Hi Sonto, April 1, 1945, Lennart na Virginia Johnson lava nga mathwasana ya le Giliyadi va fike eCiudad Trujillo (laha sweswi ku vitaniwaka Santo Domingo), ku nga ntsindza wa tiko ra Dominican Republic. Tanihi Timbhoni to sungula etikweni, va fike etikweni leri khale ka rona a ku ri ni mpfilumpfilu ni ku xaniseka. * Buku Ya Lembe Ya 1946 yi vike yi ku, “Hakunene leyi i nsimu leyi ku faneleke ku phayoniwa eka yona naswona mathwasana lawa ya le Giliyadi a ma fanele ma yi sungula ehansi.” Anakanya ntsena: A ku nga ri na rhavi, a ku nga ri na Tiholo ta Mfumo naswona a ku nga ri na mavandlha. Varhumiwa a va nga tivi munhu etikweni, a va nga xi tivi Xipaniya naswona a va nga ri na kaya kumbe nhundzu. Xana a va ta endla yini?

Lennart u ri: “Hi ye eVictoria Hotel kutani hi lava ndhawu yo tshama—a hi hakela tidolara ta ntlhanu hi ri vambirhi hi siku, ku katsa ni swakudya. Hi ndzhenga wolowo hi sungule dyondzo ya hina yo sungula ya le kaya ya Bibele. Swi endleke hi ndlela leyi: Vavasati vambirhi vo huma eDominican lava a hi dyondza na vona Bibele eBrooklyn va hi nyike mavito ya maxaka ni vanhu lava va tolovelaneke na vona, loyi un’wana wa vona a ku ri Dokodela Green. Loko hi n’wi endzerile, hi tlhele hi hlangana ni muakelani wakwe Moses Rollins. Endzhaku ko va byela ndlela leyi hi kumeke mavito ni tiadirese ta vona ha yona, va yingisele rungula ra Mfumo hi vurhon’wana kutani va pfumela ku dyondzeriwa Bibele. Hi ku hatlisa, Moses u ve muhuweleri wa Mfumo wo sungula wa kwalaho.”

Ku fike varhumiwa van’wana va mune eku sunguleni ka June 1945 naswona hi ku hatlisa va fambise minkandziyiso yo  hlaya ni ku tlhela va sungula tidyondzo to tala ta Bibele. Hi October se a swi ri erivaleni leswaku va fanele va kuma ndhawu leyi va nga ta hlanganyela eka yona. Kutani varhumiwa va cince kamara ro tshama eka rona ni kamara ro dyela eka rona ra kaya ra vona ra varhumiwa va ma endla Holo ya Mfumo ya xinkarhana. Vanhu va kwalomu ka 40 a va ta eminhlanganweni.

Un’wana wa vanhu vo sungula lava amukeleke ntiyiso a ku ri Pablo Bruzaud, loyi vanhu hinkwavo a va n’wi tiva hi vito ra Palé. A a chayela bazi leri a ri famba exikarhi ka doroba ra Santiago na Ciudad Trujillo, kutani nkarhi ni nkarhi a teka maendzo yo ya entsindza. Siku rin’wana loko a ri eCiudad Trujillo, Palé u vulavule ni Timbhoni kutani ti n’wi nyika buku leyi nge “The Truth Shall Make You Free.” U sungule ku dyondza Bibele na tona siku ni siku. Hi ku hatlisa Palé u sungule ku chumayela ni varhumiwa ni ku tlhela a va pfuna hi xo famba. Endzhakunyana, u hlangane na Lennart Johnson kutani a famba na yena va suka eCiudad Trujillo va ya eSantiago kutani va suka etintshaveni va ya eribuweni ra doroba ra Puerto Plata leswaku va endzela ntlawa lowu tsakelaka lowu tsaleleke ntsindza wa misava hinkwayo wa Timbhoni ta Yehovha eBrooklyn, le New York, wu lava rungula leri engetelekeke.

Hi March 1946, Nathan Knorr na Frederick Franz lava humaka entsindza wa misava hinkwayo wa Timbhoni ta Yehovha va endzele eDominican Republic. A va swi rindzele hi mahlo-ngati ku endza ka vamakwerhu lava naswona vanhu lava tsakelaka va 75 va ve kona eka nkulumo leyi nyikeriweke hi Makwerhu Knorr ku engetela eka nhlayo ya vamakwerhu. Hi nkarhi wa riendzo rero, Makwerhu Knorr u endle malunghiselelo yo simeka rhavi eDominican Republic.

Ku fike varhumiwa lava engetelekeke naswona eku heleni ka lembe ra ntirho ra 1946, a ku ri ni vahuweleri va 28 etikweni. Leswi mahungu lamanene a ma ha ku sungula ku chumayeriwa etikweni leri, varhumiwa va hete madyambu yo tala va ri karhi va languta nsimu emepeni ku tiyisekisa leswaku tsima ra  vona ro chumayela ri endliwa hi ku hleleka ni hilaha ku heleleke.

Hi 1947, a ku ri ni vahuweleri vo tlula 59 lava a va hlanganyela entirhweni wo chumayela. Hi lembe rero, varhumiwa van’wana lava a va tirha eCuba va averiwe ku ya tirha eDominican Republic. Exikarhi ka vona a ku ri na Roy na Juanita Brandt. Makwerhu Brandt u vekiwe leswaku a va mulanguteri wa rhavi naswona u hambete a tirha ntirho lowu eka malembe ya khume lama landzeleke.

Eku heleni ka lembe ra ntirho ra 1948, a ku ri ni vahuweleri va kwalomu ka 110 lava chumayelaka mahungu lamanene swin’we ni varhumiwa lava a va tirha hi ku hiseka. Hambiswiritano, vachumayeri volavo lava hisekaka a va nga swi xiyi leswaku a ka ha ta minkarhi yo tika swinene leyi a va ta langutana na yona.