Nkhakhuŵaranga Chomene na Umo Ŵanthu Ŵakavwaliranga Kweniso Kujitozgera

YAKUYOWOYEKA NA EILEEN BRUMBAUGH

NKHAKULIRA mu chisopa cha Old Order German Baptist Brethren, icho chikuyanako na chisopa cha Amish kweniso Mennonite. Gulu la Brethren likambira ku Germany mu 1708 nga ni gulu la ŵanthu ŵakubanuka ku maso mwauzimu lakuchemeka Pietism. Buku linyake (Encyclopedia of Religion) likuti ŵanthu ŵakulondezga Pietism ŵakagomezganga kuti ŵanthu ŵakukhumbikwira uthenga wa Khristu. Chigomezgo ichi ndicho chikambiska gulu ili kutuma ŵamishonale mu vyaru vinandi.

Mu 1719 kagulu kachoko kakulongozgeka na Alexander Mack kakafika mu chigaŵa icho sono chikuchemeka Pennsylvania, ku United States. Kwambira nyengo iyi, magulu ghakapangikanga na kupatukanaso. Gulu lililose likenderanga waka umo likupulikiskira visambizgo vya Alexander Mack. Mu tchalitchi lithu tikaŵamo waka ŵanthu 50. Fundo yikuru iyo tikenderanga njakuti tiŵazgenge Baibolo na kulondezga chomene fundo za tchalitchi lithu.

Ŵanthu ŵa mu mbumba yakwithu ŵakakhala mu chisopa ichi m’paka miwiro yitatu. Nane nkhanjira tchalitchi ili ndipo nkhabatizika apo nkhaŵa na vyaka 13. Umo nkhalelekera nkhagomezganga kuti ntchiheni kuŵa na galimoto, thirakitala, telefoni, nanga ni wayilesi panji chinyake chilichose chakwendera magesi, nanga nkhuvigwiliskira ntchito vinthu ivi. Ŵanakazi ŵakavwaranga malaya ghambura vitoweskero, tikametanga yayi sisi ndipo tikavwaranga chinthu kumutu nyengo zose. Ŵanalume ŵakasunganga mwembe. Kuyana na umo tikapulikiskiranga fundo yakuti tileke kuŵa ku chigaŵa cha charu, tikavwaranga yayi vyakuvwara vyakudura, kujitozga kumaso, panji kuvwara majuda, tikawonanga nga ntchilongolero cha kujitemwa.

Tikasambizgika kuti tichindikenge chomene Baibolo, ilo tikaliwonanga kuti ntchakurya chithu chauzimu. Mulenji uliwose pambere tindarye, tikawungananga dankha pa balaza mu nyumba na kupulikizga kwa Adada na Amama ŵakutiŵazgira chaputara chimoza mu Baibolo ndipo tikayowoyangapo pa ivyo ŵaŵazga. Paumaliro tose tikajikamanga pasi apo Adada ŵakalombanga. Pamanyuma, Amama ŵakawerezgangapo Lurombo lwa Fumu. Nyengo zose nkhakhazganga kusopa kwa mulenji chifukwa nyengo iyi ndipo tose pa nyumba tikaŵanga pamoza, tikaghanaghanirangapo pa vinthu vyauzimu.

Tikakhalanga pa famu yinyake kufupi na tawuni ya Delphi, Indiana, uko tikalimanga mbuto zakupambanapambana. Para mbuto izi zacha, tikanyamuranga pa gileta lakuguzika na hachi kuya nazo ku tawuni, tikaguliskanga mu misewu panji mu nyumba za ŵanthu. Tikawonanga kuti kulimbikira ntchito ntchigaŵa cha kuteŵetera Chiuta. Ntheura tikaŵikangapo mtima, pa Sabata pekha ndipo tikagwiranga ntchito zinonono yayi. Kweni nyengo zinyake, tose panyumba tikatangwanikanga chomene na ntchito za pa famu, mwakuti chikaŵanga chakusuzga kuti tiŵike mtima pa vinthu vyauzimu.

