Samuwele Wa Ku Sungula 31:1-13
-
Ku fa ka Sawulo ni vana va yena va madjaha (1-13)
31 Vafilista a va lwa ni Vayisrayele.+ Se masonchwa ya Israyele ma baleka Vafilista, funtshi ku dlayiwe masonchwa ya manyingi ya Vayisrayele ka Ntshava ya Jilbowa.+
2 Vafilista va hlongolisa Sawulo ni vana va yena, va gama va dlaya Yonatani,+ Abinadabi na Malakixuwa, vana va Sawulo.+
3 A nyimpi yi ya yi hisa lani Sawulo a a li kona, kutani lava va ku txopa mimpaxwa* va mu vona, va mu vavisa swinene.+
4 Se Sawulo a byela lweyi a a mu khomela matlharhi ya yena a ku: “Teka xipada xa wena u ni dlaya, swaku vavanuna lava kalaka va nga tirheli Xikwembu*+ va nga fiki va ni dlayisa ximona.” Kambe lweyi a a khoma matlharhi ya yena a nga pfumelanga hikusa a a chava hintamu. Kutani Sawulo a teka xipada a titlhava hi xona.+
5 A nkama lweyi a a khoma matlharhi ya Sawulo a nga vona swaku a file,+ na yena a titlhava hi xipada xa yena a fa.
6 Se Sawulo ni vana va yena vavanharhu ni lweyi a a mu khomela matlharhi ku patsa ni vatirhi va yena hinkwavu va fa hi siku lolelo.+
7 A nkama Vayisrayele lava a va tshama ka ndhawu leyi yi nga ka nkova ni lava a va tshama ka ndhawu ya Yordani, va nga vona swaku masonchwa ya Vayisrayele ma balekile ni swaku Sawulo ni vana va yena va file, na vona va baleka va siya madoropa ya vona.+ Kutani Vafilista va fika va tshama ka wona.
8 Hi mundzuku ka kona, nkama Vafilista va nga ta va ta teka mpahla ya lava nga dlayiwa ni minchumu ya vona, va kuma swaku Sawulo ni vana va yena vanharhu va file ka Ntshava ya Jilbowa.+
9 Se va tsema nhloko ya Sawulo va teka mpahla ya yena ya nyimpi, va gama va rhuma vanhu va ya ka tiko hinkwalu la Vafilista+ ni ka titempele ta swikwembu swa vona+ va ya byela vanhu hinkwavu leswi nga yendleka.
10 Kutani va teka mpahla ya yena ya nyimpi va ya yi veka ka tempele ya Axitoreti, kasi ntsumbu wa yena va ya wu gongondzela ka muru lowu nga Beti-Xani.+
11 A nkama lava a va tshama Yabexi-Jiliyadi+ va nga twa leswi Vafilista va nga mu yendla swona Sawulo,
12 tinhenha hinkwatu ti famba wusiku hinkwalu ti ya teka ntsumbu wa Sawulo ni mintsumbu ya vana va yena leyi a yi gongondzeliwe ka muru wa Beti-Xani, ti yi teka ti famba na yona aYabexi ti fika ti yi hisa.
13 Se ti teka marhambu ya vona+ ti ya ma lahla aYabexi+ ahansi ka nsinya wa tamarixka,* ti gama ti titsona swakudla 7 wa masiku.
Tinhlamunselu ta le hansi
^ Kumbe: “maflexa”.
^ Kumbe: “lava kalaka va nga tsemanga nsuvu”.
^ I nsinya wa vherdi wu nga ni matluka yamatsongo ni swiluva swa kor de roza kumbe swa ku basa.
