1. Lain bilong God i bin mekim wanem kibung em nau yumi bai kisim sampela save moa long en? Yumi mas tingim wanem ol askim?

 “YUPELA sanap na litimapim nem bilong God, Bikpela bilong yumi. Oltaim oltaim yumi mas litimapim nem bilong en.” Ol Livai i singautim ol manmeri bilong God long bung wantaim na beten long Jehova. Dispela beten i wanpela bilong ol beten long Baibel we i longpela tru. (Neh. 9:4, 5) Dispela kibung i bin kamap long Jerusalem long yia 455 B.C.E., long namba 24 de bilong mun Tisri, em namba 7 mun long kalenda bilong ol Juda. Taim yumi kisim sampela save moa long dispela kibung, tingim ol dispela askim: Oltaim ol Livai i save mekim wanem na dispela i bin helpim tru dispela kibung? Yumi inap kisim wanem skul long beten em ol Livai i bin redim gut? Orait nau yumi ken stori long sampela samting i bin kamap paslain long dispela kibung.—Sng. 141:2.

2. Olsem wanem lain Israel i soim gutpela pasin yumi ken bihainim long nau?

² Inap 1-pela mun paslain long dispela spesel kibung, ol Juda i bin pinisim wok bilong sanapim gen banis bilong Jerusalem. (Neh. 6:15) Ol i pinisim dispela wok insait long 52 de tasol. Orait mun bihain em mun Tisri, na long namba 1 de bilong dispela mun, olgeta manmeri i kam long ples bung long harim Esra na ol narapela Livai i ritim Lo Bilong God na stori gut long en. Ol famili olgeta, na ol pikinini tu, olgeta i sanap na harim ol tok kirap long moningtaim i go inap long belo. Dispela lain i soim gutpela pasin tru em yumi ken bihainim long nau. Maski yumi gat ol gutpela Haus Kingdom we yumi save go miting long en, sampela taim yumi inap tingting long ol narapela samting long taim bilong miting. Tasol lain Israel i bin putim gut yau, na ol i tingting gut long ol samting ol i harim, na ol i krai tu taim ol i luksave olsem ol i no bin bihainim Lo Bilong God.—Neh. 8:1-9.

3. Lain Israel i bihainim wanem tok?

 ³ Tasol dispela em i no taim bilong autim ol sin, nogat. Em taim bilong amamas, na Jehova i laik bai lain bilong em i stap amamas. (Nam. 29:1) Olsem na Nehemia i tokim ol manmeri olsem: “Yupela go long haus bilong yupela na mekim bikpela kaikai. Na yupela givim sampela kaikai na wain long ol manmeri i sot long kaikai. Nau em i de bilong Bikpela yet, olsem na yupela i no ken bel hevi. Nogat. Yupela i mas amamas long Bikpela na bai em i strongim yupela.” Ol manmeri i bihainim tok, na ol i kisim bikpela “amamas” long dispela taim.—Neh. 8:10-12.

4. Ol het bilong ol famili bilong lain Israel i bin mekim wanem? Long olgeta wan wan de bilong Ol Bikpela De Bilong i Stap Long Haus Win, ol Livai i mekim wanem?

⁴ Long neks de, olgeta het bilong famili i bung wantaim long stadi long Lo na bai ol i ken save olsem ol i bihainim olgeta tok long Lo Bilong God, o nogat. Taim ol i stadi long Lo, ol i luksave olsem ol i gat wok long tingim Ol Bikpela De Bilong i Stap Long Haus Win, kirap long namba 15 de i go inap long namba 22 de bilong dispela mun. Olsem na ol manmeri i kirap kwik long redim ol samting bilong dispela bung. Dispela bung bilong tingim Ol Bikpela De Bilong i Stap Long Haus Win i kamap gut, na “bel bilong olgeta manmeri i gutpela na ol i amamas tru.” Bung i kamap long dispela taim i winim tru ol wankain bung ol i bin mekim kirap long taim bilong Josua na i kam. Long olgeta wan wan de bilong bung, ol Livai i ritim Lo Bilong God long olgeta manmeri.—Neh. 8:13-18.

