Ol Yangpela—Yupela Bai Mekim Wanem Long Laip Bilong Yupela?

“MI LAIK i stap amamas tru.” Em tok bilong wanpela yangpela meri. Ating yu tu i laik stap olsem. Tasol olsem wanem yu inap i stap “amamas tru”? TV samting na ol wankrismas bilong yu, na ating ol tisa bilong yu tu, inap tok olsem yu bai stap amamas tru sapos yu kisim planti mani na gutpela wok mani—kisim biknem!

Tasol Baibel i mekim tok lukaut long ol yangpela olsem pasin bilong painim planti samting bilong skin i kain olsem pasin bilong “ran i go bilong holimpas win.” (Saveman 4:4) Olsem: Sampela yangpela i kisim planti mani na biknem. Tasol planti bilong ol dispela yangpela husat i kisim ol dispela samting ol i bel hevi tru. Wanpela yangpela bilong Briten i bin kisim wok mani i gat nem, em i tok: “Em kain olsem wanpela bokis nating. Taim yu lukluk i go insait, i no gat wanpela samting i stap.” Tru, sampela wok mani inap givim planti mani na biknem long man. Tasol em i no inap long inapim laik bilong yu long “kisim save long God.” (Matyu 5:3) Na tu, 1 Jon 2:17 i tok, “ol manmeri i stap longwe long God, ol bai pinis.” Maski yu kisim ol gutpela samting bilong dispela graun, em bai stap liklik taim tasol.

Olsem na Saveman 12:1 i tokim ol yangpela: “Taim yupela i yangpela yet, yupela i mas tingim [God].” Yes, nambawan gutpela samting yu ken mekim long laip bilong yu, em wok bilong God Jehova. Tasol pastaim yu mas winim mak na bai yu ken mekim wok bilong God. Olsem wanem yu ken mekim olsem? Na i gat wanem kain wok bilong God yu ken mekim long laip olgeta bilong yu?

Winim Mak Bilong Kamap Witnes Bilong Jehova

Pastaim yu mas kisim laik bilong mekim wok bilong God—na dispela laik i no kamap nating tasol, maski papamama bilong yu ol i Kristen. Yu yet i mas pas gut wantaim Jehova. Wanpela yangpela meri i tok: “Beten i helpim yu long pas gut wantaim Jehova.”—Song 62:8; Jems 4:8.

Rom 12:2 i kamapim narapela samting yu mas mekim. Em i tok: “Bai yupela i ken save tru long laik bilong God, em dispela laik em i gutpela, na em i orait, na i gutpela olgeta.” Olsem wanem?  Sampela taim yu gat tupela tingting long ol samting ol i bin lainim yu long en? Sapos olsem, orait bihainim dispela tok bilong Baibel na skelim gut ol samting na bai “yupela i ken save tru” olsem ol dispela tok ol i bin lainim yu long en em i trupela tok! Yu yet i mas mekim wok painimaut. Ritim Baibel na ol buk em Baibel i as bilong en. Tasol bilong kisim save long God, no ken skelim skelim long tingting tasol. Lusim haptaim na tingim tingim long bel ol samting yu ritim na bai tok i ken go insait tru long bel bilong yu. Dispela bai mekim na yu laikim God moa yet.—Song 1:2, 3.

Orait nau traim long tokim ol narapela, olsem ol wanskul, long ol samting yu kisim save long en. Bihain, autim tok long ol haus. Ating sampela taim bai yu bungim wanpela wanskul taim yu autim tok, na ating pastaim bai yu pret. Tasol Baibel i tokim yumi long no ken “sem long autim gutnius.” (Rom 1:16) Tok yu autim em tok bilong laip na bilong gutpela samting ol man inap wet long en! Olsem na i no gat as long sem long dispela.

Sapos papamama bilong yu ol i Kristen, ating yu bin go wantaim ol long autim tok. Tasol olsem wanem? Yu save sanap tasol long dua na yu no mekim wanpela tok o yu tilim tasol ol magasin na liklik nius, o yu inap mekim sampela samting moa? Yu yet inap mekim sampela tok, na mekim wok long Baibel bilong lainim man bilong haus? Sapos nogat, orait askim papamama o wanpela strongpela brata o sista long kongrigesen long helpim yu. Winim mak bilong kamap pablisa bilong gutnius i no baptais yet!

