•  Magezu yo vhulula mutlhangano 2

•  Titshomba ti nga ka Mhaka ya Nungungulu 3-5

  •  Kanelo 3

  •  Titshomba ta moya 4

  •  Ku lera Bhibhiliya 5

•  Ti tsitsirite ntirweni wa kuchumayela 6-14

  •  Ku sangula mabhulo 7

  •  Ku hlakulela kutsakela 8

  •  Maha vapizani 9

  •  Tlhamusela lezvi u zvi kholwako 10

  •  Kanelo 11

  •  Mahungu 12

  •  Zviyimo zva machumayelela 13

  •  Matirisela ya tivhidhio ni mabhuku 14

•  Mahanyela ya wuKristu 15-16

  •  Cigondzo ca Bhibhiliya ca bandla 16

•  Magezu yo dayelela 17

•  Ku dzundza ni ku nyika wusungukati 18

•  Cikhati 19

•  Liendzo la muwoneleli wa cipandze 20

•  Vhiki ga mutlhangano wa cipandze kutani gotsovanyano 21

•  Vhiki ga Cialakanyiso 22

•  Muwoneleli wa Mutlhangano wa ntiro ni mahanyela 23

•  Mukhomi wa citshamu wa Mutlhangano wa ntiro ni mahanyela 24

•  Sungukati ga kuvhunetela 25

•  Tisala tin’wani 26

•  Tivhidhio 27

1. A zvileletelo zvi nga ka phepha legi zvi ta vhuna vontlhe lava va nga ni zvipandze ka Mutlhangano wa ntiro ni mahanyela. Na va nga se longisela, vontlhe va fanele ku ranga hi ku vhuxeta a zvileletelo zva zvipandze zvabye zvi nga ka Cibhukwana ca Mutlhangano wa ntiro wa hina ni mahanyela ya wuKristu ni zvileletelo zva phepha legi. A vahuweleli vontlhe va fanele ku kuciwa lezvaku va ti hendleleta kasi ku veka zvipandze zva zvigondzani. Lava va hlengelako nguvhu ni bandla vonawu va nga veka zvipandze zva zvigondzani loku va vhumela tigondzo ta Bhibhiliya ni loku va hanya hi matshinya ya milayo ya wuKristu kambe. A muwoneleli wa Mutlhangano wa ntiro ni mahanyela i fanele ku bhula hi lezvi zvi lavekako ka ni wihi a kalako a nga hi muhuweleli a xuvako ku maha zvipandze a tlhela a mu byela loku a ringanelwa. A mabhulo lawo ma fanele ku mahiwa na ku hi ni loyi a mu gondzisako Bhibhiliya (kutani na ku hi ni mupswali a nga muKristu). Lezvi zvi lavekako ka loyi a lavako ku maha zvipandze zva fana ni zva loyi a lavako kuva muhuweleli wo kala kubhabhatiswa. — Hi xaxametilwe cip. 8 par. 8.

2. 1 minuto. Vhiki ni vhiki, andzhako ka lisimu lo sangula ni mukhongelo, a mukhomi wa citshamu wa Mutlhangano wa ntiro ni mahanyela i ta wula magezu ma to hi vhuxela manyawunyawu ya lezvi zvi to landzela. I fanele ku veka kupima ka timhaka leti a bandla gi to vhuneka nguvhu hi tona.

 3. Kanelo: 10 minuto. A hloko ya mhaka ni timhaka-tshinya timbiri kutani tinharu ta kanelo leyi, zvi kwalaha ka Cibhukwana ca Mutlhangano wa ntiro ni mahanyela. A kanelo leyi yi fanele ku vekiwa hi dhota kutani nandza go vhunetela gi ringanelwako. Loku ku hi lezvaku ka vhiki lego mu lava ku sangula ku gondza a bhuku giswa ga Bhibhiliya ka kugondza ka Bhibhiliya ka vhiki ni vhiki, ku ta bisiwa vhidhio leyi yi to nyika masemanyana ya bhuku lego. A mukaneli a nga ha komba lezvi a vhidhio leyo yi longolokisako zvona ni hloko ya mhaka. Hambulezvo, i fanele ku wulawula hi timhaka-tshinya leti ti xaxametilweko ka cibhukwana ca mutlhangano. Ahandle ka lezvo, loku a cikhati ci vhumela, i fanele ku tlhamusela khwatsi a mifota hakuva yi tsalelwe ku nyika ntamu a mahungu lawa ma to gondziwa. A nga patsa ni mahungu man’wani, loku ku hi lezvaku ma nga mu vhuna ku tlhamusela a timhaka leti ti nga laha ka cipandze leci.

