Lhuwa lakpuwankgo pi cruz kalilakgapaskan kstalaninanin Cristo. Pero maski xtatayananin Jehová kstalaninanin Cristo klitaxtuyaw, ni klimaklakaskinaw cruz chu na ni kkakninaniyaw. ¿Tuku xlakata?

 Pulana, Biblia ni wan pi Jesús nilh kʼakgtum cruz, wata kkgantum kiwi. Nachuna kamaxki uma limapakgsin kstalaninanin Cristo: «Katamakgatlinitit ntalakatakilhputan» ídolos. Chu kakninanikan cruz xtachuna kakninanikan ídolos (1 Corintios 10:14; 1 Juan 5:​21).

 Nachuna Jesús lichuwinalh tuku xʼamaka kalilakgapaskan kstalaninanin Cristo akxni wa: «Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat, [komo lakgalhiniyatit] ntapaxkit» (Juan 13:34, 35). Wa xlakata tuku talilakgapaskgo kstalaninanin Cristo ni wa cruz nipara atanu ídolo, wata akxni xlikana kapaxkikgo xtalatamankan.