• AKAZAARWA: 1963

• IHANGA: BRITAIN

• EBYAFAAYO: AKABA AINE OMULIMO OGW’AMAANI

OBWOMEEZI BWANGE OBWA KARA:

Nkazaalirwa omu Croydon, South London, kandi ndi wa mukaaga omu abaana mwenda. Bazaire bange baali nibaruga ha kizinga kya Caribbean omu St. Vincent. Nyina nyowe yegendaga omu kanisa yaba Mesodisti. N’obukiraaba ngu nkaba ningonza muno kumanya ebintu bingi, nkaba ntarukugonza kumanya ebirukukwata hali Ruhanga. Oruhuumuro rwange narumaraga ndi ha nyanja ey’ekaba eri nambere twaikaraga obu ninsoma ebitabu bingi ebinkaba nyihire omu lyahurro ly’ebitabu.

Hanyuma y’emyaka mmazire kusoma, nkakyetegereza ngu nkaba ningonza kukonyera abantu abali omu bwetaago. Nkatandika kukonyera abataine ahokuraara naabo abaine obulema ha mubiri rundi abaagumirwaga kwega. Nkatandika kwega ha yunivasite, kandi nasoma ebirukukwata ha by’okulya, obwomeezi hamu n’emibazi. Obunamazire kusoma, nkatunga emirimo ey’amaani, kandi nayeyongera kutunga sente. Nk’oku nkaba ninyekozesa nimpa abantu amagezi kandi nseruliiriza ha bintu bingi, nabaga ninyetaaga kompyuta yange na intaneeti. Natembaga enyonyi ngenda nyikara omu hoteeri eindukugonza kandi nimarayo obwire ninyegondeza omu biikaro ebirungi, kandi ngenda mu sawuna na jiimu nukwo nyikale ndi kurungi. Nkaba nintekereza ngu ninyegondeza omu bwomeezi. Baitu nabwo, ntaleke kufaaho abantu abarukurorwa nk’abahansi.

OMULINGO BAIBULI YAHINDWIRE OBWOMEEZI BWANGE:

Kumara emyaka nayekaguzaaga, ‘Habwaki tuli omu nsi? Kandi obwomeezi bwine kigendererwa ki?’ Baitu nkaba ntakalengahoga kutunga eby’okugarukamu kuruga omu Baibuli. Kiro kimu omu 1999, munyaanya nyowe Margaret, ow’akaba afookere omu h’Abakaiso ba Yahwe, akambungira na munywani we ondi, ayanfiireho muno. Nkaikiriza kwega Baibuli na munywani wa munyaanya nyowe, baitu nkakurakurana mpora mpora habwokuba omulimo gwange n’omulingo natwazamuga obwomeezi bwange nibyo byantwarraga obwire.

Omu 2002 hagati y’okwezi kwa Juuni na Agusto, nkagenda omu masirimuka ga England. Nkatandika, kusoma ha yunivasite nyine ekigendererwa ky’okutunga doctorate omu kuseruliiriza. Nkatandika kugenda na mutabani wange ha Kyombeko ky’Obukama ntarukwosa. N’obukiraaba ngu nkaba ningonza muno kusoma ha yunivasite, kwega Baibuli kwali nikunkonyera kwetegereza kurungi habwaki ebizibu biri omu nsi n’omulingo birihwaho. Nketegereza kurungi amananu agarukusangwa omu Matayo 6:24, aharukwoleka ngu torukusobora kuheereza abakama babiri. Nkaba nyine kucwamu kuheereza Ruhanga rundi eby’obuguuda. Nkaba nkimanyire ngu nsemeriire kucwamu ebindayebembeza omu bwomeezi bwange.

