Leswi Hi Nga Swi Dyondzaka Eka Yesu

Malunghana Ni “Makumu”

I makumu ya yini?

Vadyondzisiwa va Yesu va n’wi vutise va ku: “Xi ta va xihi xikombiso xa vukona bya wena ni xa makumu ya mafambiselo ya swilo?” (Matewu 24:3) Loko Yesu a hlamula xivutiso xexo a nga vulanga leswaku pulanete ya misava yi ta lovisiwa. Enkarhini lowu hundzeke, u vulavule hi “mafambiselo ya swilo” naswona u tirhise xiga xexo ku kombetela eka fambiselo hinkwaro ra tipolitiki, ra mabindzu ni ra vukhongeri lama lawuriwaka hi Sathana. (Matewu 13:22, 40, 49) Kutani mafambiselo wolawo hi wona lawa a a vulavula ha wona loko a ku: “Makumu ma . . . ta fika.”—Matewu 24:14.

Xana Yesu u ma hlamusele njhani makumu?

Ku herisiwa ka mafambiselo lawa yo homboloka i “mahungu lamanene.” Yesu u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” Yesu u hlamusele makumu ya mafambiselo ya swilo lama nga kona sweswi hi ndlela leyi: “Ku ta va ni nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona ku fikela sweswi, e-e, naswona a wu nge he tlheli wu va kona. Entiyisweni, loko masiku wolawo a ma nga hungutiwanga, ku hava nyama leyi a yi ta ponisiwa.”—Matewu 24:14, 21, 22.

I vamani lava nga ta lovisiwa?

Vanhu lava nga n’wi rhandziki Yehovha na Yesu naswona va nga va tirheliki hi vona ntsena lava nga ta lovisiwa. Vanhu vo tano a va xi yingisi Xikwembu. Yesu u te: “Hilaha masiku ya Nowa a ma ri hakona, ni masiku ya vukona bya N’wana wa munhu ma ta va tano. Hikuva kukota leswi a va ri xiswona emasikwini wolawo ya le mahlweni ka ndhambi, . . . va nga lemukangiki nchumu ku fikela loko ndhambi yi fika yi va kukula hinkwavo.”  (Matewu 24:36-39) Yesu u vule leswaku vanhu vo tala va le gondzweni leri yisaka eku lovisiweni. Hambiswiritano, u tshembise leswaku ku ni ‘gondzo leri laleke leri yisaka evuton’wini.’—Matewu 7:13, 14.

Xana mafambiselo lawa ya swilo ma ta fika rini emakumu?

Loko Yesu a vutisiwa malunghana ni xikombiso xa vukona byakwe “ni xa makumu ya mafambiselo ya swilo,” u hlamule a ku: “Tiko ri ta pfukela tiko rin’wana ni mfumo wu ta pfukela mfumo wun’wana, kutani ku ta va ni ku kayivela ka swakudya ni ku tsekatseka ka misava . . . nakambe rirhandzu ra vo tala ri ta hola hikwalaho ka ku engeteleka ka ku kala nawu.” (Matewu 24:3-12) Xisweswo mahungu hinkwawo yo biha lama nga kona namuntlha ma vula nchumu lowu tsakisaka—ku nga ri khale Mfumo wa Xikwembu wu ta tisa ku rhula eka vanhu lava yingisaka. Yesu u te: “Loko mi vona swilo leswi swi humelela, tivani leswaku mfumo wa Xikwembu wu kusuhi.”—Luka 21:31.

Xana u fanele u endla yini?

Yesu u vule leswaku Xikwembu “xi [nyikele] hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Leswaku u kombisa ripfumelo eka Xikwembu ni N’wana wa xona, u fanele u va tiva kahle. Hikwalaho Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Tivonele leswaku mivilelo ni swiphiqo swi nga ku siveli ku dyondza ndlela leyi u nga kombisaka ha yona leswaku wa xi rhandza Xikwembu. Yesu u te: “Tivoneleni leswaku timbilu ta n’wina ti nga tshuki ti tshikileriwa hi ku . . . vilela hi vutomi, kutani hi xitshuketa siku rero ri mi wela hi xihatla ku fana ni ntlhamu. Hikuva ri ta [ta].” Loko u yingisa xitsundzuxo xa Yesu, u ta “humelela loko [u] balekela swilo leswi hinkwaswo leswi nga ta humelela.”—Luka 21:34-36.

Leswaku u kuma rungula leri engetelekeke, vona ndzima 9 leyi nge “Xana Hi Hanya ‘eMasikwini Yo Hetelela’?,” ebukwini leyi nge Xana Bibele Yi Dyondzisa Yini Hakunene? *

[Nhlamuselo ya le hansi]