 4. Titshomba ta moya: 10 minuto. Leci cipandze ca zviwutiso ni mihlamulo. A ci lavi magezu yo sangula hi wona mabhulo ne hambu ya kudayelela. Ci fanele ku mahiwa hi dhota kutani nandza go vhunetela gi ringanelwako. I fanele ku wutisa a zviwutiso zvontlhe zva zvimbiri zvi nga ka cipandze leci. A cin’wani kambe, i fanele ku hlola a tiva lezvaku a mavhesi lawa ma kumbukilweko ma ta leriwa wontlhe ke. Lava va nyiketiwako ku hlamula va fanele ku hlamula hi 30 segundo kutani ku nga chikeli.

 5. Ku lera Bhibhiliya: 4 minuto. A ciavelo leci ca zvigondzani ci fanele ku mahiwa hi wanuna. A cigondzani ci fanele ku lera a cipandze leci ci avelweko na ci nga rangangi hi ku wula nchumu kusanguleni ge hambu ku wula nchumu magumo. A mukhomi wa citshamu wa mutlhangano i fanele ku ti karatela nguvhu ku vhuna a cigondzani lezvaku ci lera khwatsi, ci lera timhaka ti tekela ku zwala, ku dlunyatisa magezu lawa ma faneleko, ku cicacica gezu, ku koka moya, ni ku lera kota lezvi ci wulawulisako zvona. Kota lezvi a zvipandze zvo kari zva ku lera Bhibhiliya zvi nga leha, a zvin’wani zvi koma, a muwoneleli wa Mutlhangano wa ntiro ni mahanyela i fanele ku maha zviavelo zva cipandze leci na a alakanyela a lerela ga cigondzani cin’we ni cin’wani.

6. 15 minuto. A cipandze leci ci mahelwe ku nyika vontlhe a thomo ga ku gondza ku chumayela ni ku chukwatisa a wutlhari gabye ga ku sangula mabhulo, machumayelela ni magondzisela yabye. Loku zvi laveka, a madhota ma nga tshuka ma nyikiwa a zviavelo zva zvigondzani. A cigondzani cin’we ni cin’wani ci fanele ku tirela ka mhaka ya cigondzo yi nga ka broxura Gondzisa khwatsi kutani Randza vanhu yi nga ndzeni ka maparente ma nga magumo ka ciavelo ka Cibhukwana ca Mutlhangano wa ntiro ni mahanyela. Ka zvikhati zvin’wani ku ta tshuka kuva ni cipandze ca mabhulo. A cipandze leco ci fanele ku rangelwa hi dhota kutani nandza go vhunetela gi ringanelwako. — Wona  paragrafo 15 xungetano hi mamahela ya zvipandze zva mabhulo.

 7. Ku sangula mabhulo: A ciavelo leci ca zvigondzani ci nga mahiwa hi wanuna kutani wasati. Loku loyi a nyikiwako ciavelo leci a hi wanuna, a muvhuneteli wakwe i fanele kuva wanuna; loku ci nyikiwa wasati, a muvhuneteli wakwewo i fanele kuva wasati. A wanuna ni wasati va ngo maha zvin’we ntsena loku va hi va ngango wun’we. A cigondzani ni muvhuneteli wa kona va nga maha na va tshamile kutani na va yimile. — Kasi ku kuma man’wani mahungu hi mamahela ya cipandze leci, wona  maparagrafo 12 ni  13.

