Baibuli Ehindura Obwomeezi

KIKI ekyaletiire omuyaayi kusara isoke rye n’okusingura okusoroora okw’akaba ainiire abajungu? Kandi kiki ekyaletiire omusigazi ayagonzaaga kurwana kandi ayasorolezaaga abarukutunda ebitokooza bwongo sente kuhindura obwomeezi bwe? Wetegereze abantu banu boona ekibarukugamba.

“Nkasingura okusoroora.”​—HAFENI NGHAMA

EMYAKA: 34

IHANGA: ZAMBIA

EBYAFAAYO: RASTAFARIAN

OBWOMEEZI BWANGE OBWA KARA: Nkazaalirwa omu nkambi omu ihanga lya Zambia. Nyina nyowe akaba airukiire omu Namibia omu kasumi k’obulemu kandi akaba ayeteraniize ha kitongole ekirukwetwa South West Africa People’s Organization (SWAPO). Ekitongole kinu kyali nikirwanisa obulemi bwa South Africa obwali nibulema Namibia kasumi ako.

Emyaka 15 ey’obwomeezi bwange nkabanza kugimara omu nkambi ezirukwahukana. Abato abakaba bali omu nkambi eza SWAPO bayekambisibwaga kweteranizaaho ekitebe kinu, ekitwanihiraga ngu nikiija kutucungura. Tukaba twijwire entekereza ey’eby’obulemi kandi tukegesebwa kunoba abajungu.

Obunkaba nyine emyaka 11, nkagonza kugumibwa nk’Omukristaayo omu kanisa ey’ekaba eri omu nkambi ey’ekaba etabwirwemu Abakatuliki, Aba Luther, Abarokole hamu n’abandi. Pasita ounabalize nauwe atanyekambise kuteera orutambu runu. Kuruga n’obu nkatandika kugurukyagurukya Ruhanga obwaraaba aroho. Baitu ha myaka 15, okugonza kwange hali ebizina bya rege hamu n’okugonza kumaraho obutali bwinganiza kukamarwaho abantu abayetwaga black Africans abandetiire kweteranizaaho ekiguruupu ya ba Rastafarian. Nkakuza isoke, natandika kunywa enjaahi, naleka kulya enyama kandi natandika kurwanirra obugabe bw’abairaguzi. Baitu nabwo, ntahindule engeso zange embi rundi kuleka kurora filimu ez’okurwana. Kandi nkagumizaamu nimbaza kubi.

OMULINGO BAIBULI YAHINDWIRE OBWOMEEZI BWANGE: Omu 1995, obunkaba nyine emyaka nka 20, nkatandika kutekerezaaho omulingo nsemeriire kutwazaamu obwomeezi bwange. Nkaba ninsoma ebitabu byona ebya guruupu eya ba Rastafarian ebinatungaga. Bimu hali byo byajulizaaga Baibuli, baitu omulingo byasoborraga tigwakoraga makuru. Nahabweki nkacwamu kwesomera Baibuli nyenka.

Hanyuma, omuyaayi munywani wange akampa akatabu ak’okukozesa kwega Baibuli akaatiirwe Abakaiso ba Yahwe. Nkesomesa akatabu kanu nyenka ninkozesa Baibuli. Hanyuma, nkatangatangana Abakaiso ba Yahwe kandi nagumizaamu kwega nabo.

Nkatamu amaani maingi naleka kunywa etaaba n’okunywa muno amaarwa. (2 Abakolinso 7:1) Nkahinduramu ha nzooka yange, nasara isoke, naleka kurora filimu ezirumu ebisisani eby’orwanju n’okurwana kandi naleka n’okubaza kubi. (Abefeso 5:3, 4) Hakumalirra, nkasingura okusoroora okunkaba nyine hali abajungu. (Engeso Ezabakwenda 10:34, 35) Kusobora kukora empindahinduka zinu kikatwarramu n’okweihaho ebizina ebyanyekambisaaga kusoroora omu rangi n’okwecwaho abanywani abankaba nyine abandeteraga kugarukira engeso ezinkaba nyine.

