Ruti 4:1-22
4 Bowazi a ya ka nyanghwa wa doropa+ a fika a tshama kona. Kutani xaka* la Elimeleki leli Bowazi a a vulavula hi lona+ li hundza. Bowazi a ku: “Ximanyamanyani, tani halenu u ta tshama na mina.” A gama a famba a fika a tshama hansi.
2 Bowazi a langa 10 wa madoda ya doropa,+ a gama a ku: “Tshamani lani.” Se va tshama.
3 Bowazi a byela xaka leli a ku:+ “Nawomi lweyi a nga vuya hi ka tiko la Mowabu+ a fanele a xavisa nsimu leyi a yi li ya makwavu wa hina Elimeleki.+
4 Ni vone swi li kahle swaku ni ku byela mhaka leyi, se ni li: ‘Yi xavi phambheni ka madoda ni lava tshamaka ka doropa.+ Loko u yi lava yi xavi. Kambe loko u nga yi lavi, ni byeli swaku ni swi tiva, hikusa hi wena u nga ni mfanelo ya ku yi xava, ku gama ku landzela mina.’” Kutani yena a ku: “Ni ta yi xava.”+
5 Bowazi a tlhela a ku: “Siku leli u nga ta xava nsimu ka Nawomi, u fanele u yi xava ni ka Ruti wa Mumowabu, nsati wa wanuna lweyi a nga fa, swaku a tshomba li tama li va la lixaka la mufi.”+
6 Se xaka leli li hlamula li ku: “A ni nge swi koti ku yi xava, hikusa ni nga wonha tshomba la mina. Tirhisa mfanelo ya mina swaku u yi xava hikusa a ni nge swi koti ku yi xava.”
7 Khale aminkameni ya Vayisrayele, loko munhu a lava ku nyikela mfanelo ya yena ya ku xava minchumu ni ku txintxana minchumu a a fanele a tiyisa mhaka hi ku hlivila sandaliya la yena+ a nyika lweyi a mu nyikaka mfanelo yoleyo. Hi leswi a va yendlisa xiswona swaku va tiyisa ntwananu aIsrayele.
8 A nkama xaka la Elimeleki li nga byela Bowazi li ku: “Yi xavi wena,” li yo vhela li hlivila sandaliya.
9 Kutani Bowazi a byela madoda ni vanhu hinkwavu a ku: “Namuntlha mi timboni+ ta leswaku hinkwaswu leswi a swi li swa Elimeleki ni hinkwaswu leswi a swi li swa Kiliyoni na Mahaloni na swi xava ka Nawomi.
10 Na yena Ruti wa Mumowabu nsati wa Mahaloni, na mu teka a va nsati wa mina swaku vito la mufi li tama li va kona ni swaku tshomba li tama li va la lixaka la yena,+ funtshi vito la yena li nga khohlwiwi ka ndjangu wa yena ni ka vanhu va doropa leli a a tshama ka lona. Namuntlha mi timboni ta mina ka mhaka leyi.”+
11 Se madoda ni vanhu hinkwavu lava a va li ka nyanghwa wa doropa va ku: “Vhela hi timboni! Yehovha a a yendli swaku wansati lweyi u mu tekaka a fana na Rakel na Leya, lava tinxaka ta Israyele ti humaka ka vona.+ A swi ku fambele kahle aEfrata,+ u tiyendlela vito lalinene aBetlehema.+
12 Ndjangu wa wena a wu fane ni wa Farezi,+ n’wana wa Tamara na Yuda, hi vana lava Yehovha a nga ta ku nyika vona hi wansati lweyi.”+
13 Bowazi a teka Ruti a va nsati wa yena. A famba masangu na yena, se Yehovha a mu katekisa a kuma nyimba, a psala* n’wana wa djaha.
14 Kutani vavasati va byela Nawomi va ku: “A ku dzunisiwe Yehovha lweyi a nga yendla swaku xaka la nuna wa wena namuntlha li ku pfuna. Funtshi vito la n’wana lweyi a nga psaliwa li fanele li tiviwa aIsrayele!
15 N’wana lweyi a ta ku pfuna swaku u va ni wutomi la kahle funtshi a ta ku hlayisa loko se u gugile, hikusa a psaliwe hi Ruti, lweyi a ku rhandzaka+ funtshi a yampsaka ku tlula 7 wa vana va madjaha.”
16 Nawomi a teka n’wana a mu tlakula a tlhela a mu hlayisa.
17 Se vavasati lava a va li vavhizinyu va ku: “Nawomi a psaleliwe n’wana,” va gama va mu chula swaku i Obede.+ Obede i papayi wa Yese+ lweyi a nga va papayi wa Davhida.
18 Leli i lixaka la Farezi:+ Farezi a ve papayi wa Hezroni;+
19 Hezroni a ve papayi wa Arama; Arama a ve papayi wa Aminadabi;+
20 Aminadabi+ a ve papayi wa Nasoni; Nasoni a ve papayi wa Salmoni;
21 Salmoni a ve papayi wa Bowazi; Bowazi a ve papayi wa Obede;
22 Obede a ve papayi wa Yese;+ Yese a ve papayi wa Davhida.+
Tinhlamunselu ta le hansi
^ Ku nga lweyi a nga ni mfanelo ya ku teka nsati wa makwavu wa yena kumbe wa xaka leli nga fa.
^ Kumbe: “veleka”.