Bihain, bai yu gat laik long dediket—yu tok promis long God olsem kirap long dispela taim bai yu mekim wok bilong em. (Rom 12:1) Tru, dediket em i samting yu yet i mekim, tasol yu mas mekim sampela samting moa. God i laik bai olgeta i mas ‘tokaut long dispela bilip bilong ol long ai bilong ol manmeri, na God i kisim bek ol.’ (Rom 10:10) Long taim bilong baptais, pastaim yu tokaut long bilip bilong yu. Bihain yu kisim baptais long wara. (Matyu 28:19, 20) Tru, baptais em i wanpela bikpela samting. Tasol nogut yu surik long kisim baptais long wanem yu ting yu bai pundaun, nogat. Sapos yu askim God long strongim yu, em bai givim yu “strong i winim strong bilong yumi ol man,” bilong helpim yu long sanap strong.—2 Korin 4:7; 1 Pita 5:10.

Long taim bilong baptais, yu kamap wanpela Witnes Bilong Jehova. (Aisaia 43:10) Dispela i mas mekim bikpela samting long ol samting yu mekim long laip bilong yu. Taim yu dediket, yu mas  ‘givim baksait long ol laik bilong yu yet.’ (Matyu 16:24) Ating bai yu lusim sampela samting yu gat laik long kisim na bai yu ‘wok yet long painim Kingdom bilong God pastaim.’ (Matyu 6:33) Olsem na dediket na baptais i opim planti rot long yu ken mekim olsem. Yumi ken skelim sampela bilong ol.

Ol Rot Bilong Mekim Wok Bilong God Fultaim

● Wok painia em i wanpela rot. Painia em i wanpela Kristen i baptais pinis na i gat gutpela nem na em i bin stretim rot bilong lusim 70 aua o moa long olgeta mun bilong autim gutnius. Taim yu lusim bikpela haptaim moa bilong autim tok, dispela bai helpim yu long mekim gut moa wok bilong autim tok na lainim ol man. Planti painia i bin kisim amamas bilong helpim ol Baibel-stadi bilong ol long kamap wanpela Witnes i baptais pinis. I no gat wanpela wok mani inap mekim yu stap amamas na belgut olsem, a?

Bilong baim ol samting bilong skin, planti painia i save mekim wok mani haptaim. Planti i tingim dispela olsem na long skul ol i bin lain long mekim wanpela wok o papamama i lainim ol long mekim wanpela wok. Sapos yu na papamama bilong yu i ting i gutpela yu kisim sampela skul moa bihain long haiskul, yu no ken mekim olsem bilong kisim planti mani, yu mas mekim olsem bilong helpim yu long autim tok o mekim wok bilong God fultaim.

Tasol bikpela samting long laip bilong painia, i no wok mani bilong em, nogat; em wok bilong em long autim tok—helpim ol narapela long kisim laip! Gutpela sapos yu putim mak bilong mekim wok painia, a? Planti taim wok painia i opim rot long mekim ol narapela gutpela wok. Olsem: Sampela painia i save go sindaun long hap i sot long ol man bilong autim tok bilong Kingdom. Sampela ol i lain long narapela tok ples na wok long kongrigesen bilong  dispela tok ples o go long narapela kantri. Yes, wok painia i wanpela rot i givim bikpela amamas!

● Baibel Skul Bilong Ol Marit Kristen i narapela rot bilong mekim gutpela wok. Bilong skulim gut ol marit na bai Jehova na oganaisesen bilong em i ken yusim ol long mekim bikpela wok moa. Bihain long skul, planti bilong ol bai stap yet long kantri bilong ol na mekim wok we ol i nidim sampela helpim. Ating sampela bai kisim asainmen long go long narapela kantri sapos ol yet i redi long mekim olsem. Sampela sumatin i kisim wok olsem painia salim inap sampela mun bilong kirapim wok autim tok long sampela longwe ples.