Hanyuma y’okukora empindahinduka ezi, nkaserra Ekyombeko ky’Obukama eky’Abakaiso ba Yahwe kandi nasaba kubeteranizaaho. Bakatandika kunyegesa Baibuli. Obunacwiremu kubatizibwa nk’omu h’Abakaiso ba Yahwe, ab’omu ka batasemererwe. Nyina nyowe akangambira kukomamu ediini endi yoona “ey’Ekikristaayo” hatali ey’Abakaiso ba Yahwe. Omu h’abaisento nyowe ow’akaba ali mukuru omu gavumenti kandi ruranganwa yaikaraga n’anjuma habw’encamu yange ey’okweteranizaaho Abakaiso ba Yahwe.

Baitu obunayegereho omulingo Yesu yatwazamuga abantu kandi nateka omu nkora ebinayegere, kikankonyera kugumira okuhakanizibwa n’okusekerezebwa. Obunalengesaniize Abakaiso ba Yahwe ebibarukwegesa n’ebya Baibuli egamba, nkakigumya ngu nzoire ediini ey’ehikire. Ekyokurorraho, bahondera ekiragiro kya Baibuli eky’okutebeza abandi. (Matayo 28:19, 20; Engeso Ezabakwenda 15:14) Ekindi tibejumbira omu by’obulemi.​—Zabuli 146:3, 4; Yohana 15:17, 18.

OMULINGO NGASIIRWE: Kwega kuhondera emisingi ya Baibuli kinkonyire omu miringo nyingi. Ekyokurorraho, kuleka kunywa enjaahi kinkonyire kutasiisa sente nyingi buli kwezi. Tinkyhikwaho ebizibu ebiruga omu kukozesa ebitokooza bwongo kandi obwomeezi bwange bweyongiire kuba burungi omu bitekerezo n’omu mubiri.

Obwomeezi bwange hati bwine ekigendererwa ekinkaba ninserra kurugira kimu omu busigazi bwange. Kandi ekirukukira obukuru, hati nimpurra ngu nsoboire kwirra haihi na Ruhanga.​—Yakobo 4:8.

“Nyegere kulema ekiniga kyange.”​—MARTINO PEDRETTI

EMYAKA: 43

IHANGA: AUSTRALIA

EBYAFAAYO: YATUNDAGA EBITOKOOZA BWONGO

OBWOMEEZI BWANGE OBWA KARA: Obunkaba ninkura, eka yaitu yaikaraga n’efuruka. Nkaikara omu butawuni obutaito, ebibuga ebikooto kandi nkaikaraho na ha itaka ly’ekanisa kumara akasumi. Ninyijuka ebintu bingi muno ebirungi omu kasumi ako obunkaba ndi n’abanyinarumi nyowe hamu n’abaana baabo, nitusoha, nituhiiga, nitukora obusara muyaga, nitukora n’eby’okuzaanisa ebindi.

Ise nyowe akaba ali muzaani w’entomi kandi akatandika kunyegesa nkyali muto muno. Kurwana kukafooka kicweka ky’obwomeezi bwange. Omu myaka y’obusigazi bwange, namaraga obwire bwingi omu bbaara ninywa amaarwa. Nyowe n’abanywani bange twagonzaga kutandikaho obulemu. Twakozesaaga ebiti by’okuzaanisa baseball n’emihyo kutahirra abantu nka 20 n’okukiraho.

Nakoraga sente kurabira omu kutunda ebitokooza bwongo n’ebintu ebyabaga biibirwe abarukupakira emeeri. Ekindi, nasorozaaga sente z’abarukutunda ebitokooza bwongo kandi natiinisirizaaga abaabaga nibabanjibwa ninkozesa emundu. Ekigendererwa kyange kyali ky’okufooka mwisi. Mooto yange ekaba n’egamba ngu, ita rundi bakwite.