5. Lain bilong God i bin mekim wanem paslain long ol Livai i mekim beten bilong ol?

⁵ Tupela de bihain long dispela bung, long namba 24 de bilong mun Tisri, em taim stret bilong ol manmeri long autim sin bilong ol. Dispela em i no taim bilong kaikai na amamas, nogat. Lain bilong God i tambu long kaikai na ol i pasim klos bilong sore bilong soim olsem ol i sori tru olsem ol i no bin bihainim Lo Bilong God. Orait, ol Livai i ritim gen Lo Bilong God long ol manmeri inap olsem 3-pela aua long moningtaim. Long apinun, ol manmeri i “autim ol sin bilong ol na ol i lotu long God.” Long dispela taim, ol Livai i beten askim God long helpim olgeta manmeri. —Neh. 9:1-4.

6. Wanem samting i bin helpim ol Livai long mekim gutpela beten? Yumi inap kisim wanem skul long ol Livai?

⁶ Ol Livai i save ritim Lo Bilong God long olgeta taim, na dispela i helpim ol long redim gut beten. Long namba 1 hap bilong beten, ol Livai i kolim ol wok na ol pasin bilong Jehova. Long namba 2 hap bilong beten, ol Livai i kolim planti sin ol manmeri i bin mekim na ol i tokaut klia long as na lain Israel i no gutpela inap long God i ken “marimari” long ol. (Neh. 9:19, 27, 28, 31) Yumi inap kisim wanem skul long ol Livai? Yumi mas ritim Tok Bilong God long olgeta de na tingim tingim long bel ol tok bilong en. Long dispela rot, i olsem yumi larim Jehova i toktok long yumi. Na taim yumi beten, bai yumi gat planti samting bilong tokim Jehova long en, na beten bilong yumi bai gutpela moa.—Sng. 1:1, 2.

7. Ol Livai i askim God long wanem samting? Yumi kisim wanem skul long pasin ol i mekim?

 ⁷ Long beten bilong ol Livai, ol i bin askim long wanpela samting tasol. Klostu long pinis bilong beten, ol i tok: “God bilong mipela, yu gat biknem na bikpela strong. Mipela olgeta i mas i stap aninit long yu. Olgeta taim yu save bihainim tok bilong kontrak bilong yu na yu save marimari long mipela. Nau mipela i karim bikpela hevi, olsem na mipela i laik bai yu tingim mipela na helpim mipela. Bipo ol king bilong Asiria i bin mekim nogut long ol king na ol hetman na ol pris na ol profet bilong mipela, na long olgeta tumbuna bilong mipela. Na dispela hevi i stap long mipela i kam inap nau.” (Neh. 9:32) Ol Livai i soim gutpela pasin yumi ken bihainim long nau. Taim yumi beten, pastaim yumi mas litimapim nem bilong Jehova na tok tenkyu long em, na bihain yumi ken askim em long ol narapela samting.

8, 9. (a) Taim ol Livai i kirapim beten, olsem wanem ol i soim pasin daun? (b) Ol Livai i kolim wanem 2-pela lain ami bilong heven?

⁸ Ol Livai i gat pasin daun. Maski ol i mekim naispela beten, ol i pilim olsem ol tok ol i mekim i no kamapim gut olgeta glori na ona em ol i ting i stret long givim long Jehova. Olsem na ol i beten askim Jehova long helpim olgeta manmeri bilong lain Israel, na long pasin daun ol i tok: “Bikpela, mipela i laik litimapim biknem bilong yu. Tasol dispela amamas bilong mipela i samting nating. Nem bilong yu i bikpela tru, olsem na mipela i save, amamas bilong mipela i no inap long ai bilong yu.”—Neh. 9:5.