Omwaka ogwali guhoire, nagendaga omu kwega Baibuli nambere Abakaiso ba Yahwe bayegaga akatabu akaine omutwe Is There a Creator Who Cares About You? * Nkaba nkigumiize kimu ngu Omuhangi waitu wenka, Yahwe, nuwe arukusobora kumaraho ebizibu by’abantu. Kandi hati ha yunivasite bakaba nibanyegesa ngu ekigendererwa ky’obwomeezi tikirukutwarramu kwikiririza omu Muhangi. Kikambiihiza muno. Hanyuma y’ameezi abiri, nkaleka kusoma ha yunivasite nacwamu kwongera ha bwire nkaba ninteka omu bintu eby’omwoyo.

Enkarra kuruga omu Baibuli ezanyekambisize ziri omu Enfumo 3:5, 6, aharukugamba ngu: “Yesiga [Yahwe] nomutima gwawe gwona, oleke okwigamira ha kwetegereza kwawe wenka: Omu mihanda yawe yona omwatulege, kandi nuwe aliterekereza emihanda yawe.” Kwega hali Ruhanga waitu ow’engozi kikankirra ebintu n’obuguuda ebyakuleserwe kusoma. Nk’oku nayeyongiire kwega ha kigendererwa kya Yahwe hali ensi n’omulingo Yesu yahaireyo obwomeezi bwe habwaitu, nukwo nayeyongiire kugonza kuhayo obwomeezi bwange hali Omuhangi waitu. Nkabatizibwa omu Apuli 2003. Hanyuma, nkorobyamu obwomeezi bwange.

OMULINGO NGASIIRWE:

Enkoragana yange na Yahwe y’omuhendo muno. Ntungire obusinge bwonyini obw’omu mutima n’okusemerewa. Ekindi, nyine okusemererwa kwingi habw’okumara obwire hamu n’abantu abarukuramya Ruhanga omu mananu.

Okugonza kwange okw’okumanya kweyongera kwigusibwa ebyo ebinsoma kuruga omu Baibuli n’omu nsorrokano ez’ekitebe. Ngonza muno kugambiraho abandi ebirukukwata ha nyikiriza yange. Gunu gufookere mulimo gwange nambere nsobora kukonyera abantu, basobole kutunga obwomeezi oburungi hati n’okuba n’okunihira okw’omu busumi obw’omu maiso omu nsi empyaka. Kuruga Juuni 2008, nyikaire omu buheereza obw’akasumi koona, kandi nyine okusemererwa n’okumarwa kukira na kara. Ntugire ekigendererwa omu bwomeezi kandi eki mali ninkisiimira Yahwe.

• AKAZAARWA: 1973

• IHANGA: AUSTRIA

• EBYAFAAYO: MUTEEZI W’EJAARA

OBWOMEEZI BWANGE OBWA KARA:

Nkakurra omu katawuni akataito aka Braunau, omu Austria. Ekiikaro eki kikaba kikurakuraine kandi obucwi bw’ebiragiro bwali butarukukanya. Ab’omu ka baali bakatuliki kandi nanyowe niyo diini nakuliiremu.

Haroho ekintu ekyabaireho nkyali muto kandi kyankwataho muno. Omu 1984, obunkaba nyine emyaka nka 11, ninyijuka nituzaana omupiira nyowe n’omu h’abanywani bange. Kiro eki kyonyini nyamusana, akafeera omu butandwa bwa motoka. Kufeerwa munywani wange kikankwataho muno. Nahanyuma y’emyaka nyingi butandwa enu emazire kubaho, naikaraga ninyekaguza kiki ekitubaho obutufa.

Obunamazire kusoma, nkatandika kukora omu masanyarazi. N’obukiraaba ngu nkafooka muteezi w’ejaara kandi nakozesaga sente nyingi, nkaba ntaine bizibu omu by’entahya. Ekindi, namarraga obwire bwingi omu by’emizaano kandi nkatandika kugonza ebidongo eby’amaani n’ebizina ebirukukurakuraniza omwoyo gw’obujeemu. Nagonzaaga muno kugenda omu ndongo n’omu magenyi. Nkaba nyine obwomeezi obw’okwesemeza n’okusiihana, baitu nabwo nahurraga nk’owaine ekirukumburaho.