Kutengwa Kweniso Kulera Ŵana

Mu 1963, apo nkhaŵa na vyaka 17, nkhatengwa kwa James, uyo tikasoperanga lumoza mu Old Brethren. Kwa iyo, chisopa ichi chikambira ku ŵagogo ŵa agogo ŵake. Tose tikakhumbanga chomene kuteŵetera Chiuta ndipo tikagomezganga kuti tchalitchi lithu pera ndilo ndaunenesko.

Kuzakafika mu 1975 tikaŵa na ŵana 6, ndipo mu 1983 mwana withu wa nambara 7 uyoso wakaŵa waumaliro wakababika. Mwana withu wachiŵiri, Rebecca wakaŵapo yekha msungwana. Tikalimbikiranga ntchito, tikasakazanga yayi ndalama, ndipo tikaŵa na umoyo wambura kukhumba vinandi. Tikayezgayezga kusambizga ŵana ŵithu fundo za mu Baibolo izo nase tikasambira ku ŵapapi ŵithu kweniso ku Old Brethren.

Chisopa cha Old Brethren chikukondwa chomene na mawonekero ghakuwaro. Tikatenge pakuti palije uyo wangawona mu mtima, umo munthu wavwalira vikulongora kuti ndimo waliri mukati. Ntheura, usange munthu nunyake walinozga chomene sisi lake, tikamuwonanga kuti ngwakujitemwa. Usange chitoweskero cha pa chakuvwara chaŵa chikuru chomene, tikatenge ntchilongolero chinyake cha kujitemwa. Nyengo zinyake, ivi ndivyo tikaviwonanga kuŵa vyakuzirwa chomene kuluska Malemba gheneko.

Ivyo Vikachitika ku Jele

Kuumaliro kwa vyaka vya m’ma 1960, Jesse munung’una wa afumu ŵane, uyo nayo wakakulira mu chisopa cha Old Brethren, ŵakamujalira mu jele chifukwa cha kukana kunjira usilikari. Apo wakaŵa mu jele, wakakumana na Ŵakaboni ŵa Yehova, awoso ŵakuwona kuti kurwa nkhondo vikukolerana yayi na fundo za mu Baibolo. (Yesaya 2:4; Mateyu 26:52) Jesse wakadumbiskana vinandi chomene vya Baibolo na Ŵakaboni ŵa Yehova ndipo wakajiwonera yekha makhaliro ghawo. Wati wasambira nawo Baibolo nyengo yitaliko, wakabatizika kuŵa yumoza wa Ŵakaboni ŵa Yehova. Ivi vikatikondweska yayi napachoko.

Jesse wakaphalirako afumu ŵane vinthu ivyo wakasambiranga. Wakanozgaso vyakuti afumu ŵane ŵapokerenge magazini gha Gongwe la Mulinda na Wukani! nyengo zose. Chifukwa cha kuŵazga magazini agha, afumu ŵane ŵakamba kulitemwa chomene Baibolo. Pakuti afumu ŵane ŵakakhumbanga nakale kuteŵetera Chiuta kweni kanandi ŵakawonanga kuti ŵali kutali nayo, ŵakaŵa ŵakunweka na chilichose icho chingaŵawovwira kuŵa pafupi na Chiuta.

Ŵalaraŵalara ŵa tchalitchi lithu ŵakatichiskanga kuti tiŵazgenge magazini gha chisopa cha Amish, Mennonites, na magulu ghanyake gha chisopa cha Old Brethren, nangauli tikawonanga matchalitchi agha kuŵa chigaŵa cha charu. Kweni adada ŵakaŵatinkhanga chomene Ŵakaboni ŵa Yehova. Ŵakatenge tingaŵazganga yayi Gongwe la Mulinda na Wukani! Ntheura nkhazizikika nkhati nawona afumu ŵane ŵakughaŵazga. Nkhawopanga kuti ningatolera visambizgo vyautesi.

Ndipouli, afumu ŵane ŵakaŵa kuti ŵakukayikira kale visambizgo vinyake vya chisopa cha Old Brethren ivyo ŵakawonanga kuti vikususkana na Baibolo, chomenechomene chisambizgo chakuti nkhwananga kugwira ntchito yiliyose yinonono pa Sabata. Mwachiyelezgero, chisopa cha Old Brethren chikasambizganga kuti ntchakuzomerezgeka kumweska viŵeto maji pa Sabata kweni kuzgura utheka yayi. Ŵalaraŵalara ŵakatondeka kulongosolera afumu ŵane chifukwa cha mu Malemba icho ŵakaŵikira dango ili. Pachoko na pachoko, nane nkhamba kukayikira visambizgo vyanthena.

