Samuwele Wa Ku Sungula 9:1-27
-
Samuwele a tlhangana na Sawulo (1-27)
9 A ku ni wanuna wa lixaka la Benjamini lweyi vito la yena a ku li Kixi.+ A a li n’wana wa Abiyeli, n’wana wa Zerori, n’wana wa Bekorati, n’wana wa Afiya wa ndjangu wa Benjamini+ naswona a a ganyile hintamu.
2 A a ni n’wana wa djaha lweyi vito la yena a ku li Sawulo.+ A a ha li mufana naswona a a sasekile; a ku nga na wanuna aIsrayele wa ku mu tlula hi ku saseka naswona a a lehile ku tlula vanhu hinkwavu.
3 Nkama ku nga lahleka timbongolo ta Kixi papayi wa Sawulo, Kixi a byele Sawulo a ku: “Ni kombela u teka mun’we ka vatirhi va mina mi famba mi ya lavetela timbongolo.”
4 Va hundze hi ka ndhawu ya tintshava ya Efrayimi ni ka tiko la Xalixa, kambe a va ti kumanga. Va tlhela va famba va ya fika ka tiko la Xalima, kambe timbongolo a ti nga li kona. Va tsemakanye ni tiko hinkwalu la lixaka la Benjamini, kambe a va ti kumanga.
5 Nkama va nga fika Zufi, Sawulo a byela mutirhi wa yena lweyi a a li na yena a ku: “A hi muki hikusa papayi a nga tshika ku karhateka hi timbongolo se a sungula ku karhateka hi hina.”+
6 Kambe mutirhi wa yena a ku: “Ku ni munhu wa Xikwembu ka doropa leli, munhu lweyi wa hloniphiwa. Hinkwaswu leswi a swi hlayaka swa yendleka.+ A hi kahluli hi ya ka yena, devhi a ta hi byela swaku hi ta ti kuma kwini.”
7 Se Sawulo a byela mutirhi wa yena a ku: “Loko ho ya, hi ta fika hi mu nyika yini? A hi na pawu ka minkwama ya hina; phela a hi na nchumu xa ku nyika mutirheli wa Xikwembu xa ntiyiso. I mpsini hi nga na swona swaku hi ta mu nyika?”
8 Se mutirhi a tlhela a hlamula Sawulo a ku: “Ni ni prata lalitsongo* lani ka voko la mina. Ni ta li nyika mutirheli wa Xikwembu xa ntiyiso, se yena a ta hi byela swaku hi nga ti kuma kwini timbongolo.”
9 (Ka minkama ya khale aIsrayele, loko munhu a lava ku pfuniwa hi Xikwembu a a ku: “A hi fambeni ka munhu* lweyi a kotaka ku vona minchumu ya ku hlamalisa hi ndlela ya singita.”+ Hikusa muprofeta a a vitaniwa hi ndlela yoleyo aminkameni ya khale.)
10 Se Sawulo a byela mutirhi wa yena a ku: “Leswi u swi hlayaka swa twala. A hi fambe.” Se va ya ka doropa leli munhu wa Xikwembu xa ntiyiso a a li ka lona.
11 A nkama na va famba va ya ka doropa lolelo, va tlhangane ni tintombhi leti a ti ya ku kheni ka mati. Se va ti vutisa va ku: “Lweyi a kotaka ku vona minchumu ya ku hlamalisa hi ndlela ya singita+ a kona lani?”
12 Va mu hlamula va ku: “A kona. A lahaya. Kahlulani mi mu yela; namuntlha a yendzele doropa leli, hikusa namuntlha vanhu va yendla gandzelo+ ka ndhawu ya ku tlakuka+ leyi ku gandzeliwaka ka yona.
13 Loko mi kahlula mi fika ka doropa, mi ta mu kuma na a nge se ya ka ndhawu ya ku tlakuka a ya dla. Vanhu a va nge dli na a nga se fika hikusa hi yena a katekisaka gandzelo. Se hi kona lava nga rhambiwa va dlaka. Kahlulani, mi ta mu kuma.”
14 Se va famba va ya ka doropa. Nkama na va li xikarhi ka doropa, Samuwele a huma a ya va tlhangaveta swaku va ya ka ndhawu ya ku tlakuka.