⁹ Ol i beten moa olsem: “Yu wanpela tasol yu Bikpela. Yu bin wokim heven na ol sta [“lain ami bilong heven,” NW] na graun na solwara na olgeta samting i stap long ol. Na yu save givim laip long olgeta samting. Na olgeta ensel [“lain ami bilong heven,” NW] long heven i save brukim skru na lotu long yu.” (Neh. 9:6) Long dispela hap bilong beten, ol Livai i kolim sampela gutpela samting Jehova i bin wokim. Em i wokim ples antap na “lain ami” bilong en, em ol lain sta. Na tu, em i wokim olgeta samting long graun bilong yumi, na em i stretim rot na bai olgeta samting i gat laip i ken kamapim ol senis bilong ol. Long beten, ol Livai i kolim tu narapela lain ami. Ol i kolim ol ensel bilong God olsem “lain ami bilong heven.” (Rev. 19:14; Jop 38:4, 7) Long pasin daun, ol dispela ensel i save mekim laik bilong God taim ol i mekim wok bilong helpim ol man. (Hib. 1:14) Long nau, yumi tu i stap olsem wanpela lain ami i kisim gut trening na wok bung wantaim long mekim wok bilong Jehova. Yumi mas bihainim pasin bilong ol ensel na mekim wok bilong God long pasin daun.—1 Kor. 14:33, 40.

10. Yumi inap kisim wanem skul long samting God i bin mekim bilong helpim Abraham?

¹⁰ Bihain, ol Livai i kolim ol samting God i bin mekim long Abram. Jehova i bin senisim nem bilong Abram na kolim em Abraham. Mining bilong dispela nem em olsem, “tumbuna bilong planti lain manmeri,” tasol Abraham i gat 99 krismas na em i no gat pikinini. (Stt. 17:1-6, 15, 16) God i tokim tu Abraham olsem lain tumbuna pikinini bilong em bai kisim graun bilong Kenan. Ol Livai i stori long ol samting Jehova i mekim bilong  inapim tok promis bilong em, na ol i tok: “God, Bikpela, yu tasol yu bin makim Abram na kisim em long taun Ur long Babilon, na bringim em i kam. Na yu senisim nem bilong em na givim nem Abraham long en. Yu lukim bel na tingting bilong en i strong long bihainim yu tasol, olsem na yu mekim kontrak wantaim em. Na yu promis long givim em graun bilong ol Kenan . . . na yu tok, dispela graun bai i kamap graun bilong ol lain tumbuna bilong en. Na yu no bin brukim dispela promis bilong yu, long wanem, pasin bilong yu i stretpela olgeta.” (Neh. 9:7, 8) Ol manmeri i save lusim tingting long promis bilong ol. Tasol yumi inap bihainim pasin bilong Jehova sapos oltaim yumi traim long inapim ol tok promis bilong yumi.—Mat. 5:37.

11, 12. Wanem mining bilong nem bilong Jehova? Olsem wanem Jehova i helpim lain bilong em na dispela i soim olsem i stret tru long em i holim nem Jehova?

¹¹ Mining bilong dispela nem Jehova em olsem, “Em i Mekim i Kamap.” Dispela i makim olsem God i wok yet long mekim ol samting bilong inapim ol tok promis bilong em. Olsem: Em i bin mekim ol samting bilong inapim promis bilong em long lain tumbuna bilong Abraham, em lain Israel. Taim ol i stap olsem ol sleiv long Isip, God i tok promis olsem ol bai kamap fri na lusim kalabus na i go sindaun long Graun Bilong Promis. Long dispela taim bipo, i luk olsem dispela samting i no inap kamap. Tasol God i mekim yet ol samting em i mas mekim i go inap long taim tok promis bilong em i kamap tru. Long dispela rot, em i kamapim klia olsem i stret tru long em i holim dispela nambawan nem, Jehova.