Pakuti tikamba nikale kugomezga kuti tchalitchi lithu likaŵa lakuzomerezgeka kwa Chiuta ndipo tikamanyanga ivyo vingatichitikira usange talileka, chikatiŵira chakusuzga kufumamo mu Old Brethren. Kweni njuŵi zithu zikatizomerezganga yayi kulutilira kukhala mu chisopa icho tikawonanga kuti chikulondezga fikepo yayi Baibolo. Ntheura mu 1983 tikalemba kalata kulongosora vifukwa ivyo tikufumiramo kweniso tikapempha kuti kalata iyi yikaŵazgike ku mpingo. Ŵakatisezga mu gulu ili.

Kupenjapenja Chisopa Chaunenesko

Ivi vyati vyachitika, tikamba kupenjapenja chisopa chaunenesko. Tikapenjanga chisopa icho visambizgo vyake vikususkana yayi, icho ŵanthu ŵake ŵali na vipambi ivyo ŵakusambizga ŵanji kuti ŵapambikenge. Chakwamba, tikakanirathu chisopa chilichose icho chikurwako nkhondo. Tikadokeranga nipera visopa ivyo ŵanthu ŵake ŵalije umoyo wakukhumba vinandi, chifukwa tikawonanga kuti umoyo wanthena ntchilongolero chakuti chisopa icho chili chigaŵa cha charu yayi. Kufuma mu 1983 m’paka 1985, tikenda vigaŵa vinandi vya United States, kusanda visopa ivi na ivi—Mennonites, Quakers, na magulu ghanyake agho ghakaŵa na umoyo wambura kukhumba vinandi.

Panyengo yeneyiyi, Ŵakaboni ŵakiza pa nyumba yithu ku famu, kufupi na tawuni ya Camden, Indiana. Tikategherezganga, na kuŵaphalira kuti ŵagwiliskirenge waka ntchito Baibolo la King James version. Nkhakolerana nawo Ŵakaboni pa nkhani ya nkhondo. Kweni vikanisuzganga kuŵapulikiska chifukwa chakuti ŵakawonekanga kuti ŵakupatukako yayi ku charu kwizira mu kavwaliro kawo, ntheura nkhawona kuti ŵangaŵa yayi chisopa chaunenesko. Ine nkhawonanga kuti ŵanthu awo ŵakuvwara mwakupambana na ise mbakujitemwa. Nkhagomezganga kuti vinthu, panji katundu, wakupangiska ŵanthu kujitemwa.

Afumu ŵane ŵakamba kuluta ku Nyumba ya Ufumu ya Ŵakaboni ŵa Yehova, ŵakalutanga na ŵanyake mwa ŵana ŵithu ŵasepuka. Ivi vikanikwiyiska chomene. Afumu ŵane ŵakanipempha kuti nilute nawo, kweni nkhakana. Mbwe zuŵa linyake ŵakati, “Nangauli ukukolerana navyo yayi visambizgo vyawo vyose, iwe luta waka ukajiwonere wekha umo ŵakuchitira vinthu yumoza na munyake.” Ivi ndivyo vikaŵatora mtima chomene afumu ŵane.

Paumaliro, nkhaghanaghana vyakulutako kweni kuti waka nkhaŵe maso chomene. Nkhanjira mu Nyumba ya Ufumu uku navwara vyakuvwara vyane vyambura vitoweskero na chipewa kumutu. Ŵasepuka ŵithu ŵanyake ŵakendanga malundi ghawaka, vyakuvwara vyawo navyo vikaŵa vyambura vitoweskero. Ndipouli, Ŵakaboni ŵakatipokelera na kuchita nase vinthu mwachitemwa. Mu mtima nkhati, ‘Tili ŵakupambana, kweni ŵakutipokelera waka.’