 8. Ku hlakulela kutsakela: A ciavelo leci ca zvigondzani ci nga mahiwa hi wanuna kutani wasati. Loku loyi a nyikiwako ciavelo leci a hi wanuna, a muvhuneteli wakwe i fanele kuva wanuna; loku ci nyikiwa wasati, a muvhuneteli wakwewo i fanele kuva wasati. (km-T 5/97 p. 3) A cigondzani ni muvhuneteli wa cona va nga maha na va tshamile kutani na va yimile. A cigondzani ci wa kombe lezvi hi faneleko ku wula loku hi hlakulela a kutsakela ka munhu ka mabhulo yo gumesa hi vileko nawo. — Kasi ku kuma man’wani mahungu hi mamahela ya cipandze leci, wona  maparagrafo 12 ni  13.

 9. Maha vapizani: A ciavelo leci ca zvigondzani ci nga mahiwa hi wanuna kutani wasati. Loku loyi a nyikiwako a ciavelo leci a hi wanuna, a muvhuneteli wakwe i fanele kuva wanuna; loku ci nyikiwa wasati, a muvhuneteli wakwewo i fanele kuva wasati. (km-T 5/97 paj. 3) A cigondzani ni muvhuneteli wa cona va nga maha na va tshamile kutani na va yimile. Ka ciavelo leci, a cigondzani ci wa kombise cipandzana ca cigondzo ca Bhibhiliya ci sinako ci famba, a ku khwatsi hi loku a vaingiseli va no va kumela cikari. A ku wuliwi magezu yo sangula hi wona mabhulo ne hambu magezu ya ku dayelela, ahandle ka loku a cigondzani ci nyikilwe ku tirela ka cin’we ca zvigondzo lezvo. A zvizi zvi lava ku u lera a mahungu wontlhe lawa u avelweko, hambu lezvi ka ku u nga lera.

 10. Tlhamusela lezvi u zvi kholwako: Loku ku hi kanelo, a cipandze leci ca zvigondzani ci fanele ku mahiwa hi wanuna. Loku ku hi mukombiso, a cipandze leci ci nga vekiwa hi cigondzani ca wanuna kutani ca wasati. Loku loyi a nyikiwako ciavelo leci a hi wanuna, a muvhuneteli wakwe i fanele kuva wanuna; loku ci nyikiwa wasati, a muvhuneteli wakwewo i fanele kuva wasati. A wanuna ni wasati va ngo maha zvin’we ntsena loku va hi va ngango wun’we. A cigondzani ci fanele ku hlamula a ciwutiso ca hloko ya mhaka hi ndlela yo dlunyateka ni ya cichavo na ci tirisa a mahungu ma tako ka ciavelo cakwe. A cigondzani ci nga hlawula ku kumbuka kutani ku nga kumbuki a bhuku legi a mahungu ya cona ma seketelweko kona.

 11. Kanelo: A ciavelo leci ca zvigondzani ci fanele ku mahiwa hi wanuna kota kanelo yi vekelwako bandla. Loku a kanelo yi seketelwe ka mhaka yo kari yi nga ka apendise A ya broxura Randza vanhu, a cigondzani ci fanele ku tlhamusela lezvi a vhesi kutani mavhesi lawo ma nga tirisisiwako zvona ntirweni wa kuchumayela. Hi cikombiso, a nga tlhamusela a ku hi rini a vhesi lego gi nga tirisiwako, a nga nyika tlhamuselo wa vhesi, kutani ku komba ndlela ya kupimisana ni munhu hi vhesi lego. Loku a kanelo yi seketelwe ka yin’we ya timhaka ta zvigondzo zvi nga ka broxura Randza vanhu, a cigondzani ci fanele ku veka kupima ka lezvi a mhaka leyo hi nga yi tirisisako zvona ntirweni wa kuchumayela. A nga tlhamusela a cikombiso ci nga ka mhaka 1 ya cigondzo kutani ku tlhamusela ni wahi mavhesi man’wani ya cigondzo leco, loku zvi vhuna.

