GWALI MWAKA 1970 hagati ya Juuni na Agusto, mbyamire ha kitabu omu irwarro lya Valley Forge General Hospital,omu Phoenixville, Pennsylvania, United States. Naasi omusaija akaba n’apima puresa yange buli dakiika 30. Nkaba nyine emyaka 20,ndi omu mahe kandi nyine oburwaire obw’amaani oburukuturra. Naasi onu ow’akaba nankira emyaka, akaba nazooka nk’ow’atalibanizibwe muno. Puresa yange obuyali n’eyeyongera kukeeha nkamukaguza nti: “Nikisisana tokaroraga omuntu nafa, tinukwo?” Akahindukira kimu ha maiso kandi yangarukamu ati: “Ego, nukwo kiri.”

Kasumi ako,nkaba ntakyaine kunihira. Baitu nkaija nta kuba mwirwarro? Leka, mbagambireho bimu ha birukukwata ha bwomeezi bwange.

Nkarwara obunkaba ninkonyera omu kisiika nambere basemereza abantu omu bulemu obwali buli Vietnam. Nagonzaaga muno kukonyera abarwaire naabo abahutaire kandi nkaba ningonza kufooka dakitaali ow’arukusemeza abantu. Nkagenda Vietnam omu Julaayi 1969. Nk’oku kyali kiri hali boona baali baakaija, nkahebwa wiiki emu nukwo nsobole kwetegereza n’okumanyirra ekiirro hamu n’esaaha ezirukwahuna.

Hanyuma y’obwire buke, nkatandika kukora omu irwarro erikaba nirisemeza abantu omu Mekong Delta, Dong Tam, enyonyi nyingi muno ezaali ziijwiremu abahutaire zikaija. Nagonzaaga muno ihanga lyange hamu n’okukora, nahabweki nkagonza kutandikiraho aho naaho ngire ekinakora. Abantu abaali bahutaire bakatekanizibwa kutwarwa omu busiika obutaito nambere baasemerezebwaga. Dakitaali arukusemeza, dakitaali owa’rukugwijagiza, na ba naasi babiri boona baabaga omu kasiika ako, nibalengaho kukiza obwomeezi. Nkarora ngu haroho emigugu endi ey’ekaba eri omu bisaho bya ebirukwiragura eibaali batarukwiha omu nyonyi ezo. Bakangambira ngu ebisaho ebyo birumu ebicweka by’abamahe abaali batiirwe za bbomu omu bulemu. Eby’obulemu nukwo nabitandikire nti.

Obu nkaba nkyali muto, nkamanyaho amananu Abakaiso ba Yahwe agabeegesa. Nyina nyowe akeega Baibuli n’Abakiso ba Yahwe, baitu atakurakurane kuhika ha idaara ly’okubatizibwa. Nagonzaaga kuhuliiriza nyina nyowe obuyabaga nayega. Obwire nubwo bumu, nkaraba ha Kyombeko ky’Obukama na iba nyina nyowe. Nkamukaguza nti: “Eki kiki?” Akangarukamu ngu; “Abantu abo otalibairra haihi!” Habwokuba namugonzaaga kandi nimwesiga muno, nkamuhuliiriza. Nahabweki, ntasobole kweyongera kubaza n’Abakaiso ba Yahwe.

Hanyuma y’okuruga Vietnam, nkahurra ngu ninyetaaga Ruhanga omu bwomeezi bwange. Haroho ebintu ebinaijukaga binsaaliza. Kyali nikisisana oti rundi busaho arukwetegereza ebirukugenda omu maiso omu Vietnam. Ninyijuka, haroho abantu omu Vietnam obubayesalingire nibagamba ngu abamahe ga U.S. bali baisi b’abaana habwokuba abaana baingi bakaitwa omu bulemu kandi kunu tibaine musango.

Kusobora kwigusa enjara einkaba nyine omu by’omwoyo, nkatandika kugenda omu kanisa ezirukwahukana. Nkaba ningonza muno Ruhanga baitu ebinaroraga omu makanisa bitasemeze. Hakumalirra, nkagenda ha Kyombeko ky’Obukama eky’Abakaiso ba Yahwe omu Delray Beach, Florida. Ekaba eri Sande Febwali, 1971.

