1, 2. Yesu u endle yini hi madyambu ya Nisani 14, hi 33 C.E.? (Vona xifaniso lexi nga eku sunguleni ka xihloko lexi.)

A KU ri vusiku naswona n’weti a wu vonaka wu helerile eYerusalema. A ku ri madyambu ya Nisani 14, hi 33 C.E. Yesu ni vaapostola vakwe a va ha ku tlangela Paseka, va tsundzuka ku kutsuriwa ka Vaisrayele evuhlongeni bya le Egipta malembe lama tlulaka 1 500 emahlweni ka kwalaho. Endzhaku ka sweswo Yesu ni vaapostola vakwe vo tshembeka va 11 va dye swakudya swo hlawuleka—leswi a swi ta va tsundzuxa ndlela leyi a a ta dlayiwa ha yona loko siku rolero ri nga si hela. *—Mat. 26:1, 2.

² Yesu u khongerile kutani a nyika vaapostola vakwe xinkwa lexo-ke-comela, a ku: “Tekani, mi dya.” Endzhaku ka sweswo u teke xinwelo xa vhinyo, a tlhela a khongela kutani a ku: “Nwanani eka xona, hinkwenu ka n’wina.” (Mat. 26:26, 27) Yesu a a nga ha ta hundzisela swakudya swin’wana eka vona, kambe a a ta dyondzisa valandzeri vakwe vo tshembeka swilo swo tala hi vusiku byebyo bya nkoka.

3. Hi swihi swivutiso leswi nga ta hlamuriwa exihlokweni lexi?

 ³ Yesu u xi simeke hi ndlela yoleyo Xitsundzuxo xa rifu rakwe lexi nakambe xi vuriwaka “xilalelo xa Hosi.” (1 Kor. 11:20) Van’wana va nga ha vutisa malunghana na xona va ku: Ha yini hi fanele hi tsundzuka rifu ra Yesu? Xinkwa ni vhinyo swi yimela yini? Hi nga xi lunghekela njhani Xitsundzuxo? I vamani lava faneleke va dya swifanekiselo? Naswona Vakreste va titwa njhani hi leswi Matsalwa ma swi vulaka hi ntshembo wa vona?

4. Rifu ra Yesu ri endle leswaku hi kota ku kuma yini?

⁴ Leswi hi nga vatukulu va Adamu, hi velekiwe hi ri ni xidyoho naswona ha fa. (Rhom. 5:12) A nga kona munhu la nga hetisekangiki loyi a nga nyikaka Xikwembu nkutsulo wa vutomi bya yena kumbe bya van’wana. (Ps. 49:6-9) Hambiswiritano, hi rifu ra yena, Yesu u hakele nkutsulo lowu nga wona ntsena lowu amukelekaka—miri wakwe lowu hetisekeke ni ngati yakwe leyi halatiweke. Loko Yesu a nyikele hi ntikelo wa nkutsulo eka Xikwembu, u endle leswaku swi koteka leswaku hi kutsuriwa eka xidyoho ni rifu ni ku kuma nyiko ya vutomi lebyi nga heriki.—Rhom. 6:23; 1 Kor. 15:21, 22.

5. (a) Hi swi tivisa ku yini leswaku Xikwembu na Kreste va va rhandza vanhu? (b) Ha yini hi fanele hi va kona loko ku tsundzukiwa rifu ra Yesu?

⁵ Lunghiselelo ra nkutsulo ri kombisa leswaku Xikwembu xa va rhandza vanhu. (Yoh. 3:16) Gandzelo ra Yesu ri kombisa leswaku na yena wa hi rhandza. Phela, loko Yesu a nga si ta laha misaveni loko a ha ri “mutirhi la nga ni vuswikoti” wa Xikwembu, “swilo leswi a [a] swi rhandza a swi ri ni vana va vanhu”! (Swiv. 8:30, 31) Ku kombisa leswaku ha swi tlangela leswi Xikwembu ni N’wana wa xona va hi endleleke swona, hi fanele hi susumeteleka ku va kona loko ku tsundzukiwa rifu ra Yesu, xisweswo hi yingisa xileriso lexi nge: “Tshamani mi ri karhi mi endla leswi leswaku mi ndzi tsundzuka.”—1 Kor. 11:23-25.

