¿Tiku Lakgkgolotsin tiku Pulalinkgo xTatayananin Jehová?
Lakgkgolotsin tiku Pulalinkgo xTatayananin Jehová, kaj ni lhuwa kstalaninanin Cristo tiku tliwakga xtakanajlakan kgalhikgo chu kapulalinkgo xtatayananin Jehová xlikalanka katiyatni. Pulaktiy xtaskujutkan:
Pulalinkgo la lakkaxtlawakan tuku lichuwinan likgalhtawakga nema takilhti kBiblia chu tuku tamatitaxti ktamakxtumit chu escuelas nema tlawakgo xtatayananin Jehová (Lucas 12:42).
Pulalinkgo taskujut nema tlawakgo xtatayananin Jehová kxlikalanka katiyatni. Uma kilhchanima pulalinkgo la talichuwinama Dios chu la tamaklakaskima tumin nema xatapaxuwan mastakan.
Lakgkgolotsin tiku Pulalinkgo xTatayananin Jehová stalanikgo xliʼakxilhtit apóstoles chu lakgkgolotsin xalak Jerusalén tiku xlamakgo kxapulana siglo. Xlakan laksakkgolh tuku lu xlakaskinka xpalakata putum congregación xla kstalaninanin Cristo (Hechos 15:2). Lakgkgolotsin tiku Pulalinkgo xTatayananin Jehová ni kimpuxkukan litaxtukgo, xtachuna lakchixkuwin tiku latamakgolh makgasa chu ni xmakgatsankgananikgo Dios. Xlakan putum kilhtamaku putsananikgo tuku wan Biblia xlakata nakapulalin chu katsikgo pi Jehová liyawanit Jesucristo xʼakgxakga congregación nalitaxtu (1 Corintios 11:3; Efesios 5:23).
¿Tiku katatapakgsikgo la uku Lakgkgolotsin tiku Pulalinkgo xTatayananin Jehová?
Tiku tapakgsikgo Lakgkgolotsin tiku Pulalinkgo xTatayananin Jehová wa Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane chu Jeffrey Winder. Putum wilakgo niku pulalinkan taskujut xla xtatayananin Jehová kWarwick (Nueva York).
¿La talakkaxtawilanit Lakgkgolotsin tiku Pulalinkgo xTatayananin Jehová?
Lakgkgolotsin tiku Pulalinkgo xTatayananin Jehová lakkaxwilikgonit akgchaxan comités nema pulalinkgo tanu tanu taskujut. Chatunu Lakgkgolotsin kataskuja akgtum o tlakg comités.
Comité de Coordinadores. Pulalin asuntos legales chu tlawa tuku talakaskin akxni wi tuku masputunan, wi tuku lakapala la nema katlawani tuku nitlan xtatayananin Jehová o akxni wi tuku tlawa pi nialhla nalichuwinankgo xtakanajlakan.
Comité de Personal. Pulalin putum tuku makgtanu xlakata familia Betel, uma wamputun, tiku skujkgo ksucursales xla xtatayananin Jehová.
Comité de Publicación. Pulalin putum taskujut xlakata la natlawakan chu nakamalakgachakan likgalhtawakga nema takilhti kBiblia, nachuna wa pulalin taskujut xlakata nakatlawakan pukgalhtawakga, oficinas de traducción chu sucursales.
Comité de Servicio. Pulalin la talichuwinan «xalakwan tamakatsinin xla Tamapakgsin» (Mateo 24:14, TNM).
Comité de Enseñanza. Pulalin taskujut xla tamasiy nema masiyakan ktamakxtumit, kʼescuelas nema tlawakgo xtatayananin Jehová chu tuku tamatitaxti kʼaudio chu video.
Comité de Redacción. Lakkaxwili tuku namin klikgalhtawakga nema takilhti kBiblia chu tuku nawilikan kkisitiojkan xla Internet chu na pulalin taskujut nema tlawakan ktraducción.
Lakgkgolotsin tiku Pulalinkgo xTatayananin Jehová ni kajwatiya uma taskujut tlawakgo kcomités niku makgtapakgsikgo, na tamakxtumikgo akgatunu semana xlakata naʼakxilhkgo tuku maklakaskin xkachikin Jehová. Kʼuma tamakxtumit, akxilhkgo tuku wan xTachuwin Dios chu mastakgo talakaskin pi nakapulalin xʼespíritu santos Dios. Putum kilhtamaku liskujkgo xlakata ni kaj chatum nalaksaka tuku natatlawa (Hechos 15:25).
Xmakgtayananin Lakgkgolotsin tiku Pulalinkgo xTatayananin Jehová
Akgatunu comité nema lakkaxwilikgonit Lakgkgolotsin tiku Pulalinkgo xTatayananin Jehová, na kgalhikgo xtamakgtay natalan tiku ni makgatsankgananikgo Dios, tiku tlan tlawakgo taskujut chu katsikgo tuku talakaskin xlakata namakgantaxtikgo taskujut nema pulalin comité niku tapakgsikgo (1 Corintios 4:2). Umakgolh makgtayananin ankgo akgatunu semana ktamakxtumit nema tlawakgo uma comité. Maski xlakan ni laksakkgo tuku natatlawa, wankgo tuku lakpuwankgo chu tuku tlan namakgtayanan xlakata tuku talichuwinama, tlawakgo tuku comité wan pi natatlawa chu na akxilhkgo tuku tlan kitaxtuma xlakata tuku laksakka natlawakan. Lakgkgolotsin tiku Pulalinkgo xTatayananin Jehová na tlan nakawanikgo kakalakgapaxialhnankgolh xtatayananin Jehová xalak alakatanu kachikinin o kamakgtlawakgolh programas nema lu xlakaskinka, la tamakxtumit nema tlawakan akgatunu kata o akxni sputa akgtum clase xla Escuela de Galaad.
Comité |
Tukuwani |
---|---|
Coordinadores |
|
Personal |
|
Publicación |
|
Servicio |
|
Enseñanza |
|
Redacción |
|