   12. Mahungu: A mahungu ya paragrafo legi ni legi gi landzelako ma tira ka zviavelo zva “Ku sangula mabhulo” ni “Ku hlakulela kutsakela”. Loku ku nga hi na cileletelo cin’wani, a kungo ga cigondzani ku bhula hi lisine lo olova la Bhibhiliya yi nga ya lisima ka munhu loye a bhulako naye ni ku zima ciseketelo ca mabhulo va to tlhela vava nawo. A cigondzani ci fanele ku hlawula a mhaka yi ringanako yi nga vhunako lomu cipandzeni ca n’wina. A nga boha ku tirisa kutani ku nga tirisi a bhuku kutani vhidhio zvi nga ka feramenta ya hina ya ku gondzisa hi yona. Wutshan’wini ga ku tirisa a cingheniso a ci khomileko hi hloko, a cigondzani ci fanele ku gondza a wutlhari ga ku sangula mabhulo, go kota ku wulawula hi zvilo zvi khumbako van’wani ni ku wulawula hi ndlela ya ntumbuluko.

   13. Zviyimo zva machumayelela: A cigondzani ci fanele ku zwananisa a ciyimo ci avelweko ni lezvi zvi tolovelekileko lomu cipandzeni. Hi cikombiso:

1.  (1) Hi muti ni muti: A ciyimo leci ci patsa a ku chumayela hi muti ni muti — ku ngava hi nghohe ni nghohe, hi fone, kutani hi papilo — ni ku hlakulela a kutsakela ka munhu u bhulileko naye ka wukustumunyu ga muti ni muti.

2.  (2) Wukustumunyu ga citshuketi: A chumayelela legi gi komba tindlela ta ku londzowota mole wa ku cica mabhulo yo toloveleka mava wukustumunyu. Gi nga patsa ku bhula hi mhaka yo kari ya Mutsalo ni lava u kumanako navo ntirweni, cikoleni, vaakelani, lomu xapeni, kutani ni ka gihi wutshamu a cikhati u mahako mitiro ya wena ya siku ni siku.

3.  (3) Wukustumunyu ga laha kubaseni: A chumayelela legi gi nga patsa ku chumayela hi cikarinyana, ku bhula ni vanhu lomu mamerkadho, ku chumayela lomu maruweni, kutani ku chumayela lomu maparki, lomu maparajini, kutani ni kwihi ku nga ni vanhu.

 14. Matirisela ya tivhidhio ni mabhuku: Hi kuya hi ciyimo, a cigondzani ci nga boha ku tirisa vhidhio kutani gin’we ga mabhuku. Loku a cipandze ca cigondzani ci patsa vhidhio kutani loku a cigondzani ci hlawula ku yi tirisa, ci fanele ku yi kombisa ci tlhela ci wulawula hi yona kanilezvi ci nga bisi.

15. Andzhako ka lisimu, a 15 minuto yi to landzela ka cipandze leci yi ta tira ka cipandze cin’we kutani zvimbiri zvi mahelweko ku vhuna lava va nga kona lezvaku va hanya hi Mhaka ya Nungungulu wutomini gabye. Loku ku nga wuliwangi nchumu wun’wani, a zvipandze lezvi zvi nga nyikiwa madhota kutani malandza yo vhunetela ma ringanelwako, a ku tsika zvilaveko zva bandla, lezvi contlhe cikhati zvi faneleko ku mahiwa hi dhota. Loku a cipandze ci hi ca mabhulo, ahandle ka ku maha zviwutiso lezvi zvi sinako zvi wuya ka cipandze leco basi, a mukaneli a nga maha zviwutiso zvin’wani ndzeni ka cipandze leco. I fanele ku komisa a cingheniso cakwe kasi a siya cikhati ca ku wulawula hi timhaka-tshinya ni ca ku a vaingiseli va hlamula. Loku a cipandze leco ci hi ni entrevhista, loku zvi koteka i chukwana nguvhu ku loyi a lavako ku entrevhistariwa a nyikela mihlamulo na a hi laha tribhuna wutshan’wini ga ku nyikela na a tshamile zvin’we ni vaingiseli.