OMULINGO BAIBULI YAHINDWIRE OBWOMEEZI BWANGE:

Omu 1995, omu h’Abakaiso ba Yahwe anyakukuzire omu myaka, akateera kodi ha rwigi rwange kandi yampa akatabu akaali nikaha eky’okugarukamu eky’ekikaguzo ekirukugamba ngu kiki ekibaho obu tufa? Nkaba ninkyatalibanizibwa okufa kwa munywani wange, nahabweki nkaikiriza akatabu kanu. Ntagarukire ha kusoma esuura ey’ekaba n’ekwata ha kufa, baitu nkakasoma koona!

Ebinasomere bikagarukamu ebikaguzo byange ebirukukwata ha kufa. Baitu nkeega n’ebirukukiraho. Habwokuba nkakurra omu diini y’abakatuliki, nakiraga muno kwebembeza Yesu. Baitu, kwega Baibuli kukankonyera kukurakuraniza enkoragana enungi na Ise Yesu, Yahwe Ruhanga. Kikampuniiriza kwega ngu Yahwe tatusereka ensita ze, tagumangaine baitu ayeyoleka hali abo abamuserra. (Matayo 7:7-11) Nkeega ngu Yahwe aine enyehurra. Ekindi, nkeega ngu ahikiiriza ebyaba araganiize. Eki kikandetera kugonza kumanya obunabbi obuli omu Baibuli n’okumanya omulingo bwahikiriziibwe. Ebinayegere bikagumya okwikiriza kwange omuli Ruhanga.

Hanyuma y’akacu kake nkakyetegereza ngu Abakaiso ba Yahwe nubo bonka barukufaayo kukonyera abantu kwetegereza Baibuli. Nahandiikaga ebyahandiikirwe ebiri omu bitabu by’Abakaiso ba Yahwe kandi mbisoma omu Baibuli yange ey’abakatuliki. Nk’oku nayeyongiire kuseruliiriza, nukwo nayeyongiire kwetegereza ngu nzoire amananu.

Kwega Baibuli kukankonyera kumanya ngu Yahwe akaba nagonza mpondere endengo ze omu bwomeezi bwange. Kusigikirra ha binasomere omu Abefeso 4:22-24, nkakyetegereza ngu nyine kujuura “omuntu owaira,” ow’akaba nasigikirra ha ‘ngeso ezaira’ kandi ngu nkaba nyine ‘kujwara omuntu omuhyaka arukuhangwa Ruhanga.” Nahabweki nkaleka engeso zange ez’obusiihani. Ekindi, nkakirora ngu nyine kuleka kuteera ejaara habwokuba kikurakuraniza kugonza itungo n’omururu. (1 Abakolinso 6:9, 10) Nkaba nkimanyire ngu kusobora kukora empindahinduka ezi, kikaba nikinyetaagisa kwecwaho abanywani aba kara nukwo nserre abanywani abarukwebembeza endengo nk’ezange.

Kitanyanguhire kukora empindahinduka ezi. Baitu nkatandika kugenda omu nsorrokano z’Abakaiso ba Yahwe ha Kyombeko ky’Obukama kandi natandika kutunga abanywani abahyaka omu kitebe. Nkagumizaamu kwesomesa Baibuli. Ebintu binu bikankonyera kuhinduramu ebizina ebinahuliirizaaga, kuhindura ebigendererwa omu bwomeezi n’okusemeza omulingo nazookamuga. Omu 1995, nkabatizibwa nk’omu h’Abakaiso ba Yahwe.

OMULINGO NGASIIRWE:

Hati nyine endora ey’ehikire ha sente n’itungo. Nkaba ndi muntu arukubiihirwa bwangu, baitu hati nfookere muntu ow’atarukukwatwa bwangu ekiniga. Ekindi, tinkyayeraliikirra muno ha busumi obw’omu maiso.