Nkhatoleka mtima chomene na chitemwa chawo, kweni nkhalutira waka kuti nkhawone umo vikuŵira. Nkhayimilira yayi panji kwimbako sumu zawo. Pamanyuma pa maungano nkhaŵaphulunga na mafumbo, nkhaŵafumbanga vinthu ivyo ine nkhawonanga kuti ŵakuchita makora yayi panji ivyo lemba linyake likung’anamura. Nangauli nkhaŵa waluso yayi pakufumba mafumbo, kweni munthu waliyose uyo namufumba wakanizgoranga mwantchindi. Nkhatindikikaso kuti para fumbo limoza nafumba ŵanthu ŵakupambanapambana, ivyo ŵakanizgoranga vikaŵa vyakukolerana. Nyengo zinyake ŵakachitanga kunilembera mazgoro, ivyo vikaŵa vyakovwira chomene, chifukwa pamanyuma nkhawelerangamoso.

Mu 1985, tose pa mbumba yithu tikaluta ku ungano wa chigaŵa wa Ŵakaboni ŵa Yehova ku Memphis, Tennessee, kuti tikawone waka ivyo vikuchitika. Afumu ŵane ŵakaŵa ŵachali na vimwembe vyawo, ndipo ise tikavwara vyakuvwara vithu vyambura vitovweskero. Pa nyengo yakupumulira, ŵanthu ŵakizanga waka kuzakatitawuzga. Tikakopeka na chitemwa, lusungu, na kutipokelera kwawo. Tikatolekaso mtima na umoza, chifukwa kulikose uko taluta kukasopa nawo, visambizgo vikayananga waka.

Pakuwona umo Ŵakaboni ŵakachitiranga nawo, afumu ŵane ŵakazomera kusambira Baibolo. Ŵakasandanga chilichose, pakukhumba kuwoneseska ivyo ŵakusambira. (Milimo 17:11; 1 Ŵatesalonika 5:21) Nyengo yikati yajumphapo, afumu ŵane ŵakawona kuti ŵasanga unenesko. Kweni ine mutu ukayima. Nkhakhumbanga nadi kuchita icho ntchiwemi, kweni nkhakhumbanga yayi kutolera vya mazuŵa ghano na kuwoneka nga nili wa charu. Nkhati nazomera kakwamba kukhalapo pa sambiro la Baibolo, nkhaŵika Baibolo la King James Version pa khongono limoza ndipo pa khongono linyake nkhaŵikapo la Mang’anamuliro gha Charu Chiphya. Nkhawonanga vesi lililose mu mabaibolo ghose ghaŵiri pakukhumba kuwoneseska kuti nkhupuluskika yayi.

Ivyo Vikanovwira Kukhorwa

Apo tikasambiranga na Ŵakaboni, tikamanya kuti Dada withu wakuchanya walipo yumoza, mbatatu mwa yumoza yayi, kweniso kuti tili na mzimu uwo ukuleka kufwa yayi. (Genizesi 2:7; Dotoronome 6:4; Ezekiyeli 18:4; 1 Ŵakorinte 8:5, 6) Tikasambiraso kuti helo ni dindi la ŵanthu wose, kuti ni malo ghakuphyirako ŵanthu yayi. (Yobu 14:13; Salimo 16:10; Mupharazgi 9:5, 10; Milimo 2:31) Kumanya unenesko pa nkhani ya helo chikaŵa chinthu chapadera chomene, chifukwa mu chisopa cha Old Brethren ŵakakolerananga yayi pa ng’anamuro lake.

Ndipouli, nkhajifumbanga nipera kuti Ŵakaboni ŵangaŵa wuli chisopa chaunenesko, apo ine nkhawonanga kuti ŵachali chigaŵa cha charu. Nkhawonanga kuti ntchakukhumbikwa chomene kukhala umoyo wambura kukhumba vinandi, kweni iwo ŵakawonekanga kuti ŵakukhala umoyo wakukhumba vinandi. Kweni pa nyengo yimozamoza, nkhawona kuti ŵakufiska dango la Yesu la kupharazga makani ghawemi gha Ufumu ku ŵanthu wose. Nkhatimbanizgika chomene!—Mateyu 24:14; 28:19, 20.

