Samuwele Wa Ku Sungula 12:1-25
12 Hi wugamu Samuwele a byela Vayisrayele hinkwavu a ku: “Ni yendle hinkwaswu leswi mi nga ni kombela swaku ni swi yendla; ni mi vekele hosi swaku yi mi fuma.+
2 Swoswi hi leyi hosi yi nga ta mi rhangela!+ Mina se ni gugile ni misisi ya mina se i ya ku basa funtshi vana va mina va na n’wina lani.+ Ni mi rhangelile ku sukela na na ha li djaha anze namuntlha.+
3 Ni byeleni, ku ni lweyi a nga ni xikhalu hi mina? A a xi hlayi phambheni ka Yehovha ni phambheni ka lweyi a nga mu langa swaku a va hosi.+ I mani ni nga tshama ni mu tekela homu ya yena kumbe mbongolo ya yena ke?+ I mani lweyi ni nga tshama ni mu kanganyisa kumbe ni mu xanisa? I mani ni nga tshama ni pfumela swaku a ni xava swaku ni nga ti thethi kahle timhaka?+ Loko a li kona a a ni byeli swaku ni ta mu hakela.”+
4 Kutani va ku: “A wu hi kanganyisanga kumbe ku hi hlupha kumbe ku pfumela ku xaviwa.”
5 Se a ku: “Yehovha i mboni ya leswaku a mi kumanga nchumu xa ku ni lumbeta hi xona ni lweyi a nga mu langa na yena i mboni namuntlha.” Va gama va hlamula va ku: “Vhela i mboni.”
6 Samuwele a byela vanhu a ku: “Yehovha, lweyi a nga tirhisa Moxe na Aroni a tlhela a humesa vavhovho va n’wina ka tiko la Gibita,+ i mboni.
7 Se swoswi, nyimani lani mi nga kona swaku ni ta mi yavanyisa phambheni ka Yehovha hi mhaka ya minchumu hinkwayu yayinene leyi Yehovha a nga mi yendlela yona n’wina ni vavhovho va n’wina.
8 “Yakobe a rhurhile a ya Gibita.+ Hi ku famba ka nkama vavhovho va n’wina va sungule ku kombela ku pfuniwa hi Yehovha,+ se hi ku hantlisa Yehovha a rhuma Moxe+ na Aroni swaku va humesa vavhovho va n’wina ka tiko la Gibita, swaku va ta tshama ka ndhawu leyi.+
9 Kambe va khohlwe Yehovha Xikwembu xa vona, se a va nyikela+ ka mavoko ya Sisera,+ lweyi a a rhangela masonchwa ya Azora, a tlhela a va nyikela ka mavoko ya Vafilista+ ni ka mavoko ya hosi ya Mowabu,+ se va lwa na vona.
10 Va tlhela va kombela Yehovha swaku a va pfuna,+ va ku: ‘Hi djohile+ hikusa hi ku tshikile wena Yehovha hi ya tirhela swifaniso swa Bali+ ni swa Axitoreti;+ swoswi hi ponisi ka mavoko ya valala va hina swaku hi ta ku tirhela.’
11 Se Yehovha a rhume Yerubali+ na Bedani na Yefta+ na Samuwele+ swaku va mi ponisa ka mavoko ya valala va n’wina lava a va li kusuhi na n’wina, swaku mi ta tshama hi ku rhula.+
12 Nkama mi nga vona swaku Nahaxi+ hosi ya Vaamoni wa mi dumela, a mi tshamela ku hlaya leswi: ‘Ihim, hina hi lava hosi,’+ hambileswi Yehovha Xikwembu xa n’wina a nga Hosi ya n’wina.+
13 Se hi leyi hosi mi nga yi langa, leyi mi nga yi kombela. Yehovha a mi nyike yona.+
14 Loko mi hlonipha Yehovha+ mi tlhela mi mu tirhela,+ mi yingisa leswi a mi byelaka swona,+ mi tlhela mi nga tshiki minawu ya Yehovha, funtshi n’wina ni hosi ya n’wina leyi mi fumaka mi tirhela Yehovha Xikwembu xa n’wina, swi ta mi fambela kahle.
15 Kambe loko mi nga swi yingisi leswi Yehovha a mi byelaka swona, mi tlhela mi tshika minawu ya Yehovha, yena Yehovha a ta lwa na n’wina ni vapapayi va n’wina.+
16 Swoswi nyimani kolanu mi vona nchumu xa ku hlamalisa lexi Yehovha a nga ta mi yendlela xona.
17 Swoswi i nkama wa ku tshovela trigu, kambe ni ta khongela ka Yehovha swaku a yendla tilo li duma li tlhela li nisa mpfula; kambe swi tiveni mi tlhela mi swi twisisa swaku mi mu yendlele swa ku biha Yehovha hi ku tikombelela hosi.”+
18 Samuwele a khongela ka Yehovha, a gama Yehovha a yendla swaku tilo li duma ku tlhela ku na mpfula hi siku lolelo, se vanhu hinkwavu va mu hlonipha hintamu Yehovha na Samuwele.
19 Vanhu hinkwavu va byela Samuwele va ku: “Hi khongeleli ka Yehovha Xikwembu xa wena+ swaku hi nga fi, hikusa hi yengesele xidjoho xin’wani ka swidjoho leswi hi nga na swona hi ku tikombelela hosi.”
20 Se Samuwele a byela vanhu a ku: “Mi nga chavi. I ntiyiso swaku mi djohile. Kambe swoswi mi nga tshuki mi tshika ku tirhela Yehovha,+ tirhelani Yehovha hi mbilu ya n’wina hinkwayu.+
21 Mi nga tshuki mi tirhela swikwembu swin’wani swaku a hi swa nchumu,+ leswi kalaka swi nga koti ku ponisa,+ hikusa a swi nga ta mi yisa ndhawu.
22 Yehovha a nge va tshiki vanhu va yena+ hi mhaka ya vito la yena lalikulu,+ hikusa Yehovha a mi langile swaku mi va vanhu va yena.+
23 A ni nge djoheli Yehovha hi ku tshika ku mi khongelela funtshi ni ta tama ni mi djondzisa hi ndlela yayinene ni ya ku lulama.
24 Ntsena hloniphani Yehovha,+ mi mu tirhela hi ku tshembeka* hi timbilu ta n’wina hinkwatu, mi khumbuka minchumu ya ku hlamalisa leyi a nga mi yendlela yona.+
25 Kambe loko mi tama mi yendla swa ku biha, mi ta khatisiwa,+ n’wina ni hosi ya n’wina.”+
Tinhlamunselu ta le hansi
^ Kumbe: “ntiyiso”.
