1, 2. (a) Kasi Elifazi na Bilidadi ŵakati Chiuta wakuwuwona wuli uteŵeti uwo tikuchita? (b) Kasi Yehova wakalongora wuli umo wakujipulikira?

“KASI munthu wali na ntchito kwa Chiuta? Kasi waliyose wamahara wangaŵa wachandulo kwa iyo? Kasi Wankhongonozose wakupwelerako kuti ndiwe murunji, panji wakusanga chandulo chilichose chifukwa chakuti iwe ukwenda mu nthowa yaurunji?” (Yobu 22:1-3) Kasi muli kughanaghanirapo mazgoro gha mafumbo agha? Apo Elifazi Mutemani wakafumba Yobu mafumbo agha, Elifazi wakawonanga kuti zgoro ndakuti yayi. Mubwezi wa Yobu, Bilidadi Mushuwa, wakasuska kuti ŵanthu ŵangaŵa ŵarunji pamaso pa Chiuta.—Ŵerengani Yobu 25:4.

² Ivyo Elifazi na Bilidadi ŵakayowoya pakupembuzga Yobu vikaŵa vyautesi. Iwo ŵakati uteŵeti uwo tikuchita ulije phindu kwa Yehova. Kweniso ŵakati taŵanthu tili ŵakuzirwa yayi kwa Chiuta kujumpha fufuzi, mpholozi, panji munyoloro. (Yobu 4:19; 25:6) Kasi ivyo Elifazi na Bilidadi ŵakayowoya kukaŵa kujiyuyura? Yayi. (Yobu 22:29) Para tili pachanya pa phiri, panji tili mu ndege na kulaŵiska pa windo, ivyo ŵanthu ŵakuchita pasi vingawoneka vyambura kuzirwa. Kweni kasi ndimo Yehova wakuwonera uteŵeti uwo  tikuchita para wakulaŵiska pa charu chapasi? Yayi. Yehova wakalongora umo wakujipulikira apo wakasuska ivyo Elifazi, Bilidadi, na Zofari ŵakayowoya. Iyo wakawonanga Yobu kuti ni ‘muteŵeti wake.’ (Yobu 42:7, 8) Unenesko ngwakuti munthu “wali na ntchito kwa Chiuta.”

3. Kasi Elihu wakayowoya vichi kwa Yobu, ndipo wakang’anamuranga vichi?

³ Yehova wakamususka yayi Elihu apo wakafumba Yobu kuti: “Usange muli ŵarunji, kasi mukumupa vichi [Chiuta], kasi wakupokera vichi kufuma kwa imwe?” (Yobu 35:7) Kasi Elihu wakang’anamuranga kuti Chiuta walije nawo ntchito uteŵeti uwo tikuchita? Yayi. Iyo wakang’anamuranga kuti Yehova wakuthemba kusopa kwithu yayi. Yehova wali na chilichose, wakusoŵa kanthu yayi. Palije icho tingachita kuti Yehova waŵe musambazi panji wankhongono. Kweni chilichose chiwemi, luso lwithu, na nkhongono izo tili nazo, vikufuma kwa Chiuta. Ndipo wakuwona umo ise tikugwiliskira ntchito vinthu ivi.

4. Kasi Yehova wakujipulika wuli para tikovwira ŵanyithu?

⁴ Para tikovwira ŵabali na ŵadumbu ŵithu, Yehova wakuwona nga kuti tikuchitira iyo. Lemba la Zintharika 19:17 likuti: “Uyo wakulongora lusungu kwa mukavu wakubwerekeska Yehova, ndipo wamuwezgerenge pa ivyo wachita.” Kasi lemba ili likulongora kuti Yehova wakuwona kalikose ako tikuchitira ŵanthu ŵakusuzgika? Kasi tingati Mlengi wa chilengiwa chose wakuwonga waliyose uyo wakovwira ŵakusuzgika? Kasi wakuwona kuti para tikuŵawovwira ndikuti tikubwerekeska iyo ndipo watiwezgerenge na kutitumbika? Enya, ivi ndivyo mwana wa Chiuta wakayowoya.—Ŵerengani Luka 14:13, 14.

