Magumo
Ngha “muva vaecanyisi va lava va gako tshomba ya zitsumbiso, hi kota ya kukholwa ni kutimisela kabye.” — MAHEBERU 6:12.
1, 2. Hikuyini zi nga za lisima nguvu kuva hi hlakulela a kukholwa zalezi? Tlhamusela hi mufananiso.
A KUKHOLWA i gezu go saseka nguvu, gi yimelako a tshamela go naveleka nguvu. Kanilezi, loku hi wona kutani kuzwa a gezu lego, hi fanele ku tekela ku alakanyela ginwani: “Xihatla!” Zi tano hakuva loku hi nga hi na kukholwa hi fanele ku ku hlakulela hi xihatla. Niku loku hi hi nako, hi fanele ku ku vikela ni ku ku hlayisa hi xihatla. Hikuyini?
2 Hi nga ti wona na u kari u famba xiwuleni xa hombe. Uzwa tora ga hombe. Loku u kuma mati, u fanele ku ma vikela lezaku ma nga hisi. Zonake u fanele ku tatisa a xibya xa wena lezaku uva ni mati yo enela kala u chikela lomu u yako kona. Inyamutlha, hi hanya xiwuleni xa moya tikweni legi a kukholwa ka lisine — a ku fana ni mati lawo — ku kalako niku hambu loku ku hi kona ku nga mira hi xihatla loku hi nga ku vikeli ni loku hi nga ku hlayisi. A xilaveko lexo nja xihatla nguvu; a ku fana ni lezi hi nga zi kotiko ku hanya na hi nga hi na mati, loku hi nga hi na kukholwa hi nga ta zi kota ku hanya hi tlhelo ga moya. — Rom. 1:17.
3. Zini lezi Jehova a hi nyikileko kasi ku hi vuna ku hlakulela a kukholwa, niku zilo muni za zimbiri hi faneleko ku zi alakanya?
3 Jehova wa xi tiva a xilaveko xa hina xa xihatla xa kuva ni kukholwa, niku wa zi tiva kambe lezi zi karatisako zona inyamutlha a ku ku hlakulela ni ku ku hlayisa. Handle ko kanakana, hi zona zi mu mahileko a hi nyika zikombiso za ku zi pimanyisa. Jehova i pimisele mupostoli Paule a ku tsala lezi: Ngha “muva vaecanyisi va lava va gako tshomba ya zitsumbiso, hi kota ya kukholwa ni kutimisela kabye.” (Maheb. 6:12) Niku lezo hi zona zi mahako a hlengeletano ya Jehova yi hi kuca a ku ti karatela ku pimanyisa a zikombiso za vavanuna ni vavasati vo tsumbeka, vo kota lava hi wulawulileko hi vona lomu ka bhuku legi. Kanilezi, zini hi faneleko ku maha makunu? A hi ti alakanyiseni a zilo zimbiri: 1) Hi fanele ku simama hi tiyisa a kukholwa ka hina; 2) hi fanele ku tshama na hi alakanya a kutsumba ka hina.
4. Xana Satani i zi kombisisa kuyini lezaku i nala wa kukholwa, hambulezo hikuyini hi nga faneliko ku mbhelelwa hi kutsumba?
4 Simama ku tiyisa a kukholwa ka wena. Ku na ni nala wa hombe nguvu a lwako ni kukholwa — Satani. A mufumeli wa tiko legi i hunzulile a mafambisela lawa ya zilo mava wutshamu legi zi karatako nguvu a ku hlayisa a kukholwa ka hina. I na ni ntamu wa hombe nguvu a ku hunza lowu hi nga nawo. Xana hi fanele ku chava hi alakanya lezaku hi nga ta zi kota ku hlakulela ge hambu ku tiyisa a kukholwa ka hina? Hi nga tshuki hi alakanya lezo! Jehova Munghana wa hombe nguvu wa lava va lavako kuva ni kukholwa ka lisine. Wa hi tiyisekisa lezaku, na hi vuniwa hi Yena, ha zi kota ku ala Diabolus ni ku mu maha a hi tsutsuma! (Jak. 4:7) Hi ala Satani hi ku ti nyika xikhati siku ginwe ni ginwani kasi ku tiyisa a kukholwa ka hina ni ku ku hlakulela. Hi nga zi mahisa kuyini lezo?