Obunataahire omu Kyombeko ky’Obukama, nkasanga orubazo ruli haihi kuhwa, nahabweki nkasigaramu habw’ekicweka ky’okwega Omunaara ekyali nikyongeraho. Tindukwijuka ekyali nikibazibwaho, baitu ninkyaijuka abaana abato abaali nibasuukura ebyahandiikirwe omu Baibuli. Mali bakansemeza! Nkaba nimpuliiriza kandi ninyetegereza ebirukugenda omu maiso. Obunkaba ninduga ha Kyombeko ky’Obukama, ow’oruganda ow’akaba aine emyaka nka 80 akaija namberendi. Ibaralye akaba nuwe Jim Gardner. Akanyoleka akatabu akaali kaine omutwe The Truth That Leads to Eternal Life kandi yankaguza ati: “Nosobora kwikiriza akatabu kanu?” Tukakora entekaniza kutandika kwega Baibuli Kyakana ekyahondireho.

Sande egi yonyini nkaba nyine kugenda ha mulimo. Nkaba ninkora omu irwarro omu Boca Raton, Florida, kandi nakoraga nambere abarwaire abali kubi betaaga kukorwaho bwangu bwangu. Nkaba ninyija kutandika kukora kuruga saaha itaano ez’ekiro kuhikya saaha emu eza nyekyakara. Habwokuba obwire bwekiro bwali buculiire, nkasobora kusoma akatabu kange. Haroho naasi ayaizire namberendi, yanyihaho akatabu mu ngaro kandi yatokera haiguru ati: “Otangambira ngu nogenda kuba omu hali bo?” Nkamwihaho akatabu kange kandi namugambira ngu: “Nubwo nakakahika hagati baitu nikinsisanira ngu ningenda kuba omu hali bo!” Akandugaho yagenda kandi namaliiriza kusoma akatabu ako kiro eki kyonyini.

Obu nali ningenda kutandika kwega Baibuli n’oworuganda  Gardner nkamukaguza nti: “Hati nitugenda kwega ki?” Akangarukamu ati: “Akatabu akanakuhaire.” Kandi hanyuma namugambira ngu, “Mazire ira kukasoma.” Ow’oruganda Gardner akangarukamu n’embabazi nagamba ati: “Baitu nabwo, katubazeeho esuura ey’okubanza.” Mali kikampuniriza ngu haroho bingi ebinkaba ntakarozere omu suura egi. Tukasukura ebyahandiikirwe bingi obu nimbisoma omu baibuli yange erukutukura ey’empindura ya King James. Hati nkaba ninyega hali Ruhanga ow’amananu, Yahwe. Nyekyakara egi, tukasoma esuura isatu n’Ow’oruganda Gardner, ounagonzaaga kweta Jim. Kuruga obu, buli Kyakana nyekyakara twayegaga esuura isatu. Mali nayegondezaga omu kwega kwaitu oku. Gukaba mugisa gw’amaani kwegesebwa Ow’oruganda ogu owaseserweho amagita ayaali namanya kurungi Charles T. Russell!

Hanyuma ya wiiki nke, nkaikirizibwa kufooka omutebezi w’amakuru amarungi. Jim akankonyera muno ha bintu ebyali nibinyeraliikiriza, otwaliremu n’okutebeza enju ha nju. (Engeso Ezabakwenda 20:20) Habw’okuba Jim yakoraga nanyowe omu buheereza, nkatandika kwegondeza omu mulimo ogw’okutebeza. Na hati obuheereza nkyabutwara kuba mugisa ogw’amaani muno. Nikinsemeza muno kuba mukozi hamu na Ruhanga!​—1 Kol. 3:9.

Hati kambagambireho ensonga erukunkwataho muno​—okugonza kwange okw’okubanza hali Yahwe. (Kus. 2:4) Kugonza Yahwe kunkonyiire kugumiisiriza obusaalizi obuntunga habw’okwijuka ebyaali omu bulemu hamu n’ebizibu ebindi bingi.​—Is. 65:17.

Ninyijuka kiro kimu eky’embaganiza omu 1971 hagati ya Maaci na Maayi. Nubwo nkaba naakabingwa omu nju nambere bazaire bange baali banyikirize kwikara. Iba nyina nyowe akaba atarukugonza omu h’Abakaiso ba Yahwe kwikara omu nju ye! Nkaba ntaine sente nyingi kasumi ako. Irwarro nambere nakoraga lyansasuraga hanyuma ya buli wiiki ibiri, kandi nubwo nkaba nakaruga kukozesa sente ezinkaba nyine kugura engoye nukwo nsobole kugenda omu buheereza kukikirra Yahwe omu mulingo ogusemeriire. Nkaba nyine aka sente akankaba nyahwire, baitu kakaba kali omu banka eri omu Michigan, isaaza nambere nakuliire. Nahabweki kikanyetaagisa kwikara omu motoka yange kumara ebiro bike. Nayogaga kandi nsarra omuleju gwange omu byogero eby’ebyoma by amafuta.

