Bibele Yi Hundzula Vutomi Bya Vanhu

Xana i yini lexi endleke leswaku wanuna loyi a a rhandza mphikizano wa swithuthuthu, swidzidziharisi ni mintlango, a hlawule ku va muchumayeri wa mahungu lamanene wa nkarhi hinkwawo? I yini lexi susumeteleke wanuna loyi a a ri mugemburi wa ndhuma leswaku a tshika mukhuva wakwe wo gembula kutani a wundla ndyangu wakwe hi ntirho lowu xiximekaka? I yini lexi khutazeke wansati loyi a kurisiweke a ri Mbhoni ya Yehovha, loyi eku sunguleni a tshikeke ku hanya hi milawu ya Bibele leswaku a tlhela a hanya ha yona nakambe? Titwele hi ta wena loko va hi chumbutela.

MATIMU YAKWE HI KU KOMISA

VITO: TERRENCE J. O’BRIEN

MALEMBE: 57

TIKO LERI A VELEKIWEKE EKA RONA: AUSTRALIA

LESWI A A SWI ENDLA: A A TIRHISA SWIDZIDZIHARISI A TLHELA A RHANDZA MINTLANGO YA SWITHUTHUTHU

VUTOMI BYA MINA: Ndzi kulele edorobeni ra Brisbane, ku nga ntsindza wa Queensland. Ekaya a hi nghena kereke ya Khatoliki, kambe loko ndzi ri na malembe ya nhungu, hi tshike ku ya ekerekeni naswona a hi nga ha vulavuli hi vukhongeri. Loko ndzi ri na malembe ya khume, ndyangu wa ka hina wu rhurhele eGold Coast le Australia. Leswi a hi tshama ekusuhi ni lwandle, ndzi hete malembe ya vuntshwa ndzi ri karhi ndzi hlambela ni ku tlanga emagandlatini.

Hambiswiritano, a ndzi tiphinanga hi vuntshwa bya mina. Tatana u fambe a siya ndyangu loko ndzi ri na malembe ya nhungu. Manana u tlhele a tekiwa naswona timholovo ni byala ekaya a swi ri tshamelo maxelo. Siku rin’wana ni vusiku endzhaku ka ku holova ka vatswari va mina, a ndzi tshame ehenhla ka mubedo wa mina ndzi tibyela leswaku loko ndzo tshuka ndzi teka, a ndzi nge pfuki ndzi holove ni nsati wa mina. Ku nga khathariseki swiphiqo leswi a swi ri kona, ndyangu wa ka hina lowu a wu ri na swirho swa tsevu ku katsa manana na tatana loyi a a hi wundla, wu hambete wu tshama swin’we.

Loko ndza ha ri muntshwa, tintangha ta mina to tala a ti nga yingisi milawu ya mfumo. A ti dzaha mbangi, fole ni swidzidziharisi naswona a ti kukutlela byala. Na mina ku fana ni tintangha ta mina a ndzi hanya vutomi byebyo bya ku nga khathali. Nakambe a ndzi rhandza swithuthuthu. Hambileswi swi endleke leswaku ndzi katseka eka timhangu to tala, a ndzi tshikanga ku swi rhandza naswona ndzi kunguhate ku rhendzeleka hi swona etikweni ra Australia.