¹² Long beten bilong ol Livai, ol i kolim sampela samting Jehova i bin mekim bilong helpim lain bilong em. Ol i tok: “Taim ol tumbuna bilong mipela i bin i stap long Isip, yu lukim ol Isip i givim bikpela hevi long ol. Na bihain long ol i lusim Isip na i go kamap long solwara Retsi, yu harim ol i krai long yu long helpim ol. Yu bin wokim ol narakain mirakel bilong daunim king bilong Isip wantaim ol ofisa na olgeta manmeri bilong Isip. Yu mekim olsem, long wanem, yu bin lukim ol Isip i mekim nogut long ol manmeri bilong yu. Long dispela taim yu soim strong bilong yu long olgeta man. Na ol i bin givim biknem long yu i kam inap nau. Yu bin tok na solwara i bruk tuhap na graun i drai, na ol manmeri i wokabaut i go kamap long hapsait. Na ami bilong Isip i ranim ol manmeri bilong yu, tasol yu mekim solwara i karamapim ol Isip, na ol i go daun long wara olsem ston.” Ol Livai i kolim sampela tok moa long beten na ol i tok Jehova i bin helpim lain bilong em long kisim Graun Bilong Promis. Ol i tok: “Yu yet i daunim ol Kenan na larim ol tumbuna i kisim graun bilong ol.” Ol Livai i tok moa olsem lain bilong God “i bin pait na kisim ol taun i gat strongpela banis na kisim graun i gat planti gris na ol haus i gat planti samting i pulap long ol. Na ol i kisim ol liklik raunwara ol man i bin wokim na ol gaden wain na ol diwai oliv na planti kain diwai i gat gutpela kaikai. Na taim ol i sindaun pinis long dispela kantri, ol i kaikai planti gutpela kaikai na i kamap patpela na ol i amamas tru long olgeta gutpela samting yu bin givim ol.”—Neh. 9:9-11, 24, 25.

13. Bihain liklik long lain Israel i lusim Isip, Jehova i bin mekim wanem bilong helpim ol? Bihain lain Israel i mekim wanem?

¹³ Jehova i bin mekim planti narapela samting bilong truim ol tok promis bilong em. Olsem: Bihain liklik long lain Israel i lusim Isip, Jehova i givim ol lo na i skulim ol long olsem wanem ol inap lotuim em. Ol Livai i beten na tok: “Taim ol i kamap long maunten Sainai yu stap long heven na toktok long ol. Na yu kam daun na yu stap antap long dispela maunten. Na yu bin givim planti gutpela stretpela lo long ol.” (Neh. 9:13) Jehova i makim lain Israel long kamap ol manmeri bilong em na em i laik givim Graun Bilong Promis long ol. Olsem na em i skulim ol long bihainim pasin we bai litimapim nem bilong em. Ol i bihainim tok bilong Jehova inap sotpela taim tasol, na bihain ol i sakim tok bilong em.—Ritim Nehemia 9:16-18.

14, 15. (a) Olsem wanem Jehova i soim olsem em i marimari long lain Israel? (b) Yumi kisim wanem skul long pasin Jehova i mekim long lain Israel?

¹⁴ Long beten bilong ol Livai, ol i kolim 2-pela  rong em lain Israel i bin mekim bihain tasol long ol i tok promis long bihainim Lo Bilong God long maunten Sainai. Lain Israel i mekim ol dispela sin, olsem na i stret long ol i mas i dai long ples drai nating. Tasol Jehova i marimari long ol na lukautim ol long ol samting ol i nidim. Long beten, ol Livai i litimapim nem bilong Jehova na tok: “Ol i bin wokabaut inap 40 yia long ples drai, na long olgeta dispela yia yu bin lukautim ol gut long kaikai samting. Na klos samting bilong ol i no bin bruk na lek bilong ol i no bin pen o solap.” (Neh. 9:19, 21) Long nau, Jehova i save lukautim yumi long ol samting yumi nidim na bai yumi inap stap gut long em na mekim wok bilong em. Yumi no ken lusim bilip bilong yumi long Jehova na sakim tok bilong em wankain olsem planti tausen Israel husat i dai long ples drai nating. Pasin nogut bilong ol i stap olsem tok lukaut long yumi.—1 Kor. 10:1-11.

