Toktok gut wantaim i makim olsem yu na pikinini i kamapim tingting na filings bilong yupela long narapela narapela.

Pasin bilong toktok wantaim ol tineja inap kamap hatwok moa. Buk Breaking the Code i tok: “I olsem pikinini i mekim pilai long stes na yu stap baksait na yu no save long samting em i mekim. Nau yu tingting, em bai gutpela sapos mi sindaun long wanpela sia long odiens, na ating sia i no gutpela tumas.” Maski pikinini i no laik toktok long yu, dispela em taim pikinini i nidim yu long toktok wantaim em!

Mekim senis long taim i stret long pikinini. Yu mas toktok wantaim pikinini maski em biknait.

“Ating yu bai tingting long tok olsem, ‘Yu laik toktok? Mi stap wantaim yu de olgeta!’ Yumi no ken komplein sapos ol pikinini i laik kamapim tingting bilong ol. Ating em samting olgeta papamama i laik bai pikinini i mekim, a?”—Lisa.

“Mi laik tru long slip, tasol mi save toktok gut wantaim ol tineja pikinini bilong mi bihain long biknait.”—Herbert.

STIATOK BILONG BAIBEL: “Olgeta wan wan i mas wok long tingim ol samting bilong helpim narapela, na ol i no ken tingting long ol samting bilong helpim ol yet, nogat.”—1 Korin 10:24.

Tingting i no ken wokabaut. Wanpela papa i tok: “Sampela taim mi tingting long ol narapela samting taim ol pikinini i toktok long mi. Na mi no inap giamanim ol—ol inap luksave!”

Sapos TV o mobail samting i pulim tingting bilong yu, orait yu mas ofim. Putim gut yau long tok pikinini i mekim, na soim olsem yu pilim tru tingting bilong em, maski yu ting em i no bikpela samting.

“Yumi mas tokim ol pikinini olsem tingting bilong ol i bikpela samting long yumi. Sapos ol i ting yumi no pilim tingting bilong ol, ol bai i no inap tokaut o ol bai go long ol narapela bilong kisim helpim.”—Maranda.

“No ken kirap nogut, maski tingting bilong em i no stret.”—Anthony.

STIATOK BILONG BAIBEL: “Skelim gut pasin bilong yupela long harim tok.”—Luk 8:18.

Toktok long kain kain taim. Sampela taim ol pikinini bai kamapim tingting bilong ol taim ol i no sindaun na lukluk long pes bilong papa o mama.

“Mipela i yusim gut haptaim mipela i ron long kar. Mipela i sindaun arere long narapela, na mipela i toktok gut wantaim.”—Nicole.

Taim bilong kaikai i opim rot long toktok wantaim ol pikinini.

“Long taim bilong kaikai long apinun, mipela wan wan i save stori long samting nogut na gutpela samting i kamap long dispela de. Dispela pasin i helpim mipela long pas gut na mipela i save olsem wanpela bai helpim mipela long taim bilong hevi.”—Robin.

STIATOK BILONG BAIBEL: “Putim yau kwik long harim tok, na ol i no ken hariap long mekim toktok.”—Jems 1:19.