Baibuli Ehindura Obwomeezi

OMWISIKI omu ayarabire omu bizibu bingi omu buto bwe akatunga ata ekigendererwa omu bwomeezi? Kiki ekyaletiire omuheekera ayagonzaaga kurwana kufooka muntu ow’obusinge kandi omutebezi w’amakuru amarungi? Soma ebyafaayo binu nukwo otunge eby’okugarukamu.

“Nkaba ninserra kugonzebwa n’okufibwaho.”​—INNA LEZHNINA

AKAZAARWA: 1981

IHANGA: RUSSIA

EBYAFAAYO: AKARABA OMU BIZIBU BINGI OMU BUTO BWE

OBWOMEEZI BWANGE OBWA KARA: Nkazaarwa nfiire amatu n’omunwa kandi n’abazaire bange boona nukwo bali. Obwomeezi bwange bwali burungi obunkaba nyine emyaka mukaaga. Hanyuma abazaire bange bakagaitururwa. N’obukiraaba ngu nkaba nkyali muto, nkaba manyire okugaitururwa nikimanyisa ki kandi kikansaaliza muno. Hanyuma y’okugaitururwa, ise nyowe na mukuru wange omwojo bakagenda kwikara omu rubuga rwa Troitsk, kandi nyowe na nyina nyowe tukagenda kwikara omu Chelya­binsk. Hanyuma y’akasumi, nyina nyowe akongera yaswerwa. Iba nyina nyowe akaba ali mutamiizi kandi yaikaraga n’atuteera.

Omu 1993, mukuru wange omwojo akafeera omu maizi. Ekizibu eki kikasaaliza muno eka yaitu. Habw’okuganya kwingi, nyina nyowe nauwe akatandika kunywa amaarwa kandi boona bakatandika kuntwaza kubi. Nkatandika kuserra obwomeezi oburungi. Nkaba ninserra okugonzebwa n’okufibwaho. Nkatandika kugenda omu makanisa agarukwahukana ninserra okuhuumuzibwa baitu ntakutunge.

OMULINGO BAIBULI YAHINDWIRE OBWOMEEZI BWANGE: Obunkaba nyine emyaka 13, omwegi mutaahi wange ha isomero ow’akaba ali omu h’Abakaiso ba Yahwe akagambiraho enganikyo kuruga omu Baibuli. Nkasemererwa obunayegereho abantu abarukubazibwaho omu Baibuli nka Nuha na Yobu, abaaheeriize Ruhanga n’obukiraaba ngu enyikara zaabo zaali zigumangaine. Hanyuma y’akacu kake nkatandika kwega Baibuli n’Abakaiso ba Yahwe n’okugenda omu nsorrokano zaabo.

Nkega bingi kuruga omu Baibuli. Nkakwatwaho muno obunamanyire ngu Ruhanga aine ibara. (Zabuli 83:18) Nkasemererwa obunarozere omulingo oguhikire Baibuli oguyarangiremu ebintu ebyakubaireho omu “biro ebya hanyuma.” (2 Timoseo 3:1-5) Ekindi, nkasemererwa muno obunayegereho okunihira okw’okuhumbuuka. Kitekerezeeho​—Ninyija kwongera kurora mukuru wange!​—Yohana 5:28, 29.

Baitu tibali boona abaatungire okusemererwa nk’okwange. Nyina nyowe na iba baali banobere Abakaiso ba Yahwe. Bakalengaho kunsindikiriza ngu ndeke kwega Baibuli. Baitu ebinkaba ninyega nkabigonza kandi nkaba ntasobora kubireka.

Kikaba kitanguhire kugumira okuhakanizibwa kuruga omu bantu b’omu ka. Ekintu ekindi ekyansaaliize, owanyina nyowe omwojo ayansendekerezaaga omu nsorrokano z’Abakaiso ba Yahwe nauwe akaitwa amaizi. Baitu nabwo, Abakaiso ba Yahwe baikaraga nibampuumuza. Omuli bo nuho nasangire okugonza n’okuhuumuzibwa ebinkaba ninserra obwomeezi bwange bwona. Nkamanya ngu mali enu niyo diini ey’amananu. Omu 1996, nkabatizibwa nk’omu h’Abakaiso ba Yahwe.

OMULINGO NGASIIRWE: Nkaswerwa omusaija omurungi oubarukweta Dmitry kandi twakamara emyaka mukaaga omu buswere. Itwena nituheereza ha Ofiisi y’Itaagi ey’Abakaiso ba Yahwe omu St. Petersburg. Hanyuma y’akasumi, enyehurra y’abazaire bange ha nyikiriza zange ekahinduka.

Ninsiima muno Yahwe habw’okumumanya! Ntungire ekigendererwa omu bwomeezi bwange habw’okumuheereza.

“Haroho Ebikaguzo Bingi Ebyantalibanizaaga.”​—RAUDEL RODRÍGUEZ RODRÍGUEZ

AKAZAARWA: 1959

IHANGA: CUBA

EBYAFAAYO: MUHEEKERA AYAHAKANIZAAGA GAVUMENTI

OBWOMEEZI BWANGE OBWA KARA: Nkazaalirwa omu kiikaro ekirukwetwa Havana, omu ihanga lya Cuba, kandi nkakurra omu kiikaro ekinaku nambere abantu baikaraga nibakungana kandi nibarwana. Obunkaba ninkura, nkagonza kuzaana omuzaano ogw’ebigwa n’emizaano endi eya mulingo ogu.