Ku nga khathariseki ntshunxeko lowu a ndzi ri na wona, hakanyingi a ndzi titwa ndzi ri na ntshikilelo loko ndzi anakanya hi xiyimo xa misava ni ndlela leyi ha yona vanhu vo tala va nga khathaliki hi swiphiqo  swa vanhu van’wana. A ndzi navela ku tiva ntiyiso malunghana ni Xikwembu, vukhongeri ni swiyimo swa misava. Kambe loko ndzi vutise vafundhisi vambirhi va kereke ya Khatoliki swivutiso leswi a ndzi ri na swona, tinhlamulo ta vona ti ndzi hete mongo. Ndzi tlhele ndzi vutisa vafundhisi vo hambana-hambana va kereke ya Protestente swivutiso leswi fanaka kambe ni tinhlamulo ta vona ti ndzi hete matimba. Kutani munghana wa mina u endle malunghiselelo ya leswaku ndzi hlangana na Eddie loyi a nga Mbhoni ya Yehovha. Ndzi vutise Eddie mune wa swivutiso naswona nkarhi na nkarhi a a tirhisa Bibele loko a hlamula. Loko ha ha sungula bulo ra hina ndzi nambe ndzi swi vona leswaku ndzi kume nchumu wo hlawuleka. Kambe hi nkarhi wolowo a ndzi nga xi voni xilaveko xo cinca ndlela leyi a ndzi hanya ha yona.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndzi ri karhi ndzi rhendzeleka etikweni ra Australia, ndzi hlangane ni Mbhoni yin’wana leyi ndzi buleke na yona. Kambe loko ndzi tlhelele eQueensland, a ndza ha hlangananga na tona Timbhoni ku ringana tin’hweti ta tsevu.

Kutani siku rin’wana loko ndzi ri karhi ndzi vuya entirhweni, ndzi vone vavanuna vambirhi lava a va ambale kahle va khome minkwama va ri karhi va famba exitarateni naswona ndzi ehlekete leswaku a va ri Timbhoni ta Yehovha. Ndzi va tshinelerile kutani ndzi kume leswaku hakunene a va ri tona kutani ndzi va kombela leswaku va dyondza na mina Bibele. Handle ko dya nkarhi, ndzi sungule ku ya eminhlanganweni ya Timbhoni ndzi tlhela ndzi ya entsombanweni lowu veke kona eSydney hi 1973. Nilokoswiritano, loko vatswari va mina va twa hi ta leswi a ndzi ri ku swi endleni, sweswo a swi va khomanga kahle. Hikwalaho ka leswi ku katsa ni swivangelo swin’wana, ndzi tshike ku tihlanganisa ni Timbhoni. Ku ringana nkarhi lowu nga endlaka lembe, ndzi dzikise mianakanyo ya mina eka nchumu lowu a ndzi wu rhandza, ku nga ku tlanga khrikete.

Hambiswiritano, eku heteleleni ndzi xiye leswaku a ndzi va ni ntsako wa xiviri ntsena loko ndzi dyondza Bibele ni Timbhoni ta Yehovha. Ndzi tlhele ndzi tihlanganisa na tona kutani ndzi sungula ku ya eminhlanganweni ya tona. Ndzi tlhele ndzi tihambanisa ni vanghana va mina lava tirhisaka swidzidziharisi.

Leswi ndzi swi dyondzeke hi Yobo wanuna loyi ku vulavuriwaka ha yena eBibeleni, swi ndzi pfune leswaku ndzi cinca mahanyelo ya mina. Bill loyi a nga Mbhoni leyi kuleke leyi nga ni musa naswona leyi nga debyisiki voko, a a tshamela ku bula na mina hi Bibele. Endzhaku ka loko hi dyondze hi rungula ra Yobo, Bill u ndzi vutisile leswaku i vamani van’wana lava Sathana a va hehleke hi leswaku a va tirheli Xikwembu hi timbilu ta vona hinkwato. (Yobo 2:3-5) Ndzi vule mavito ya vanhu hinkwavo lava ndzi va tivaka va le Bibeleni, naswona hi ku lehisa mbilu Bill u hlamule a ku, “Ina, ina, na vona volavo.” Hiloko a ndzi languta ematihlweni kutani a ku, “Sathana u katsa na wena eka xihehlo xexo!” Sweswo swi ndzi hlamarise ngopfu. Emahlweni ko heta ku fambiseriwa dyondzo ya Bibele, ndzi nambe ndzi swi vona leswaku leswi a ndzi swi dyondza a ku ri ntiyiso. Kambe loko hi ya emahlweni na dyondzo, ndzi swi twisisile leswaku ha yini a ndzi fanele ku tirhisa leswi a ndzi swi dyondza. Endzhaku ka tin’hweti ta mune ndzi khuvuriwile ndzi va Mbhoni ya Yehovha.

