1. Wanem kain pasin laikim em i nambawan tru? Bilong wanem? (Lukim piksa long kirap bilong stadi.)

PASIN LAIKIM em ol stiatok bilong Baibel i as bilong en (a·gaʹpe) em presen i kam long Jehova. Dispela pasin laikim i nambawan tru, long wanem, God yet i As bilong dispela pasin. (1 Jon 4:7) Man i gat dispela pasin laikim bai tingim ol narapela na mekim gut long ol. Wanpela wok painimaut i tok pasin a·gaʹpe “bai kamap klia long pasin man i mekim.” Taim yumi tingim ol narapela na putim laik bilong ol i go pas long laik bilong yumi yet, yumi bai amamas na pilim olsem laip bilong yumi i gat as bilong en.

2, 3. Olsem wanem Jehova i kamapim klia pasin laikim bilong em long yumi?

² Jehova i soim pasin laikim long ol manmeri paslain long em i wokim Adam na Iv. Em i wokim graun bambai ol manmeri inap i stap amamas na stap oltaim long en. Na tu, God i kamapim klia pasin laikim long yumi taim em i wokim graun i kamap ples paradais.

³ Taim Adam na Iv i bikhet, Jehova i mekim wanpela bikpela  samting bilong kamapim klia pasin laikim bilong em. God i stretim rot bilong givim ofa bilong baim bek ol tumbuna pikinini bilong Adam na Iv. Em i save olsem sampela bilong ol bai amamas long samting Em i mekim. (Stt. 3:15; 1 Jon 4:10) Taim Jehova i tok promis long salim Man Bilong Kisim Bek yumi, long tingting bilong Em i olsem dispela samting i kamap pinis. Inap 4 tausen yia bihain, Jehova i salim Pikinini tru bilong em i kam long graun bilong baim bek ol manmeri. (Jon 3:16) Yumi pilim tru pasin laikim Jehova i kamapim!

4. Wanem sampela eksampel i kamapim klia olsem yumi ol sinman inap kamapim pasin laikim?

⁴ Yumi inap kamapim pasin laikim bikos God i wokim yumi olsem em yet. Tasol sin i mekim na i hatwok long yumi soim dispela pasin. Maski i olsem, yumi inap kamapim pasin laikim. Abel i soim olsem em i laikim God taim em i givim nambawan pikinini sipsip olsem ofa long God. (Stt. 4:3, 4) Noa tu i kamapim pasin laikim taim em i autim tok bilong God inap planti yia maski ol man i no putim yau. (2 Pita 2:5) Abraham i putim pasin bilong laikim God i stap namba 1, olsem na em i bihainim tok bilong God na em i redi long givim Aisak olsem ofa. (Jems 2:21) Yumi inap bihainim pasin bilong ol dispela bilipman na kamapim pasin laikim maski yumi karim ol hevi.

5. Yumi inap mekim wanem bilong kamapim pasin laikim tru?

⁵ Baibel i tok: “Yumi no ken kamapim pasin laikim long tok o long maus tasol, nogat, yumi mas kamapim tu long ol samting yumi mekim na long pasin i tru.” (1 Jon 3:18) Yu ting dispela i makim olsem yumi no inap kamapim pasin laikim long tok yumi mekim? Nogat tru! (1 Tes. 4:18) Taim ol narapela i nidim helpim, yumi no laik tok tasol olsem yumi tingim ol, nogat, pasin laikim i mas kirapim yumi long mekim sampela samting bilong helpim ol. Olsem, taim wanpela Kristen i sot long kaikai na klos samting, orait yumi mas helpim em. (Jems 2:15, 16) Sapos yumi laikim Jehova na ol narapela, yumi bai beten askim God long salim ol wokman i go autim tok, na tu, yumi bai givim bel tru long mekim wok autim tok.—Mat. 9:38.

6, 7. (a) Pasin laikim tru i makim wanem samting? (b) Wanem sampela eksampel bilong ol man husat i giaman long mekim pasin laikim?