Panyengo yakukhumbikwa iyi, chitemwa icho Ŵakaboni ŵakanilongoranga chikanovwira kuti nilutilire kupenjapenja unenesko. Mpingo wose ukakondwa nayo mbumba yithu. Apo ŵanthu ŵanandi mu mpingo ŵakizanga kuzakatiwona kunyumba kwithu—nyengo zinyake ŵakagwentheranga kuzakatigura mkaka na masumbi—tikamba kuŵawona kuti mbanthu ŵawemi. Ŵakaboni ŵakakatanga yayi pa nyumba yithu nangauli tikasambiranga na Kaboni yumoza. Kweni nyengo yiliyose para ŵanthu ŵa mu mpingo ŵakujumpha, m’paka ŵayime dankha na kutiwona. Tikakhumbikwiranga nadi mwaŵi uwu kuti tiŵamanye makora Ŵakaboni, ndipo tikawona kuti ŵakutighanaghanira na kutitemwa nadi.

Mbakaboni awo tikakhalanga nawo kufupi pera yayi awo ŵakatilongoranga chitemwa ichi. Apo ine nkhasuzgikanga na nkhani ya kuvwara na kujitozga mwakwenelera, Kay Briggs, Kaboni munyake wa mu mpingo wakufupi, uyo wakachita kusankha yekha kuvwara vyambura vitoweskero nanga nkhujiphaka vyakuphakaphaka, wakiza ku nyumba. Nkhajipulika makora ndipo nkhachezga nayo mwakufwatuka. Kufuma apo, zuŵa linyake kunyumba kukiza Lewis Flora, uyo nayo wakakulira mu chisopa icho ine nkhakuliramo. Wati wawona umo nkhawonekeranga, wakamanya kuti nahangayika ndipo wakanilembera kalata ya mapeji 10, kuyezga kunisanguluska. Nkhalira chifukwa cha lusungu ulo wakanilongora, ndipo nkhaŵazga kalata iyi kanandi waka.

Nkhafumba mulaŵiliri wa dera, Mubali O’Dell kuti wanilongosolere lemba la Yesaya 3:18-23 kweniso 1 Petrosi 3:3, 4. Nkhati, “Asi mavesi agha ghakulongora kuti malaya ghambura vitoweskero ndigho ngakukhumbikwa kuti tikondweske Chiuta?” Iyo wakati: “Kasi ntchiheni kuvwara chipewa? Kasi nkhwananga kuluka sisi?” Mu chisopa cha Old Brethren, tikaŵalukanga sisi ŵana ŵasungwana, ndipo ŵanakazi ŵakavwaranga vipewa. Nkhawona kuti pali kususkana nadi, ndipo nkhatoleka mtima na mtima wakuzikira kweniso walusungu uwo mulaŵiliri wa dera wakalongora.

Pachoko na pachoko, nkhamba kukhorwa chomene, kweni pakaŵa chinthu chimoza icho chikanisuzganga chomene chakuti ŵanakazi ŵangameta sisi lawo. Ŵalara mu mpingo ŵakaniphalira kuti ŵanakazi ŵanyake sisi lawo likukura pachoko waka, apo ŵanyake sisi lawo likukura chomene. Kasi apa ndikuti sisi la mwanakazi yumoza likaŵa liwemiko kuluska la munyake? Apa napo ŵakanovwira kuwona ntchito ya njuŵi pa nkhani ya vyakuvwara na kujitozga ndipo ŵakanipa nkhani yinyake yakulembeka kuti nkhaŵazgire ku nyumba.

Tikamba Kuchita Ivyo Tikasambiranga

Tikapenjanga vipambi, ndipo tikavisanga. Yesu wakati: “Usange mukutemwana, wose ŵamanyenge kuti ndimwe ŵasambiri ŵane.” (Yohane 13:35) Tikakhorwa kuti Ŵakaboni ŵa Yehova mbanthu awo ŵakulongora chitemwa chanadi. Ndipouli, iyi yikaŵa nyengo yakutimbanizga chomene ku ŵana ŵithu ŵalara ŵaŵiri, Nathan na Rebecca, chifukwa ŵakazomera chisopa cha Old Brethren ndipo ŵakabatizikira mwenemumo. Pamanyuma, nawo ŵakakhorwa na unenesko wa mu Baibolo uwo tikaŵaphalirangako, kweniso na chitemwa icho Ŵakaboni ŵakalongoranga.