Kinsemeza kuba kicweka ky’ekitebe eky’abantu abarukuheereza Yahwe omu nsi yoona. Omuli bo harumu abantu abarukuheereza Ruhanga n’obwesigwa n’obukiraaba ngu batunga ebizibu. Nimpurra nsemeriirwe muno habw’okukozesa obwire n’amaani gange hatali kweserurra ebindukugonza, baitu kuramya Yahwe n’okukorra abantu abandi ebirungi.

• AKAZAARWA: 1963

• IHANGA: ENGLAND

• EBYAFAAYO: AKABA AYETAMIRWE OBWOMEEZI

OBWOMEEZI BWANGE OBWA KARA:

Nkazaalirwa omu England, baitu omu kasumi ako nkaba nyine emyaka musanju kandi eka yaitu ekafurukira Australia. Tukatandika kwikara ha mwaro ogurukwetwa Gold Coast, ekiikaro ekiikarwamu abarambuzi omu Queensland, Australia. N’obukiraaba ngu twali tutali baguuda, twaikaraga twine ebyetaago byaitu.

N’obukiraaba ngu nkakurra omu nyikara enungi, nkaba ntaine okusemererwa kwonyini. Obwomeezi bwange bukantama. Ise nyowe akaba ali mutamiizi. Tinamugonzaaga muno habwokuba yanywaga muno amaarwa kandi yatwazaaga kubi nyina nyowe. Hanyuma y’akasumi, obunamanyire ebintu yarabiremu obw’akaba akyali muserikale omu Malaya, nubwo natandikire kwetegereza habwaki yayetwazaaga omu mulingo ogu.

Nkatandika kunywa amaarwa maingi obunkaba ndi omu siniya. Nkasoma kuhikya bunahikize emyaka 16, nataaha amahe. Nkatandika kukozesa ebitokooza bwongo n’okunywa etaaba. Ekindi, nkemanyiiza muno kunywa amaarwa. Nkaruga ha kunywa amaarwa maingi ha wiikendi kandi natandika kuganywa buli kiro.

Obunkaba nyine emyaka nka 20, nkatandika kugurukyagurukya Ruhanga obwaraaba aliyo. Nkekaguza nti ‘Ruhanga obwaraaba aliyo, habwaki naikiriza abantu kufa n’okubonabona?’ Nkahandiika na powemu ninjunaana Ruhanga habw’obubi bwona obwijwire omu nsi.

Obunahikize emyaka 23, nkaruga omu mahe. Hanyuma, nkatandika kukora emirimo ey’erukwahukana otwaliremu n’okugenda omu nsi ezindi kumara omwaka gumu, baitu busaho ekyankonyiire kuleka kwetuntura. Nkaba ntarukugonza kweteraho ebigendererwa rundi kuhikiriza ekintu kyona. Busaho kintu kyona ekyansemezaaga. Ekitekerezo eky’okuba n’enju enungi, kuba n’omulimo ogw’amaani n’okuba n’obwomeezi oburungi kikanzokera nk’ekitaine mugaso. “Okuhuumuzibwa” kwange kwarugaga omu kunywa amaarwa n’okuhuliiriza ebizina.

Ninyijuka akasumi obunatungire ekihika eky’amaani eky’okugonza kutunga ekigendererwa omu bwomeezi. Nkaba mbungire omu nkambi embi muno eya Poland, ey’erukumanywa nka Auschwitz. Nkaba nsomereho ebintu ebibi ebyabayoga. Baitu obunagenzereyo kandi narora obukooto bw’enkambi egi, nkakwatwaho muno. Nkaba ntasobora kwikiriza ngu abantu nibasobora kutwaza bataahi baabo omu mulingo omubi. Ninyijuka nindubata ninyetoroora enkambi obu nyine amaziga omu maiso gange kandi ninyekaguza nti, ‘Habwaki?’