● Baibel Skul Bilong Ol Singel Brata em i bilong skulim ol elda na kongrigesen sevan i singel na i winim mak. Dispela kos bilong 8-pela wik i skulim ol long wok ol elda na kongrigesen sevan i mas mekim, ol samting bilong oganaisesen, na pasin bilong mekim ol tok long ol miting samting. Ol i makim sampela long mekim wok long kantri bilong ol yet. Ol i makim sampela long wok long ol narapela kantri.

● Wok bilong Betel em wok volantia long wanpela brens-ofis bilong ol Witnes Bilong Jehova. Sampela bilong famili Betel ol i wokim ol buk na nius bilong Baibel. Na sampela i helpim wok bilong wokim ol buk samting, olsem lukautim ol haus na masin o lukautim famili Betel long ol samting bilong skin. Olgeta dispela wok em wok holi bilong Jehova. Na tu, ol man i wok long Betel ol i amamas long save olsem maski ol i mekim wanem wok, dispela i helpim planti brata long olgeta hap bilong graun.

 Sampela taim ol i singautim ol brata i kam wok long Betel, em ol brata i gat gutpela save long mekim wanpela wok. Tasol planti ol i kisim trening taim ol i kam long Betel. Ol man i wok long Betel ol i no wok bilong kisim planti samting bilong skin, nogat; ol i ting kaikai, haus, na liklik mani ol i kisim bilong baim ol samting, em inap long ol. Wanpela yangpela long Betel i stori long wok bilong em olsem: “Em i nambawan stret! I hatwok long bihainim sediul bilong mekim ol wok, tasol mi bin kisim planti blesing taim mi wok long hia.”

● Wok intenesenel i opim rot long man i ken insait long wok bilong wokim ol brens-ofis na Haus Kingdom. Ol i kolim ol olsem intenesenel sevan, na ol i go long ol narapela kantri bilong helpim wok bilong sanapim ol dispela kain haus. Dispela em i wok bilong God, wankain olsem wok bilong ol man i bin sanapim tempel bilong Solomon. (1 King 8:13-18) Ol i lukautim ol intenesenel sevan long ol samting bilong skin wankain olsem ol i save lukautim famili Betel. Ol dispela brata na sista inap mekim gutpela wok tru bilong litimapim nem bilong Jehova!

Givim Bel Long Mekim Wok Bilong Jehova

Wok bilong Jehova em i nambawan gutpela samting yu ken mekim long laip bilong yu. Gutpela sapos yu putim mak bilong mekim wok bilong God fultaim, a? Toktok long fultaim sevis wantaim papamama, ol elda, na wasman sekit. Sapos yu gat laik long go long Betel, o Baibel Skul Bilong Ol Singel Brata, o Baibel Skul Bilong Ol Marit Kristen, orait go long ol miting i kamap long taim bilong ol kibung sekit na distrik, bilong ol man i gat laik long mekim ol dispela wok.

Tru, i no olgeta man inap mekim fultaim sevis o inapim mak bilong en. Sampela taim hevi bilong helt, mani, na ol wok bilong famili i mekim na man i no inap mekim bikpela wok tumas. Tasol olgeta Kristen i dediket pinis i mas bihainim dispela tok bilong Baibel: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.” (Matyu 22:37) Jehova i laik bai yu wok strong inap tru long skel bilong yu. Olsem na maski sindaun bilong yu i wanem kain, putim wok bilong Jehova i stap nambawan samting long laip bilong yu. Putim ol mak bilong mekim wok bilong God i stret long yu. Yes, ‘taim yu yangpela yet, yu mas tingim God’—na sapos yu mekim olsem bai yu kisim ol blesing inap oltaim oltaim!

Ol tok bilong Skripsa Hibru mipela kisim long Buk Baibel em Baibel Sosaiti bilong Papua Niugini i wokim; tasol taim mipela kisim long New World Translation mipela putim NW. Na ol tok bilong Skripsa Grik mipela kisim long Nupela Taim Baibel; tasol taim mipela kisim long Buk Baibel, mipela putim BB.