YOLOMAJEL JA BʼA SPATIKI | ¿JASTAL TALNAJI JA BIBLIA?
Ja Biblia talnaji sbʼaja sjomelal ja spowili
JA SKONTRA. Ja tsʼijbʼumanik soka matik skʼulane kopyar ja Biblia ti stsʼijbʼane bʼa papiro sok pergamino (2 Timoteo 4:13). * ¿Jasa wokol stʼaspun ja Biblia yuja ti tsʼijbʼaxi tiw?
Ja papiro jel wego xchʼiʼi, wa x-el ja yelawi sok wa xchʼak ja yipi. Ja paklanumik bʼa Egipto Richard Parkinson soka Stephen Quirke, wa xyalawe: «Soka tyempo, jun spowil juʼun wa xjomi masan wa xtikilji sok wa xpax tsʼubʼil luʼum. Yajni nolubʼali, jun royo wa xbʼobʼ och xojil ma wa xkʼaʼi yuja wa x-ujkʼi, sok yajni mukubʼali ojni bʼobʼ skʼux chanteʼik ma wa x-och xchajnul, jastal sakal xanich». Yajni taji jujuntik papiro, ti aji bʼa jel ijlabʼ ma aji bʼa jel x-ujkʼi, soka jaw mas wego jomi.
Ja pergamino masni wa xkuchyuj yuja papiro, pe cha wani xjom ta mi xyamxi toji sok ta wa x-axi bʼa ay cheʼej, bʼa jel kʼixin ma bʼa jel x-ujkʼi. * Chomajkil wani xcha och xchajnul. Ja yujil, jitsan registroʼik bʼa najate mixa ayuk ja wego. Lekbʼi jach ekʼ sbʼaj ja Biblia, anto ja rason yiʼoji ojni cha chʼayuk ajyi.
JASTAL TALNAJI JA BIBLIA. Ja Ley ajiyile ja israʼelenyo wa xyaʼa ja mandar bʼa spetsanil ja mandaranum bʼa Israel a-stsʼijbʼuke bʼa jun libro jun kopya ja bʼa ley jaw, ja sbʼajtanil joʼe libro bʼa Biblia (Deuteronomio 17:18). Chomajkil, ja matik jel chapane bʼa skʼulajel kopyari jel jitsan ja kopyaʼik yawe eluki, pes ja bʼa xchʼakulabʼil ja bʼajtan siglo oj bʼobʼa taʼ kopyaʼik ja bʼa sinagogaʼik bʼa yibʼanal ja Israel sok man bʼa Macedonia (Lucas 4:16, 17; Hechos 17:11). ¿Jastal talnubʼal man jtyempotik jujuntik ja bʼa poko kopyaʼik jaw?
Ja kopyaʼiki naʼubʼal sbʼaj jastal Royoʼik bʼa mar Muerto ti ajyi sigloʼik bʼa yoj oxomik sok nolan bʼa kʼeʼenik jel takin.
«Wani xnaxi ja judíoʼik ti wa snolowe ja royoʼik bʼa Biblia bʼa tsujik ma bʼa oxomik bʼa mi oj jomuk», jach yala ja maestro bʼa Yajkʼachil Testamento Phillip Comfort. Sok ja nochumanik bʼa Jesús jani cha snochowe ja kostumbre jaw. Jach jastal it jujuntik kopyaʼik bʼa Biblia taxel bʼa yoj oxom, bʼa lugarik jel kʼikʼ, bʼa kʼeʼenik sok bʼa lugarik jel takin.
JA SLEKILAL. Jitsan xentik yaman ja kopyaʼik bʼa Biblia, jujuntik masxa ja chabʼ mil jabʼil yiʼoji, aytoni man jtyempotik. Mini ay jun libro bʼa najate bʼa jel yiʼoj jitsan kopyaʼik bʼa ayxa lek jitsan tyempo.
^ par. 3 Ja papiro tojbʼesnubʼal sok jun yal kʼul ti wa x-ajyi bʼa jaʼ sok jani jaw ja sbʼiʼili. Jaxa pergamino tojbʼesnubʼal sok stsʼujmil chante.
^ par. 5 Jun sjejel, ja mero acta bʼa Declaración bʼa Independencia ja bʼa Estados Unidos ti tsʼijbʼaxi bʼa jun pergamino. Ja wego, ojxta tsʼikwukyuj 250 jabʼil sok mixa jel xchijkaji la sletraʼil bʼa oj kʼumaxuk.