Kiro kimu obunkaba ninkyaikara omu mutooka yange, nkahika ha Kyombeko ky’Obukama orusorrokano rw’okugenda kutebeza rutakatandikire. Nubwo nkaba nakaruga ha irwarro kukora. Obunkaba nyikaliire enyuma y’Ekyombeko ky’Obukama nambere nkaba ntarukurorwa, nkatandika kwijuka ebyali omu bulemu Vietnam​—emitumbi eyokiibwe n’enuuka, esagama n’okuhumiragana​—bikatandika kunkiza amaani. Omu bitekerezo byange nkatandika kuhurra n’okurorra kimu abasaija abeeraliikiriire nibankaguza ngu, “Mali ndakira? Mali ndakira?” Nkaba nkimanyire ngu nibagenda kufa, baitu nkalengaho kubahuumuza nk’oku nkaba ninsobora obu nindegaho kwetantara kubooleka ha maiso kiki kyonyini ekimanyire. Nkaikarra nyena nsobiirwe kandi nyijwire enaku.

Nkasaba obu amaziga nigasirimuka kuruga omu maiso. (Zab. 56:8) Nkatandika kwecumiitirizaaho okunihira kw’okuhumbuuka. Naijukira kimu ngu kurabira omu kicunguro, Yahwe Ruhanga naija kwihaho obusaasi obw’omu mutima obunkaba nyine, n’abandi obubaali barabiremu kandi amarreho kimu ebintu ebinarozere. Ruhanga naija kuhumbuura abasaija abo kandi nibaija kutunga omugisa gw’okumwegaho. (Engeso Ezabakwenda 24:15) Kasumi ako, omutima gwange gukaijura okugonza hali Yahwe kandi nahurra kyakwataho muno obwomeezi bwange. Ekiro eki kikyali kyembaganiza hali nyowe. Kuruga obu, nkora kyona ekirukusoboka kurora ngu okugonza kwange okw’okubanza hali Yahwe tikwaceka, kukira muno obuntunga emitalibaine n’ebirengo.

Omu bulemu, abantu bakora ebintu bibi muno. Nanyowe ntahukaneho nabo. Baitu ekinkonyiire nukwo kwecumiitirizaaho ebyahandiikirwe bibiri ebinkira kugonza muno. Eky’okubanza kiri omu Okusuku’rwa 12:10, 11, ekirukugamba ngu Diabolo asingurwa hatali obw’ekigambo ky’okugamba kwaitu kyonka baitu na habw’esagama y’Omwana gw’Entaama. Ekyakabiri kiri omu Abagaratiya 2:20. Kurabira omu rukarra runu, nkimanyire ngu Kristo akanfeera. Yahwe andorra omu sagama ya Yesu, kandi akanganyira habw’ebintu nakozere. Kumanya eki, kinkonyiire kuba n’omuntu ow’omunda omurungi kandi kyanyekambisa kukora kyona ekindukusobora kukonyera abandi kumanya amananu agarukukwata hali Ruhanga waitu ow’embabazi, Yahwe!​—Baheb. 9:14.

Obunyijuka omulingo obwomeezi bwange bwali buli, nsiima muno ngu Yahwe aikaire nadolerra. Ekyokurorraho, ekiro kyonyini Jim yamanyire ngu nkaba ninyikara omu motooka yange, akangambira ngu haroho munyaanya itwe ow’akaba aine enju y’okwikaramu. Ninkigumiza kimu ngu Yahwe akakozesa Jim na munyaanya itwe ogu nsobole kutunga ah’okwikara aharungi. Mali Yahwe aine embabazi nyingi! Afaaho abaheereza be abesigwa.

Omu Maayi 1971, kikanyetaagisa kugenda Michigan kugira ebinamaliiriza. Ntakarugire omu Kitebe kya Delray Beach omu Florida, bbuutu ye motoka yange nkagijuza ebitabu kandi nasimbura. Obunkaba ntakahikire hara muno ebitabu byona bikababihoiremu omu bbuutu. Nkatebeza amakuru amarungi ag’Obukama n’obwekambi omu biikaro ebya buli mulingo. Obunahikaga ha nkomo n’ebiikaro eby’okuhuumurramu nayemerraga ningaba turakiti hali abantu abaabaga omu biikaro binu. Kuhikya na hati nkyayekaguza embibo y’amananu obweraaba yakuzire omu bantu abo.​—1 Kol. 3:6, 7.