  16. Cigondzo ca Bhibhiliya ca bandla: 30 minuto. A Cigondzo ca Bhibhiliya ca bandla ci fanele ku fambisiwa hi dhota gi ringanelwako. (Ka mabandla lawa ku nga ni madhota ma tsongwani, ku nga ha tirisiwa a malandza yo vhunetela ma ringanelwako, loku zvi laveka.) A hubye ya madhota yi fanele ku hlola yi tiva ku himani a ringanelwako hi ku fambisa a Cigondzo ca Bhibhiliya ca bandla. Lava va hlawulilweko va fanele kuva ni wutlhari ga ku gondzisa khwatsi kasi a cigondzo leci ci nga hundzisi cikhati, va dlunyatisa mitsalo-tshinya, ni ku vhuna a mun’we ni mun’wani lezvaku a wona a lisima la mahungu lawa ma gondziwako. Lava va pasisilweko va nga kuma wusungukati gi nene ga mafambisela ya cigondzo leci hi ku vhuxeta zvileletelo zvi humesilweko xungetano hi mafambisela ya zvipandze zva zviwutiso ni mihlamulo. (Murindzeli 04.23 paj. 24, kwadru) Loku mu mbhetile ku bhula hi mahungu lawa mu nyikilweko ku gondza ka vhiki lego, a ku na cilaveko ca ku simama mu lava zvilo zva ku bhula hi zvona kasi ku eneta cikhati. Lomu zvi kotekako, tirisani a vafambisi ni valeri vo hambana vhiki ni vhiki. Loku a mukhomi wa citshamu wa Mutlhangano wa ntiro ni mahanyela a leletela lezvaku a cigondzo ci fanele ku komisiwa, a mufambisi i fanele ku hlota a ndlela ya ku komisa cigondzo. A nga ha hlawula ku nga leri a maparagrafo yo kari.

17. 3 minuto. A mukhomi wa citshamu wa Mutlhangano wa ntiro ni mahanyela i ta vhuxeta timhaka-tshinya leti ti nga ta lisima nguvhu ti gondzilweko mutlhanganweni. A cin’wani kambe, i fanele ku nyika masemanyana ya lezvi zvi to gondziwa ka vhiki gi tako. Loku a zvi lava ni loku a cikhati ci hi kona, a nga tivisa mavito ya zvigondzani lezvi zvi nga ni zvipandze ka vhiki gi tako. Loku ku nga wuliwangi nchumu wun’wani wo hambana ni lowu, ni cihi citiviso ci faneleko ku mahiwa kutani papilo gi faneleko ku leriwa, zvi fanele ku lerelwa bandla hi mukhomi wa citshamu ka magezu yakwe yo dayelela. A zvitiviso zvo toloveleka, zvo kota zva mitlhangano ya ntiro wa simu ni zva ku basisa Salawu, a zvi faneli ku mahiwa laha tribhuna; zvi wa namekiwe ka kwadru ga zvitiviso. Loku a wona ku zvi nga ta koteka ku maha zvitiviso zvontlhe kutani ku lera mapapilo wontlhe ndzeni ka cikhati ca magezu yo dayelela, a mukhomi wa citshamu i fanele ku kombela vamakabye lava va nga ni zviavelo ka cipandze ca Mahanyela ya wuKristu lezvaku va komisa zvipandze zvabye kasi va mu siyelanyana cikhati ci lavekako. (Wona  paragrafo 16 ni  19.) A mutlhangano wu ta gumesa hi lisimu ni mukhongelo.

18. Andzhako ka cipandzana cin’we ni cin’wani ca zvigondzani, a mukhomi wa citshamu wa Mutlhangano wa ntiro ni mahanyela i na ni 1 minuto basi kutani ku nga chikeli, ya ku dzundza cigondzani ni ku ci nyika wusungukati gi seketelwako ka mhaka leyi a cigondzani ci tirelako ka yona. A cikhati leci a mukhomi wa citshamu a vitanako a cigondzani lezvaku ci ta maha cipandze ca cona, a nga ta wula a cigondzo leci ci tirelako ka cona. Hambulezvo, neti a cigondzani ci ku bhi, a gumesa a wula magezwana mangani ya ku ci dzundza, a mukhomi wa citshamu a nga ha wula laha a cigondzani ci nga tirela kona, a tlhela a wula ku hikuyini a cigondzani ci mahileko khwatsi kutani ku tlhamusela khwatsanyana lezvaku hikuyini a cigondzani ca ha faneleko ku chukwatisa zvokari ka cigondzo leco ni lezvi ci nga chukwatisisako zvona. A mukhomi wa citshamu a nga ha wula zvin’wani xungetano hi mukombiso loku a alakanya lezvaku a magezu lawo ma ta vhuna cigondzani kutani lava va nga kona. A cigondzani ci nga ha nyikiwa wusungukati gin’wani gi akako na va hi cihundleni, gi nga ka broxura Randza vanhu, Gondzisa khwatsi kutani ka bhuku Escola do Ministério, andzhako ka mutlhangano kutani ka cin’wani cikhati; a wusungukati lego gi ngava na gi yelana ni cigondzo leci a nga tirela ka cona kutani na gi yelana ni cin’wani cigondzo. — Kasi ku tiva zvin’wani xungetano hi ntiro wa mukhomi wa citshamu wa Mutlhangano wa ntiro ni mahanyela ni wa sungukati ga kuvhunetela, wona a  paragrafo 19,  24, ni  25.

