Long stat bilong yia 1942, bihain liklik long Amerika i insait long Wol Woa 2, mi mekim namba 5 yia bilong mi long yunivesiti na sampela mun bihain tasol bai mi kisim digri long kamap akitek ensinia. Mi serim rum wantaim 2-pela mangi. Wanpela bilong ol i tokim mi long toktok wantaim man husat i save “visitim ol mangi long rum i stap daunbilo” long mipela. Mi go na mi bungim John O. (Johnny) Brehmer em wanpela Witnes Bilong Jehova. Mi kirap nogut olsem em inap painim bekim bilong olgeta askim long Baibel. Mi amamas na mi kirap stadi Baibel wantaim Johnny long olgeta taim na bihain mi save go autim tok wantaim em long ol fri taim bilong mi.

Otto, papa bilong Johnny, i bin kamap Witnes taim em i stap yet olsem presiden bilong wanpela benk long Walnut, Iowa. Otto i bin lusim dispela wok bambai em i ken autim tok fultaim. I no longtaim, pasin bilong em na famili bilong em long stap gutpela piksa i kirapim mi long mekim wanpela bikpela disisen.

Wanpela taim, hetman bilong yunivesiti i tokim mi olsem ol mak bilong skul wok bilong mi i go daun na mi no inap gretiuet wantaim ol mak bilong mi long bipo. Mi tingim mi bin beten strong long God Jehova na mi askim em long stiaim mi. Bihain liklik, ol i singautim mi long go lukim ensinia profesa bilong mi. Em i tokim mi olsem em i kisim wanpela pas i askim long wanpela ensinia na em i bekim dispela pas olsem mi orait long kisim dispela wok, maski em i no bin askim mi pastaim. Mi tok tenkyu long profesa, tasol mi tokim em olsem mi tingting pinis long mekim wok bilong Jehova long laip olgeta bilong mi. Long Jun 17, 1942, mi kisim baptais na i no longtaim ol i makim mi kamap painia em nem bilong ol Witnes Bilong Jehova i save autim tok fultaim.

Klostu long pinis bilong 1942, mi kisim pas bilong insait long ami, tasol mi tok nogat, na nau mi mas lukim ol bikman na eksplenim as na mi no laik insait long woa. Mi givim ol pepa em ol profesa bilong mi long yunivesiti i raitim bilong soim olsem mi gat gutpela pasin na gutpela save long wok ensinia. Maski ol i raitim ol gutpela tok long mi, ol bikman i sasim mi long baim fain inap 10,000 dola (U.S.) na ol i kalabusim mi inap 5-pela yia long haus kalabus long Leavenworth, Kansas, long Amerika.

Ol i salim winim 230 yangpela Witnes i go kalabus long Leavenworth fam bilong kalabus. Mipela i kisim  ol wok long dispela fam na mipela i wok aninit long lukaut bilong ol gad. Sampela bilong ol i save olsem mipela i no save insait long pait na ol i orait long dispela tingting bilong mipela.

Sampela gad i larim mipela i holim ol Baibel miting bilong mipela. Na tu, ol i helpim mipela na bringim ol buk na nius bilong Baibel i kam insait long ples kalabus. Bosman bilong haus kalabus i save kisim sabskripsen bilong nius Consolation (nau Kirap!).

Long Februeri 16, 1942, sampela mun bihain long Wol Woa 2 i pinis, mi lusim kalabus bihain long mi bin kalabus 3-pela yia tasol long 5-pela yia em ol i makim. Wantu mi kirap gen long mekim wok autim tok fultaim olsem wanpela painia. Asainmen bilong mi em long go bek long biktaun Leavenworth, Kansas. Mi pret long go bek bikos pasin bilong bel nogut long ol Witnes Bilong Jehova i bikpela tru long dispela hap. I hatwok tru long painim wok mani bilong sapotim mi yet na haus we mi ken stap long en.

Mi tingim wanpela gad mi bin bungim i singaut olsem, “Klia long banis bilong mi!” Taim mi lukim em i holim beisbal stik, mi pret na hariap tasol mi lusim hap bilong em. Long narapela haus, wanpela meri i tok, “Wet liklik,” na em i pasim dua na go insait. Mi wet i stap na wantu em i opim windo bilong rum antap na i kapsaitim doti wara i kam daun wasim mi. Maski i olsem, wok misineri bilong mi i gat ol blesing. Bihain mi kisim save olsem sampela husat i kisim ol buk na nius bilong Baibel long mi ol i kamap Witnes.

Long 1943, wanpela nupela skul bilong ol misineri i kamap long hap not bilong New York. Ol i invaitim mi long go long dispela skul na long Februeri 8, 1948, mi gretiuet long namba 10 klas bilong en. Bihain ol i kolim dispela skul Wastaua Baibel Skul Bilong Gileat. Taim mi gretiuet ol i makim mi long go wok misineri long Gol Kos em nau ol i kolim Gana.