¹⁵ Sori tru, lain Israel husat i kisim Graun Bilong Promis, ol i no stap gut long Jehova. Ol i kirap lotuim ol god bilong Kenan, na ol i insait long pasin pamuk na ofaim pikinini bilong ol long ol god giaman. Olsem na Jehova i larim ol narapela kantri long mekim hatpela pasin long lain Israel. Tasol taim lain Israel i tanim bel, Jehova i fogivim ol na em i helpim ol long daunim ol birua bilong ol. Dispela pasin i bin kamap planti taim. (Ritim Nehemia 9:26-28, 31.) Ol Livai i autim sin na tok: “Planti yia yu bin isi long ol na yu tok long ol i mas tanim bel. Spirit bilong yu i bin givim dispela tok long ol profet, tasol ol tumbuna i no laik harim tok. Olsem na yu givim ol long han bilong ol man bilong ol arapela kantri.”—Neh. 9:30.

16, 17. (a) Wanem samting i kamap taim lain Israel i kirap gen long sakim tok bilong Jehova? (b) Lain Israel i bin mekim wanem ol sin na ol i autim? Ol i tok promis long mekim wanem?

¹⁶ Bihain long lain Israel i lusim Babilon na kam bek, ol i kirap gen long sakim tok bilong Jehova. Orait, wanem samting i kamap? Ol Livai i beten na tok: “Nau mipela i stap gen long dispela gutpela graun yu bin givim long ol tumbuna. Em i gat gutpela gris na mipela i save kisim planti kaikai long en. Tasol mipela i stap yet olsem wokboi nating bilong ol arapela lain. Mipela i mekim sin pinis, olsem na yu bin larim ol king bilong ol arapela kantri i bosim mipela. Na ol i save kisim olgeta samting i save kamap long graun bilong mipela. . . . Olsem na mipela i gat bikpela hevi tru.” Lain Israel i kamap sleiv long graun em Jehova i bin givim long ol.—Neh. 9:36, 37.

¹⁷ Yu ting ol Livai i tok olsem God i no mekim stretpela pasin long lain bilong em? Nogat tru! Ol i autim sin na tok: “Mipela i bin mekim sin na yu bin mekim save long mipela. Na dispela pasin bilong yu i stret. Oltaim yu save bihainim promis bilong yu na yu helpim mipela, tasol mipela i save bikhet na mekim kain kain pasin nogut.” (Neh. 9:33) Ol i pinisim beten bilong ol wantaim strongpela promis olsem lain Israel bai bihainim Lo Bilong God. (Ritim Nehemia 9:38; 10:29) Ol i raitim promis bilong ol na 84 lida bilong Juda i sainim dispela tok promis.—Neh. 10:1-27.

18, 19. (a) Sapos yumi laik stap long nupela taim God bai kamapim, orait yumi mas mekim wanem? (b) Oltaim yumi mas beten long wanem samting? Bilong wanem?

¹⁸ Sapos yumi laik kisim ol pasin em Jehova i laik bai yumi bihainim long nupela taim, orait yumi mas larim em i stretim yumi. Aposel Pol i askim olsem: “Wanem pikinini i stap na papa bilong en i no save stretim em?” (Hib. 12:7) Sapos yumi larim Jehova i stretim yumi na yumi stap gut yet long wok bilong em, yumi soim olsem yumi larim em long trenim yumi. Na sapos yumi mekim bikpela sin, yumi ken save olsem Jehova bai fogivim yumi sapos yumi tanim bel tru na long pasin daun yumi larim em i stretim yumi.

¹⁹ Klostu nau, Jehova bai mekim ol samting i gutpela moa winim ol samting em i bin mekim taim em i kisim bek lain Israel long Isip. Long dispela taim, olgeta manmeri bai save olsem em i nambawan bikpela God. (Ese. 38:23) God bai mekim holi nem bilong em long dispela taim, na olgeta manmeri husat i stap gut long em, ol bai go insait long nupela taim, wankain olsem lain Israel i bin go insait long Graun Bilong Promis. (2 Pita 3:13) Olsem na yumi mas wok yet long beten long nem bilong God i mas i stap holi. Long neks stadi, yumi bai stori long narapela beten we inap helpim yumi long mekim ol samting na bai God i blesim yumi long nau na long olgeta taim bihain.