Mwachiyelezgero, Rebecca wakakhumbanga chomene kuŵa paubwezi uwemi na Chiuta. Chikamba kumuŵira chipusu kulomba kwa Chiuta wati wamanya kuti wandalemberethu ivyo munthu munyake wazamuchita panji umo munthazi mwake muzamuŵira. Kweniso wakasendelera kwa Chiuta wati wamanya kuti iyo wali mu gulu la ŵachiuta ŵatatu mwa yumoza yayi, kweni ni munthu wanadi, uyo iyo wangamuyezga. (Ŵaefeso 5:1) Wakaŵaso wakukondwa kuti wakakhumbikwirangaso kuyowoya na Chiuta mu chiyowoyero chakale yayi chakusangika mu Baibolo la King James Version. Apo wakasambiranga ivyo Chiuta wakukhumba pa nkhani ya lurombo, kweniso chilato chikuru cha Chiuta chakuti ŵanthu ŵakhalenge muyirayira mu paradiso pa charu chapasi, wakamba kuwona kuti wali pafupi chomene na Mlengi wake.—Salimo 37:29; Chivumbuzi 21:3, 4.

Mwaŵi Uwo Tose Tili Nawo

Afumu ŵane, ine na ŵana ŵithu ŵalara ŵankhondi—Nathan, Rebecca, George, Daniel, na John—tose tikabatizika kuŵa Ŵakaboni ŵa Yehova mu 1987. Harley wakabatizika mu 1989, ndipo Simon wakabatizika mu 1994. Mbumba yithu yose yikujipeleka chomene pa mulimo uwo Yesu Khristu wakatuma ŵalondezgi ŵake kuchita, wa kupharazga makani ghawemi gha Ufumu wa Chiuta.

Ŵana ŵithu ŵalara ŵankhondi—Nathan, George, Daniel, John, na Harley—kweniso mudumbu wawo Rebecca—waliyose wa iwo wali kuteŵeterapo pa ofesi ya Ŵakaboni ŵa Yehova ya ku United States. George wachali kwenekuko ndipo wakhalako vyaka 14, ndipo Simon, uyo wakamalizga sukulu mu 2001, nayo wakuteŵetera kwenekuko. Ŵana ŵithu wose ŵanalume ŵanyake mbalara, ŵanyake mbateŵeti ŵakovwira mu mipingo ya Ŵakaboni ŵa Yehova. Afumu ŵane ŵakuteŵetera nga mulara mu mpingo wa Thayer, ku Missouri, ndipo ine nkhutangwanika na uteŵeti.

Pasono tili na ŵazukuru ŵatatu—Jessica, Latisha, na Caleb—ndipo tikukondwa kuwona kuti ŵapapi ŵawo ŵakuŵasambizga kuti ŵatemwenge Yehova ŵachali ŵachoko. Nga ni banja, tikukondwa kuti Yehova wakatiguzira kwa iyomwene na kutovwira kumanya ŵanthu ŵa zina lake kwizira mu chitemwa icho ŵakulongora.

Chitima chikutikora na ŵanji awo ŵakukhumbisiska nadi kukondweska Chiuta kweni njuŵi zawo zili kusambizgika kulondezga ivyo ŵaphalirika na ŵanthu m’malo mwa kulondezga Baibolo. Tikugomezga kuti nawo mphanyi ŵasanga chimwemwe icho ise sono tili nacho apo tikwenda nyumba na nyumba, kuguliska vyakurya vyakuminda yayi, kweni na uthenga wa Ufumu wa Chiuta kweniso vinthu vikuru ivyo uzamufiska. Nkhuthiska masozi ghachimwemwe para nakumbuka kuzikira na chitemwa ivyo ŵanthu awo ŵakumanyikwa na zina la Yehova ŵakatilongora!

[Vithuzi]

Apo nkhaŵa na vyaka pafupifupi 7, kweniso nkhati nakura

[Vithuzi]

James, George, Harley, na Simon, ŵavwara vyakuvwara vyambura vitoweskero

[Vithuzi]

Chithuzi chane ichi apo nkhanyamura malonda kuya nagho ku msika chikaŵa mu nyuzipepara

[Kulongosora Chithuzi]

Journal and Courier, Lafayette, Indiana

[Vithuzi]

Tili pamoza na mbumba yithu mazuŵa ghano