NDLELA LEYI NDZI VUYERIWEKE HA YONA: Swa ndzi tikela ku anakanya hileswi vutomi bya mina a byi ta va byi ri xiswona loko a ndzi nga dyondzanga ku hanya hi milawu ya Bibele. Kumbexana a ndzi ta va ndzi file. Vo tala lava a va ri vanghana va mina, va file hikwalaho ka swidzidziharisi kumbe byala. Nakambe a va nga tsakanga evukatini bya vona. Ndzi anakanya leswaku vutomi bya mina a byi ta va byi fana ni bya vona.

Sweswi ndzi tekile naswona mina ni nsati wa mina Margaret hi tiphina hi ku tirha erhavini ra Timbhoni ta Yehovha eAustralia. Ku hava ni un’we endyangwini wa ka hina loyi a veke Mbhoni ya Yehovha. Nilokoswiritano, ku ringana malembe yo tala mina na Margaret hi ve ni ntsako wa ku dyondza Bibele ni vanhu vo hlayanyana swin’we ni vatekani  lava hundzuleke vutomi bya vona hilaha na mina ndzi endleke hakona. Loko hi ri karhi hi endla tano, hi ve ni vanghana vo tala va kahle. Ku engetela kwalaho, Margaret loyi a kurisiweke a ri Mbhoni, u ndzi pfunile leswaku ndzi hetisisa xihlambanyo lexi ndzi xi endleke kwalomu ka malembe ya 40 lama hundzeke. Sweswi se hi ni malembe lama tlulaka 25 hi tekanile naswona hi ni ntsako. A hi minkarhi hinkwayo laha hi pfumelelanaka hi nchumu wun’wana ni wun’wana kambe ku fikela sweswi a hi si tshama hi holova. Havumbirhi bya hina hi nkhensa Bibele leswi yi hi pfuneke leswaku hi endla tano.

MATIMU YAKWE HI KU KOMISA

VITO: MASAHIRO OKABAYASHI

MALEMBE: 39

TIKO LERI A VELEKIWEKE EKA RONA: JAPANI

LESWI A A SWI ENDLA: MUGEMBURI

VUTOMI BYA MINA: Ndzi velekiwe eIwakura, ku nga xitikwana lexi u nga tekaka hafu ya awara ku ya eka xona hi xitimela loko u suka eNagoya. Manana na tatana a ndzi va teka va ri vanhu lava nga ni tintswalo swinene. Kambe endzhakunyana, ndzi tive leswaku tata wa mina a a ri yakuza kumbe nsula-voya, loyi ku ringana nkarhi wo karhi a wundleke ndyangu wa ka hina lowu nga ni swirho swa ntlhanu hi ku endla vugevenga bya ku kanganyisa vanhu. A a ri xilovekelo naswona loko ndzi ri na malembe ya 20, u dlayiwe hi vuvabyi bya xivindzi.

Tatana a a ri Mukoriya, hikwalaho ndyangu wa ka hina a wu nga khomiwi hi ndlela leyinene laha a hi tshama kona. Sweswo swin’we ni swiphiqo swin’wana swi endle leswaku vuntshwa bya mina byi nga tsakisi. Ndzi nghene xikolo xa le henhla kambe a ndzi nga yi minkarhi hinkwayo naswona ndzi tshikile endzhaku ka lembe. Leswi se a ndzi ri na rhekhodo ya milandzu emaphoriseni ni leswi tata wa mina a a ri Mukoriya, swi endle leswaku swi nga ndzi oloveli ku kuma ntirho. Ndzi hetelele ndzi wu kumile ntirho, kambe ndzi tivavise matsolo lerova ndzi nga ha swi koti ku endla ntirho wo tika.