5. Kasi tidumbiskanenge mafumbo wuli?

⁵ Yehova wakapempha Yesaya kuti wayowoye ku ŵanthu m’malo mwa iyo. Iyo wakalongora kuti wakukondwa na uteŵeti uwo ŵateŵeti ŵake ŵakugomezgeka ŵakuchita kuti wafiske khumbo lake. (Yes. 6:8-10) Yesaya wakachita ivyo Yehova wakamupempha. Mazuŵa ghano, ŵanthu ŵanandi ŵakujipeleka kuchita uteŵeti uliwose mu gulu la Yehova. Iwo ŵakuchita nga ni Yesaya uyo wakati: “Ndine pano. Nitumani!” Kweni munyake wangajifumba kuti: ‘Kasi uteŵeti uwo nkhuchita ngwakuzirwa nadi kwa Yehova? Pakuti ni lusungu waka kuti Yehova wanizomerezga kuchitako ntchito iyi, kasi para ningatondeka, wangatondeka kufiska icho wayowoya?’ Kuti tisange mazgoro gha mafumbo agha, tiyeni tidumbiskane ivyo vikachitika mu nyengo ya Debora na Baraki.

6. Kasi Ŵaisrayeli ŵakapambananga wuli na ŵasilikari ŵa Yabini?

⁶ Yabini, Fumu ya Kenani, ‘yikayuzga’ Ŵaisrayeli vyaka 20. Mu mizi ya mu Israyeli mukaŵavya ŵanthu chifukwa cha wofi. Ŵaisrayeli ŵakamanyanga yayi kurwa nkhondo. Ŵakaŵavya vilwero vyankhongono, vilwero vyakujivikililira ku nkhondo, kweniso ŵalwani ŵawo ŵakaŵa na magileta ghankhondo 900 gha visulo.—Ŵeru. 4:1-3, 13; 5:6-8. *

7, 8. (a) Kasi Yehova wakamupa ulongozgi wuli Baraki? (b) Kasi Ŵaisrayeli ŵakathereska wuli ŵasilikari ŵa Yabini? (Wonani chithuzithuzi chakwamba.)

⁷ Yehova wakaphalira Balaki fundo yakupulikikwa makora kwizira mwa Debora, ntchimi yanakazi, kuti: “Luta ukende ku Phiri la Tabori, utore ŵanalume 10,000 ŵa Nafutali na Zebuloni. Nikutumirenge Sisera, mulongozgi wa ŵankhondo ŵa Yabini, pa dambo la Kishoni pamoza na magileta ghake ghankhondo na  ŵankhondo ŵake, ndipo nimupelekenge mu woko lako.”—Ŵeru. 4:4-7.

⁸ Ŵanthu ŵanandi ŵakapulika uthenga. Ŵanthu awo ŵakajipeleka ŵakawungana pa Phiri la Tabori. Baraki wakapulikira ulongozgi wa Yehova mwaluŵiro. (Ŵerengani Ŵeruzgi 4:14-16.) Apo ŵakaŵa ku nkhondo ku Tanaki, kukiza chivula chikuru ndipo kukaŵa mathipa ghanandi. Baraki wakaskera ŵankhondo m’paka ku Harosheti, mtunda wa makilomita 24. Apo Sisera wakachimbiranga, wakakhira pa gileta lake la nkhondo ilo pakwamba likaŵa lakofya kweni sono likaŵa lambura ntchito. Wakamba kuchimbira pasi kuluta ku Zananimu uko panji kukaŵa kufupi na Kedeshi. Iyo wakakabisama mu hema la Yayeli, muwoli wa Heberi Mukeni, ndipo Yayeli wakamupokelera. Chifukwa cha vyakulema vya ku nkhondo, Sisera wakagona tulo twakufwa nato. Ndipo Yayeli wakasangirapo mwaŵi na kumukoma. Apa Yayeli wakalongora chikanga chikuru. (Ŵeru. 4:17-21) Ŵalwani Ŵaisrayeli ŵakamalira penepapo. *