Baitu, amananu gali ngu obunkaba nkyayegere amananu, nkaba ntarukwegendereza, kukira muno obunabazaaga n’ab’omuka rundi abanyabuzaale. Habw’okuba okugonza kwange okw’okubanza hali Yahwe kwali kw’amaani, nabatebezaaga n’obumanzi baitu kandi omu mulingo ogutali gw’amagezi. Ngonza muno bagenzi bange abakuru, John na Ron, kandi nahambirizaaga mbatebeza. Hanyuma nkabasaba ekiganyiro habw’enyetwaza yange egi embi. Baitu nabwo, tinkalekaga kubasabira ngu baikirize amananu. Kuruga obu, Yahwe anyegeseze, kandi nyegere kufaaho abantu abandi obundukuba nimbegesa rundi nimbatebeza.​—Bak. 4:6.

N’obundaaba ninyijuka okugonza okunyiniire Yahwe, tinyebwa ebintu ebindi ebindukugoza omu bwomeezi bwange. Ekindi enkindukugonza muno nuwe mukazi wange ow’omuhendo muno, Susan. Nkaba nkimanyire ngu ningonza omuntu ayakunkonyiire kukora omulimo ogw’Obukama. Susan mukazi ow’aine amaani kandi ow’eby’omwoyo. Nikyaijuka kurungi obunamubungiire obutwali nitukyajumbirangana. Susan akaba aikaliire ha bbaraza y’enju yabo omu Cranston, Rhode Island. Akaba aliyo nasoma Omunaara gw’Omulinzi na Baibuli ye ha rubaju. Ekyansemiize kiri ngu akaba n’asoma ebicweka ebindi ebirumu obu nasukura n’ebyahandiikirwe. Kandi nkatekereza nti: ‘Mali onu ali mukazi w’eby’omwoyo!’ Tukataaha obuswere omu Desemba 1971, kandi ninsiima ngu kuruga obu aikaire harubaju rwange nansagika. Ekindukukira kugonza hali uwe nikyo ngu, n’angonza, baitu nagonza Yahwe kukira nyowe.

Nyowe na Susan tukazaara aboojo babiri, Jesse na Paul. Obubakaba nibakura, Yahwe akaba ali nabo. (1 Sam. 3:19) Habwokuba amananu bakagafoora gaabo, tubesiimisa muno. Bagumizeemu kuheereza Yahwe habw’okwijuka okugonza kwabo okw’okubanza hali Yahwe. Hati boona bamazire emyaka erukuhingura 20 omu buheereza obw’akasumi koona. Ekindi, nyesiimisa muno bakabaana bange babiri abarungi, Stephanie na Racquel, abandukurora nka bahara bange bonyini. Batabani bange boona babiri bakaswera abakazi ab’eby’omwoyo abarukugonza Yahwe Ruhanga n’emitima yabo yoona n’obwomeezi bwabo bwona.​—Bef. 6:6.

Hanyuma y’okubatizibwa, nkaheereza omu Rhode Island kumara emyaka 16, kandi nkatunga abanywani ab’omuhendo. Ninyijuka ebintu bingi muno ebirungi hali abagurusi ab’ekitebe abarukwahukana abamperiize nabo. Ekindi, ninsiima muno habw’abaroleerezi baingi abantasobora kubara abankonyiire. Mali kamugisa gw’amaani kukorra hamu naabo abasoboire kulinda okugonza kwabu okw’okubanza hali Yahwe! Omu 1987 tukafurukira omu North Carolina kuheereza nambere hali obwetaago bw’abatebezi, kandi oku naho tukatungayo abanywani abandi ab’omuhendo. *

Omu Agusto 2002, nyowe na Susan atukaikiriza kugenda kuheereza ha Beseeri eya Patterson omu United States. Nkaba ninkora omu ekitongole ekirukujunaanizibwa n’omulimo gw’okutebeza, kandi Susan akaba nakora nambere boogeza engoye ha Beseeri. Yagonzaaga muno kukorayo! Kandi, omu Agusto 2005, nkaheebwa omugisa gw’okuheereza h’Akatebe Akalemi. Nkahurra mbudaazibwe habw’obujunaanizibwa bunu. Mukazi wange akahurra atiinire habwokuba obujunaanizibwa bunu nibutwarramu emirimo, n’engendo nyingi. Susan tagonza kugendera mu nyonyi, baitu tukira kugigenderamu! Susan angambira ngu ebigambo bya bakazi b’ab’Oruganda abali h’Akatebe Akalemi abandi ebibamugambira omu mulingo gw’okugonza, bimukonyiire kugonza kweyongera kukora kyona ekyarukusobora kunsagika. Eki mali nikyo akozere, kandi mugonza habw’eki.

Ofiisi yange ijwiremu ebisisani bingi eby’omuhendo! Binyijukya obwomeezi oburungi obunyegondiizeemu. Ntungire empeera enungi habw’okukora kyona ekindukusobora kwijuka okugonza kwange okw’okubanza hali Yahwe!