Vatesalonika Wo Sungula 2:1-20
2 Entiyisweni, ma swi tiva vamakwerhu leswaku ku mi endzela ka hina ku ve ni vuyelo.+
2 Hikuva hambileswi hi rhangeke hi xaniseka ni ku rhukaniwa eFilipiya,+ hilaha mi swi tivaka hakona, hi ve ni xivindzi hikwalaho ka Xikwembu xa hina, xo mi byela mahungu lamanene ya Xikwembu,+ hambiloko hi kanetiwa swinene.*
3 Hikuva xitsundzuxo lexi hi mi nyikaka xona a xi humi eka swilo leswi nga riki ntiyiso naswona a hi mi nyiki xona hi xikongomelo xo biha kumbe leswaku hi mi xisa,
4 kambe tanihi leswi Xikwembu xi hi hlawuleke leswaku hi chumayela mahungu lamanene, hikwalaho a hi vulavuli hi ndlela leyi tsakisaka vanhu kambe leyi tsakisaka Xikwembu lexi kambelaka timbilu ta hina.+
5 Entiyisweni, ma swi tiva leswaku a hi si tshama hi tirhisa marito lama tsakisaka kumbe hi tiendla vanhu lavanene leswaku hi ta kuma swilo swo karhi;+ Xikwembu i mbhoni ya swona!
6 Naswona a hi nga lavi ku dzunisiwa hi vanhu, hambi ku ri hi n’wina kumbe hi van’wana, hambileswi a mi ta va ni vutihlamuleri lebyikulu byo hi pfuna hi swa timali, hileswi hi nga vaapostola va Kreste.+
7 Kambe, hi ve ni rirhandzu ni musa loko hi ri na n’wina, hi ndlela leyi manana loyi a mamisaka a va hlayisaka ha yona vana vakwe.
8 Kutani leswi hi mi rhandzaka swinene,+ a hi tiyimisele ku mi chumayela mahungu lamanene ya Xikwembu ni ku nyikela hi vutomi bya hina leswaku hi mi pfuna.+
9 Vamakwerhu, a swi kanakanisi leswaku ma ku tsundzuka ku tikarhata ka hina ni ntirho wa hina wo tika. A hi tirha vusiku ni nhlikanhi leswaku ku nga vi na munhu ni un’we eka n’wina loyi a bohekaka ku hi pfuna hi swa timali+ loko hi chumayela mahungu lamanene ya Xikwembu eka n’wina.
10 N’wina ni Xikwembu mi timbhoni ta ndlela leyi hi tshembekeke ni ku lulama ni ku pfumala xisandzu ha yona eka n’wina vapfumeri.
11 Mi swi tiva kahle leswaku a hi tshamela ku mi khongotela ni ku mi chavelela, hi tsundzuxa un’wana ni un’wana wa n’wina+ leswi a faneleke a swi endla, hilaha tatana+ a endlaka hakona eka vana vakwe,
12 leswaku mi ta ya emahlweni mi famba hi ndlela leyi amukelekaka eka Xikwembu,+ lexi mi vitanelaka eMfun’weni wa xona+ ni le ku vangameni ka xona.+
13 Hakunene, hi yona mhaka leyi na hina hi khensaka Xikwembu nkarhi hinkwawo,+ hikuva loko mi amukela rito ra Xikwembu leri mi ri tweke eka hina, a mi ri amukelanga tanihi rito ra vanhu kambe mi ri amukele tanihi rito ra Xikwembu leri tirhaka ni le ka n’wina vapfumeri.
14 Hikuva vamakwerhu, mi tekelele mavandlha ya Xikwembu lama nga ni vun’we na Kreste Yesu lama nga eYudiya, hikuva mi xanisiwile hi vanhu va le tikweni ra ka n’wina+ hi ndlela leyi fanaka ni leyi vamakwerhu va le Yudiya va xanisiwaka ha yona hi Vayuda,
15 lava dlayeke hambi ku ri Hosi Yesu+ ni vaprofeta va tlhela va hi xanisa.+ Ku tlula kwalaho, a va tsakisi Xikwembu kambe va lwisana ni leswi vuyerisaka vanhu hinkwavo,
16 hileswi va ringetaka ku hi sivela ku vulavula ni vanhu va matiko leswaku vanhu va matiko va ta ponisiwa.+ Loko va endla tano, mikarhi hinkwayo va engetela swidyoho swa vona. Kambe eku heteleleni vukarhi bya xona byi va werile.+
17 Kambe vamakwerhu loko hi hambanisiwe na n’wina nkarhi wo koma, (a hi nga mi voni kambe etimbilwini ta hina a hi tshama hi ri karhi hi mi tsundzuka), hikwalaho ka ku navela ka hina, hi ringete hilaha hi nga kotaka hakona leswaku hi tlhela hi mi vona.
18 Hikwalaho a hi lava ku ta eka n’wina, mina Pawulo ndzi ringete kambirhi; kambe Sathana u hi siverile.
19 Hikuva hi wihi ntshembo wa hina kumbe ntsako kumbe harhi ya ku khana emahlweni ka Hosi ya hina Yesu hi nkarhi wa ku vuya kakwe? Xana a hi n’wina?+
20 Hakunene mi ku vangama ni ntsako wa hina.
Tinhlamuselo ta le hansi
^ Kumbexana “hi ku lwa lokukulu ngopfu.”