9. Kasi pa Ŵeruzgi 5:20, 21 pakulongora kuti ninjani wakawovwira Ŵaisrayeli kuthereska Sisera?

⁹ Kuti tipulikiske makora nkhani iyi, tikwenera kuŵerenga chaputara 4 na 5 cha buku la Ŵeruzgi. Mwachiyelezgero, pa Ŵeruzgi 5:20, 21 pakuti: “Nyenyezi zikarwa kufuma kuchanya, zikarwa na Sisera mu tunthowa twawo. Dambo la Kishoni likaŵakukura.” Kasi lemba ili likung’anamura kuti ŵangelo ndiwo ŵakawovwira Ŵaisrayeli pakurwa nkhondo? Panji likung’anamura kuti Chiuta wakawiska vimalibwe kufuma kuchanya? Baibolo likuyowoya yayi. Kweni kasi vingachita kwambura wovwiri wa Chiuta kuti kuŵe chivula chikuru pa malo agho pakachitikira nkhondo, kweniso pa nyengo iyo nkhondo yikachitikiranga kuti magileta ghankhondo 900 ghaphatire? Pa Ŵeruzgi 4:14, 15, Yehova wakuzunulika katatu kuti ndiyo wakawovwira Ŵaisrayeli kuthereska ŵalwani ŵawo. Ŵanalume 10,000 awo ŵakajipeleka, pakaŵavya uyo wakaghanaghana kuti ŵakathereska ŵalwani chifukwa cha nkhongono zawo.

10, 11. Kasi “Merozi” ukwenera kuti ukaŵa vichi? Chifukwa wuli ukatembeka?

¹⁰ Debora na Baraki ŵakati ŵathereska ŵalwani ŵawo, ŵakimba sumu yakulumba Yehova chifukwa cha kuŵathaska mwamunthondwe. Iwo ŵakimba kuti: “‘Mungelo wa Yehova wakati: ‘Tembani Merozi, enya, tembani awo ŵakukhalamo, pakuti ŵakiza yayi kuzakamovwira Yehova, kovwira Yehova kwimikana na ŵankhongono.’”—Ŵeru. 5:23.

¹¹ Kasi Merozi ukwenera kuti ukaŵa vichi? Tikumanya makora yayi. Panji Merozi ukaŵa msumba uwo mukakhalanga ŵanthu awo ŵakakana kovwira Ŵaisrayeli. Pakuti Sisera wakabisama mu Merozi, kasi ŵanthu ŵakaŵavya mwaŵi wakuti ŵangamukoma? Chifukwa wuli ŵakapulikira yayi apo Yehova wakakhumbanga ŵanthu kuti ŵawovwire Baraki? Ŵanthu 10,000 kufuma mu vigaŵa vyawo ŵakiza kuzakawovwira Baraki. Ŵanthu ŵa ku Merozi ŵakwenera kuti ŵakamuwona Sisera, munthu wakumanya nkhondo, wakuchimbira mu msewu kuti wajiponoske. Uwu ukaŵa mwaŵi ukuru wakuti ŵawovwirepo kuti khumbo la Yehova lichitike kweniso kuti waŵatumbike. Panyengo yakusuzga iyi, ŵakaŵa na mwaŵi wakuti ŵachitepo kanthu. Kweni cha chitima ntchakuti palije icho ŵakachitapo. Ivyo ŵakachita ŵanthu ŵa ku Merozi vikapambana chomene na ivyo Yayeli, mwanakazi wachikanga wakachita.—Ŵeru. 5:24-27.

