Loko kuli leswaku kuhlupheka aku vangiwi hi Xikwembu, hayini ku ni tindlala, wusiwana la kutsema nhlana, mavabyi ni timhangu ta ntumbuluku? A Rito la Xikwembu, Bibele, li boxa swivangelo swinharhu leswi yendlaka vanhu va hlupheka.

1. Kunga khatali hi van’wana, kunavela swilo leswi yengetelekeke ni livengo. ‘Munhu afuma munhu mun’wana kumuyendlela swobiha.’ (Eklesiasta 8:9) Makhambi manyingi, kuhlupheka kuvangiwa hi vanhu lavanga hetisekangiki, lavanga liki na mhaka ni van’wana naswona vanga ni tihanyi.

2. Nkama ni swiyendlakalo leswinga languteliwangiki. Hi ntolovelo, vanhu va hlupheka hi mhaka ya leswi ‘nkama ni xiyendlakalo lexinga languteliwangiki swi welaka [vanhu] hinkwavu’. (Eklesiasta 9:11) Xana leswo swi lava kuvula yini? Hi marito matsongo swi lava kuvula leswaku vanhu va ka ndhawu leyi hoxeke hi nkama lowu hoxeke. Handle ka leswo, timhangu, swihoxo leswi vanhu vaswi yendlaka ni kunga nyikeli yingiso ka swiyendlo swa vona swi vanga kuhlupheka.

3. Mufumi wa misava. Hikuya hi Bibele, xivangelo lexikulu lexi yendlaka vanhu va hlupheka hileswi ‘misava hinkwayo yinga mavokweni ya lweyi wobiha.’ (1 Yohane 5:19) “Lweyi wobiha” a hlamuseliwaka laha i Sathana Diyavulosi, xivumbiwa xa moya lexi kusunguleni axi li ntsumi ya Xikwembu kambe xi tshikeke ‘kutshama ntiyisweni’. (Yohane 8:44) Swivumbiwa swin’wana swa moya switi patse na Sathana ivi na swona swi pfukela Xikwembu leswaku swi fikelela kunavela ka swona kobiha. Hi ndlela leyi, switi hundzule mademona. (Genesa 6:1-5) Kusukela loko va pfukele Xikwembu, Sathana ni mademona ya yena va sungule kukucetela misava hi ndlela ya kubiha. Loko kuli namuntlha, va tlulisa mpimo. Swoswi, Sathana a kwate swinene naswona ‘a kanganyisa vanhu va misava hinkwayo’. Hi mhaka leyo, misava hinkwayo ya konya. (Nhlavutelo 12:9, 12) Kunene, Sathana i mufumu lweyi anga ni tihanyi. A tsaka hintamu loko ahi vona hi hlupheka. Hi yena — ahi Xikwembu — lweyi a vangaka kuhlupheka.

ANAKANYISISA HI LESWI: I Sathana ntsena lweyi aata yendla leswaku vanhu va kukala nandzu va xaniseka. Kuhambana na Sathana, loko li vulavula hi Xikwembu, Bibele li li: “Xikwembu i lirhandzu.” (1 Yohane 4:8) Hi mhaka ya wumunhu la xona la lirhandzu, ‘swi kule swinene ni Xikwembu xa ntiyiso leswaku xi yendla hi ndlela leyibiheke, ni lweyi wa Matimba Hinkwawu kuyendla swobiha.’ — Yobo 34:10.

Ungaha tivutisa: Xana Xikwembu xa Matimba hinkwawu xita pfumelela Sathana, mufumi wobiha swinene, leswaku a hambeta a fuma kufikela siku muni? Hilaha se hi djondzeke ha kona, Xikwembu xali nyenya wubihi naswona xa vaviseka loko xihi vona hi hlupheka. Hi mhaka leyo, Rito la xona lahi khutaza: “Rhulani kukarhateka hinkwaku ka n’wina ka xona, hikuva xitikarhatela [kumbe kukhatalela] n’wina.” (1 Petro 5:7) Xikwembu xahi rhandza nakambe xi ni matimba ya kuhelisa kuhlupheka hinkwaku loku hi langutanaka na kona, hilaha nhlokomhaka leyi landzelaka yingata komba ha kona. *