19. A ku na cipandze ni cin’we ci faneleko ku hundzisa cikhati, ne hambu magezu ya mukhomi wa citshamu wa Mutlhangano wa ntiro ni mahanyela. Hambu lezvi a Cibhukwana ca Mutlhangano wa ntiro ni mahanyela ci kombako a timinuto ta cipandze cin’we ni cin’wani, loku a mahungu wontlhe ma tlhamuselwe khwatsi ma enela, a zvizi zvi lava ku u wulawula kala u mbheta timinuto leti ti nga tsaliwa. Loku a zvipandze zvi hundzisa cikhati, a mukhomi wa citshamu wa Mutlhangano wa ntiro ni mahanyela kutani sungukati ga kuvhunetela va fanele ku nyikela wusungukati cihundleni. (Wona  paragrafo 24 ni  25.) A mutlhangano wontlhe, a ku patsa ni tisimu ni mikhongelo, wu fanele ku mahiwa hi hora ni 45 minuto.

 LIENDZO LA MUWONELELI WA CIPANDZE

20. Loku a bandla gi endzelwa hi muwoneleli wa cipandze, a mutlhangano wu fanele ku fambisa lezvi zvi xaxametisilweko zvona ka Cibhukwana ca Mutlhangano wa ntiro ni mahanyela, ku cica lezvi basi: A Cigondzo ca Bhibhiliya ca bandla ci nga ndzeni ka cipandze leci ca ku Mahanyela ya wuKristu ci ta vhaletiwa hi kanelo ya ntiro ya 30 minuto yi vekiwako hi muwoneleli wa cipandze. Cikhatanyana mahlweni ka kanelo ya ntiro, a mukhomi wa citshamu wa Mutlhangano wa ntiro ni mahanyela i ta vhuxeta lezvi zvi gondzilweko, a nyika masemanyana ya lezvi zvi to gondziwa ka vhiki gi landzelako, a tivisa lezvi zvi lavako ku tivisiwa loku zvi hi kona a tlhela a lera mapapilo lawa ma lavako ku leriwa a gumesa a vitana muwoneleli wa cipandze. Andzhako ka kanelo ya ntiro, a muwoneleli wa cipandze i ta vhala mutlhangano hi lisimu leli yena a to li hlawula. Loku a zvi lava, a nga vitana makabye mun’wani lezvaku a ta vhala hi mukhongelo. Ka vhiki ga liendzo la muwoneleli wa cipandze, a ku vekiwi zvipandze hi lirimi la bandla lego ka tin’wani tisala. Loku ku hi ni ntlawa wa lin’wani lirimi, wu nga maha a mitlhangano ya wona hambu loku a muwoneleli wa cipandze a endzela a bandla legi a ntlawa lowo wu nga ka gona. Hambulezvo, a ntlawa lowo wu fanele ku wuya wu ta patsana ni bandla legi wu nga ka gona kasi ku ta ingisela a kanelo ya ntiro ya muwoneleli wa cipandze.

21. Ka vhiki ga mutlhangano wa cipandze kutani gotsovanyano, a ku mahiwi mutlhangano wa bandla ne wun’we. A bandla gi fanele ku alakanyisiwa lezvaku a mahungu lawa ma nga wa ta gondziwa mitlhanganweni ka mavhiki lawo a munhu ni munhu i ta gondza yece kutani hi ngango.

