Samuwele Wa Ku Sungula 19:1-24
19 Siku lin’wani Sawulo a byela Yonatani n’wana wa yena ni vatirhi va yena hinkwavu swaku a lava ku dlaya Davhida.+
2 Leswi Yonatani n’wana wa Sawulo a a mu rhandza hintamu Davhida,+ a fambe a ya byela Davhida a ku: “Papayi wa mina Sawulo a lava ku ku dlaya. Ni kombela swaku mundzuku nimixo u tivonela, u baleka u ya tumbela.
3 Ni ta famba na papayi akusuhi ni lani u nga ta va u li kona. Ni ta vulavula hi wena ka papayi, se loko ni tsumbula nchumu ni ta ta ni ta ku byela.”+
4 Kutani Yonatani a vulavula kahle hi Davhida+ ka papayi wa yena Sawulo. A mu byele a ku: “Wena hosi u nga tshuki u yendla swa ku biha* u yendlela Davhida hikusa a nga ku wonhelanga nchumu naswona leswi a nga ku yendlela swona swi ku pfunile.
5 Phela Davhida a veke wutomi la yena nghozini swaku a ya dlaya Mufilista+ a za Yehovha a ponisa tiko hinkwalu la Israyele hi ndlela ya ku hlamalisa. Wena u swi vonile naswona a wu tsakile. Se hi mhaka muni u lava ku djohela Davhida, hi ku mu dlaya kuve a nga ku wonhelanga nchumu?”+
6 Kutani Sawulo a yingisa Yonatani, a gama a ku: “Na funga hi vito la Yehovha Xikwembu lexi hanyaka swaku a nga ta dlayiwa.”
7 Yonatani a gama a vitana Davhida a mu byela swilo hinkwaswu leswi Sawulo a nga swi hlaya. Se Yonatani a tlhela na Davhida ka Sawulo, kutani a tama a mu tirhela ku fana ni le ku sunguleni.+
8 Hi ku famba ka nkama ku tlhela ku sungula nyimpi, se Davhida a ya lwa ni Vafilista, a dlaya va vanyingi, van’wani va baleka.
9 Siku lin’wani Sawulo a a li kaya ka yena na a khome tlharhi naswona Davhida a a mu chayela haripa.+ Yehovha a mu tshika a hluphiwa hi mimpimiso ya ku biha,+
10 Sawulo a gama a zama ku tlhava Davhida hi tlharhi a mu patsa ni khumbi, kambe Davhida a vhika, a tlharhi li ya tlhava khumbi. Davhida a baleka hi wusiku lolelo.
11 Kutani Sawulo a gama a rhuma vanhu swaku va ya vonelela yindlo ya Davhida swaku va ta mu dlaya nimixo,+ kambe Mikala nsati wa Davhida a mu byela a ku: “Loko wo kala u nga baleki ka wusiku la namuntlha, mundzuku u ta va u file.”
12 Hi ku hantlisa Mikala a humesa Davhida hi ka janela swaku a baleka.
13 Se Mikala a teka xifaniso xa terafimi* a xi lata lani Davhida a yetlelaka kona, a tlhela a veka ni panu ya ku yendliwa hi mavoya ya mbuti lahayani a vekaka kona nhloko, a gama a xi mbhonya hi nguvu.
14 Kutani Sawulo a rhuma vanhu swaku va landza Davhida, kambe Mikala a ku: “Davhida wa vabya.”
15 Sawulo a tlhela a rhuma vanhu swaku va ya vona Davhida, a va byela a ku: “Mu tiseni halenu na a li ka mubedu wa yena swaku a ta dlayiwa.”+
16 Nkama lava nga rhumiwa va nga nghena ka yindlo ya Davhida, va kuma swaku lani a a yetlela kona a ku li ni xifaniso xa terafimi* kasi lani a vekaka nhloko a ku ni panu ya ku yendliwa hi mavoya ya mbuti.
17 Sawulo a vutisa Mikala a ku: “Hi mhaka muni u ni kanganyise hi ndlela leyi, u tshika nala wa mina+ a baleka?” Mikala a hlamula Sawulo a ku: “Yena a ni byele swaku loko ni nga mu tshiki a famba, a ta ni dlaya.”
18 Hi nkama wolowo Davhida se a a tsutsumile a baleka, a ya fika ka Samuwele aRama.+ A fike a mu byela hinkwaswu leswi Sawulo a nga mu yendla swona. Kutani yena na Samuwele va famba, va ya tshama Nayoti.+
19 Hi ku famba ka nkama, Sawulo a byeliwe leswi: “Davhida a le Nayoti aRama.”
20 Sawulo a vhela a rhuma vatirhi va yena swaku va ya khoma Davhida. Nkama vatirhi va Sawulo va nga vona vavanuna va ku guga na va profeta na va rhangeliwa hi Samuwele, moya wa ku kwetsima wa Xikwembu wu va na vona, va sungula ku vulavula ingaku vo va vaprofeta.
21 A nkama Sawulo a nga twa leswi nga yendleka, a rhuma vatirhi van’wani se na vona va sungula ku vulavula ingaku vo va vaprofeta. Sawulo a tlhela a rhuma ntlawa wun’wani wa wunharhu, na wona wu sungula ku vulavula ingaku wo va vaprofeta.
22 Hi wugamu na yena a ya Rama. A nkama a nga fika ka xihlovo xaxikulu lexi nga aSeku, a vutisa a ku: “Samuwele na Davhida va kwini?” Va mu hlamula va ku: “Va le Nayoti+ aRama.”
23 A nkama Sawulo a nga suka kolanu a fambe a ya Nayoti. Kutani a nkama a a li ndleleni moya wa ku kwetsima wa Xikwembu wu va ka yena se a famba na a vulavula ingaku o va muprofeta a za a ya fika Nayoti aRama.
24 A tlhele a hlivila mpahla ya yena a tama a vulavula ingaku o va muprofeta phambheni ka Samuwele, a yetlela na a nga yambalanga nchumu siku lolelo hinkwalu ni wusiku la kona. Hi leswo swi nga yendla vanhu va tolovela ku hlaya leswi: “Swi li na yena Sawulo i muprofeta?”+
Tinhlamunselu ta le hansi
^ Hi Xiheberu: “ku djoha”.
^ Kumbe: “xifaniso xa ndjangu; xikwembu xa mavunhwa”.
^ Kumbe: “xifaniso xa ndjangu; xikwembu xa mavunhwa”.
