DYONDZO 11
Va Tsale Hi Yesu
Xana wa va vona vavanuna lava nga exifanisweni?— I Matewu, Marka, Luka, Yohane, Petro, Yakobo, Yudha na Pawulo. Vavanuna lava hinkwavo va hanye hi nkarhi wun’we na Yesu naswona va tsale hi Yesu. A hi dyondzi swo tala ha vona.
U tiva yini hi vavanuna lava?
Vavanuna vanharhu a ku ri vaapostola lava chumayeleke na Yesu. Xana wa swi tiva leswaku a ku ri vamani vavanuna volavo vanharhu?— A ku ri Matewu, Yohane na Petro. Muapostola Matewu na Yohane a va n’wi tiva kahle Yesu naswona ha un’we wa vona va tsale buku leyi vulavulaka hi vutomi byakwe. Nakambe muapostola Yohane u tsale buku leyi vuriwaka Nhlavutelo ni mapapila manharhu lama vitaniwaka Yohane wo Sungula, Yohane wa Vumbirhi na Yohane wa Vunharhu. Muapostola Petro u tsale mapapila mambirhi lama nga eBibeleni. Ma vitaniwa Petro wo Sungula na Petro wa Vumbirhi. Epapileni rakwe ra vumbirhi, Petro u tsale hi nkarhi lowu Yehovha a vulavuleke ku suka etilweni a vula leswi hi Yesu: ‘Loyi i n’wananga. La rhandzekaka naswona ndza tinyungubyisa ha yena.’
Nakambe vavanuna van’wana lava nga exifanisweni va hi dyondzisa hi Yesu etibukwini leti va ti tsaleke. Un’wana wa vona i Marka. Swi nga ha endleka leswaku a a ri kona loko Yesu a khomiwa naswona u vone swilo hinkwaswo leswi humeleleke. Un’wana wa vona i Luka. A a ri dokodela naswona swi nga ha endleka leswaku u ve Mukreste endzhaku ka loko Yesu a file.
Vatsari van’wana vambirhi va Bibele lava u va vonaka exifanisweni a ku ri vamakwavo va Yesu. Xana wa ma tiva mavito ya vona?— I Yakobo na Yudha. Eku sunguleni, a va nga pfumeli eka Yesu. Nakambe a va anakanya leswaku wa penga. Kambe hi ku famba ka nkarhi va pfumele eka Yesu kutani va va Vakreste.
Mutsari wo hetelela wa Bibele loyi u n’wi vonaka laha xifanisweni i Pawulo. Loko a nga si va Mukreste, vito rakwe a ku ri Sawulo. A a venga Vakreste naswona a va xanisa. Xana wa swi tiva leswaku i yini lexi endleke leswaku Pawulo a va Mukreste?— Siku rin’wana, Pawulo a a ri karhi a famba endleleni loko hi ku hatlisa a twa munhu un’wana a vulavula na yena a ri etilweni. Munhu wa kona a ku ri Yesu! U vutise Pawulo a ku: ‘Ha yini u xanisa vanhu lava pfumelaka eka mina?’ Endzhaku ka sweswo, Pawulo u cincile kutani a va Mukreste. Pawulo u tsale tibuku ta 14 ta Bibele, ku nga buku ya Varhoma ku ya fika eka Vaheveru.
Siku ni siku hi hlaya Bibele, a hi swona ke?— Loko hi hlaya Bibele, hi dyondza swo tala hi Yesu. Xana u nga tsakela ku dyondza leswi engetelekeke hi Yesu?