6. Hi fanele hi xi teka njhani xinkwa ni vhinyo leswi tirhisiwaka eXitsundzuxweni?

⁶ Loko Yesu a simeka Xitsundzuxo, a nga hundzulanga xinkwa hi singita xi va miri wa yena ni vhinyo yi va ngati ya yena. Ku ri na sweswo, u vule leswi malunghana ni xinkwa: “Leswi swi vula miri wa mina.” Malunghana ni vhinyo, u te: “Leswi swi vula ‘ngati ya ntwanano’ ya mina, leyi nga ta halateriwa vo tala.” (Mar. 14:22-24) Kutani, swi le rivaleni leswaku xinkwa ni vhinyo swi fanele swi tekiwa tanihi swifanekiselo.

7. Xinkwa lexi tirhisiwaka eXitsundzuxweni xi fanekisela yini?

⁷ Hi madyambu wolawo ya nkoka swinene hi 33 C.E., Yesu u tirhise xinkwa lexo-ke-comela lexi saleke loko va tlangela Paseka. (Eks. 12:8) EMatsalweni, minkarhi yin’wana comela yi fanekisela ku onhaka kumbe xidyoho. (Mat. 16:6, 11, 12; Luka 12:1) Hikwalaho i swa nkoka leswi Yesu a tirhiseke xinkwa lexo-ke-comela hikuva a xi wu fanekisela kahle miri wakwe lowu a wu nga ri na xidyoho. (Hev. 7:26) Hi yona mhaka hi tirhisaka xinkwa xa muxaka wolowo eXitsundzuxweni.

8. Vhinyo leyi tirhisiwaka eXitsundzuxweni yi fanekisela yini?

⁸ Vhinyo leyi Yesu a yi tirhiseke hi Nisani 14, hi 33 C.E., a yi fanekisela ngati ya yena, ku fana ni vhinyo leyi tirhisiwaka eXitsundzuxweni namuntlha. Ngati yakwe yi halatiwile eGolgota, ku nga ndhawu leyi nga ehandle ka Yerusalema, “leswaku [hi] rivaleriwa swidyoho.” (Mat. 26:28; 27:33) Leswi xinkwa ni vhinyo leswi tirhisiwaka eXitsundzuxweni swi fanekiselaka gandzelo ra risima ra Yesu leri nyikeriweke hikwalaho ka vanhu lava yingisaka ni leswi hi tlangelaka lunghiselelo rolero ra rirhandzu, swi fanerile leswaku hi swi lunghekela ku va kona eXilalelweni xa Hosi lembe ni lembe.

9. (a) Ha yini swi ri swa nkoka ku tirhisa xiyimiso xa ku hlaya ka Bibele ka Xitsundzuxo? (b) U titwa njhani hi nkutsulo?

⁹ Loko hi tirhisa xiyimiso xa ku hlaya ka Bibele  ka Xitsundzuxo lexi kumekaka eka xibukwana lexi nge Ku Kambisisa Matsalwa Siku Ni Siku, hi nga anakanyisisa hi leswi Yesu a swi endleke loko a nga si fa. Sweswo swi nga hi pfuna leswaku hi endla timbilu ta hina ti lunghekela Xilalelo xa Hosi. Makwerhu un’wana wa xisati u tsarile a ku: “Hi xi langutela hi mahlo-ngati Xitsundzuxo. Xi ya xi va xo hlawuleka swinene lembe ni lembe. Ndzi tsundzuka ndzi yime emoxari . . . ndzi langute ntsumbu wa tata wa mina loyi a ndzi n’wi rhandza, hiloko ndzi sungula ku vona ndlela leyi nkutsulo wu nga wa nkoka ha yona. . . . A ndzi ma tiva matsalwa hinkwawo ni ndlela yo ma hlamusela! Kambe loko ndzi feriwe hi munhu loyi ndzi n’wi rhandzaka, mbilu ya mina yi khanile hi ntsako loko ndzi ehleketa hi leswi hi nga ta endleriwa swona hikwalaho ka nkutsulo wolowo wa risima.” Loko hi tilunghiselela Xitsundzuxo, hi fanele hi anakanyisisa hi ndlela leyi gandzelo ra Yesu ri hi ntshunxaka ha yona eka xidyoho ni rifu.