15 Na ka ha sale siku swaku Sawulo a ta, Yehovha a a byele Samuwele a ku:
16 “Mundzuku hi nkama wa ku fana ni lowu, ni ta ku tisela wanuna wa lixaka la Benjamini.+ U fanele u mu chela mafurha swaku a ta va murhangeli wa vanhu va mina, ku nga Vayisrayele;+ a ta ponisa vanhu va mina ka mavoko ya Vafilista. Hikusa ni vone mahlomulu ya vanhu va mina ni ku rila ka vona ni ku twile.”+
17 Nkama Samuwele a nga vona Sawulo, Yehovha a mu byelile a ku: “Hi lweyi munhu lweyi ni nga ku byela hi yena ni ku: ‘Hi yena a nga ta fuma vanhu va mina.’”+
18 Kutani Sawulo a ya ka Samuwele lweyi a a li ka xipfalu xa doropa, a fika a ku: “Kasi munhu lweyi wa ku kota ku vona minchumu ya ku hlamalisa hi ndlela ya singita a tshama kwini?”
19 Samuwele a hlamula Sawulo a ku: “Phela hi mina munhu wa kona lweyi u mu lavetelaka. Se famba ka ndhawu ya ku tlakuka, u ta dla na mina namuntlha.+ U ta pfuka u muka nimixo, se ni ta ku byela hinkwaswu leswi u lavaka ku swi tiva.*
20 A timbongolo leti nga ni masiku manharhu na ti lahlekile,+ u nga karhateki hi tona hikusa ti kumiwile. Kasi minchumu hinkwayu ya lisima ya Israyele yi lumba mani? A hi ya wena ni ndjangu hinkwawu wa papayi wa wena?”+
21 Sawulo a gama a mu hlamula a ku: “A ni wa lixaka la Benjamini ku nga lixaka lalitsongo ka tinxaka hinkwatu ta Israyele?+ Ndjangu wa ka hina a hi wona wa ku kala wu nga li wa nchumu ka mindjangu hinkwayu ka lixaka la ka Benjamini? Se hi mhaka muni u vulavulisa xileswo na mina?”
22 Kutani Samuwele a teka Sawulo ni mutirhi wa yena a va yisa ka ndhawu ya ku dlela ka yona, a va tshamisa ka ndhawu ya lisima lani ku tshamaka lava nga rhambiwa; a ku ni kolomuyani ka 30 wa vavanuna.
23 Samuwele a byela lweyi a a sweka a ku: “Tisa nyama leyi ni nga ku nyika yona, leyi ni nga ku byela ni ku: ‘Yi veki tlhelweni.’”
24 Se lweyi a a sweka a ya tlakula nyama leyi a a yi vekile ku nga nenge wa xiharhi, a yi veka phambheni ka Sawulo. Kutani Samuwele a ku: “Leswi nga phambheni ka wena hi leswi a swi vekiwe tlhelweni. Dlani hikusa va swi vekele wena swaku u swi dla swoswi. Hikusa ni va byele ni ku: ‘Ni rhambe vapfhumba.’” Se Sawulo na Samuwele va dla xikan’we hi siku lelo.
25 Va gama va suka ka ndhawu ya ku tlakuka va ya doropeni,+ se Samuwele a tama a bula na Sawulo na va li ka vharanda leli nga henhla ka yindlo.
26 Se va pfuka nimpundzu swinene; a nkama a li ya ku xeni Samuwele a vitana Sawulo lweyi a a li ka vharanda leli nga henhla ka yindlo a ku: “Tilulamiseli swaku ni ta ku vhalelisa.” Sawulo a tilulamisela, a gama a huma handle na Samuwele.
27 A nkama na va ngirimela ahandlenyana ka doropa, Samuwele a byela Sawulo a ku: “Byela mutirhi wa wena+ swaku a pfa a famba.” Se mutirhi wa yena a famba. A gama a ku: “Kambe wena nyima swaku ni ta ku byela rito la Xikwembu.”
Tinhlamunselu ta le hansi
^ Hi Xiheberu: “1/4 ya xikele ya prata”. Vona Xiyengetelo B14.
^ Hi Xiheberu: “Muvoni wa swivono”.
^ Hi Xiheberu: “Ni ta ku byela hinkwaswu leswi nga ka mbilu ya wena.”
