Samuwele Wa Ku Sungula 8:1-22
8 A nkama Samuwele a nga guga, a lange vana va yena swaku va va vayavanyisi aIsrayele.
2 Vito la n’wana wa yena wa ku sungula a ku li Yuwele, kasi lweyi wa wumbirhi a ku li Abiya.+ Vana lava a va yavanyisa aBerxeba.
3 Kambe vana va yena a va xi tekelelanga xikombiso xa papayi wa vona; a va kanganyisa vanhu,+ va pfumela ku xaviwa+ va tlhela va yavanyisa hi ndlela ya ku biha.+
4 Hi ku famba ka nkama, madoda hinkwawu ya Israyele ma tlhangana ma ya ka Samuwele aRama.
5 Ma fika ma ku: “Se u gugile naswona vana va wena a va xi tekeleli xikombiso xa wena. Hi vekeli hosi swaku yi ta hi yavanyisa ku fana ni matiko laman’wani hinkwawu.”+
6 Kambe a swi mu tsakisanga* Samuwele nkama va nga te: “Hi nyiki hosi swaku yi ta hi yavanyisa.” Kutani Samuwele a khongela ka Yehovha,
7 se Yehovha a byela Samuwele a ku: “Yingisa hinkwaswu leswi va ku byelaka swona; hikusa a va tshikanga wena, va tshike mina swaku ni nga ha vi hosi ya vona.+
8 Va yendla leswi va nga swi yendla ku sukela siku leli ni nga va humesa Gibita ku ta fikela swoswi; va tshamela ku ni tshika+ va ya tirhela swikwembu swin’wani,+ se na wena va ku yendla swoleswo.
9 Va yingisi. Kambe va basopisi; u va byela leswi hosi leyi nga ta va fuma yi nga ta va ni mfanelo ya ku swi lava ka vona.”
10 Se Samuwele a byela vanhu lava a va mu kombela swaku a va vekela hosi, marito hinkwawu ya Yehovha.
11 A ku: “A hosi leyi nga ta mi fuma yi ta va ni mfanelo ya ku yendla leswi:+ Yi ta teka vana va n’wina va madjaha+ swaku va fambisa tinyolo*+ ta nyimpi ni ku fambisa makavhalu ya yona,+ van’wani va ta famba hi minenge phambheni ka wona.
12 Yi ta langa varhangeli lava nga ta rhangela 1.000 wa vanhu,+ van’wani va rhangela 50 wa vanhu,+ van’wani va ta rima+ va tlhela va tshovela ka masimu ya yona,+ van’wani va ta yendla matlharhi lawa ma nga ta tirhisiwa anyimpini ni minchumu leyi tirhisiwaka ka tinyolo ta yona.+
13 Yi ta teka vana va n’wina va tintombhi swaku va ya yendla mafurha ya ku nun’hwela,* va sweka va tlhela va hamba mapawu.+
14 Yi ta teka masimu ya n’wina yamanene, masimu ya n’wina ya mawuvha ni masimu ya n’wina ya minsinya ya mawolivhera,+ yi ma nyika vatirhi va yona.
15 Yi ta teka wukhume* la leswi mi swi tshovelaka ka masimu ya n’wina ni wukhume la mawuvha ya n’wina, yi swi nyika varhangeli lava tirhaka ka yindlo ya yona ya wuhosi ni vatirhi va yona.
16 Yi ta teka vatirhi va n’wina, va xinuna ni va xisati, tihomu tatinene ni timbongolo ta n’wina yi swi tirhisa ka ntirho wa yona.+
17 Yi ta teka wukhume la tinyempfu ta n’wina,+ se n’wina mi ta va vatirhi va yona.
18 Ku ta fika siku leli mi nga ta rila hi mhaka ya hosi leyi mi nga tilangela yona,+ kambe hi siku lolelo Yehovha a nga ta mi hlamula.”
19 Kambe vanhu va yale ku yingisa Samuwele, va ku: “Ihim, hina hi lava hosi.
20 Hi ta fana ni matiko laman’wani hinkwawu, hosi ya hina yi ta hi yavanyisa, yi hi rhangela yi tlhela yi lwa tinyimpi ta hina.”
21 Nkama Samuwele a nga gama ku twa hinkwaswu leswi vanhu va nga mu byela swona, a game a swi byela Yehovha.
22 Yehovha a byela Samuwele a ku: “Va yingisi, va langeli hosi leyi nga ta va fuma.”+ Se Samuwele a byela vavanuna va Israyele a ku: “Mun’wani ni mun’wani wa n’wina a a tlhelele ka doropa la yena.”
Tinhlamunselu ta le hansi
^ Hi Xiheberu: “a swi bihile ka matihlo ya”.
^ Kumbe: “tin’qolo; makalichi”.
^ Kumbe: “maperfumi”.
^ Kumbe: “dízimo”.
