Kalata Yakufuma ku Wupu Wakulongozga
Kwa Imwe Mukutemwa Yehova:
Yesu wakati: “Mumanyenge unenesko, ndipo unenesko umufwaturaninge.” (Yohane 8:32) Mazgu agha ngakukhozga chomene! Enya, ntchamachitiko kumanya unenesko, nangauli tili mu “mazuŵa ghaumaliro” agho nganonono ndiposo ghakuzura na utesi. (2 Timote 3:1) Kasi mukukumbuka nyengo yakwamba iyo mukamanyira unenesko uwo uli mu Mazgu gha Chiuta? Chikaŵa chinthu chakukondweska chomene!
Ndipouli, nangauli ntchakuzirwa kumanya unenesko na kuphalirako ŵanji unenesko nyengo zose, nkharo yithu yikweneraso kukolerana na unenesko uwo tikusambira. Kuti tichite nthena, tikwenera kujisungilira mu chitemwa cha Chiuta. Kasi kuchita nthena kukusazgapo vichi? Mazgu agho Yesu wakayowoya pa usiku wakuti machero wafwenge ghakuzgora fumbo ili. Wakaphalira ŵapositole ŵake ŵakugomezgeka kuti: “Usange mukusungilira malango ghane, mukhalilirenge mu chitemwa chane, nga umo nane nasungililira malango gha Adada ndipo nkhukhalilira mu chitemwa chawo.”
Wonani kuti Yesu wakakhalilira mu chitemwa cha Chiuta mwa kusungilira malango ghake. Ndimo viliriso kwa ise mazuŵa ghano. Kuti tikhalilire mu chitemwa cha Chiuta, tikwenera kuchita vinthu mwakukolerana na unenesko zuŵa lililose. Mu usiku wenewuwu, Yesu wakayowoyaso kuti: “Usange mukumanya vinthu ivi, ŵakukondwa ndimwe usange mukuvichita.”—Yohane 13:17.
Tili na chigomezgo chose kuti buku ili limovwiraninge kuti mulutilire kulondezga unenesko uwo mukusambira pa umoyo winu na kujisungilira “mu chitemwa cha Chiuta, . . . na kuzakasanga umoyo wamuyirayira.”
Wupu Wakulongozga wa Ŵakaboni ŵa Yehova