Umoyo mu Caru Cipya ca Mtende

Para mukulaŵiska vithuzithuzi ivi vili pa trakiti ili, kasi mukuŵa na maghanoghano wuli? Kasi mtima winu ukunweka cara na mtende, cimwemwe, na umoyo uweme uwo ukuwoneka pa vithuzithuzi ivi? Nkanira mukunweka. Kweni kasi ilo ni loto waka, panji ni ghanoghano lautesi, kugomezga kuti vintu vyanteura ivi vizamucitika pa caru capasi?

Ŵantu ŵanandi panji ndimo ŵakughanaghanira ntena. Mazuŵa ghano vintu ivyo vikucitika ni zinkondo, viwawa, njara, urwari, ucekuru—kuzunurapo vicoko waka. Ndipouli cilipo cifukwa cakuŵira na cilindizga. Pakuyowoya za muntazi, Baibolo likuphara kuti “kwakulingana na cilayizgano cake, [ca Ciuta] tikulindirira macanya ghapya na caru cipya mwenemumo mukukhala urunji.”—2 Petros 3:13; Yesaya 65:17.

Mwakukolerana na Baibolo “macanya ghapya” agha na “caru cipya” ici, ni macanya gheneko panji caru ceneko ici cara. Caru na macanya gheneko vikalengeka vyambura uheni wuliwose, ndipo Baibolo likulongora kuti vikhalirirenge kwamuyirayira. (Salmo 89:36, 37; 104:5) “Caru cipya” cizamuŵa ca ŵantu ŵarunji awo ŵazamukhala pa caru capasi, ndipo “macanya ghapya” ghazamuŵa ufumu waurunji wa kucanya, panji boma ilo lizamuwusa pa mtundu wa ŵantu pa caru capasi. Kweni kasi ncakwenelera kugomezga kuti “caru cipya” panji macanya ghapya ghaucindami, ghazamuŵako nadi?

Manyani fundo iyi yakuti mikhaliro yiweme iyi yikaŵa khumbo la Ciuta lakwambilira kurazga ku caru capasi. Iye wakaŵika mbumba yakwamba mu Paradiso wa Eden  ndipo wakaŵapa ncito yakuzirwa comene: “Babanani, mwandane, muzuzge caru, mucitereske.” (Genesis 1:28) Inya, cilato ca Ciuta pa ŵantu aŵa cikaŵa cakuti ŵababe ŵana ndipo panyuma pake ŵakuzge Paradiso pacaru cose. Nangauli panyuma pake ŵakasanka kuleka kupulikira Ciuta, mwanteura ŵakajisankira kuti mbambura kwenelera kukhala kwamuyirayira, ndipouli cilato ca Ciuta cakwambilira cikasinta cara. Ndipo cikwaniriskikenge mu caru cipya!—Yesaya 55:11.

Ndiposo, para mukupereka Pempero la Fumu, panji la Ŵadada Ŵithu, mukupempa kuti Ufumu wa Ciuta wize, mukupempelera boma lake lakucanya kuti lizakafumiskepo uheni wa pa caru capasi ndipo lizakawuse pa caru cipya. (Mateyu 6:9, 10) Ndipo tili na cigomezgo kuti Ciuta wazgorenge pempero ili, cifukwa Mazgu ghake ghakulayizga kuti: “Ŵakunyoroka ŵamkuhara caru na kukhala mwenemumo kwandanda.”—Salmo 37:29.

Umoyo mu Caru Cipya ca Ciuta

Ufumu wa Ciuta wizenge na vyandulo vinandi vyambura mayerezgereko, uzamukwaniriska viweme vyose ivyo Ciuta wakakhumba kuti ŵantu ŵasangwe navyo pa caru capasi. Thinko na kujitemwa vizamumara, ndipo muntu waliyose wazamuŵa bwezi lakugomezgeka kwa waliyose. Mu Baibolo, Ciuta wakulayizga kuti ‘wazamulekeska nkondo kumpererekezgo za vyaru.’ “Fuko la ŵantu nta tiliwuskire linyake lupanga, nanga nkusambiraso nkondo nako cara.”—Salmo 46:9; Yesaya 2:4.

