Tugambire ebirukukukwataho.

Nkazaarwa omu 1979 omu United States. Obunkaba nyine emyaka esatu, abazaire bange bakagaitururwa. Nyina nyowe akankuliza omu migenzo y’Ekiyudaaya kandi akantwara omu masomero g’Ekiyudaaya agarukwetwa yeshivas. Obunkaba nyine emyaka musanju, tukafurukira omu Isaleri twamarayo omwaka gumu, kandi nkasomera omu isomero erikaba liri omu kiikaro ekirukwetwa Kibbutz. Hanyuma tukafurukira Mexico.

N’obukiraaba ngu hakaba hataliyo isorrokaniro, nkaikara ninyejumbira omu migenzo yange ey’Ekiyudaaya. Ha kiro kya Sabbiti nahembaga kando, nsoma ebitabu bya Musa ebirukwetwa Torah, kandi nasabaga ninkozesa ekitabu ky’esaara ekirukwetwa siddur. Nakiraga kugambira abeegi bagenzi bange ha isomero ngu ediini yange niyo yabandize. Nkaba ntakasomahoga ebitabu ebirukumanywa nk’Endagaano Empyaka ebiteeka omutima ha buheereza bwa Yesu Kristo n’enyegesa ze. Kandi nyina nyowe akaba antangire kubisoma ngu nibiija kusiisa enyikiriza zange.

Habwaki wacwiremu kusoma Endagaano Empyaka?

Obunahikize emyaka 17, nkagaruka omu ihanga United States kumaliiriza emisomo yange. Kandi oku nuho munywani wange yangambiriire ngu obwomeezi bwange nibuba butali burungi kakuba mba ntarukwikiririza omuli Yesu.

Nkamugarukamu nti: “Abantu abaikiririza omuli Yesu babuzire.”

Akankaguza ati: “Wakasomahoga Endagaano Empyaka?”

Nkamugarukamu nti: “Nangwa,”

“Hanyuma akankaguza ati: “Hati torukurora ngu nooba otahikire kuhayo entekereza yaawe ha kintu eky’otamanyire?”

Ebigambo bye bikankwataho muno habwokuba nanyowe nakiroraga nk’ekitali ky’amagezi kuhayo entekereza yaawe otaine horukusigikirra. N’obwebundaazi, nkatwara Baibuli omu ka kandi natandika kusoma Endagaano Empyaka.

Ebiwasomere bikakukwataho bita?

Kikampuniiriza obunasangire ngu abaahandiikire Endagaano Empyaka baali Bayudaaya. Ekindi, nk’oku nayeyeyongiire kusoma nukwo nayeyongiire kurora Yesu nk’omuntu ow’embabazi, Omuyudaaya omwebundaazi ayagonzaaga kukonyera abantu hatali kubanyunyuuta. Nkagenda n’omu lyahurro ly’ebitabu nayetiiza ebitabu ebirukumukwataho. Baitu busaho na kimu ekyangumize ngu akaba ali Masiya. Ebimu byamubazaahoga nka Ruhanga—baitu eki nyowe ntakiikirize. N’ekindi nkekaguza nti Yesu uwe yasabaga oha? Kwongerraho, Yesu akafa. Baitu Baibuli ebazaaho Ruhanga eti: “Iwe tolifa.” *

Okatunga ota ebyokugarukamu by’ebikaguzo ebi?

Amananu tigehakaniza kandi nkacweramu kimu kugaserra. Nahabweki nkasaba Ruhanga obu nincura, kandi gukaba guli murundi gwange gw’okubanza kusaba ntarukukozesa ekitabu kyange ky’esaara ekirukwetwa Siddur. Obunkaba nimara kusaba nkahurra kodi ha rwigi. Baali Bakaiso ba Yahwe babiri. Bakampa kimu ha bitabu byabo ebibakozesa kwegesa Baibuli. Ekitabu kinu hamu n’okuleeta hamu ebiteekerezo hagati yange nabo bikangumya ngu enyikiriza zaabo nizisigikirra ha Baibuli. Nk’ekyokurorraho, Abakaiso ba Yahwe barora Yesu hatali nk’ekicweka ky’Obusatu baitu nka ‘Omwana wa Ruhanga’ * kandi nka “okubanza okwokuhanga kwa Ruhanga.” *

Hanyuma y’obwire kurabaho, nkagaruka Mexico, nambere nagumiizemu ninyega n’Abakaiso ba Yahwe ha bunabbi oburukukwata hali Masiya. Obunabbi obwingi obunarozere bukampuniiriza muno! Baitu nabwo nkaikara ningurukyagurukya. Nkekaguza nti: ‘Yesu nuwe wenka arukubazibwaho?’ kandi ‘Kakuba yali ali muntu ondi omugezi ow’arukwefoora Yesu?’

Hati, kiki ekyakugumize?

Abakaiso ba Yahwe bakanyoleka ebintu ebiri omu bunabbi omuntu ow’arukwefoora eby’atasobora kukora. Nk’ekyokurorraho obuhakaba harabireho emyaka erukuhingura 700 nabbi Mika akagamba ngu Masiya yakuzaaliirwe Beterehemu eya Yuda. * Nooha yakumutangire kuzaalirwayo? Isaya akahandiika n’agamba ngu Masiya yakwisirwe nk’omuccwi w’ebiragiro baitu yakuziikirwe omu mulingo ogw’ekiguuda. * Obunabbi bunu bwona bukahikirizibwa

Obwakaiso obundi bukatwarramu abazaire ba Yesu. Baibuli ekagamba ngu Masiya yakubaire mwijukuru w’Omukama Daudi. * Abayudaaya aba kara bahandiikaga okuzaarwa kw’abantu boona. Kakuba Yesu atararugire omu ruzaaro rwa Daudi, kyakwanguhiire abanyanzigwa be kukibazaaho! Baitu batakikole habwokuba obuzaale bwa Yesu na Daudi bwali butali bw’okugurukyagurukya. N’ekindi haroho n’ekitebe ky’abantu abaamwetaga “omwana wa Daudi.” *

Omu mwaka gwa 70 C.E. hanyuma y’okurabaho emyaka—37 Yesu afiire—amahe ga Roma gakatahirra Yerusalemu kandi nikisobora kuba ngu ebihandiiko eby’obuzaarwa bikabura rundi bikahwerekerezebwa. Nahabweki kusobora kumanyirra Masiya n’osigikirra ha ruzaaro, akaba aine kuzooka omwaka 70 C.E. gutakahikire

Kwetegereza ebintu binu kikakukwataho kita?

Omu Ekyebiragiro 18:18, 19, hakaranga ngu Ruhanga yakwimukize nabbi omu Isaleri owaali nka Musa. Kandi Ruhanga akagamba ngu ogu weena “atalihurra ebigambo byange ebyaligamba omu ibara lyange ndikimujunaniza.” Okwesomesa kwange okwa Baibuli yoona kukangumya ngu Yesu owa Nazalesi akaba ali nabbi.