YANGPELA
10: Trastim
MAKIM WANEM SAMTING
Ol papamama, pren, na bosman i save bilip long man ol inap trastim. Ol dispela man i save bihainim ol lo, inapim promis, na oltaim ol i tok tru.
WAI NA EM I BIKPELA SAMTING
Long klostu olgeta samting, fridom yu kisim i soim olsem ol narapela i trastim yu, na dispela i kamap inap longpela taim pinis.
“Namba 1 rot papamama inap trastim yu em long kamapim olsem yu gat tingting bilong man i bikpela pinis na yu inap mekim gut wok, i no long taim ol i stap wantaim yu tasol, nogat, long taim ol i no stap tu.”—Sarahi.
STIATOK BILONG BAIBEL: “Oltaim yupela i mas skelim yupela yet.”—2 Korin 13:5.
SAMTING YU KEN MEKIM
Sapos yu laik bai planti man i trastim yu o yu laik bai ol man i trastim yu gen, ol dispela samting bai helpim yu.
Mekim tok tru. Kwiktaim ol man bai i no trastim yu sapos yu tok giaman. Sapos yu tok tru na tokaut long popaia—moa yet bilong yu—ol narapela inap trastim yu.
“Em isi long tok tru taim ol samting i kamap gut. Tasol pasin bilong tok tru long ol samting we inap mekim na ol man i ting yu man nogut bai helpim ol narapela long trastim yu.”—Caiman.
STIATOK BILONG BAIBEL: “Long olgeta samting mipela i mekim, mipela i laik wokabaut stret.”—Hibru 13:18.
Mekim gut wok. Long wanpela wok painimaut long Amerika, 78 pesen bilong lain husat i save kisim ol man long wok i tok, pasin bilong mekim gut wok em “wanpela bilong ol 3-pela samting man i mas i gat long kisim bikpela wok.” Skul long mekim gut wok long nau, na dispela bai helpim yu long taim yu kamap bikpela man.
“Papamama bilong mi i luksave olsem mi inap mekim gut wok na i no olsem oltaim ol i mas tokim mi. Planti taim mi mekim olsem, na ol i trastim mi moa.”—Sarah.
STIATOK BILONG BAIBEL: “Mi bilip olsem yu bai bihainim tok bilong mi. . . . Mi save olsem yu bai mekim ol samting i winim ol samting mi tokim yu long mekim.”—Filemon 21.
No ken les kwik. Sampela haptaim i mas lus pastaim na ol narapela bai luksave olsem yu gat pasin bilong wokim tingting na mekim ol samting olsem man i bikpela pinis.
“Longpela taim i mas lus na yu mas mekim planti samting na bai papamama bilong yu na ol narapela i ken trastim yu. Tasol isi isi ol narapela inap trastim yu sapos planti taim yu mekim gut wok.”—Brandon.
STIATOK BILONG BAIBEL: “Yupela i mas kisim . . . pasin bilong i no les kwik.”—Kolosi 3:12.
