Kakilalitachuwinaw tsinu milatamat.

Klakachilh kkata 1979 kʼEstados Unidos. Akxni xakkgalhi akgtutu kata, kinatlatni lakxtlawakgolh xtamakgaxtokgatkan. Kintse kilimakgastakli xtalismaninkan judíos chu ankgalhin xakan kʼescuelas judías nema kawanikan yeshivás. Akxni xakkgalhi akgtujun kata kaw latamayaw kʼIsrael; escuela niku xakan xwi kʼakgtum kibutz, tukuwani nema kalilakgapaskan colonias niku chananankan. Akgtum kata alistalh, kaw México.

Maski ni xʼanan akgtum sinagoga lakatsu kkinchik, akit chuntiya xaktlawa kintalismanin: kilhtamaku sábado xakmapasi vela, xaklikgalhtawakga Torá [xasanto tatsokgni judíos] chu xakmaklakaskin maktum sidur, o libro xla oraciones akxni xaktlawa kiʼoración. Xaklakgati xakkawani kincompañeros xalak escuela pi kintakanajla o kireligión xaxlikana xwanit. Akit nikxni xaklikgalhtawakganit Nuevo Testamento, niku lichuwinan xlatamat chu xtamasiy Jesucristo; kintse kiwanilh pi ni xaklikgalhtawakgalh xlakata xʼama kimaxkajwani.

¿Tuku xlakata tsuku likgalhtawakgaya Nuevo Testamento?

Akxni xakkgalhi 17 kata, ktaspitli kʼEstados Unidos xlakata xakmasputulh kintakgalhtawakga. Chatum kiʼamigo kiwanilh pi xla kstalanina Cristo xlitaxtu chu kiwanilh pi komo ni xakkanajlanilh Jesús ni xakama paxuwa kkilatamat.

—Akit kwanilh: Tiku kanajlanikgo Jesús kaj taʼakgskgawikgonit.

—¿Likgalhtawakganitata Nuevo Testamento?

—Ni.

—Komo ni likgalhtawakganita, ¿tuku xlakata chuna wana? Tiku lichuwinan tuku ni katsi kaj xatonto.

 Tuku kiwanilh kaks kimalakawanilh xlakata akit nachuna xaklakpuwan. Kmaxanalh chu wa xlakata kmakglhtilh xBiblia chu klilh kkinchik xlakata xaklikgalhtawakgalh Nuevo Testamento.

¿Lakgati tuku likgalhtawakga?

Lu kaks klilakawa pi Nuevo Testamento wa judíos xtsokgwilikgonit. Nachuna, akxni tlakg xaklikgalhtawakga xakakxilha pi Jesús chatum chixku tiku xpaxkinan, xtaktuju chu xkamakgtayaputun latamanin, chu ni kaj xkaʼakgskgawiputun. Asta kalh kbiblioteca chu kputsalh makgapitsi libro nema xlichuwinan Jesús. Pero nipara maktum libro kimakanajlilh pi Jesús wa Mesías xwanit. Makgapitsi libro xwankgo pi Jesús wa Dios, chu uma nipara tsinu xakkanajla. Xaklakpuwan: «¿Tiku xtachuwinan Jesús akxni xtlawa xʼoración? ¿Xʼakstu xtachuwinankan?». Nachuna, Jesús nilh, pero Biblia wan xpalakata Dios: «Wix ni niya». *

¿Tuku tlawa alistalh?

Tuku xaxlikana ni talakgpali chu akit xaktekgsputun xaxlikana. Wa xlakata, xliputum kinaku ktlawanilh oración Dios, asta ktasalh chu xlimakgtumku ni kmaklakaskilh sidur. Aku xaktlawamakgo kiʼoración akxni lakgatlakgka kimalakcha: chatiy xtatayananin Jehová xyakgo kkilhtin. Kkgalhchuwinaw chu kimakgxtakgnikgolh maktum xfolletojkan. Uma likgalhtawakga chu tuku klichuwinaw alistalh kimakanajlilh pi tuku xkanajlakgo xlikana anta xkilhtiyakgo kBiblia. Akgtum liʼakxilhtit, xtatayananin Jehová ni kanajlanikgo Trinidad chu ni lakpuwankgo pi Jesús wa Dios, wata «xKgawasa Dios» * chu «xapulana xtamalakatsukin Dios». *

Ni makgas titaxtulh ktaspitli kMéxico chu anta xtatayananin Jehová chuntiya kimasiyanikgolh tuku xlichuwinankanit xpalakata Mesías. ¡Lhuwa tuku xlichuwinankanit! Maski chuna, ni lu xakkanajla pi Jesús wa Mesías xwanit. Xaklakpuwan: «¿Kajwatiya Jesús makgantaxtilh tuku xlichuwinankanit xpalakata Mesías? ¿Chu komo kaj kaʼakgskgawilh latamanin chu kamakanajlilh pi wa Mesías xwanit?».

¿Tuku tlawalh pi xkanajla?

Xtatayananin Jehová kimasiyanikgolh makgapitsi tuku xlichuwinankanit xpalakata Mesías nema nila xmakgantaxtilh chatum akgskgawina. Akgtum liʼakxilhtit, akxni akgtujun ciento kata xtsankga xlakachilh Mesías, palakachuwina Miqueas lichuwinalh pi xʼama lakachin kBelén. * ¿Anan chatum lataman nema tlan nalaksaka niku nalakachin? Isaías lichuwinalh pi Mesías xʼamaka makgnikan la chatum tiku lu lixkajni xtayat, pero xʼamaka maknukan kxlakgstipankan tiku xkgalhikgo tumin *. Jesús makgantaxtilh putum uma tuku xlichuwinankanit.

Pero wa tuku kimakanajlilh pi Jesús wa Mesías, wa familia niku xminitancha. Biblia wan pi Mesías xʼama min kxfamilia mapakgsina David *. Judíos lu liwana klhkawilikgonit tuku familia xminkgoyacha, wa xlakata komo Jesús ni anta xmincha kxfamilia David, xtalamakgasitsin lu xlichuwinankgolh uma. Pero nila chuna tlawakgolh, xlakata liwana xtasiya pi Jesús xalak xfamilia David xwanit. Asta lhuwa latamanin limapakuwikgolh la «xKgawasa David». *

Kkata 70, akxni xtitaxtunita puxamakutujun kata lata xninit Jesús, soldados xalak Roma masputukgolh Jerusalén, chu niku xtsokgwilikanit tuku familia xminkgoyacha judíos tsankgakgolh o masputuka. Wa xlakata xtalakaskin pi Mesías xlakachilh akxni nina xmasputukan Jerusalén xlakata tlanku xkatsika tuku familia xminacha.

Akxni xʼakxilhnitata putum uma, ¿tuku lakpuwanti?

Anta kDeuteronomio 18:18, 19, Dios lichuwinalh pi xʼama tawila kʼIsrael chatum palakachuwina chuna la Moisés chu wa: «Nakskini kuenta tiku ni nakgaxmata tuku xla nawan kkintukuwani». Akxni liwana klikgalhtawakgalh putuminika Biblia, kkanajlalh pi Jesús xalak Nazaret wa uma palakachuwina.