Tikronika Ta Vumbirhi 16:1-14
16 Hi lembe ra vu-36 ra ku fuma ka Asa, Hosi Baxa+ wa Israyele a ta ku ta lwa na Yuda, kutani a sungula ku aka muti wa Rhama+ leswaku ku nga vi na munhu loyi a humaka kumbe ku nghena eka Hosi Asa wa Yuda.+
2 Loko Asa a vona sweswo, a teka silivhere ni nsuku endhawini yo hlayisela xuma endlwini+ ya Yehovha ni le ndlwini ya hosi, a swi rhumela Hosi Beni-hadadi wa Siriya+ loyi a a tshama eDamaska a ku:
3 “Mina na wena hi endle ntwanano, tata wa mina ni tata wa wena na vona va endle ntwanano. Ndzi ku rhumela silivhere ni nsuku. Tana u ta herisa ntwanano wa wena na Hosi Baxa wa Israyele, leswaku a ta suka eka mina.”
4 Beni-hadadi a yingisa Hosi Asa, a rhuma tindhuna takwe ta nyimpi leswaku ti ya hlasela miti ya Israyele, hiloko ti hlasela muti wa Iyona,+ Dani,+ Avele-mayimi ni tindhawu hinkwato to hlayisela swilo leti nga emitini ya Neftali.+
5 Loko Baxa a twa sweswo, a namba a tshika ku aka muti wa Rhama.
6 Endzhaku ka sweswo Hosi Asa a teka tiko hinkwaro ra Yuda, va ya rhwala maribye ni timhandzi eRhama+ leswi Baxa a a aka ha swona,+ kutani a tirhisa swona ku aka muti wa Geba+ ni wa Mizpa.+
7 Hi nkarhi wolowo Hanane+ loyi a vonaka swivono a ta eka Hosi Asa wa Yuda a fika a ku: “Leswi u tshembeke hosi ya Siriya, u nga tshembangiki Yehovha Xikwembu xa wena, masocha ya hosi ya Siriya ma ku balekerile.+
8 Xana Vaetiyopiya ni Valibiya a va nga ri vuthu lerikulu leri nga ni makalichi yo tala ni vagadi va tihanci? Kambe leswi a wu tshemba Yehovha u ku pfunile leswaku u va hlula.+
9 Hikuva matihlo ya Yehovha ma fambafamba emisaveni hinkwayo+ leswaku a pfuna lava n’wi tshembaka hi mbilu hinkwayo.+ Kambe wena u endle vuphukuphuku emhakeni leyi; u ta hlaseriwa hi tinyimpi ku sukela sweswi.”+
10 Hambiswiritano, Asa a hlundzukela muvoni loyi wa swivono, hiloko a n’wi pfalela ekhotsweni hikwalaho ka leswi a swi vuleke. Hi nkarhi wolowo Asa a sungula ku tshikilela ni vanhu van’wana.
11 Matimu hinkwayo ya Asa, ku sukela eku sunguleni ku ya fikela emakumu ma tsariwile eBukwini ya Tihosi ta Yuda ni ta Israyele.+
12 Hi lembe ra vu-39 ra ku fuma kakwe, Asa a khomiwa hi vuvabyi bya milenge kutani vuvabyi lebyi byi ya byi nyanya; hambiloko swi ri tano a nga kombelanga mpfuno eka Yehovha u ye etin’angeni.
13 Kutani Asa a fa, a lahliwa ni vakokwa wakwe;+ u fe hi lembe ra vu-41 ra ku fuma kakwe.
14 A lahliwa esirheni rakwe lerikulu leri a ticeleleke rona eMutini wa Davhida,+ va n’wi late erihlakeni* leri a ri cheriwe mafurha yo tala ya balsama ni mafurha yo nun’hwela yo hambanahambana lama pfanganisiweke ni mafurha man’wana yo hlawuleka.+ Ku engetela kwalaho, va n’wi hisela mirhi yo tala yo nun’hwela.
Tinhlamuselo ta le hansi
^ Ku nga nchumu lowu khale a wu tirhisiwa ku rhwala mufi.