Nkaba ndi mwegi umurungi, kandi abazaire bange bakanyekambisa kugenda ha yunivasite. Obunkaba ndi ha yunivasite, nkatandika kwehurra ngu eby’obulemi eby’omu ihanga lyaitu nibyetaaga kuhindurwa. Nahabweki nkacwamu kufooka muheekera. Nyowe n’omwegi mutaahi wange tukatahirra omu poliisi obu nitugonza kumwaka emundu. Omupoliisi tukamusiga n’ebihuta by’amaani ha mutwe. Tukatwarwa omu nkomo habw’ekikorwa eki kandi twacwerwa omusango ogw’okufa obu nibatuteera amasasi. Nkaba nyine emyaka 20 yonka obunacweriirwe ogw’okufa!

Obunkaba ndi nyenka omu kisiika ky’enkomo, nkatandika kwerengesaamu nk’oku ndayetwaza omu maiso g’abaserikale abaali nibaija kututeera amasasi. Nkaba ntarukugonza kwoleka ngu ntiinire. Ha murundi nugwo gumu nkaba nyine ebikaguzo bingi. Nkekaguza nti: ‘Habwaki mu nsi harumu obutali bwinganiza bwingi? Mali obwomeezi nukwo burukwija kwikara buti?’

OMULINGO BAIBULI YAHINDWIRE OBWOMEEZI BWANGE: Ekifubiro kyaitu eky’okwitwa bakakihindura bakigaara ha kusibwa emyaka 30. Kasumi ako nubwo natangatangaine Abakaiso ba Yahwe abaali basibirwe habw’enyikiriza zaabo. Omulingo ogw’obumanzi kandi ogw’obusinge Abakaiso ba Yahwe ogubaayetwazamuga gukansemeza muno. N’obukiraaba ngu baali basibirwe bataine musango, batakwatwe kiniga rundi kubiihirwa.

Abakaiso ba Yahwe bakanyegesa ngu Ruhanga ainiire abantu ekigendererwa. Bakanyoleka kuruga omu Baibuli ngu naija kuhindura ensi yaitu agifoole orugonjo orurungi orutarumu bucwi bw’ebiragiro n’obutalibwinganiza. Bakanyegesa ngu ensi niija kuba ijwiremu abantu abarungi abaliba n’omugisa ogw’okwomeera ebiro n’ebiro omu bwomeezi obuhikiriire.​—Zabuli 37:29.

Nkagonza ebintu Abakaiso ba Yahwe ebibaali nibanyegesa, baitu nkatekereza ngu nyowe nikisobora kungumira kwetwaza omu mulingo ogw’obusinge kandi ogutekaine nkabo. Nkatekereza ngu kutagwera rubaju omu by’obulemi rundi kuhindura orusaya orw’emoso kyali kitarukusoboka hali nyowe. Nahabweki nkacwamu kwesomera Baibuli nyenka. Obunamazire, nkakyetegereza ngu Abakaiso ba Yahwe nubo bonka abetwaza nk’Abakristaayo aba kara.

Obunkaba ninyega Baibuli, nkakyetegereza ngu nsemeriire kukora empindahinduka ez’amaani omu bwomeezi bwange. Nk’ekyokurorraho nkaba nyine kuhinduramu omulingo nabazaamuga habwokuba nakozesaaga muno ebigambo eby’okurahira. Ekindi nkaba nyine kuleka kunywa etaaba. Kandi nkaba nyine n’okuleka kwetahya omu by’obulemi. Kitanyanguhire kukora empindahinduka zinu, baitu Yahwe akankonyera kandi nasingura mporampora.

Emu ha mpindahinduka eyakizireyo kungumira kukora nukwo kulema ekiniga kyange. Na hati ninkyasaba Yahwe ankonyere ntunge okwetanga. Nsoboire kukonyerwa enkarra ezimu omu Baibuli nk’Enfumo 16:32, aharukugamba: “Aikaraho okubihirwa akira abamani; kandi arukulema omwoyogwe nakira oburungi ogu anyaga orubuga.”

Omu 1991, nkabatizibwa nk’omu h’Abakaiso ba Yahwe. Nkabatirizibwa omu duramu y’amaizi omu nkomo. Omwaka ogwahondireho, bamu h’abanyankomo tukalekerwa kandi twasindikwa omu Spain habwokuba twali twineyo abanyabuzaale baitu. Obunahikire Spain, aho naaho nkatandika kugenda omu nsorrokano z’Abakaiso ba Yahwe. Abakaiso ba Yahwe bakantangirra kurungi kandi kikasisana oti rundi nkaba mazire nabo emyaka nyingi kandi bakankonyera obu nkaba nintandika obwomeezi obuhyaka omu Spain.

OMULINGO NGASIIRWE: Hati nyine okusemererwa, kandi nyowe na mukazi wange n’abahara baitu babiri nituheereza hamu Ruhanga. Nyine omugisa ogw’okumara obwire bwange oburukukira obwingi ninkonyera abandi kwega Baibuli. Obwire obumu obuntekerezaaho omulingo nkaba nigenda kufa ha myaka yange ey’obusigazi, nsiima Ruhanga habw’ebirungi nsoboire kutunga kasumi kanu. Tinkyali mwomeezi kwonka, baitu nyine n’okunihira. Ndindiriire orugonjo orurungi orw’aturaganiziibwe​—n’akasumi nambere obwinganiza buliba bwingi kandi “tihakiroho okufa.”​—Okusuku’rwa 21:3, 4.

[Ebigambo ebikomerwemu]

“Nkakwatwaho muno obunamanyire ngu Ruhanga aine ibara”

[Ekisisani]

Nyowe na iba nyowe twegondeza omu kugabira abafu b’amatu n’omunwa ebitabu