Kusigikirra ha Baibuli, abantu boona basiisi. Tukaijukura ekibi hali omusaija ow’okubanza Adamu. Nahabweki, obwire obumu tukora ebintu ebibi kandi hanyuma tweyijukya habwaki tubikozere. Omwana wa Ruhanga Yesu Kristo, akasasurra ebibi byaitu obuyatuferiire. Ekicunguro kye kikatuletera kuganyirwa. Kiri kisembo kuruga hali Ruhanga.​—Soma Abarumi 3:23, 24.

Abantu abamu bakozere ebibi eby’amaani kandi nibekaguza Ruhanga obw’araaba n’asobora kubaganyira. Ekirukusemeza kiri ngu Ekigambo kya Ruhanga nikigamba kiti: ‘Esagama ya Yesu Omwana we etwogyaho ebibi byona.’ (1 Yohana 1:7) Yahwe atuganyira n’ebibi ebyamaani kakuba tuba twine omutima omurungi egw’okwegarukamu.​—Soma Isaya 1:18.

Obuturaaba nitugonza Yahwe Ruhanga atuganyire, tusemeriire kumwegaho nukwo twetegereze emiringo ye, obuhabuzi bwe hamu n’ebyarukutwetaagisa. (Yohana 17:3) Yahwe aganyira abo abaine engeso embi obubegarukamu kandi bakalengaho kuhinduka.​—Soma Engeso Ezabakwenda 3:19.

Tikigumire muno kusiimwa Ruhanga. Yahwe n’ayetegereza obuceke bwaitu kandi w’embabazi. Embabazi ze n’okugonza tibirukukuletera kugonza kumumanya kurungi nukwo omusemeze?​—Soma Zabuli 103:13, 14.