OMULINGO BAIBULI YAHINDWIRE OBWOMEEZI BWANGE: Nkaba mpuliireho ngu haroho Abakaiso ba Yahwe obunkaba ninkura. Obunkaba ndi omu myaka nka 20, ninyijuka nkakaguzaaho nyina nyowe obw’araaba amanyire nambere bali. Hanyuma y’ebiro bibiri, omu h’Abakaiso ba Yahwe arukwetwa Dixon akateera kodi ha rwigi rwange. Hanyuma y’okumara akasumi nitubaza, akandaaliza kugenda omu nsorrokano z’Abakaiso ba Yahwe. Nkagendayo kandi kuruga obu nyikaire ningenda omu nsorrokano kumara emyaka erukuhingura omu 20. Buli kikaguzo ekinkaba nyine, Abakaiso ba Yahwe bakakigarukamu nibakozesa Baibuli.

Nkasemererwa obunayegere ngu Yahwe n’agonza abantu omu omu otwaliiremu n’abatamumanyire. (2 Petero 3:9) Nkakyetegereza ngu ali Isiitwe ow’okugonza ayakundoleriire n’obu abandi bataakunfireho. Ekindi, kikampumuza obunayegere ngu n’asobora kunganyira ebibi byange kakuba mpinduramu enyetwaza yange. Enkarra za Baibuli azirukusangwa omu Abefeso 4:22-24 zikankwataho muno. Zikanyekambisa “okujura omuntu owaira” hamu “nokujwara omuntu omuhyaka, arukuhangwa Ruhanga omu kuhikirra.”

Kikantwarra akasumi kuhinduramu omulingo nayetwazamuga. Namaraga wiiki ntakukozesa bitokooza bwongo, baitu obunatangatanganaga banywani bange ha wiikendi, bansindikirizaaga kandi malirra mbikozeseze. Nkakyetegereza ngu kyali nikinyetaagisa kwecwaho abantu namaraga nabo obwire obundaaba ningonza kusemezaamu obwomeezi bwange, nahabweki nkacwamu kugenda omu isaza erindi. Abanywani abamu bakansaba kunsendekerezaaho omu rugendo rwange kandi nkaikiriza. Obutwali nitugenda, bakatandika kunywa enjaahi kandi nanyowe bampaho. Nkabagambira ngu engeso ezi nkaba nzirekere kandi twayecwahongana ha mutaano gw’isaza. Hanyuma y’obwire buke kurabaho, nkahurra ngu banywani bange bakagenda bacwa banka nibakozesa emundu.

OMULINGO NGASIIRWE: Hanyuma y’okwecwaho abanywani bange ababi, kikanyanguhira kukora empindahinduka ezikaba nizetaagisa omu bwomeezi bwange. Omu 1989, nkabatizibwa nk’omu h’Abakaiso ba Yahwe. Hanyuma y’okubatizibwa, munyaanya nyowe, nyina nyowe hamu na ise nyowe boona bakanyeteranizaaho omu kuheereza Yahwe.

Hati nakamara emyaka 17 ntahire obuswere kandi twine abaana basatu. Nyegere kulema ekiniga kyange n’obundukuba ninyenderezebwa. Ekindi nyegere kugonza abantu boona ntarukusoroora omu ‘nganda, erangi n’endimi.’ (Okusuku’rwa 7:9) Nimpurra ngu ebigambo bya Yesu bihikiriziibwe omu bwomeezi bwange. Akagamba ati: “Obumuraaba nimuikara omu kigambo kyange, nukwo muli begeswa bange mali; kandi mulimanya amananu, namananu galibafora bobugabe.”​—Yohana 8:31, 32.

[Ebigambo ebikomerwemu]

Kusobora kukora empindahinduka zinu kikatwarramu n’okweihaho ebizina ebyanyekambisaaga kusoroora omu rangi

[Ebigambo ebikomerwemu]

Nyowe n’abanywani bange twagonzaga kutandikaho obulemu. Twakozesaaga ebiti by’okuzaanisa baseball n’emihyo kutahirra abantu nka 20 n’okukiraho.