10. Ku tilunghiselela Xitsundzuxo swi nga ha wu khumba njhani ntirho wa hina wa nsimu?

¹⁰ Ku tilunghiselela Xitsundzuxo swi nga ha katsa ku kunguhata ku tirha nkarhi lowu engetelekeke ensin’wini, kumbexana hi ku teka vuphayona bya nkarhinyana hi nkarhi wa Xitsundzuxo. Loko hi ri karhi hi rhamba swichudeni swa Bibele ni van’wana eXilalelweni xa Hosi, hi ta tsaka loko hi ri karhi hi vulavula hi Xikwembu, N’wana wa xona ni hi mikateko leyi nga ta kumiwa hi lava va tsakisaka Yehovha va tlhela va n’wi dzunisa.—Ps. 148:12, 13.

11. Ha yini Pawulo a vule leswaku Vakorinto van’wana a va dya va tlhela va nwa hi ndlela leyi nga fanelangiki eXitsundzuxweni?

¹¹ Loko u ri karhi u tilunghiselela Xilalelo xa Hosi, anakanya hi leswi muapostola Pawulo a swi tsaleleke vandlha ra Vakreste va le Korinto. (Hlaya 1 Vakorinto 11:27-34.) Pawulo u vule leswaku mani na mani la dyaka xinkwa a tlhela a nwa exinwelweni swi nga fanelanga, u ni “nandzu eka miri ni ngati ya Hosi,” Yesu Kreste. Hikwalaho mutotiwa u fanele a “tiyiseka leswaku wa faneleka endzhaku ka ku tikambisisa,” kutani hi kona a nga dyaka swifanekiselo. Loko a swi dya kambe a nga faneleki, u “dya a tlhela a nwa vuavanyisi ehenhla ka yena.” Vakorinto vo tala a va ‘tsanile ni ku vabya, kasi vo hlayanyana a va etlele eku feni hi tlhelo ra moya’ hikwalaho ko tikhoma hi ndlela yo biha. Swi nga ha endleka leswaku van’wana a va dya va tlhela va nwa ku tlula mpimo loko va nga si ya eXitsundzuxweni kumbe hi nkarhi wa xona lerova a va khudzehela. Loko va dya swifanekiselo hi ndlela yoleyo  leyi nga fanelangiki a swi va endla va nga amukeleki eka Xikwembu.

12. (a) Pawulo u xi fanise na yini Xitsundzuxo, naswona hi xihi xilemukiso lexi a xi nyikeke lava dyaka swifanekiselo? (b) Munhu la dyaka swifanekiselo u fanele a endla yini loko a endle xidyoho lexikulu?

¹² Pawulo u fanise Xitsundzuxo ni swakudya leswi vanhu va siyerisanaka swona, kutani u lemuxe lava dyaka swifanekiselo a ku: “A mi nge nwi xinwelo xa Yehovha swin’we ni xinwelo xa madimona; a mi nge dyi ‘etafuleni ra Yehovha’ swin’we ni le tafuleni ra madimona.” (1 Kor. 10:16-21) Loko munhu la dyaka swifanekiselo eXilalelweni xa Hosi a endle xidyoho lexikulu, u fanele a ya lava mpfuno eka vakulu. (Hlaya Yakobo 5:14-16.) Loko mutotiwa yoloye a humese “mihandzu leyi fanekelaka ku hundzuka,” u va a kombisa leswaku wa ri xixima gandzelo ra Yesu hi ku dya swifanekiselo swa Xitsundzuxo.—Luka 3:8.

13. Ha yini swi ta hi vuyerisa ku khongela hi ntshembo lowu Xikwembu xi hi nyikeke wona?

¹³ Loko hi ri karhi hi tilunghiselela ku ya eXitsundzuxweni, swi ta hi vuyerisa loko hi khongela hi tlhela hi anakanyisisa hi ntshembo lowu Xikwembu xi hi nyikeke wona. A ku na nandza la tinyiketeleke wa Yehovha tlhelo mulandzeri la tshembekaka wa N’wana wa yena loyi a nga ta lava ku kombisa leswaku a nga ri xiximi gandzelo ra Yesu hi ku dya swifanekiselo swa Xitsundzuxo, loko a nga ri na vumbhoni lebyi nga erivaleni bya leswaku yena i Mukreste la totiweke. Hikokwalaho, xana munhu a nga swi tivisa ku yini loko a faneleka ku dya swifanekiselo kumbe a nga faneleki?