Ndzi sungule ku tihanyisa hi ntlango wa ku gembula wa pachinko, lowu eka wona u faneleke u rhanga hi ku hoxa mali emuchinini leswaku u kota ku tlanga. Hi nkarhi wolowo a ndzi tshama ni nhwanyana loyi a a lava leswaku ndzi kuma ntirho wa kahle ndzi tlhela n’wi teka hi ku ya hi nawu. Kambe a ndzi endla mali yo tala hi ku gembula naswona a ndzi nga swi lavi ku swi tshika.

NDLELA LEYI BIBELE YI HUNDZULEKE VUTOMI BYA MINA HA YONA: Siku rin’wana Mbhoni ya Yehovha yi fike ekaya ka hina kutani yi ndzi siyela buku leyi nge, Life—How Did It Get Here? By Evolution or by Creation? A ndzi nga si tshama ndzi tivutisa xivutiso xexo. Nilokoswiritano, endzhaku ka ku hlaya buku yoleyo, ndzi pfumerile ku dyondza leswi engetelekeke hi Bibele. Minkarhi hinkwayo a ndzi tshamela ku tivutisa leswaku ku humelela yini loko munhu a file. Tinhlamulo leti twalaka ta le Bibeleni malunghana ni mhaka leyi swin’we ni tin’wana, ti endle leswaku ndzi twa onge ku na swilo leswi fanaka ni mahakatimba leswi weke ematihlweni ya mina.

Ndzi vone xilaveko xa ku tirhisa leswi a ndzi swi dyondza eBibeleni. Hikwalaho, ndzi tsarise vukati bya mina hi ku ya hi nawu, ndzi tshika ku dzaha,  ndzi tsemeta misisi ya mina yo leha leyi a yi dayiwile ni ku ambala hi ndlela leyi nga ni xindzhuti. Nakambe ndzi tshike ni ku gembula.

A swi nga ndzi oloveli ku endla ku cinca loku hinkwako. Hi xikombiso, a ndzi nga ta swi kota ku tshika fole hi matimba ya mina n’wini. Kambe hi xikhongelo lexi humaka embilwini ni ku tshembela eka Yehovha Xikwembu ndzi swi kotile ku ri tshika. Na ntirho lowu ndzi wu kumeke endzhaku ko tshika ntlango wa pachinko a wu ri ntlhontlho eka mina. Mali leyi a ndzi yi hola a yi ri hafu loko yi ringanisiwa ni mali leyi a ndzi yi kuma loko ndza ha gembula naswona ntirho a wu tika wu tlhela wu karharisa. Ndzimana ya Bibele leyi ndzi pfuneke hi nkarhi wolowo wo tika, a ku ri Vafilipiya 4:6, 7 leyi nge: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.” Minkarhi yo tala xitshembiso lexi xi ve ntiyiso eka mina.

NDLELA LEYI NDZI VUYERIWEKE HA YONA: Loko ndzi sungula ku dyondza Bibele ni Timbhoni ta Yehovha ro sungula, nsati wa mina a a nga swi tsakeli. Kambe loko a vona ku cinca lokukulu loku a ndzi ku endla emahanyelweni ya mina, na yena u sungule ku dyondza na mina naswona hi fambe swin’we eminhlanganweni ya Timbhoni ta Yehovha. Havumbirhi bya hina sweswi hi Timbhoni ta Yehovha. I nkateko lowukulu leswi hi tirhelaka Xikwembu hi ri swin’we!

Emahlweni ko va ndzi dyondza Bibele a ndzi anakanya leswaku ndzi ni ntsako. Kambe sweswi ndza swi tiva leswi ntsako wa xiviri wu nga swona hakunene. A swi olovi ku hanya hi milawu ya Bibele kambe ndza tiyiseka leswaku swa vuyerisa.

