Xtatayananin Jehová kliskujaw xlakata kifamiliaskan chu xla kintalakatsukan tlakg makxtum natawilakgo. Xlakaskinka kakxilhaw familia xlakata kkatsiyaw pi wa Dios tiku malakatsukilh (Génesis 2:21-24; Efesios 3:14, 15). Anta kBiblia, Jehová masta tastakyaw nema kamakgtayanit latamanin xlikalanka katiyatni xlakata xtapaxuwan chu makxtum natawila xtamakgaxtokgatkan.

 Nachuna, kliskujaw xlakata naktlawayaw tuku wan Biblia nema kinkamakgtayayan xlakata tlan chixku o puskat nakwanaw chu tlan natlatni (Proverbios 31:10-31; Efesios 5:22–6:4; 1 Timoteo 5:8). Asta Biblia tlan nakamatliwakglha familias niku ni lakxtum kgalhikgo xtakanajlakan (1 Pedro 3:1, 2). Akgtum liʼakxilhtit, kaʼakxilhwi tuku wankgolh makgapitsi latamanin akxni xtatayananin Jehová wankgolh tiku tamakgaxtokgkgo:

•   «Xapulana akgchaxan kata la kmakgaxtokgaw putum kilhtamaku lu xaklatalatlawayaw chu ni xakkatsiyaw tuku xaktlawayaw. Pero akxni Ivete xtatayana Jehová wa, tlakg xapaxkina wa chu nialh lakapala ksitsi. Lakgmaxtulh kintamakgaxtokgatkan xlakata talakgpalilh.» (Clauir, xalak Brasil)

•   «Akxni kinchixku tiku wanikan Chansa, tsukulh katakgalhtawakga xtatayananin Jehová, akit ni xaklakaskin, xlakata xaklakpuwan pi xlakan xlakxtlawakgo familias. Pero la titaxtunit kilhtamaku kakxilhnit pi makgtayanit kintamakgaxtokgatkan.» (Agness, xalak Zambia)

 Nachuna, xlakata la talichuwinama Dios, kkamasiyaniyaw kintalakatsukan xlakata la Biblia tlan nakamakgtayakgo la umakgolh anta kxfamiliajkan:

•   Liwana laksakkan tiku tatamakgaxtokgkan

•   Tayanikan taʼakglhuwit nema tawila xapulana kata ktamakgaxtokgat

•   Tlan katalalinkan xnatlatnikan tiku tamakgaxtokga

•   Liwana maklakaskinkan tumin

•   Nialh nataʼakglhuwiya

•   Katsinikan tapatinankan

•   Kastakyawakan kamanan

 Lakgachunin chuna kitaxtu. Nachuna, tuku lichuwinalh kkata 1998 akgtum empresa nema wanikan Sofres limasiyalh lata 20 tamakgaxtokgat 1 tamakgaxtokgat kgalhikgolh laklanka taʼakglhuwit akxni chatum xtatayana Jehová wa.

 Jesús lichuwinalh pi tiku kstalaninanin xʼamakgolh titaxtukgo taʼakglhuwit kxfamiliajkan (Mateo 10:32-36). Tiku lichuwinan tuku lanit makgasa wanikan Will Durant lichuwinalh pi akxni xmapakgsinama Roma «wa cristianismo limawakaka pi xlakxtlawamakgolh tamakgaxtokgat». a Chu la uku xtatayananin Jehová min kilhtamaku nachuna kinkalimawakakanan. Pero ¿wa xtatayananin Jehová tiku wilikgo taʼakglhuwit?

 Akxni kalimawakaka pi xtatayananin Jehová mapapitsikgo familias, Tribunal Europeo de Derechos Humanos wa pi xalak familia tiku ni xtatayananin Jehová wa tiku taʼakglhuwikgo xlakata «ni maxkikgo kakni chu tuku kanajla xfamiliajkan tiku kgalhi tanu takanajla». Tribunal wa: «Chuna titaxtukgo familias tuku ni lakxtum kgalhikgo xtakanajlakan; xtatayananin Jehová nachuna titaxtukgo». b Asta familias niku ni lamaxkikan talakaskin tanu tanu takanajla nakgalhikan, xtatayananin Jehová kliskujaw xlakata naktlawayaw uma tastakyaw: «Lapi wi mpala ti mpala tu xkatlawanin ntu ni tlan, ni chuna ntitamakgapuspitniyatit. [...] Wa mpala pi tlan, nakgalhinikgoyatit ntapaxuwan xlipaks nchixkuwin, chuna nkatlawatit» (Romanos 12:17, 18).

 Xtatayananin Jehová kgalhakgaxmataw uma xtastakyaw xalak Biblia nema wan pi kajwatiya natatamakgaxtokgaw tiku «kanajlaniy nkimPuchinakan», uma wamputun, pi kaj man wa natatamakgaxtokgaw tiku na watiya takanajla kgalhi (1 Corintios 7:39). Uma xlimapakgsin Dios kinkamakgtayayan. Akgtum liʼakxilhtit, akgtum artículo nema wanikan. Journal of Marriage and Family kkata 2010 xwan pi «tamakgaxtokgat tiku akxtum takanajla kgalhikgo chu tuku tlawakgo chu kanajlakgo» tlakg tlan la talalin. c

 Pero, tiku xtatayananin Jehová ni kawanikan pi kalamakgxtakgkgolh komo tiku tamakgaxtokga ni xtatayana Jehová. Anta kBiblia lichuwinan: «Mpi lapi chatum ntala, kalhiy xpuskat na ni kanajlay, wampi lakkgatsan ntlan ntawi kchiki, ni kamakalh xpuskat. Chu wa mpuskat nti nkgalhi xchixku, ni xakanajlani, wampi lakgkatsan ntlan ntawi kchiki, ni kamakgaxtakgli xchixku» (1 Corintios 7:12, 13). Akinin kkgalhakgaxmataw uma limapakgsin.