14. I yini leswi vatotiwa va swi endlaka eXitsundzuxweni leswi va katsekaka eka ntwanano lowuntshwa?

¹⁴ Lava va dyaka swifanekiselo swa Xitsundzuxo hi ndlela leyi faneleke va tiyiseka leswaku va katseka eka ntwanano lowuntshwa. Malunghana ni vhinyo, Yesu u te: “Xinwelo lexi xi vula ntwanano lowuntshwa hikwalaho ka ngati ya mina.” (1 Kor. 11:25) Xikwembu xi tirhise muprofeta Yeremiya ku profeta leswaku xi ta endla ntwanano lowuntshwa lowu a wu hambana ni ntwanano wa Nawu lowu a xi wu endle ni Vaisrayele. (Hlaya Yeremiya 31:31-34.) Xikwembu xi endle ntwanano lowuntshwa ni Vaisrayele va moya. (Gal. 6:15, 16) Ntwanano lowu wu endliwe wu tirha hi gandzelo ra Kreste hi ku tirhisa ngati yakwe leyi halatiweke. (Luka 22:20) Yesu i Muhlanganisi wa ntwanano lowuntshwa, naswona vatotiwa lava tshembekaka lava katsekaka eka wona va ta dya ndzhaka ya le tilweni.—Hev. 8:6; 9:15.

15. I vamani lava katsekaka eka ntwanano wa Mfumo, naswona va ta kuma lunghelo rihi loko va tshembeka?

¹⁵ Vanhu lava fanelekaka ku dya swifanekiselo swa Xitsundzuxo va swi tiva leswaku va katseka eka ntwanano wa Mfumo. (Hlaya Luka 12:32.) Vanhu lava veke valandzeri va Yesu lava totiweke va tlhela va n’wi namarhela hi ku tshembeka, va tlhela va hlanganyela eku xanisekeni ka yena, a va ta fuma na yena etilweni. (Filp. 3:10) Leswi vatotiwa vo tshembeka va katsekaka eka ntwanano wa Mfumo, va ta fuma na Kreste tanihi tihosi ta le tilweni hilaha ku nga heriki. (Nhlav. 22:5) Va swi fanelekela ku dya swifanekiselo hi nkarhi wa Xilalelo xa Hosi.

16. Hlamusela hi ku komisa leswi Varhoma 8:15-17 yi vulaka swona.

¹⁶ Lava faneleke va dya swifanekiselo swa Xitsundzuxo i vanhu lava nga ni vumbhoni bya moya bya leswaku i vana va Xikwembu ntsena. (Hlaya Varhoma 8:15-17.) Xiya leswaku Pawulo u tirhise rito ra Xiaramu ra “Abba,” leri vulaka leswaku “Tatana!” N’wana a nga ha tirhisa rito leri loko a vitana tata wakwe, hikuva i rito leri kombisaka rirhandzu leri fambisanaka ni vuxaka lebyikulu na “papa” swin’we ni rito leri kombisaka xichavo ra “tatana.” Lava va amukeleke “moya wa ku vekiwa tanihi vana” i vana va Xikwembu lava totiweke hi moya. Moya wa xona wu nyikela vumbhoni swin’we ni moya wa vona,  wu va endla va tiyiseka leswaku i vana va Yehovha lava totiweke. A swi vuli swona leswaku a va ha swi lavi ku hanya laha misaveni. Va tiyiseka leswaku va ta va vadyandzhaka-kulobye na Yesu eMfun’weni wa le tilweni loko va tshembeka ku kondza va fa. Namuntlha, ku lo sala masalela ntsena eka valandzeri va Kreste va 144 000, lava ‘totiweke hi mukwetsimi,’ ku nga Yehovha. (1 Yoh. 2:20; Nhlav. 14:1) I moya wa yena lowu va susumetelaka ku huwelela va ku “Abba, Tatana!” Mawaku vuxaka lebyikulu lebyi va nga na byona ni Xikwembu!

