Nehemiya 4:1-23
4 Nkama Sanibalati+ a nga twa swaku hi pfuxa* muru, a kwate hintamu, se a sungula ku poyilela Vayuda.
2 Kutani a vulavula ni vamakwavu ni masonchwa ya Samariya, a ku: “Va zama ku yendla yini vambuyangwana lava va Vayuda ke? Indjhe va ta wu kota ntirho lowu? Indjhe va ta yendla magandzelo? Indjhe va ta swi kota ku heta hi siku lin’we? Indjhe va ta swi kota ku kuma maribye yamanene ka xidulu xa maribye lama nga psha?”+
3 Kutani Tobiya+ wa Muamoni+ lweyi a a nyime kusuhi na yena a ku: “Phela loko mbyana ya khwati* yo tshuka yi khwela ka muru lowu va wu yakaka hi maribye, wu nga wa.”
4 Xikwembu xa hina, hi yingisi hikusa ha poyiliwa,+ yendla swaku leswi va hi yendlaka swona swi djika hi vona,+ va nyikeli va khomiwa va ya wukaraweni.
5 Naswona u nga xi voneli hansi xidjoho xa vona kumbe ku va rivalela,+ hikusa va rhuke lava yakaka.
6 Se hi tame hi yaka muru, hi pfaletele mimbhovo hinkwayu kambe a wu nge se hela ku ya henhla, lava a va yaka, a va yaka hi ku hiseka.
7 Nkama Sanibalati, Tobiya,+ Vaarabiya, Vaamoni+ ni Vaaxidodi+ va nga twa swaku ntirho wa ku yaka muru wa Yerusalema wu ya phambheni naswona wu kusuhi ni ku hela, va kwata hintamu.
8 Kutani va yendla planu la ku ta va ta lwa ni Yerusalema va tlhela va kavanyeta ntirho.
9 Kambe hi khongele ka Xikwembu xa hina hi tlhela hi veka vagwardu wusiku ni nhlikanhi swaku va hi vhikela.
10 Kambe Vayuda a va ku: “Phela vatirhi va hele matimba naswona swidulu swa maribye ya muru wa khale i swinyingi; a hi nge zi hi wu hetile ku yaka muru lowu.”
11 Valala va hina a va ku: “Hi ta djuma hi nghena na va nga hi voni kutani hi va dlaya hi nyimisa ntirho.”
12 Nkama Vayuda lava tshamaka kusuhi ni valala va nga fika, va hi byele hi ku phindhaphindha va ku: “Va ta hi hlasela na va ta hi ka matlhelo hinkwawu.”
13 Kutani ni veka vavanuna ndzhaku ka muru lowu a wu li hansi lomu valala va nga nghenaka hi kona, ni va veka hi ku ya hi mindjangu ya vona na va khome swipada swa vona, matlharhi ya vona ni tigubu ta vona.
14 Nkama ni nga vona swaku va chava, ni yo vhela ni sekeleka ni khuluma ni varhangeli,+ vapfunisi va vagovhernadori ni vanhu hinkwavu ni ku: “Mi nga chavi.+ Khumbukani Yehovha hikusa i Xikwembu lexikulu lexi nga ni matimba swinene;+ lwelani vamakwenu, vana va n’wina, vasati va n’wina ni makaya ya n’wina.”
15 Nkama valala va hina va nga swi twa swaku hi ma tsumbulile maplanu ya vona ni swaku Xikwembu xa ntiyiso xi wonhe maplanu ya vona, hinkwerhu hi tlhelele ka ntirho wa ku yaka muru.
16 Ku sukela hi siku lolelo, hafu ya vatirhi va mina a yi yaka+ kasi hafu leyin’wani a yi khoma matlharhi, swivhikelo, tigubu, na va yambale mpahla leyi nga yendliwa hi swinsimbani. Varhangeli+ a va seketela* Vayuda hinkwavu
17 lava a va yaka muru. Lava a va rhwala mindzhwalu a va tirha hi voko lin’we kuve lelin’wani a li khome tlharhi.
18 Naswona muyaki mun’wani ni mun’wani a a yaka na a tlhome xipada ka nyonga naswona muchayi wa limhondzo+ a a nyime tlhelweni ka mina.
19 Se ni byela varhangeli ni vapfunisi va vagovhernadori ni vanhu hinkwavu ni ku: “Phela ntirho i wukulu funtshi i wunyingi, naswona hi hangalakile ka muru hi tlhela hi va kule na kule.
20 Nkama mi nga ta twa ku chaya ka limhondzo, tanani lomu hi nga kona. Xikwembu xa hina xi ta hi lwela.”+
21 Kutani hi tama hi tirha kuve hafu leyin’wani yi khome matlharhi, ku sukela nimpundzu anze niwusiku ka nkama lowu ku humaka tinyeleti.
22 Hi nkama wolowo ni byele vanhu ni ku: “Vavanuna ni vapfunisi va vona va nga suki aYerusalema, va ta txintxana swaku va hi rindza niwusiku va tlhela va tirha ninhlikanhi.”
23 Hi mhaka leyo, mina ni vamakwerhu, vatirhi+ ni vagwardu lava a va li na mina, a hi nga hlivili mpahla ya hina naswona mun’wani ni mun’wani a a tshama na a khome tlharhi hi voko la yena la xinene.
Tinhlamunselu ta le hansi
^ Kumbe: “hi tlhela hi yaka”.
^ Lani ku vulavuliwa hi mhungubye.
^ Hi Xiheberu: “a va nyima ndzhaku ka”.