MATIMU YAKWE HI KU KOMISA

VITO: ELIZABETH JANE SCHOFIELD

MALEMBE: 35

TIKO LERI A VELEKIWEKE EKA RONA: UNITED KINGDOM

LESWI A A SWI ENDLA: A A HANYELA KU TIPHINA HI MAHELO-VHIKI

VUTOMI BYA MINA: Ndzi kulele eHardgate laha ku nga xidorobana lexi nga ehandle ka Glasgow eScotland. Loko ndzi ri ni malembe ya nkombo, mana wa mina loyi a a ri Mbhoni ya Yehovha, u sungule ku ndzi dyondzisa Bibele. Hambiswiritano, loko ndzi ri na malembe ya 17, a ndzi rhandza ku ti hlanganisa ni vanghana va mina va le xikolweni—ndzi ya etigigini, ndzi yingisela vuyimbeleri lebyi nga ni huwa leyikulu ni ku nwa byala. A ndzi tshamela ku anakanya hi swilo swin’wana ematshan’weni yo anakanya hi ku endla ku rhandza ka Xikwembu. Lexi a ndzi hanyela xona a ku ri ku tiphina hi mahelo-vhiki. Kambe sweswo hinkwaswo swi cincile loko ndzi ri na malembe ya 21.

Ndzi endzele maxaka ya mina man’wana lama tshamaka eNorthern Ireland. Loko ndzi ri kwalaho  ndzi vone ntlawa wa Maprotestente lowu vuriwaka Orange Walk wu ri karhi wu macha. Rivengo ra tihanyi leri ndzi nga ri vona siku rero exikarhi ka Maprotestente ni Makhatoliki ri ndzi tseme nhlana. Ri endle leswaku ndzi sungula ku anakanya hi swilo swo karhi. Ndzi tsundzuke swilo leswi manana a ndzi dyondziseke swona ku suka eBibeleni naswona a ndzi swi tiva leswaku Xikwembu a xi nge pfuki xi va amukerile lava honisaka milawu ya xona ya rirhandzu. Hikwalaho, ndzi hatle ndzi swi xiya leswaku a ndzi rhangisa swilaveko swa mina ni ku honisa ndlela leyi Xikwembu a xi lava leswaku ndzi hanya ha yona. Ndzi endle xiboho xa leswaku loko ndzi tlhelela ekaya eScotland, ndzi ta endla vulavisisi lebyi enteke bya leswi Bibele yi swi dyondzisaka.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndzi tlhelele ekaya, siku ro sungula loko ndzi ya eminhlanganweni ya Timbhoni ta Yehovha, ndzi khomiwe hi tingana ni ku chava. Hambiswiritano, hinkwavo va endle leswaku ndzi titwa ndzi amukelekile. Loko ndzi ri karhi ndzi sungula ku tirhisa leswi a ndzi swi dyondza eBibeleni, xirho xin’wana xa vandlha xi ti tshinetile eka mina. Xi ndzi pfune leswaku ndzi tlhela ndzi titwa ndzi ri xirho xa vandlha. Vanghana va mina va khale va ye emahlweni va ndzi rhamba leswaku ndzi ya na vona etigigini, kambe ndzi va byele leswaku ndzi tiyimisele ku hanya hi milawu ya Bibele. Eku heteleleni, va tshike ku ndzi rhamba.

Enkarhini lowu nga hundza a ndzi languta Bibele tanihi buku leyi nga pfuniki nchumu, kambe yi ri buku ya milawu ntsena. Sweswi vonelo ra mina ri cincile. Ndzi sungule ku vona leswaku vanhu lava ku vulavuriwaka ha vona eBibeleni i va xiviri naswona ku na ndlela leyi va titwaka ha yona, nakambe va ni swihoxo ku fana na mina. Na vona va swi endlile swihoxo naswona Yehovha Xikwembu a a va rivalela loko va tisola swi huma embilwini. Hambileswi ndzi fularheleke Xikwembu loko ndza ha ri ntsongo, ndzi sungule ku tiyiseka leswaku xi ta ndzi rivalela xi tlhela xi rivala swihoxo swa mina leswi ndzi swi endleke enkarhini lowu nga hundza, ntsena loko ndzi ringeta hi matimba ku xi tsakisa.