⁶ Aposel Jon i tok yumi mas kamapim pasin laikim “long ol samting yumi mekim na long pasin i tru.” Dispela i makim olsem pasin laikim bilong yumi i “no ken i gat pasin giaman long en.” (Rom 12:9; 2 Kor. 6:6) Ating yumi gat kain tingting olsem, ‘Man inap giaman long kamapim pasin laikim?’ Nogat. I no stret long yumi giaman long kamapim pasin laikim.

⁷ Tingim stori bilong sampela lain husat i giaman long kamapim pasin laikim. Satan i giamanim Iv long gaden Iden olsem em i laik helpim em, tasol Satan i laik helpim em yet. (Stt. 3:4, 5) Long taim bilong Devit, Ahitofel i giaman long i stap pren bilong king. Em i givim baksait long king taim em i luksave olsem rot i op long em inap kisim ol gutpela samting bilong helpim em yet. (2 Sml. 15:31) Dispela i wankain long nau, ol apostet na ol narapela i laik brukim lain insait long kongrigesen. Ol i save “mekim ol switpela tok na tok gris” bambai ol manmeri i ting olsem ol i soim pasin laikim, tasol ol i laik helpim ol yet.—Rom 16:17, 18.

8. Yumi ken givim wanem askim long yumi yet?

⁸ Pasin laikim em nambawan pasin bilong God, olsem na yumi no ken giaman long soim pasin laikim. Maski yumi giamanim ol narapela man, yumi no inap giamanim Jehova. Jisas i tok olsem ol man husat i giaman long mekim pasin laikim, ol bai kisim  “bikpela strafe.” (Mat. 24:51) Ol wokman bilong Jehova i no ken giaman long mekim pasin laikim. Yumi ken askim yumi yet olsem, ‘Mi save kamapim pasin laikim i no gat pasin giaman long en?’ Yumi bai stori long 9-pela rot bilong soim pasin laikim we i no gat “pasin giaman long en.”

9. Pasin laikim tru bai kirapim yumi long mekim wanem?

⁹ Amamas long kamapim pasin laikim maski ol narapela i no lukim. Yumi mas soim pasin laikim long ol bratasista long “ples hait,” dispela i makim olsem yumi mekim pasin laikim maski ol narapela i no lukim. (Ritim Matyu 6:1-4.) Tingim stori bilong Ananaias na Safaira. Ol i salim wanpela hap graun na kisim mani, tasol long pasin hait ol i holim bek sampela mani. Ol i givim hap mani i go olsem kontribiusen bambai ol narapela i ken lukim. Ananaias na Safaira i mekim pasin giaman, olsem na tupela i kisim strafe. (Apo. 5:1-10) Sapos yumi gat pasin laikim tru, yumi bai amamas long helpim ol bratasista na yumi no tingting long kisim biknem. Kain olsem, ol brata husat i helpim Gavening Bodi long redim kaikai bilong strongim bilip bilong yumi, ol i no tokim ol narapela long wanem wok ol i mekim.

10. Olsem wanem yumi inap givim ona long ol narapela?

¹⁰ Go pas long givim ona long ol narapela. (Ritim Rom 12:10.) Jisas i stap gutpela eksampel yumi ken bihainim bikos em i givim ona long ol narapela na mekim ol wok em ol man nating i save mekim. (Jon 13:3-5, 12-15) Yumi mas wok strong long kisim pasin daun bambai yumi inap givim ona long ol narapela. Ol aposel i no kliagut long risen na Jisas i wasim lek bilong ol, tasol taim ol i kisim holi spirit ol i luksave olsem Jisas i givim ona long ol. (Jon 13:7) Yumi olgeta i gat narapela narapela sindaun na yumi mekim narapela narapela wok insait long kongrigesen. Maski i olsem, yumi no laik givim biknem long yumi yet. Long dispela rot, yumi givim ona long ol narapela insait long kongrigesen. (Rom 12:3) Na tu, taim ol narapela i mekim gutpela wok na ol man i tok amamas long ol, yumi tu bai amamas wantaim ol maski yumi mekim wankain wok.

