Xtatayananin Jehová maklakaskinkgonit lhuwa biblias xlakata tlan nalikgalhtawakgakgo. Maski chuna, xlakaskinka akxilhkgo Traducción del Nuevo Mundo de las Santas Escrituras, nema wi klhuwa tachuwin, xlakata maklakaskin xtukuwani Dios chu nachuna xatakgatsin chu liwana taʼakgatekgsa.

•   Maklakaskin xtukuwani Dios. Ni putum tiku tlawakgo Biblia malankikgo Tiku xtalakapastakni tuku wi kBiblia. Akgtum liʼakxilhtit, maktum Biblia limin xtukuwanikan liwaka tutupuxamakaw latamanin tiku makgtayanankgolh xlakata xtatlawalh, pero nipara makgtum lichuwinan Tiku makilhtsukilh: Jehová.

   Pero Traducción del Nuevo Mundo lhuwa mil limin xtukuwani Dios anta niku xliminkgo ktachuwin nema litsokgka Biblia chu ni limin xtukuwanikan tiku matitaxtikgo kʼatanu tachuwin.

•   Xatakgatsin. Wilakgolh Biblia nema ni wankgo putum tuku xwamputun akxni tsokgka Biblia. Akgtum liʼakxilhtit, maktum chuna matitaxti Mateo 7:13: «Katanutit kxatitsu malakcha, xlakata malakcha chu tiji nema linkgo kpupatin lu tilanka chu laklanka». Akxni tsokgka Biblia ni wan «pupatin», wata wan «lisputni». Tasiya pi tiku matitaxtikgolh Biblia xlakpuwankgo pi tiku lixkajni likatsikgo kamapatinikan putum kilhtamaku anta kpupatin. Pero Biblia ni tataya uma takanajla. Wa xlakata, Traducción del Nuevo Mundo limin tachuwin «lisputni», chuna la xwan ktachuwin nema litsokgka Biblia.

•   Liwana taʼakgatekgsa. Katsiyaw pi akxni wi tuku matitaxtikan kʼatanu tachuwin xatakgatsin xliwanat, pero na liwana xlitaʼakgatekgsat. Kawiliw akgtum liʼakxilhtit. Lhuwa Biblia chuna matitaxtikgo Mateo 5:3: «Bienaventurados tiku ni kgalhikgo espíritu». Pero la uku ni liwana akgatekgskgo tiku likgalhtawakgakgo. Wa xlakata, Traducción del Nuevo Mundo chuna matitaxti uma versículo: «Xatapaxuwan latamakgo tiku katsikgo pi lakaskinkgo tuku xla Dios».

 Ni kajwatiya malanki xtukuwani Dios, xatakgatsin chu liwana taʼakgatekgsa akxni matitaxti tamakatsin xalak Biblia, na wi atanu tuku litalakgapasa Traducción del Nuevo Mundo: ni taxokgo biblias nema tamakgpitsi. Wa xlakata lhuwa millón latamanin tlan nalikgalhtawakgakgo Biblia kxtachuwinkan maski ni kgalhikgo tumin nema nalitamawakgo.