5. Xana a vavanuna ni vavasati lava ku wulawuliwako hi vona lomu ka Biblia va ku kumisile kuyini a kukholwa? Tlhamusela.
Gal. 5:22, 23) Va lo khongela va kombela ku vuniwa, niku Jehova i lo simama ku tiyisa a kukholwa kabye. Ngha hinawu hi maha zalezo va mahileko, hi nga tshuki hi rivakelwa lezaku Jehova i nyika a moya wakwe hi matsenya ka vontlhe va wu kombelako va tlhela va hanya hi kuyelana ni mikhongelo yabye. (Luka 11:13) Xana zi kona zinwani zo engeteleka hi nga mahako?
5 Kota lezi hi zi wonileko, a vavanuna ni vavasati lava va kumbukiwako lomu ka Biblia a va pswaliwangi na va hi ni kukholwa. A wutomi gabye gi komba lezaku a kukholwa i tshamela gi vangiwako hi moya wa ku basa wa Jehova. (6. Hi nga vunekisa kuyini hi kumbheleleko hi mitlhatlhambutelo leyi hi gonzako lomu ka Biblia?
6 Ka bhuku legi, hi wulawulile hi zikombiso zitsongwani ntsena za vanhu va kombisileko kukholwa ka hombe nguvu. Kanilezi ku na ni vanhu vanwani vo tala nguvu! (Gonza Maheberu 11:32.) A munwe ni munwani wabye — hi ndlela yakwe — i hi nyika a lungelo ga ku lera ni ku gonza hi zikombiso za vanhu lava vo tsumbeka ka xigonzo xa hina wutsumbu. Loku hi lera ntsena a mitlhatlhambutelo yi nga lomu ka Biblia xungetano hi vanhu va nga kombisa kukholwa, kanilezi hi nga keli hi etisa, hi nga ta ku tiyisa khwatsi a kukholwa ka hina. Kasi hi vuneka khwatsi hi lezi hi lerako, hi fanele ku mbheta xikhati na hi hlola a xiyimo ni matshamela ya lava ku wulawuliwako hi vona lomu ka mitlhatlhambutelo ya Biblia. Loku xontlhe xikhati hi alakanya lezaku a vavanuna ni vavasati lavo vo kala ku mbhelela va wa hi ni kutizwa ko fana ni loku ka hina, a zikombiso zabye zi tava za lisine ka hina. (Jak. 5:17) Hi ku ti veka ka xiyimo xabye, hi nga alakanyela lezi va nga ti zwisa zona loku va yimisana ni zikarato zo fana ni lezi hinawu hi yimisanako nazo.
7-9. a) Xana a vavasati ni vavanuna vo kari va kukholwa ku wulawuliwako hi vona lomu ka Biblia va wa ta ti zwisa kuyini hi lungelo ga ku khozela Jehova hi ndlela leyi hi mu khozelako hi yona hina inyamutlha? b) Niku hikuyini hi faneleko ku tiyisa a kukholwa ka hina hi mitiro?
7 Ha tiyisa kambe a kukholwa ka hina hi zimaho za hina. Lezo zi tano hakuva, a “kukholwa loku ku nga hava mitiro ku file.” (Jak. 2:26) Hi nga alakanyela lezi a vavanuna ni vavasati lava hi wulawulileko hi vona va nga wa ta tsakisa zona loku va wo nyikiwa a ntiro lowu Jehova a nyikileko hina inyamutlha!
8 Hi xikombiso, u alakanya lezaku Abrahama i wa ta ti zwisa kuyini loku i wa no nyikiwa a lungelo ga ku khozela Jehova, na ku nga hi ka maalati yo mahiwa hi maribye lomu xiwuleni, kanilezi ka tiSalawu ta Mufumo to saseka ni ka migotsovanyano ya hombe zinwe ni mitlawa ya vakhozeli-kulobye yi xaxametilweko khwatsi, lomu ku kambisiswako ku tlhela ku tlhamuselwa hi kumbhelela a zitsumbiso lezi a nga zi wona “hi kule” ke? (Gonza Maheberu 11:13.) Niku, ahati loku Elija i wa no byeliwa lezaku a ntiro wakwe a hi ku daya a vaprofeti vo biha va Baali lava a va deleko a xikhati lexi a nga zama ku tirela Jehova mufunweni wa hosi yo biha ya muhluwuki, kanilezi ku enzela vanhu hi kurula a va tivisa a mahungu yo chavelela ni ma nyikako kutsumba? Xana hakunene a vavanuna ni vavasati va kukholwa ku wulawuliwako hi vona lomu ka Biblia na va nga tlulangi va kina hi kutsaka hi kuva ni lungelo ga ku khozela Jehova kota lezi hinawu hi mahako inyamutlha?
