Amosi 7:1-17
7 Yehovha Hosi Leyi Tlakukeke u ndzi kombe leswi exivonweni: U rhumele tinjiya to tala eku sunguleni ka ku mila ka leswi byariweke endzhaku.* A ku ri endzhaku ka ku tsemiwa ka byanyi bya swifuwo emasin’wini ya hosi.
2 Loko tinjiya ti hete ku dya swimilana swa tiko, ndzi te: “Yehovha Hosi Leyi Tlakukeke, ndzi kombela u rivalela vanhu va wena.+ Xana Yakobo u ta hanyisa* ku yini? Hikuva a nga na matimba!”+
3 Hiloko Yehovha a tshika ku tisa khombo.+ Yehovha a ku: “A ri nge he ti.”
4 Yehovha Hosi Leyi Tlakukeke u ndzi kombe leswi exivonweni: Yehovha Hosi Leyi Tlakukeke u endle leswaku vanhu vakwe va xupuriwa hi ndzilo. Wu hise mati ya xidziva lexikulu ni xiphemu xa tiko.
5 Hiloko ndzi ku: “Yehovha Hosi Leyi Tlakukeke, ndzi kombela u yimanyana.+ Xana Yakobo u ta hanyisa* ku yini? Hikuva a nga na matimba!”+
6 Hiloko Yehovha a tshika ku tisa khombo.+ Yehovha Hosi Leyi Tlakukeke a ku: “Khombo leri na rona a ri nge he ti.”
7 U ndzi kombe leswi exivonweni: Yehovha a a yime ekhumbini leri pimiweke hi ntambhu yo pima naswona a a khome ntambhu yo pima.
8 Yehovha a ku eka mina: “Amosi, xana u vona yini?” Kutani ndzi ku: “Ntambhu yo pima.” Yehovha a ku: “Ndzi ta pima vanhu va mina va Israyele ha yona. A ndzi nge he va rivaleli.+
9 Tindhawu to gandzela eka tona ta Isaka+ ti ta sala ti ri marhumbi ni titempele ta Israyele ti ta hirimuxiwa,+ ndzi ta lwa ni yindlu ya Yerobuwamu hi banga.”+
10 Amaziya muprista wa le Bethele+ u rhumele rito eka Hosi Yerobuwamu+ wa le Israyele, a ku: “Amosi u ku bohele xikungu laha tikweni ra Israyele.+ Tiko a ra ha swi koti ku tiyiselela marito yakwe hinkwawo.+
11 Amosi u te, ‘Yerobuwamu u ta dlayiwa hi banga, vanhu va Israyele va ta ya evuhlongeni va siya tiko ra vona.’”+
12 Hiloko Amaziya a byela Amosi a ku: “Wena la vonaka swivono, famba, balekela etikweni ra Yuda, u ya kuma xinkwa* kona, u ya profeta kwale.+
13 Kambe u nga ha profeti eBethele,+ hikuva i tempele ya hosi+ ni yindlu ya vuhosi.”
14 Amosi a hlamula Amaziya, a ku: “A ndzi nga ri muprofeta naswona a ndzi nga ri n’wana wa muprofeta; kambe a ndzi ri murisi,+ ndzi khathalela mikuwa.*
15 Hiloko Yehovha a ndzi tshikisa ku risa ntlhambi, kutani Yehovha a ku eka mina, ‘Famba u ya profetela vanhu va mina, ku nga Israyele.’+
16 Yingisa rito ra Yehovha: ‘Wena u ri, “U nga tshuki u profeta swo biha hi Israyele+ naswona u nga tshuki u vula rito+ ro biha hi yindlu ya Isaka.”
17 Hikwalaho Yehovha u ri: “Nsati wa wena u ta va nghwavava emutini, vana va wena va majaha ni va vanhwanyana va ta dlayiwa hi banga. Tiko ra wena ri ta aviwa hi ntambhu yo pima, loko ku ri wena, u ta fela etikweni rin’wana; loko ku ri Israyele, u ta ya evuhlongeni a siya tiko rakwe.”’”+
Tinhlamuselo ta le hansi
^ Ku nga hi January na February.
^ Hi Xiheveru, “yimisa.”
^ Hi Xiheveru, “yimisa.”
^ Hi Xiheveru, “dya xinkwa.”
^ Kumbe “boxa makuwa.”
