2 Kuma Vutivi Lebyi Kongomeke Bya Xikwembu

“Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso.”—Yohane 17:3.

HA YINI SWI TIKA? Van’wana va vula leswaku Xikwembu a xi kona. Van’wana va pfumela leswaku Xikwembu a hi munhu, kambe i matimba lamakulu ntsena. Lava pfumelaka leswaku Xikwembu i munhu wa xiviri va dyondzisa tidyondzo leti kanetanaka malunghana ni leswaku i mani ni leswaku xi ni timfanelo tihi.

U NGA XI HLULA NJHANI XIHINGA XEXO? Ndlela yin’wana leyi u nga kumaka vutivi hi Xikwembu i ku langutisa swilo leswi xi swi tumbuluxeke. Muapostola Pawulo u te: “Timfanelo ta [Xikwembu] leti nga vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke, ni hi matimba ya xona lama nga riki na makumu ni Vukwembu bya xona.” (Varhoma 1:20) Loko u langutisa hi vukheta swilo leswi Muvumbi  wa hina a swi tumbuluxeke, u nga dyondza swo tala malunghana ni vutlhari swin’we ni matimba yakwe.—Pisalema 104:24; Esaya 40:26.

Hambiswiritano, leswaku hi kuma vutivi lebyi kongomeke malunghana ni vumunhu bya Xikwembu, un’wana ni un’wana wa hina u fanele a ti hlayela Rito ra xona, ku nga Bibele. U nga pfumeleli vanhu va ku byela leswi u faneleke u swi endla. Kambe yingisa ndzayo ya Bibele leyi nge: “Tshikani ku titwananisa ni mafambiselo lawa ya swilo, kambe mi hundzuka hi ku hundzula mianakanyo ya n’wina, leswaku mi ta tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.” (Varhoma 12:2) Hi xikombiso, kambisisa tinhla leti landzelaka leti Bibele yi ti hlavutelaka malunghana ni Xikwembu.

Xikwembu xi ni vito. Vito ra Xikwembu eku sunguleni a ri humelela minkarhi leyi endlaka magidi eBibeleni hinkwayo. Tibibele to tala ti na rona vito leri eka Pisalema 83:18 leyi nge: “Leswaku vanhu va ta swi tiva leswaku wena loyi vito ra wena u nga Yehovha, Wena u ri wexe u La nge Henhla-henhla emisaveni hinkwayo.”

Yehovha Xikwembu wa khumbeka hi swiendlo swa vanhu. Endzhaku ka loko Yehovha a ntshunxe Vaisrayele evuhlongeni aEgipta, minkarhi yin’wana a va nga yi yingisi ndzayo yakwe leyi pfunaka. Swiendlo swa vona swa ku xandzuka a swi n’wi “twisa ku vava.” Swiendlo swa vona a swi “twisa ni Mukwetsimi wa Israyele ku vava.”—Pisalema 78:40, 41.

Yehovha wa khathala hi un’wana ni un’wana wa hina. Loko Yesu a vulavula ni vadyondzisiwa vakwe u te: “Xana swindzingiri swimbirhi a swi xavisiwi hi mali ya nsimbi ya risima leritsongo ke? Kambe ku hava ni xin’we xa swona lexi nga waka ehansi Tata wa n’wina a nga swi tivi. Hambi ku ri misisi ya tinhloko ta n’wina yi hlayiwile hinkwayo. Hikokwalaho mi nga chavi: Mi ni risima ku tlula swindzingiri swo tala.”—Matewu 10:29-31.

Xikwembu a xi na xihlawuhlawu. Muapostola Pawulo u byele Vagriki eAtena leswaku Xikwembu “hi munhu un’we xi endle matiko hinkwawo ya vanhu, leswaku va tshama ehenhla ka vuandlalo hinkwabyo bya misava.” U tlhele a vula leswaku Xikwembu a xi le “kule ngopfu ni un’wana ni un’wana wa hina.” (Mintirho 17:26, 27) Kasi muapostola Petro u te: “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”—Mintirho 10:34, 35.

HI BYIHI VUYELO BYA KONA? Van’wana “va xi hisekela Xikwembu; kambe ku nga ri hikwalaho ka vutivi lebyi kongomeke.” (Varhoma 10:2) Loko u tiva leswi Bibele yi swi dyondzisaka hakunene malunghana ni Xikwembu, u nge kanganyisiwi naswona u ta kota ku ‘tshinela eka xona.’—Yakobo 4:8.

Leswaku u kuma rungula leri engetelekeke, vona ndzima 1 leyi nge, “Hi Yihi Dyondzo Leyi Nga Ntiyiso Malunghana Ni Xikwembu?,” ebukwini leyi nge Xana Bibele Yi Dyondzisa Yini Hakunene? *

[Nhlamuselo ya le hansi]

[Xifaniso lexi nga eka tluka 6]

Ndlela yin’wana leyi u nga kumaka vutivi hi Xikwembu i ku langutisa swilo leswi xi swi tumbuluxeke