OMULINGO BAIBULI YAHINDWIRE OBWOMEEZI BWANGE:

Omu 1993, hanyuma y’okuruga omu nsi ezindi, nkatandika kusoma Baibuli ninserra eby’okugarukamu. Hanyuma, Abakaiso ba Yahwe babiri bakateera kodi ha rwigi rwange kandi bandaaliza kugenda ha rusorrokano orukooto orwali ruli omu kizaaniro ekituli haihi. Nkacwamu kugendayo.

Emyezi nke enyuma, nkaba ngenzere ha muzaano omu kizaaniro eki baitu orusorrokano rukahukanira kimu ha muzaano. Abakaiso ba Yahwe baali nibabaza kurungi, bajwaire kurungi kandi n’abaana baabo baali nibetwaza kurungi. Kandi ekinarozere ha bwire bw’ekyamusana, kikampuniiriza. Abakaiso ba Yahwe baingi bakaliira ekyamusana omu kizaaniro, baitu obubaagarukire omu ntebe zaabo, busaho karofu koona akaasigaire omu kizaaniro! Ekirukukirayo, abantu banu bakasisana nk’abaine obusinge n’okumarwa, ekintu ekinkaba ninserra. Tindukwijuka orubazo rwona omu mbazo ezahairwe kiro eki, baitu omulingo Abakaiso ba Yahwe bayetwizeemu nugwo gwakizireyo kunkwataho.

Rwebagyo oru, nkatekerezaaho omwana wa isenkati nyowe ayasomere Baibuli kandi yagenda n’omu madiini agarukwahukana. Emyaka nke enyuma, akaba angambiire ngu Yesu akagamba ngu twakumanyire ediini ey’amananu nitusigikirra ha byana byayo. (Matayo 7:15-20) Nahabweki, nkatekereza ngu nyine kuserra ekintu ekirukufoora Abakaiso ba Yahwe b’embaganiza. Omurundi ogw’okubanza omu bwomeezi bwange, nkahurra nyine entekereza enungi n’okunihira.

Wiiki eyahondiireho, Abakaiso ba Yahwe abaali bandaaliize ha rusorokano orukooto bakagaruka. Bakansaba kunyegesa Baibuli kandi nkaikiriza. Ekindi, nkatandika n’okugenda omu nsorrokano.

Obunkaba ninyega Baibuli, omulingo naroramuga Ruhanga gukahindukira kimu. Nkakyetegereza ngu tali nuwe arukuleeta obubi n’okubonabona kandi ngu nauwe ayehurra kubi abantu obubakora ebintu ebibi. (Okubanza 6:6; Zabuli 78:40, 41) Nkacwamu kulengaho kukora kyona ekirukusoboka kurora tinaletera Yahwe kwehurra kubi. Nkaba ningonza kusemeza omutima gwe. (Enfumo 27:11) Nkaleka kunywa muno amaarwa, etaaba kandi nkaleka n’okwejumbira omu busiihani. Omu Maaci 1994, nkabatizibwa nk’omu h’Abakaiso ba Yahwe.

OMULINGO NGASIIRWE:

Nyine okusemererwa kwonyini n’okumarwa. Tinkyanywa amaarwa kulengaho kumaraho ebizibu byange. Oihireho nyegere kunagira Yahwe emigugu yange.​—Zabuli 55:22.

Emyaka ikumi ey’erabireho, nyikaire ndi mu buswere namunyaanya itwe arukwetwa Karen, kandi nitwikara na muhara we omurungi muno arukwetwa Nella. Itwena basatu nitwegondeza omu kumara obwire bwaitu oburukukira obwingi omu buheereza obw’Ekikristaayo, nitukonyera abandi kumanya amananu agarukukwata hali Ruhanga. Hakumalirra, nyine ekigendererwa omu bwomeezi.