17. Hi wihi ntshembo lowu vatotiwa va nga na wona, naswona va wu teka njhani?

¹⁷ Loko u ri Mukreste la totiweke, u tshama u ri karhi u vulavula hi ntshembo wa wena wo ya hanya etilweni loko u tiendlela swikhongelo swa wena. Loko Bibele yi vulavula hi ku ‘vutiwa’ hi Muteki wa le tilweni, Yesu Kreste, wa swi tiva leswaku sweswo swi tirha eka wena naswona u swi langutele hi mahlo-ngati ku va xiphemu xa “mutekiwa” wa Kreste. (2 Kor. 11:2; Yoh. 3:27-29; Nhlav. 21:2, 9-14) Loko Xikwembu eRitweni ra xona xi vulavula hi ndlela leyi xi va rhandzaka ha yona vana va xona va moya, u ri, “Ku vuriwa mina.” Naswona loko Rito ra Yehovha ri nyikela swiletelo eka vana va xona lava totiweke, moya lowo kwetsima wu ku susumetela ku yingisa ni ku vula leswi embilwini ya wena, “Sweswo swi tirha eka mina.” Moya wa Xikwembu ni wa wena swi nyikela vumbhoni bya leswaku u ni ntshembo wo hanya etilweni.

18. Hi wihi ntshembo lowu “tinyimpfu tin’wana” ti nga na wona, naswona u titwa njhani hi wona?

¹⁸ Hi hala tlhelo, loko u ri un’wana wa lava “ntshungu lowukulu” wa “tinyimpfu tin’wana,” Xikwembu xi ku nyike ntshembo wo hanya laha misaveni. (Nhlav. 7:9; Yoh. 10:16) U lava ku hanya hilaha ku nga heriki eParadeyisini, naswona swa ku tsakisa ku anakanyisisa hi leswi Bibele yi swi vulaka hi vutomi enkarhini lowu taka emisaveni. U swi langutele hi mahlo-ngati ku tiphina hi ku rhula lokukulu u ri karhi u hanya ni ndyangu wa wena ni vanhu van’wana vo lulama. U wu langutele hi mahlo-ngati nkarhi lowu vanhu va nga ta va va nga ha karhatiwi hi ku pfumaleka ka swakudya, vusweti, ku xaniseka, mavabyi ni rifu. (Ps. 37:10, 11, 29; 67:6; 72:7, 16; Esa. 33:24) U swi navela hi mbilu hinkwayo ku amukela vanhu lava pfuxiweke eku feni va ri ni ntshembo wo hanya hilaha ku nga heriki laha misaveni. (Yoh. 5:28, 29) U swi tlangela swinene leswi Yehovha a ku nyikeke ntshembo wo hanya laha misaveni! Hambileswi u nga dyiki swifanekiselo, u va kona eXitsundzuxweni u kombisa leswaku wa ri tlangela gandzelo ra nkutsulo ra Yesu Kreste.

19, 20. (a) I yini leswi nga endlaka leswaku u kota ku hanya hilaha ku nga heriki? (b) Ha yini u ta va kona eXilalelweni xa Hosi?

¹⁹ U nga hanya hilaha ku nga heriki, emisaveni kumbe etilweni loko u kombisa ripfumelo eka Yehovha Xikwembu, Yesu Kreste ni le ka nkutsulo. Loko u va kona eXitsundzuxweni, u ta kuma nkarhi wo anakanyisisa hi ntshembo wa wena ni hi nkoka lowukulu wa rifu ra Yesu. Hikwalaho tiyimisele ku va un’wana wa vanhu va timiliyoni lava nga ta va kona eXilalelweni xa Hosi endzhaku ka ku pela ka dyambu hi Ravuntlhanu, April 3, 2015, eTiholweni ta Mfumo ni le tindhawini tin’wana emisaveni hinkwayo.

²⁰ Ku va kona ka wena eXitsundzuxweni swi nga ha kurisa ndlela leyi u ri tlangelaka ha yona gandzelo ra nkutsulo ra Yesu. Ku yingiserisisa nkulumo ya kona swi nga ha ku susumetela ku kombisa vaakelani va wena rirhandzu hi ku va byela leswi u swi dyondzeke malunghana ni rirhandzu ra Yehovha ni xikongomelo xa yena lexikulu malunghana ni vanhu. (Mat. 22:34-40) Tiyimisele ku va kona eXilalelweni xa Hosi.