Paumaliro pake caru cose capasi cizamuŵa munda wa paradiso. Baibolo likuyowoya kuti: “Mapopa na malo gha mayiyi tighakondwenge, luwalala tilusekerere na kuphuka. . . . Maji tighabwibwituke mu mapopa, mironga nayoso mu luwalala. Mcenga wakoca wamkuŵa ciziŵa, dongo la cinkamwa lamkuŵa mbwiwi.”—Yesaya 35:1, 6, 7.

Pazamuŵa vifukwa vyakukwanira vyakuŵira wakukondwa mu Paradiso pa caru capasi. Ŵantu kuti  ŵazamuŵaso na njara cara cifukwa ca kusoŵa cakurya. Baibolo likuyowoya kuti ‘Caru cizamupambika vipambi vyake.’ (Salmo 67:6; 72:16) Wose ŵazamusangwa na ncito ya mawoko ghawo, nga ndi umo Mlengi withu wakulayizgira: “Tiŵapande mpeska na kurya vipasi. . . . nta tiŵapande munyake warye.”—Yesaya 65:21, 22.

Mu caru cipya ca Ciuta, ŵantu ŵazamuphapatizgana cara mu nyumba za vipinda panji kukhala mu nyumba zambura kuwoneka makora, cifukwa Ciuta walayizga kuti: “Tiŵazenge nyumba na kukhalamo . . . ŵazengenge cara munyake ndiye wakhalengemo.” Baibolo likulayizgaso kuti: “Tiŵateŵetenge waka cara.” (Yesaya 65:21-23) Nteura ŵantu ŵazamuŵa na ncito yiweme, na yakukondweska. Umoyo uzamuŵa wakuvuska cara.

Pa nyengo iyo, Ufumu wa Ciuta uzamuwezgerapo ubwezi na mtende uwo ukaŵa mu munda wa Eden wa pakati pa vinyama, ndiposo wa pakati pa vinyama na ŵantu. Baibolo likuphara kuti: “Mpumpi yamkukhala pamoza na kanamberere, ntoromi yamkugona pasi na kanambuzi, toli na nkaramo na ng’ombe yakututuŵa zose pamoza, ndipo mwana mucoko waziliskenge.”—Yesaya 11:6-9; Hoseya 2:18.

Aghanaghanani kuti mu Paradiso pa caru capasi muzamuŵavye maurwari ghose na kupweteka kulikose kwa thupi! Mazgu gha Ciuta ghakutisimikizgira kuti: “Nanga njumoza wa ŵenecaru tiwanene, ‘Ndarwara.’” (Yesaya 33:24) “[Ciuta] wati wafyurenge sozi lose ku maso ghaŵo; ndipo nyifwa kuti yiti yiŵengekoso cara; panji nesi citengero kuti citi ciŵengekoso cara, nesi kulira, panji nesi kuŵinya: cifukwa vyakudanga viri kuruta.”—Civumbuzi 21:4.

 Umo Ici Ciliri Camacitiko kwa Imwe

Mtima winu ukwenera kukhuŵirizgika nkanira na malayizgo gha Ciuta gha umoyo wamuyirayira mu caru cipya caurunji. Nangauli ŵanji ŵangawona kukwaniriskika kwa vitumbiko vyanteura ivi kungaŵa kwakusuzga cifukwa ca uweme wake, ivyo nvyakujumpizga comene cara kuti Mlengi withu wacitemwa waleke kukwaniriska.—Salmo 145:16; Mika 4:4.

Mbunenesko kuti pali viyeneresko ivyo tikwenera kukwaniriska usange tikukhumba kuzakakhala mu Paradiso pa caru capasi uyo wakwiza. Yesu wakalongora ciyeneresko cikuru pa vyose apo wakapempera kwa Ciuta kuti: “Uwu mbumoyo wa muyirayira, kuti ŵamumanyani imwe, Ciuta mweneco yeka, na Yesu Kristu, mweneuyo mukamutuma.”—Yohane 17:3.

Usange tikukhumbisiska nadi kuzakakhala mu caru cipya ca Ciuta, tikwenera kusambira danka za khumbo la Ciuta na kulicita. Pakuti ncakusimikizgirika kuti: ‘Caru ici cikuruta na makhumbiro ghake, kweni uyo wakucita khumbo la Ciuta, wakhalirirenge muyirayira,’ kuzakasangwa kwamuyirayira na vitumbiko vyakufuma kwa Mlengi wacitemwa.—1 Yohane 2:17.

Kulekapo kwekha usange kwalongoreka panyake, kukoreka Malemba kwafuma mu Tumbuka Bible.