Hambileswi Internet yi nga kumekiki hi ku olova eCuba, sweswi swa koteka leswaku va yi tirhisa eswitolo leswi pfuriweke hi tikhampani ta tinqingho. Hambiswiritano, ku yi tirhisa swa durha swinene. Leswaku rhavi ri pfuna vamakwerhu leswaku va vuyeriwa eka jw.org, ri khutaze mavandlha ku hlela leswaku muhuweleri un’we a kopa minkandziyiso, rungula leri rhekhodiweke ni tivhidiyo eka Web site kutani a avelana ni Timbhoni tin’wana ta le mavandlheni ya kwalaho. Lunghiselelo leri ri famba kahle.

Teona loyi a nga ni malembe ya khume swin’we ni makwenu wakwe Tamuna, loyi a nga ni malembe ya nhungu, va tshama eRiphabliki ra Georgia. Swinhwanyetana leswi a swi lava selfoni. Leswaku kokwa wa swona a swi pfuna swi yi xava, u swi tshembise ku swi nyika mali yin’wana ya mudende n’hweti ni n’hweti. Lexi twisaka ku vava, kokwa wa swona u fe hi xitshuketa. Nilokoswiritano, ndyangu wolowo wu swi nyike mali yo hetelela ya mudende wa kokwa wa swona leswaku swi ta kota ku xava selfoni leyi a swi yi lava. Endzhaku ka loko swinhwanyetana leswi swi anakanyisise hi mhaka leyi, swi tsalele vandlha swi ku: “Ha swi tiva leswaku Holo ya hina ya Mfumo leyintshwa yi ta sungula ku akiwa eka mavhiki mambirhi lama taka eximutanini lexi xa T’erjola. Kokwa wa hina a swi lava hi mbilu hinkwayo ku pfuna entirhweni lowu, kutani hi endle xiboho xo nyikela hi mali hinkwayo yo hetelela ya mudende wakwe evandlheni ematshan’weni yo va hi xava selfoni. Hi kombela mi hi akela Holo ya Mfumo yo saseka!”

Hi January 17, 2014, eDili, le Timor-Leste, Geoffrey Jackson loyi a nga xirho xa Huvo leyi Fumaka u humese Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi Xitetum, ku nga ririmi leri vulavuriwaka swinene etikweni rero. Eku sunguleni, tikopi leti nga kona ta Matsalwa ya Xigriki hi Xitetum a ti kandziyisiwa ni ku hangalasiwa hi Kereke ya Khatoliki ntsena, leyi yi aleke ku xavisela Timbhoni ta Yehovha kumbe vanhu lava a yi va ehleketelela leswaku va dyondza ni Timbhoni. Hambiswiritano, Bibele ya Khatoliki a yi ri ni rungula ro tala leri hoxeke, leri hungutiweke, marito ya xikhale ni swihoxo leswi veke kona loko yi  kandziyisiwa. Ku hambana ni sweswo, malunghana ni Vuhundzuluxeri Bya Misava Leyintshwa, Darren, loyi a nga murhumiwa eTimor-Leste, u te: “Vanhu vo tala va le Timor-Leste va tsakisiwa hi ndlela leyi byi pakanisaka ha yona kutani va namba va endla xikombelo xo kuma tikopi. Bya va olovela ku byi hlaya naswona va tsakisiwa ni hi lebyi byi tsariweke hi maletere lamakulu, ngopfu-ngopfu leswi vanhu vo tala va nga riki na gezi. Vanhu vo tala lava va kumeke tikopi se va dyondza Bibele.”

Hi January 2014, vahundzuluxeri va ririmi ra Xirhoma, lexi vulavuriwaka eMacedonia, va fikelele pakani leyintshwa. Ku sunguriwe ntlawa wo hundzuluxela naswona wu nyikiwe mpfumelelo wo humesa minkandziyiso hi ririmi leri ku nga ri hi matsalelo ya Xirhoma ntsena kambe ni hi maletere ya Xicyril. Leswi swi pfune swinene eka vanhu lava vulavulaka Xirhoma, lava ma toloveleke swinene maletere ya Xicyril, ku nga matsalelo lama nga enawini eMacedonia.

 Vaaki vo tala lava vulavulaka Xiromani va tsakisiwa hi leswaku nhlengeletano ya Yehovha yi humesa minkandziyiso hi ririmi ra vona. Makwerhu un’wana wa xisati u te: “Tanihi leswi ndzi vulavulaka Xiromani, hakanyingi ndzi languteriwa ehansi hi vanhu va tinxaka tin’wana, kutani ndzi n’wi khensa swinene Yehovha leswi a ndzi tekaka ndzi ri wa nkoka hileswi ndzi kumaka minkandziyiso hi ririmi ra mina. Kutani leswi swi ya swi ndzi tshineta swinene eka yena.”

Ku sukela hi February 1, 2014, rhavi ra le United States ri sungule ku langutela nsimu ni mavandlha ya le Jamaica ni le Swihlaleni swa Cayman. Mawaku vun’we lebyi nga kona exikarhi ka vahuweleri vo tlula 1,2 wa timiliyoni lava nga ensin’wini leyi languteriwaka hi rhavi ra le United States! Nhlayo leyi yi katsa vahuweleri vo huma eka swifundzha swa 50 swa le United States, Bahamas, Bermuda, Swihlala swa Virgin leswi lawuriwaka hi Britain ni leswi lawuriwaka hi United States, Puerto Rico, Swihlala swa Turks ni swa Caicos.

Vamakwerhu va le Japani va ya emahlweni va kombisa moya wo hisekela ku phayona naswona nhlayo ya maphayona ya nkarhi hinkwawo exihlaleni lexi hi yona ya vumune emisaveni hinkwayo. Eku sunguleni ka lembe ra ntirho ra 2014, vanhu lavantshwa va 2 646 va teke vuphayona bya nkarhi hinkwawo, leswi endleke leswaku nhlayo ya maphayona yi tlakuka yi ya eka 65 668. Hi March 2014, vahuweleri vo tlula hafu va teke vuphayona.