan ja bʼa leki bʼa yaʼteltajel ja Jyoba, wana sjejel waxa xjipa akʼujol bʼa yeʼna. Aʼa tʼabʼan akʼujol, mini atuchʼil ayuka. Ja jasa skʼapa ja Jesús smeranilni leka: «Jaxa queni oj ni jmojtayex ecʼ tola vida, masan to cuando huax chʼac ja mundoi» (Mat. 28:20).

Ajuluka kʼujol ja Jyoba mini oj kʼot tekʼan yajel koʼ slekilal ja aʼtel wana skʼulajeli. Anima jitsan ma tʼusan waxa kʼulan, ja jasa wa xyila jani ta wana yajel ja janekʼ wa xlajxi awuji sok ja tikʼe modoʼal waxa kʼulani. Yajni jach waxa kʼulan, wa xkʼot man bʼa skʼujol ja Jyoba sok jelni gusto x-ilwani (2 Cor. 9:6, 7). Moka wakan yajelyi orasyon ja kala Tatiki, spaklajel ja Yabʼali, wajel ja bʼa tsomjeliki sok xcholjel kongana. Jachuk, kʼakʼu kʼakʼu oj tsatsbʼuk mas ja jastal waxa wilabʼaj soka yeʼn.

Ja Satanás «huan ni snaa que bisubal xa lec ja stiempo», sok ja yeʼn kongana wan yajel makunuk tuktukil jasunuk bʼa oj ya elankan yaʼteltajel toj lek ja Jyoba (Apoc. 12:12). Ajyan lek kʼubʼan soka Jyoba, jachuk ja Dyablo mini oj bʼobʼyuj ja jasa wa skʼana (Sal. 16:8). Awa pabor, mok chʼayuka kʼujol jel wa xkʼanawetikon sok wa xkaʼatikon tsʼakatal bʼa spetsanil ja jasa waxa kʼulan bʼa waxa koltayotikon stalnajel ja jastik sbʼaj ja sGobyerno ja Dyos ja bʼa tsaʼanixta kʼakʼu it.

Jawa moj-aljelex,

Tsome Tojwanum bʼa Taʼumantiʼik bʼa Jyoba