Amosi 2:1-16
2 “Yehovha u ri,‘“A ndzi nge tshiki ku xupula Mowabu+ hikwalaho ka milandzu yinharhu ni hikwalaho ka mune wa yona,Hikuva u hise marhambu ya hosi ya Edomu leswaku a ta kuma nkuma.
2 Ndzi ta rhumela ndzilo eka Mowabu,Wu ta hisa swihondzo swa muti wa Keriyoti;+Mowabu u ta fa hi nkarhi wa mpfilumpfilu,Ku ri karhi ku biwa hungwe* ni nanga.+
3 Ndzi ta lovisa loyi a fumaka* exikarhi ka yena,Ndzi dlaya ni tihosana ta yena hinkwato,”+ ku vula Yehovha.’
4 Yehovha u ri,‘A ndzi nge tshiki ku xupula Yuda+ hikwalaho ka milandzu yinharhu ni hikwalaho ka mune wa yona,Hikuva va ale ku yingisa nawu* wa Yehovha,A va swi yingisanga swileriso swa yena;+Kambe va hambukisiwe hi mavunwa lama hambukiseke vakokwa wa vona.+
5 Ndzi ta rhumela ndzilo eka Yuda,Wu ta hisa swihondzo swa Yerusalema.’+
6 Yehovha u ri,‘A ndzi nge tshiki ku xupula Israyele+ hikwalaho ka milandzu yinharhu ni hikwalaho ka mune wa yona,Hikuva u xavisa vanhu vo lulama leswaku a kuma silivhere,Ni xisiwana leswaku a kuma maphaxani.+
7 Va kandziyela tinhloko ta swisiwana ti va ritshuri,+Va siva ndlela ya lowo rhula.+
Jaha ni tata wa rona va etlela ni nhwanyana un’we,Va thyakisa vito ra mina ro kwetsima.
8 Va tshama etlhelo ka altari+ yin’wana ni yin’wana ehenhla ka nkumba lowu va wu tekeleke lava va kolotaka;+Va teka mali leyi vanhu va nga riha ha yona va xava vhinyo va yi nwela endlwini* ya swikwembu swa vona.’
9 ‘Kambe hi mina ndzi loviseke Vaamori emahlweni ka vona,+Lava a va lehe ku fana ni mirhi ya mikedari naswona a va ri ni matimba ku fana ni mirhi ya oku;Ndzi herise mihandzu ni timitsu ta vona.+
10 Ndzi mi humese etikweni ra Egipta,+Ndzi mi fambisa emananga ku ringana malembe ya 40,+Leswaku mi ta teka tiko ra Vaamori.
11 Vana van’wana va n’wina va xinuna ndzi va endle vaprofeta,+Kasi vana van’wana va n’wina va majaha ndzi va endle Vanaziri.+
Xana a swi tano, n’wina Vaisrayele?’ ku vula Yehovha.
12 ‘Kambe mi hambete mi nyika Vanaziri vhinyo leswaku va nwa,+Mi lerise vaprofeta, mi ku: “Mi nga ha profeti.”+
13 Ndzi ta mi pyanya etikweni ra n’wina,Hilaha golonyi leyi teleke hi mavele lama ha ku tshoveriwaka yi swi pyanyetelaka hakona leswi nga ehansi ka yona.
14 Loyi a nga ni rivilo a nge vi na ndhawu yo balekela eka yona,+Loyi a nga ni matimba ma ta n’wi helela,A yi kona nhenha leyi nga ta ponisa vutomi bya yona.
15 Loyi a lwaka hi vurha* a nge yimi,Loyi a kotaka ku tsutsuma a nge baleki,Mugadi wa hanci na yena a nge byi ponisi vutomi bya yena.
16 Hambi ku ri nhenha exikarhi ka tinhenha,Yi ta baleka yi nga ambalanga nchumu hi siku rero,’+ ku vula Yehovha.”
Tinhlamuselo ta le hansi
^ Ku nga xitiviso xa nyimpi.
^ Hi Xiheveru, “muavanyisi.”
^ Kumbe “xileriso.”
^ Kumbe “etempeleni.”
^ Kumbe “mpaxu.”