11. Bilong wanem yumi mas tok tru taim yumi tok amamas long ol narapela?

¹¹ Tok amamas long ol bratasista. Yumi mas tok amamas long ol narapela bikos ol kain tok olsem bai “strongim ol man.” (Efe. 4:29) Tasol yumi mas mekim tok tru taim yumi tok amamas long ol narapela. Sapos yumi no was gut, yumi inap mekim nating ol tok bilong amamasim narapela na yumi no givim ol tok we inap helpim ol. (Snd. 29:5) Taim yumi tok amamas long wanpela man na bihain yumi tok baksait long em, dispela em pasin giaman. Aposel Pol i stap gutpela eksampel long kamapim pasin laikim tru na tok amamas long ol narapela. Olsem, Pol i bin tok amamas long ol Kristen long Korin bikos ol i holimpas tok em i givim long ol. (1 Kor. 11:2) Tasol taim ol i mekim pasin i no stret, em i stretim ol na long gutpela pasin em i tokim ol long risen na em i mekim olsem.—1 Kor. 11:20-22.

12. Olsem wanem yumi inap soim pasin laikim taim yumi helpim ol narapela?

¹² Mekim gutpela pasin. Jehova i laik bai yumi mekim gutpela pasin long ol bratasista. (Ritim 1 Jon 3:17.) Tasol yumi mas tingim olsem yumi laik helpim ol, na yumi no tingting long helpim yumi yet. Yumi ken askim yumi yet: ‘Mi save mekim gutpela pasin long ol pren bilong mi, long ol man i gat biknem, na long ol lain husat inap helpim mi long bihain? O mi save mekim gut long ol  bratasista em mi no save long ol na ol lain i no gat planti samting?’ (Luk 14:12-14) Olsem wanem sapos yumi helpim wanpela wanbilip, tasol em i no tok tenkyu long yumi? Long kain taim olsem, yumi ken bihainim dispela stiatok: “Yupela i mas amamas long mekim gut long ol arapela, na no ken toktok planti long mekim dispela pasin.” (1 Pita 4:9) Sapos yu bihainim dispela stiatok, yu bai kisim amamas long pasin bilong givim samting.—Apo. 20:35.

13. (a) Bilong wanem yumi no ken les kwik long helpim ol bratasista? (b) Yumi inap mekim wanem bilong helpim ol lain i slek long bilip?

¹³ Strongim ol man i no gat strong. Yumi inap kamapim pasin laikim tru taim yumi bihainim tok bilong Baibel long ‘helpim ol man i no gat strong, na kamapim pasin bilong i no les kwik long olgeta man.’ (1 Tes. 5:14) Planti bratasista i bin slek long bilip na bihain ol i kamap strong gen. Maski i olsem, sampela bilong ol i nidim yet helpim bilong yumi, olsem na yumi no ken les kwik long helpim ol. Yumi ken ritim wanpela skripsa bilong strongim ol, invaitim ol long autim tok wantaim yumi, o yumi lusim sampela haptaim long putim yau long ol taim ol i toktok. Yumi no ken skelim ol bratasista bilong yumi bikos yumi olgeta i save karim hevi na yumi save mekim ol popaia. Aposel Pol tu i stori long hevi i painim em na olsem wanem Krais i strongim em. (2 Kor. 12:9, 10) Yumi olgeta inap kisim helpim long ol wanbilip Kristen.