9 Hikwalaho a hi simameni hi tiyisa a kukholwa ka hina hi mitiro. Loku hi maha lezo, hi ta ngha hi tirisa wutomini ga hina lezi hi zi gonzako ka zikombiso za vavanuna ni vavasati va kukholwa lava va nga Mhakeni yi pimisilweko ya Nungungulu. Kota lezi zi wulilweko ka Xingheniso, hi ta va wona kota vanghana va hina va hombe. Kanilezi, lokuloku a wunghana lego gi tava ga lisine nguvu.
10. Litsako muni hi tova nalo Paradiseni?
10 Tshama hi ku alakanya a kutsumba ka wena. Xontlhe xikhati, a vavanuna ni vavasati va kukholwa va kumile ntamu hi ku ehleketa hi kutsumba loku va nyikilweko hi Nungungulu. Xana wenawu wa maha lezo? Hi xikombiso, ehleketa hi litsako la ku tlhangana ni malanza yo tsumbeka ya Nungungulu a xikhati lexi ma to tlhela ma hanya ‘kuvukeni ka valulamileko.’ (Gonza Mitiro 24:15.) Ziwutiso muni lezi u xuvako nguvu ku va maha?
11, 12. Misaveni yiswa, ziwutiso muni lezi u nga ha mahako a) Abeli? b) Noa? c) Abrahama? d) Rute? e) Abigaili? f) Estere?
11 Loku u kumana na Abeli, xana wa xuva nguvu ku mu wutisa lezi a vapswali vakwe va nga tshamisile zona? Kutani u lava ku mu wutisa ku: “Xana u tshukile u angula a makerubima lawa ma nga wonelela a ndlela yi ngaya sinwini ga Edeni? Xana ma ku hlamulile? Ahati Noa ke? U nga ha mu wutisa lezi: “Xana u wa zi chava a zihotlovila? U zi khatalelisile kuyini a zihari zontlhe lezo ka lembe legi u nga hi lomu tarwini?” Loku u kumana na Abrahama, u nga ha mu wutisa lezi: “Xana u tshukile u bhula na Xemi? Himani a nga ku gonzisa xungetano hi Jehova? Xana zi karatile a ku suka Ure?”
12 Hi kufanana, alakanyela a ziwutiso zo kari lezi u nga ha mahako a vavasati vo tsumbeka lava va to vuxiwa. “Rute, zini zi nga ku kuca kuva mukhozeli wa Jehova?” “Abigaili, xana u chavile ku byela Nabali lezi u nga mu vunisa zona Davida?” “Estere, zini zi nga humelela wena na Mordekai anzhako ka matimu lawa ma hlawutelwako lomu ka Biblia?”
13. a) Ziwutiso muni lezi kuzilava u to mahiwa hi lava va to vuxiwa hi ka vafileko? b) U ti zwisa kuyini hi lungelo ga ku tlhangana ni vavanuna zinwe ni vavasati vo tsumbeka va zikhatini za kale?
13 Hakunene, a vavanuna lavo ni vavasati vo tsumbeka kuzilava vonawu va tava ni ziwutiso za ku ku maha. Zi ta tsakisa nguvu a ku va hlawutela lezi a masiku yo gumesa ma nga gumesisa zona ni lezi Jehova a nga katekisisa zona a vanhu vakwe zikhatini lezo za zikarato! Handle ko kanakana, va ta khumbeka nguvu hi ku tiva lezi Jehova a nga tatisisa zona a zitsumbiso zakwe zontlhe. Masikwini ma tako, hi nga ta hava ni xilaveko xa ku alakanyela a malanza yo tsumbeka ya Nungungulu lawa ku wulawuliwako hi wona lomu ka Biblia hakuva ma tava na hina Paradiseni! Hikwalaho, simama ku maha zontlhe u zi kotako zalezi, lezaku a vanhu lavo vava va lisine ka wena. Simama ku pimanyisa a kukholwa kabye. Ngha u tsaka hi ku tirela Jehova zinwe navo; niku ngha muva vanghana va hombe kala kupinzuka!