Taim mi kamap long Gol Kos, asainmen bilong mi em long autim tok long ol wokman bilong gavman na ol man bilong Yurop. Long ol wiken mi save wok wantaim wanpela kongrigesen bilong ol Witnes Bilong Jehova na helpim ol long autim tok. Na tu, mi save go visitim ol ples we ol wan wan Witnes tasol i stap long en na skulim ol long pasin bilong autim tok. Mi mekim wok tu olsem wasman raun long Aivori Kos, nau ol i kolim Kot Diwa.

Taim mi mekim wok misineri long dispela ples, mi kisim pasin bilong ol lain Afrika long slip long haus ol i wokim long graun, kaikai long han, na pekpek ausait olsem ol Israel i bin mekim long ples drai nating. (Lo 23:12-14) Taim mipela i mekim olsem, dispela i helpim mi na ol narapela misineri long kisim ol gutpela pasin. Mipela i kirap stadi Baibel wantaim ol meri bilong sampela bikman bilong gavman. Olsem na taim ol man husat i birua long mipela i kisim kot oda long kenselim ol visa bilong mipela, ol dispela  meri i putim presa long ol man bilong ol na ol i no kenselim visa bilong mipela!

Olsem planti narapela misineri long Afrika, mi kisim sik malaria. Dispela i save mekim skin bilong mi i kol tru na hat tru na sampela taim tingting bilong mi i paul. Sampela taim mi save holim wasket bilong mi bambai em i no ken guria. Maski i olsem, wok autim tok bilong mi i givim mi amamas na mekim mi belgut yet.

Taim mi stap 4-pela yia long Afrika mi wok long raitim pas long Eva Hallquist, mi bin bungim em paslain long mi lusim Amerika. Mi kisim save olsem long Julai 19, 1953, em bai gretiuet long namba 21 klas bilong Skul Gileat long kibung intenesenel bilong ol Witnes Bilong Jehova long Yankee Stediam long New York. Mi stretim tok wantaim wanpela kepten bilong sip long wok long sip bilong em na pe bilong wok bilong mi em long go long Amerika.

Mipela raun long sip inap 22 de long solwara we sampela taim biksi i sakim nabaut sip, na bihain mipela i kamap long Amerika na mi go bungim Eva long hetkota bilong ol Witnes Bilong Jehova long Brooklyn. Mipela i stap antap long rup bilong wanpela bilding we yu inap lukim het bilong olgeta bikpela bilding na haba bilong New York, na mi askim em long maritim mi. Bihain, Eva i kam mekim wok misineri wantaim mi long Gol Kos.

Sampela yia bihain long mi wok wantaim Eva long Afrika, mi kisim wanpela pas long mama bilong mi olsem Papa i gat sik kensa. Bihain long mipela i kisim tok orait long lusim asainmen bilong mipela, mitupela Eva i go bek long Amerika. Sik bilong Papa i go bikpela hariap na em i dai.

Mipela i go bek stap long Gana inap 4-pela yia na mipela i kisim save olsem Mama i sik. Sampela pren i tok i gutpela mi na Eva i go bek long ples na lukautim em. Em wanpela bikpela disisen mipela i mas mekim. Mitupela i go bek long Amerika bihain long mi mekim wok misineri inap 15 yia, 11-pela bilong ol dispela yia em mitupela Eva i wok wantaim.

Inap sampela yia, mitupela i was long Mama na helpim em long go long ol miting taim em i pilim orait long go. Long Janueri  17, 1976, em i dai taim em i gat 86 krismas. Tasol samting i nogut moa i bin kamap 9-pela yia bihain. Eva i kisim sik kensa. Mipela mekim kain kain samting bilong daunim dispela sik, tasol sik i winim em na em i dai long Jun 4, 1985, taim em i gat 70 krismas.

Long 1988, mi kisim invatesen bilong go long dedikesen bilong brens ofis bilong Gana em ol i bin skruim i go bikpela. Em wanpela bung mi no inap lusim tingting long en! Taim mi bin go kamap long Gana inap 40 yia i go pinis em bihain tasol long gretiuesen bilong mi long Skul Gileat, i gat sampela handret Witnes tasol long dispela taim. Long 1988, i gat winim 34,000, na nau i gat klostu 114,000 Witnes!

Tupela yia bihain long mi visitim Gana, mi maritim gutpela pren bilong Eva em Betty Miller, long Ogas 6, 1990. Mitupela wantaim i putim wok bilong Jehova i stap olsem wok tru bilong mitupela. Mipela i wet long dispela taim we mipela bai lukim ol tumbuna bilong mipela, ol papamama bilong mipela, na Eva taim ol i kirap bek long Paradais long graun.—Aposel 24:15.

Mi save aiwara taim mi tingim hau Jehova i yusim mi long mekim dispela nambawan gutpela wok bilong em na mi inap mekim dispela wok winim 70 yia. Planti taim mi save tok tenkyu long em long stiaim mi long mekim wok bilong em long laip olgeta bilong mi. Nau maski mi winim 90 krismas, Jehova em dispela nambawan gutpela ensinia long yunives i bin wok yet long givim strong long mi na strongim bel bilong mi long mekim yet wok bilong em, dispela em wok tru bilong mi.