Timbhoni ta Yehovha a ti hlanganyeli eka tipolitiki hikwalaho ka leswi ti swi pfumelaka, leswi sekeriweke eBibeleni. A hi kuceteli leswaku nawu wo karhi wu cinca, a hi vhoteli mintlawa yo karhi ya tipolitiki kumbe lava faneleke va hlawuriwa, a hi lweli swikhundlha eka hulumendhe kumbe ku hlanganyela eka xiendlo xin’wana ni xin’wana xo lava ku cinca tihulumendhe. Ha tshemba leswaku Bibele yi nyikela swivangelo leswi twalaka leswi endlaka hi nga hlanganyeli.

•   Hi landzela xikombiso xa Yesu, loyi a aleke ku amukela xikhundlha xa tipolitiki. (Yohane 6:15) U dyondzise vadyondzisiwa vakwe leswaku va nga vi “xiphemu xa misava” kutani a swi veka erivaleni leswaku a va fanelanga va seketela timhaka ta tipolitiki.​—Yohane 17:14, 16; 18:36; Marka 12:13-17.

•   Hi tshembekile eka Mfumo wa Xikwembu, lowu Yesu a vulavuleke ha wona loko a ku: “Mahungu lamanene lawa ya Mfumo ma ta chumayeriwa emisaveni hinkwayo leyi akiweke.” (Matewu 24:14) Tanihi vayimeri va Mfumo wa Xikwembu lava nyikiweke ntirho wo tivisa ku ta ka wona, hi hambeta hi nga hlanganyeli eka timhaka ta tipolitiki ta matiko hinkwawo, ku katsa ni le ka leri hi tshamaka eka rona.​—2 Vakorinto 5:20; Vaefesa 6:20.

•   Hi ku hambeta hi nga hlanganyeli eka tipolitiki, hi kota ku vulavula hi mahungu lamanene ya Mfumo wa Xikwembu hi ku ntshunxeka eka vanhu lava tshembelaka eka tipolitiki. Hi ringeta ku kombisa hi marito ni hi swiendlo swa hina leswaku hi titshege hi Mfumo wa Xikwembu leswaku wu tlhantlha swiphiqo swa misava.​—Pisalema 56:11.

•   Tanihi leswi hi papalataka ku avana ka tipolitiki, hi ni vun’we tanihi vamakwerhu emisaveni hinkwayo. (Vakolosa 3:14; 1 Petro 2:17) Ku tlula kwalaho, vukhongeri lebyi nghenelelaka etimhakeni ta tipolitiki byi endla leswaku swirho swa byona swi avana.​—1 Vakorinto 1:10.

 Ku xixima tihulumendhe. Hambileswi hi nga hlanganyeliki eka tipolitiki, hi xixima vulawuri bya tihulumendhe bya laha hi tshamaka kona. Leswi swi fambisana ni xileriso xa Bibele lexi nge: “Moya-xiviri wun’wana ni wun’wana a wu tiveke ehansi ka valawuri lava tlakukeke.” (Varhoma 13:1) Hi yingisa nawu, hi hakela swibalo naswona hi tirhisana ni matshalatshala ya hulumendhe yo tisela vaaki va yona vuhlayiseki. Ematshan’weni yo hlanganyela eka matshalatshala man’wana ni man’wana yo langutela hulumendhe ehansi, hi landzela ndzayo ya Bibele ya ku khongelela “tihosi ni hinkwavo lava nga eswiyin’weni leswi tlakukeke,” ngopfu-ngopfu loko va endla swiboho leswi nga ta khumba ku gandzela ka hina hi ntshunxekile.​—1 Timotiya 2:1, 2.

 Nakambe hi xixima timfanelo ta van’wana to va va tiendlela swiboho swa vona vini etimhakeni ta tipolitiki. Hi xikombiso, a hi kavanyeti minhlawulo kumbe hi nghenelela eka lava hlawuleke ku vhota.

 Xana ku nga hlanganyeli ka hina eka tipolitiki i nchumu wa manguva lawa? Doo. Vaapostola ni Vakreste van’wana va lembe-xidzana ro sungula va teke goza leri fanaka eka vulawuri bya hulumendhe. Buku leyi nge Beyond Good Intentions yi ri: “Hambileswi a va fanele va xixima valawuri, Vakreste vo sungula a va nga tshembeli eka ku hlanganyela etimhakeni ta tipolitiki.” Hilaha ku fanaka, buku leyi nge On the Road to Civilization yi vula leswaku Vakreste vo sungula “a va nga ri na swikhundlha eka tipolitiki.”

 Xana ku va hi nga hlanganyeli eka tipolitiki swi xungeta vuhlayiseki bya tiko? Doo. Hi vaaka-tiko lava rhandzaka ku rhula lava valawuri va hulumendhe va nga fanelangiki va va chava. Xiya xiviko xa 2001 lexi kandziyisiweke hi National Academy of Sciences ya le Ukraine. Loko xi vulavula hi ku nga hlanganyeli ka hina eka tipolitiki, xi te: “Namuntlha vanhu van’wana va nga venga xiboho lexi xa Timbhoni ta Yehovha, ku nga xivangelo lexi nga erivaleni lexi endleke leswaku ti hehliwa hi ntlawa wa Manazi ni hi mimfumo ya Makhomunisi ya le nkarhini lowu hundzeke.” Kambe hambiloko ti ri karhi ti fumiwa hi Soviet, Timbhoni ti “hambete ti ri vaaka-tiko lava xiximaka nawu. Hi ku tshembeka ni ku pfumala vutianakanyi ti tirhe emapurasini ni le tindhawini ta vumaki naswona a ti wu xungetanga mfumo wa Makhomunisi.” Hilaha ku fanaka ninamuntlha, leswi Timbhoni ta Yehovha ti swi tshembaka ni swiendlo swa tona a swi “xungeti vuhlayiseki bya tiko ni bya hulumendhe yin’wana ni yin’wana,” hilaha xiviko xi gimeteke hakona.