KASI mungatemwa kuwona kuti nkhondo yamara pa charu chose? Mbunenesko kuti kudumbiskana kungawovwira kuti vyaru vikolerane chimoza para vyapambana maghanoghano. Ŵanthu ŵanandi ŵakuwona kuti para ŵalongozgi ŵa vyaru ŵangakolerana waka chimoza, mbwenu kungaŵavya nkhondo. Kweni panji mukwenera kuti mukukhuŵara chomene kuwona kuti vinthu vikwenda yayi nanga pangaŵa kudumbiskana. Kwa vyaka vinandi, vyaru vikukolerana fundo zinyake, kupanga malango, kuchita maungano gha ŵalongozgi ŵa vyaru, kweni ni masuzgo ghachoko chomene agho ghakumalirathu.

Baibolo likuyowoyapo pa nkhani ya kudumbiskana na mtende. Likuzgora mafumbo agha: Kasi ni vichi ivyo vikupangiska kuti kudumbiskana kuleka kwiziska mtende? Kasi Ŵakhristu nawo ŵakwenera kunjizgikamo para vyaru vikudumbiskana? Kasi ntchivichi chingawovwira kuti paŵe mtende wenecho?

Nkhani za mu Baibolo zinandi zikulongora waka umo kudumbiskana maso na maso kungawovwilira kuti paŵe mtende. Mwachiyelezgero, Abigelu wakayowoya mwavinjeru chomene na kumupangiska Davide na ŵasilikari ŵake kusintha maghanoghano ghakuti ŵakakome ŵanthu ŵa mu mbumba ya Nabala. (1 Samuyeli 25:18-35) Yesu wakapeleka chiyelezgero cha themba ilo likaŵa na ŵasilikari ŵachoko, kweni likatuma ŵimiliri kuti ŵakaŵeyelere mtende. (Luka 14:31, 32) Ntheura Baibolo likupeleka ukaboni wakuti kudumbiskana kungawovwira nadi kumazga mphindano. Kweni chifukwa wuli pera, para vyaru vikudumbiskana kanandi vikovwira viŵi yayi?

Baibolo likayowoyerathu kuti nyengo izi tikukhalamo zizamuŵa zakusuzga. Chifukwa cha nkhongono ya Satana Dyabulosi, ŵanthu ŵazamuŵa “ŵanonono, ŵakofya, ŵambura kutemwa uwemi, ŵakwendera mphiska, ŵakajilangi, ŵakujitukumura na kunotha.” (2 Timote 3: 3, 4; Chivumbuzi 12:12) Yesu nayo wakayowoyerathu kuti mu mazuŵa ghaumaliro kuzamuŵa “zinkhondo na malumbiri gha zinkhondo.” (Mariko 13:7, 8) Waliyose wangazomerezga kuti ivi ndivyo tikuwona kuti vikuchitika nadi mazuŵa ghano ndipo vikuyira munthazi. Ntheura ni vyakuzizika yayi para tikuwona kuti kudumbiskana kukovwira viŵi yayi kuti paŵe mtende.

Ghanaghaniraniso fundo iyi: Nanga vingaŵa kuti vyaru ivyo vikudumbirana vikuyezgeska kuti paŵavye nkhondo, kweni waliyose wakukhumba kuti charu chake ndicho vinthu vichiyendere makora. Nakuti fundo iyi ndiyo vyaru vinandi vikwendera pa nkhani yakudumbiskana vyakukhwaskana na ndyali. Kasi Ŵakhristu ŵakwenera kunjilirapo pa nkhani zanthena izi?

Baibolo likuti: “Ungathembanga ŵakaronga yayi, panji mwana wa munthu, mweneuyo wangaponoska yayi.” (Salimo 146:3) Ichi chikung’anamura kuti nanga vyaru vingaŵa na khumbo lakuti vidumbiskane, kweni vilije nkhongono panji mazaza ghakuti vimazgirethu masuzgo agho ghangaŵapo.

Apo Yesu wakeruzgikanga na Pontiyo Pilato, wakati: “Ufumu wane ngwa charu chino chara. Ufumu wane uŵenge wa charu chino mphanyi ŵateŵeti ŵane ŵarwa nkhondo kuti nileke kupelekeka ku Ŵayuda. Kweni Ufumu wane ngwakufuma ku charu chino chara.” (Yohane 18:36) Kanandi mapulani ghakuti paŵe mtende ghakutimbanizgika chifukwa cha kutinkhana kwa vyaru panji nkhani za ndyali. Ntheura, Ŵakhristu ŵaunenesko ŵakukana kunjilirapo pa viwawa ivyo vikuchitika mu charu ichi, kweniso nthowa zakudumbiskana izo vyaru vikuchita.

Kasi ivi vikung’anamura kuti Ŵakhristu ŵalije navyo ntchito ivyo vikuchitika mu charu? Kasi vikuŵakhwaska yayi kuti ŵanthu ŵakusuzgika? Yayi. Baibolo likuyowoya kuti ŵateŵeti ŵa Chiuta nawo “ŵakudagha na kutampha” chifukwa cha vinthu viheni ivyo vikuchitika mu charu. (Ezekiyeli 9:4) Ŵakhristu ŵakulindilira waka kuti Chiuta wiziske mtende uwo wali kulayizga. Kasi mukuwona kuti para nkhondo kulije mbwenu ndikuti kuli mtende? Ufumu wa Chiuta uzamufiska nadi kuwuskapo nkhondo. (Salimo 46:8, 9) Chinyake ntchakuti Ufumu uwu uzamuwoneseska kuti tili ŵakuvikilirika kweniso kuti tose tili na umoyo uwemi. (Mika 4:3, 4; Chivumbuzi 21:3, 4) Mtende wanthena uwu ngwakuti nanga vyaru vingadumbiskana, vingawufiska yayi, ndipo palije wupu wa ŵanthu uwo ungafiska kwiziska mtende wanthena.

Uchimi wa mu Baibolo kweniso ivyo vikachitika kale, vikulongora pakweru kuti para tingakhazga kuti kudumbiskana kungawovwira kuti paŵe mtende, mbwenu tikhuŵarenge waka. Awo ŵakugomezga Yesu kweniso kuti Ufumu wa Chiuta ndiwo uzamwiziska mtende wanadi, ndiwo ŵazamukondwa kuwona ivyo ŵakakhazganga vikufiskika. Nakuti chakukondweska chomene ntchakuti, ŵazamukondwa na mtende uwu kwamuyirayira!—Salimo 37:11, 29.