Ndlela leyi manana a a tikhoma ha yona yi ndzi tsakisile. Hambileswi mina ndzi fularheleke Xikwembu yena a nga xi fularhelanga. Xikombiso xakwe xo khoma swi tiya xi endle ndzi swi xiya leswaku swa vuyerisa hakunene ku tirhela Yehovha. A ndzi nga swi rhandzi ku ya entirhweni wo chumayela hi yindlu na yindlu ni mana wa mina loko ndza ha ri ntsongo, naswona a ndzi nga tivoni ndzi heta tiawara to tala ndzi ri eku chumayeleni ka vanhu. Hambiswiritano, sweswi ndzi tiyimisele ku vona ndlela leyi xitshembiso xa Yesu xi tirhaka ha yona, lexi kumekaka eka Matewu 6:31-33. U te: “Mi nga tshuki mi vilela kutani mi ku, ‘Xana hi ta dya yini?’ kumbe, ‘Xana hi ta nwa yini?’ kumbe, ‘Xana hi ta ambala yini?’ . . . Tata wa n’wina wa le tilweni wa swi tiva leswaku ma swi lava swilo leswi hinkwaswo. Kutani, hambetani mi lava mfumo ni ku lulama ka yena ku sungula, xisweswo swilo leswin’wana hinkwaswo mi ta engeteleriwa swona.” Endzhaku ko khuvuriwa tanihi Mbhoni ya Yehovha ndzi nambe ndzi tshika ntirho wo tihanyisa lowu a ndzi wu endla nkarhi hinkwawo, ndzi kuma lowu a ndzi ta wu endla hi masiku yo karhi ntsena kutani ndzi va muchumayeri wa nkarhi hinkwawo.

NDLELA LEYI NDZI VUYERIWEKE HA YONA: Loko ndza ha ri muntshwa naswona ndza ha hanyela ku tiphina hi mahelo-vhiki, a ndzi nga ri na wona ntsako. Vutomi bya mina a byi nga ri na xikongomelo. Leswi sweswi ndzi tirhelaka Yehovha hilaha ku heleleke ndzi titwa ndzi enerisekile. Vutomi bya mina byi ni xikongomelo. Sweswi ndzi tekiwile, naswona mina na nuna wa mina hi ya emavandlheni yo hambana-hambana ya Timbhoni ta Yehovha vhiki rin’wana ni rin’wana leswaku hi ya ma khutaza. Ntirho lowu, ndzi wu teka wu ri lunghelo lerikulu evuton’wini bya mina. Ndza n’wi nkhensa Yehovha leswi a nga ndzi nyika nkarhi wa leswaku ndzi tlhela ndzi n’wi tirhela!

[Marito lama tshahiweke exihlokweni lama nga eka tluka 27]

“Loko ha ha sungula bulo ra hina ndzi nambe ndzi swi vona leswaku ndzi kume nchumu wo hlawuleka. Kambe hi nkarhi wolowo a ndzi nga xi voni xilaveko xo cinca ndlela leyi a ndzi hanya ha yona”

[Marito lama tshahiweke exihlokweni lama nga eka tluka 29]

“A ndzi nga ta swi kota ku tshika fole hi matimba ya mina n’wini. Kambe hi xikhongelo lexi humaka embilwini ni ku tshembela eka Yehovha Xikwembu ndzi swi kotile ku ri tshika”

[Marito lama tshahiweke exihlokweni lama nga eka tluka 30]

“Enkarhini lowu nga hundza a ndzi languta Bibele tanihi buku leyi nga pfuniki nchumu, kambe yi ri buku ya milawu ntsena. Sweswi vonelo ra mina ri cincile. Ndzi sungule ku vona leswaku vanhu lava ku vulavuriwaka ha vona eBibeleni i va xiviri naswona ku na ndlela leyi va titwaka ha yona, nakambe va ni swihoxo ku fana na mina”