14. Yumi mas mekim wanem bilong stap bel isi wantaim ol bratasista?

¹⁴ Stap bel isi. Yumi mas mekim olgeta samting yumi inap mekim bilong i stap bel isi wantaim ol bratasista, maski yumi pilim olsem ol i no kliagut long tok yumi mekim o ol i mekim hatpela pasin long yumi. (Ritim Rom 12:17, 18.) Yumi mas tok sori taim yumi mekim tok i bagarapim bel bilong narapela. Olsem, yu ken tok, “Sori long mi mekim dispela tok i bagarapim bel bilong yu.” Abrusim pasin bilong mekim kain tok olsem, “Sori long yu pilim olsem.” Em i bikpela samting long bel isi i mas i stap insait long marit. Tupela marit i no ken giaman long soim olsem ol i laikim narapela narapela taim ol i stap long ai bilong ol narapela man, tasol long haus ol i save pait na mekim ol hatpela tok long narapela narapela.

15. Olsem wanem yumi inap soim olsem yumi fogivim tru ol narapela?

¹⁵ Fogivim ol narapela. Sapos wanpela i rongim yumi, yumi mas fogivim em na lusim tingting long rong em i mekim. Yumi mas “karim hevi ol arapela i putim long [yumi] na mekim wantaim pasin laikim. Na wok strong long holimpas pasin wanbel bilong holi spirit na stap bel isi, em pasin i save bungim yumi wantaim.” Dispela bai helpim yumi long fogivim ol narapela husat i no luksave olsem ol i rongim yumi. (Efe. 4:2, 3) Sapos yumi laik fogivim tru ol narapela, yumi mas bosim gut tingting bilong yumi bambai yumi no ‘tingim rong ol i mekim long yumi.’ (1 Kor. 13:4, 5) Sapos yumi holim yet bel kros long narapela,  dispela bai bagarapim pasin bilong yumi long pas gut wantaim Jehova na ol bratasista. (Mat. 6:14, 15) Yumi mas beten long God i ken fogivim ol manmeri husat i rongim yumi.—Luk 6:27, 28.

16. Yumi mas holim wanem tingting long ol wok yumi holim insait long oganaisesen?

¹⁶ Daunim laik bilong yu yet. Taim yumi kisim ol wok long oganaisesen bilong Jehova, dispela i mas kirapim yumi long soim pasin laikim tru na “tingim ol samting bilong helpim narapela, na [yumi] no tingting long ol samting bilong helpim [yumi] yet, nogat.” (1 Kor. 10:24) Long ol kibung bilong yumi, ol brata i mekim wok atendan i mas stap long ples kibung paslain long program i kirap. Ol i no tingting long kisim ol gutpela sia bilong ol na famili bilong ol. Planti bilong ol dispela brata i save sindaun long ol sia long baksait o long wanem hap ol i wok long en. Ol i daunim laik bilong ol yet na kamapim pasin laikim tru. Olsem wanem yumi inap bihainim gutpela eksampel bilong ol?

17. Sapos man i mekim bikpela rong, pasin laikim bai kirapim em long mekim wanem?

¹⁷ Tokaut long ol rong yu mekim. Sampela Kristen i mekim bikpela rong, tasol ol i no tokaut long dispela samting. Ol i no laik semim ol yet o mekim ol narapela i bel hevi. (Snd. 28:13) Sapos Kristen i mekim olsem, orait em i putim hevi long em yet na ol narapela na em i no kamapim pasin laikim. Dispela bai pasim holi spirit bilong God long stiaim laip bilong em, na tu, bel isi i no inap stap insait long kongrigesen. (Efe. 4:30) Pasin laikim bai kirapim Kristen husat i mekim rong long toktok wantaim ol elda na kisim helpim.—Jems 5:14, 15.

18. Bilong wanem yumi mas kamapim pasin laikim?

¹⁸ Pasin laikim em i nambawan pasin tru winim ol narapela pasin. (1 Kor. 13:13) Sapos yumi kamapim pasin laikim, yumi soim olsem yumi ol disaipel bilong Jisas na yumi bihainim pasin bilong Jehova, em As bilong pasin laikim. (Efe. 5:1, 2) Pol i tok, sapos “mi no gat pasin laikim, orait mi olsem samting nating.” (1 Kor. 13:2) Yumi laik wok yet long kamapim pasin laikim “long tok” yumi mekim na “ol samting yumi mekim na long pasin i tru.”