22. Loku a Cialakanyiso ci kotlana ni siku ga lomu cikari ka vhiki, ku nga tava ni Mutlhangano wa ntiro ni mahanyela ka vhiki lego.

23. A hubye ya madhota yi fanele ku hlawula dhota gin’we kasi gi tira kota muwoneleli wa Mutlhangano wa ntiro ni mahanyela. A ntiro wakwe ku wonelela a mutlhangano lowu kasi wu nga mahi vhilinganya, ni ku wona lezvaku lava va avelweko zvipandze ka wona va landzela a zvileletelo lezvi ke. I fanele ku tirisana khwatsi ni sungukati ga kuvhunetela; va nga kalelani. Neti a Cibhukwana ca Mutlhangano wa ntiro ni mahanyela ci huma, a muwoneleli wa Mutlhangano wa ntiro ni mahanyela i fanele ku tsala zviavelo zva zvigondzani zva tihweti leto ta timbiri. Lezvo zvi patsa a zvipandze zvo kala zvi nga hi zva zvigondzani ni vakhomi va citshamu va mutlhangano wa cikari ka vhiki lava va pasisilweko hi hubye ya madhota, ni zvipandze zva zvigondzani. (Wona  paragrafo 3-16 ni  24.) Loku a maha a zviavelo zva zvigondzani, i fanele ku alakanyela a tanga ya cigondzani, wutlhari, ni ku wona ku a nga wulawula na a tlhatlhekile ka mhaka leyo ke. I fanele ku alakanyela lezvo kambe a cikhati a avelako a zvipandze lezvi zvin’wani zva mutlhangano. A cigondzani cin’we ni cin’wani ci fanele ku nyikiwa a ciavelo ca cona na ka ha kiyela mavhiki manharu hi wutsongwani ga kona. Ku fanele ku tirisiwa a formulario Ciavelo ka Mutlhangano wa ntiro wa hina ni mahanyela ya wuKristu (S-89) kasi ku avela zvipandze zva zvigondzani. A muwoneleli wa Mutlhangano wa ntiro ni mahanyela i fanele ku tiyiseka lezvaku a mahungu ya programa yontlhe ya mutlhangano ya namekiwa laha ka kwadru ga zvitiviso. A hubye ya madhota yi nga yimisa a dhota gin’wani kutani nandza go vhunetela kasi ku mu vhuna. Kanilezvi, madhota basi ma faneleko ku avela zvipandze zvo kala zvi nga hi zva zvigondzani.

24. Vhiki ni vhiki, ku fanele kuva ni dhota gi tova mukhomi wa citshamu wa Mutlhangano wontlhe wa ntiro ni mahanyela. (Ka mabandla lawa ku nga ni madhota ma tsongwani, a ciavelo leci ci nga nyikiwa malandza yo vhunetela ma ringanelwako, loku zvi laveka.) A ntiro wakwe ku longisela magezu yo vhulula mutlhangano ni yo dayelela. Hi yena kambe a vitanako vontlhe lava va nga ni zviavelo ni ka cihi cipandze, niku loku a madhota ma hi ma tsongwani, a nga maha zvin’wani zvipandze ndzeni ka mutlhangano, nguvhunguvhu a zvipandze lezvi zva ku kombisa vhidhio ntsena, ku nga ha landzeli manʼwani mabhulo. A magezu yakwe loku ku mbhela cipandze kuya ka cin’wani ma wave ma tsongwani nguvhu. A hubye ya madhota hi yona yi hlolako yi tiva ku hi wahi madhota ma ringanelwako ku maha ntiro lowu. A madhota lawa ma pasisilweko ma tata na ma nyikiwa a ciavelo leci ca kuva mukhomi wa citshamu. Hi kuya hi lezvi a hubye ya madhota ya bandla lego yi nga tshamisa zvona, a muwoneleli wa Mutlhangano wa ntiro ni mahanyela a nga ha tirisiwa kota mukhomi wa citshamu hi kukhandzakanya a ku hundza madhota lawa man’wani ma pasisilweko. Loku a dhota go kari gi ringanelwa hi ku fambisa a Cigondzo ca Bhibhiliya ca bandla, zvi komba ku ga ringanelwa kambe hi kuva mukhomi wa citshamu. Hambulezvo, mu nga rivali lezvaku a dhota legi gi tirako kota mukhomi wa citshamu, a ntiro wa gona wu ta lava ku gi dzundza ni ku tiyisa hi ndlela ya lirandzo lava va mahako zviavelo zva zvigondzani ni ku va nyika wusungukati gi nene, loku zvi laveka. A mukhomi wa citshamu hi yena kambe a nga ni ntiro wa ku wonelela a mutlhangano kasi wu mbhela hi cikhati. (Wona  paragrafo 17 ni  19.) Loku a mukhomi wa citshamu a zvi lava ni loku ku hi ni wutshamu go enela, ku nga yimisiwa a mikrofone wun’wani laha tribhuna kasi a vitana hi wona a vamakabye lava va nga ni zvipandze, a makabye loyi a to maha cipandze leco na a kari a yima wutshan’wini gakwe laha tribhuna. Loku a zvi lava kambe, a mukhomi wa citshamu a nga tshama ka cimezana laha tribhuna a cikhati leci a cigondzani ci lerako Bhibhiliya ni ka cipandze leci ca ku Ti tsitsirite ntirweni wa kuchumayela. A mahela legi ga civa kutani ku popara cikhati.

