Yehovha u lava leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Tim. 2:4) Hi ku pfumelelana ni ku rhandza ka Xikwembu, Timbhoni ta Yehovha eDominican Republic ti endle matshalatshala lamakulu yo fikelela vanhu hinkwavo lava nga ensin’wini ya tona, ku katsa ni lava pfaleriweke emakhotsweni ya le tikweni rero.

Hi 1997 maphayona mambirhi yo hlawuleka a ma ri karhi ma endla maendzo yo vuyela ya vhiki ni vhiki eKhotsweni ra Najayo le San Cristóbal loko ma hlangana na Gloria wansati la humaka eColombia, loyi a nga ni malembe ya 23 loyi a khomiwe hikwalaho ko ngungumerisa swidzidziharisi. A a ri karhi a burisana ni makwerhu wa xisati loyi a a pfaleriwe handle ka nandzu. Leswaku va hlamula swivutiso swa Gloria swa Bibele, vamakwerhu va n’wi tisele buku leyi nge Ku Hlamulana Hi Matsalwa ni minkandziyiso yin’wana. Ku hisekela kakwe ku dyondza Bibele swi khumbe vakhotsiwa van’wana, lerova ntlawa lowu a wu endzeriwa vhiki ni vhiki wu hambete wu andza.

Ntiyiso lowu a wu dyondza wu endle leswaku Gloria a hundzula vutomi byakwe naswona hi 1999 u fanelekele ku va  muhuweleri loyi a nga khuvuriwangiki. N’hweti ni n’hweti a a heta tiawara to tlula 70 a ri karhi a chumayela ekhotsweni naswona a a dyondza Bibele ni vabohiwa van’wana va tsevu lava a va endla nhluvuko. Kutani hi 2000, u endle xikombelo xo rivaleriwa nandzu naswona xi amukeriwile hikwalaho ka mahanyelo yakwe lamanene. U ntshunxiwile kutani a tlheriseriwa eColombia. Hi 2001, endzhakunyana ka loko a fike etikweni ra rikwavo, u khuvuriwile hambileswi ndyangu wa ka vona a wu lwisana swinene ni xiboho lexi a xi endleke.

Endzhaku ka loko Gloria a khuvuriwile, u sungule ku phayona. U tekane na makwerhu loyi a nga nkulu naswona havumbirhi bya vona i maphayona ya nkarhi hinkwawo. Sweswi va tirha eColombia endhawini leyi ku nga ni xilaveko lexikulu. Gloria u pfune swichudeni swakwe swo hlayanyana leswaku swi tinyiketela ni ku khuvuriwa. U vula leswaku u titwa a kolota Yehovha naswona ndlela leyinene leyi a nga n’wi hakelaka ha yona i ku endlela van’wana leswi yena a endleriweke swona, ku nga ku va pfuna leswaku va tiva ntiyiso.

Hilaha ntokoto wa Gloria wu swi kombisaka hakona, tinyangwa ta khotso a ti swi koti ku sivela vakhotsiwa leswaku va dyondza ntiyiso lowu ponisaka vutomi. Vayimeri va rhavi va hlangane ni vatirhela-mfumo va le ka Ndzawulo ya Makhotso leswaku va kombelela vamakwerhu mpfumelelo wo dyondzisa vabohiwa lava engetelekeke Bibele. Hikwalaho ka sweswo, vamakwerhu va xinuna va 43 ni va xisati va tsevu va nyikiwe mpfumelelo wo hlanganyela entirhweni wo dyondzisa Bibele emakhotsweni ya 13.

Eku heleni ka lembe-xidzana ra vu-20, tiko ra Dominican Republic a ri ri ni vahuweleri va mahungu lamanene va 21 684 va le mavandlheni ya 342 lava a va fambisa tidyondzo ta Bibele ta 34 380. Lava veke kona eXitsundzuxweni a va ri 72 679. Hikwalaho ka ku andza loku, vanhu va Yehovha va angule hi ku hatlisa eka marito ya Esaya lama nge: “Pfula ndhawu ya ntsonga wa wena yi anama. Naswona a va  tshambulute tinguvu ta ntsonga wa tabernakela ya wena leyikulu. U nga feleli. Lehisa tintambhu ta ntsonga wa wena.”—Esa. 54:2.

Xiphiqo xin’wana lexi a xi ri kona a ku ri ku kuma Holo ya Tinhlengeletano leyi a yi ta tirhisiwa hi vahuweleri lava a va ya va andza. Hi 1996 Holo ya Tinhlengeletano leyi a yi ri etlhelo ka rhavi ra le Santo Domingo yi herile naswona a yi tirhisiwa hi vahuweleri lava a va tshama entsindza wa kwalaho ni lava a va tshama etindhawini ta le kusuhi. Hambiswiritano, Holo ya Tinhlengeletano ya le Villa González, leyi a yi tirhisiwa hi tiko hinkwaro a yi lava ku lunghisiwa kumbe ku cinciwa swilo swo karhi.

Hi 2001, Huvo leyi Fumaka yi nyike mpfumelelo wa leswaku ku akiwa Holo ya Tinhlengeletano leyi ku nga tshamaka vanhu va 2 500 le Villa González. Ku engetela kwalaho, vamakwerhu a va tsakile loko va twa leswaku a ku ta akiwa muako lowu nga ta tirhiseriwa ku khoma Xikolo xa Ndzetelo wa Vutirheli (lexi sweswi xi siviweke hi Xikolo Xa Vachumayeri Va  Mfumo). A wu ta va etlhelo ka Holo ya Tinhlengeletano naswona a wu ta va ni makamara yo etlela eka wona, tlilasi, layiburari, khixi ni kamara ro dyela eka rona. Hi 2004, Theodore Jaracz loyi a nga xirho xa Huvo leyi Fumaka u nyikele nkulumo yo nyiketela miako leyintshwa. Ku sukela kwalaho, ku ve ni titlilasi ta 14 leti khomeriweke exikolweni lexi.