25. Loku zvi koteka, i chukwana ku a ntiro lowu wu mahiwa hi dhota gi nga mukaneli wa munene. A ntiro wa sungukati ga kuvhunetela ku nyika wusungukati ka madhota ni malandza yo vhunetela cihundleni, loku zvi laveka. I fanele ku maha lezvo ka ni cihi cipandze ca ku kanela va ci mahako, a ku patsa ni zvipandze ka Mutlhangano wa ntiro ni mahanyela, tikanelo ta vanhu vontlhe, ku fambisa kutani ku lera maparagrafo ka Cigondzo ca Murindzeli kutani ka Cigondzo ca Bhibhiliya ca bandla. (Wona  paragrafo 19.) Loku ku hi ni madhota yo tala ma nga vakaneli ni vagondzisi vo buvha laha bandleni, lembe ni lembe ku nga hlawuliwa gin’wani lezvaku gi maha sungukati ga kuvhunetela, va cica legi gi nga tira ka lembe gi nga hundza. A zvizi zvi lava ku a sungukati ga kuvhunetela gi nyika wusungukati andzhako ka cipandze cin’we ni cin’wani.

26. Hi kuya hi ntsengo wa zvigondzani, a mabandla ma ngava ni zviavelo zva zvigondzani ka tisala tin’wani ahandle ka Salawu leyi ya hombe. Ka sala yin’we ni yin’wani ku fanele kuva ni sungukati gi ringanelwako hi ku maha ntiro lowo. I fanele kuva dhota loku zvi koteka. Loku zvi laveka, a ciavelo leci ci nga nyikiwa a nandza go vhunetela gi ringanelwako. A hubye ya madhota hi yona yi faneleko ku hlola yi tiva ku hi vamani va ringanelwako hi ku maha ntiro lowu ni lezvaku va fanele ku cicisana ke. A sungukati lego gi fanele ku landzela zvileletelo zvi nga ka  paragrafo 18. Loku mu maha zviavelo ka tisala tin’wani, a zvigondzani zvi fanele ku byeliwa lezvaku zviya ka tisala leto andzhako ka cipandzana leci ca Titshomba ta moya ka cipandze “Titshomba ti nga ka mhaka ya Nungungulu” ca mutlhangano lowu. Zvi fanele ku wuya zvi ta ti patsa ni bandla andzhako ka cipandze co gumesa ca zvigondzani.

27. Ka mutlhangano lowu, ku ta tiriswa tivhidhio to kari ti sinako ti hlawulilwe. A tivhidhio ta mutlhangano lowu wa cikari ka vhiki ti ta cheliwa ka JW Library^®, niku u nga ti wona kutani ku ti kuma na u tirisa michini yo hambanahambana.

© 2023 Watch Tower Bible and Tract Society of Pennsylvania

S-38-AW 11/23