12. Kasi ŵanthu awo ŵakulongosoreka pa Ŵeruzgi 5:9, 10 ŵakaŵa na mtima wuli? Ndipo ise tikusambirapo vichi?

¹² Pa Ŵeruzgi 5:9, 10, tikuwona mphambano pakati pa ŵanthu awo ŵakajipeleka kovwira  Baraki na awo ŵakakana. Debora na Baraki ŵakalumba “ŵalongozgi ŵa nkhondo ŵa Israyeli, awo ŵakajipeleka pamoza na ŵanthu.” Ŵalongozgi ŵa nkhondo Ŵaisrayeli ŵakapambananga chomene na awo ŵakakweranga “pa mbunda ziswesiswesi,” awo ŵakakana kujipeleka chifukwa cha kujikuzga. Kweniso ŵakapambananga na awo ŵakakhalanga pa “visalu vyakutowa chomene,” ndipo ŵakakhumbanga waka kusangwa. Ŵanthu awo ŵakaluta na Baraki ŵakapambananga na awo ‘ŵakendanga mu msewu,’ kukhumba waka kunjoya. Ŵasilikari ŵa Baraki ŵakaŵa ŵakunozgeka kurwa nkhondo ku mapiri gha Tabori na ku vidikha vya Kishoni. Wose awo ŵakakhumbanga umoyo wa wofuwofu ŵakaŵaphalira kuti: “Ghanaghanirani ichi!” Iwo ŵakeneranga kughanaghanira mwaŵi uwo ŵakataya wakuti ŵawovwirepo pa ntchito ya Yehova. Mazuŵa ghano, tikwenera kujisanda usange tikujipeleka kuteŵetera Chiuta na mtima wose.

13. Kasi ŵa fuko la Rubeni, Dani, na Asheri ŵakapambananga wuli na fuko la Zebuloni na Nafutali?

¹³ Awo ŵakajipeleka ŵakawona ŵekha umo Yehova wakalongolera nkhongono zikuru. Iwo “ŵakamba kuyowoya vya milimo yaurunji ya Yehova” ku ŵanyawo. (Ŵeru. 5:11) Kweni fuko la Rubeni, Dani, na Asheri, awo ŵakuyowoyeka pa Ŵeruzgi 5:15-17 ŵakaŵika chomene mtima pa vinthu vyawo vyakuthupi. Iwo ŵakapweleleranga waka miskambo, ngalaŵa, na madowoko ghawo m’malo mwa kovwirapo pa ntchito ya Yehova. Ŵanthu ŵa ku Zebuloni na Nafutali “ŵakaŵika umoyo wawo pangozi na ku nyifwa wuwo,” kuti ŵawovwire Debora na Baraki. (Ŵeru. 5:18) Tingasambirako vinthu vyakuzirwa ku ŵanthu awo ŵakajipeleka na awo ŵakakana.

14. Kasi tingalongora wuli kuti tikovwira gulu la Yehova?

¹⁴ Mazuŵa ghano, tikurwa nkhondo nga umo ŵakachitiranga kale yayi. Kweni tingalongora chikanga para tikulimbikira ntchito yakupharazga. Pasono gulu la Yehova likukhumba ŵanthu ŵanandi ŵakujipeleka kuluska kumanya kose. Pali ŵabali, ŵadumbu, na ŵachinyamata ŵanandi awo ŵakujipeleka kuchita  mauteŵeti ghakupambanapambana mu gulu la Yehova. Ŵanyake ŵakuchita upayiniya, ŵakuteŵetera pa Beteli, ŵakuzenga Nyumba za Ufumu, kweniso ŵakuchita mauteŵeti ghanyake pa maungano gha dera na gha chigaŵa. Kweniso pali ŵabali ŵalara awo ŵakuteŵetera mu Makomiti Ghakudumbiskana na Chipatala ndiposo ŵakwendeska maungano gha chigaŵa. Manyani kuti Yehova wakuwonga chomene chifukwa cha kujipeleka kwinu ndipo wazamuluwa yayi mulimo winu.—Heb. 6:10.

15. Kasi waliyose wakwenera kujifumba mafumbo wuli?

¹⁵ Waliyose wakwenera kujifumba kuti: ‘Kasi nkhukhumba kuti ŵanyane ŵachitenge vinandi kuluska ine? Kasi nkhutemwa chomene vinthu vyakuthupi kuluska vyauzimu? Baraki, Debora, Yayeli, na ŵanalume 10,000 awo ŵakajipeleka ŵakaŵa na chipulikano kweniso chikanga pakugwiliskira ntchito vinthu vyawo kuti ŵateŵetere Yehova. Kasi nkhuchita nga ndiwo? Kasi nkhughanaghana kuluta ku charu chinyake kuti nkhasange ndalama? Para ni nthena, kasi nkhulomba kwa Yehova na kughanaghanira umo vingakhwaskira banja lane kweniso mpingo?’ *

16. Kasi tingamupa vichi Yehova?

¹⁶ Yehova watichindika chomene pakutipa mwaŵi wakuti tikhozgere Ufumu wake. Kufuma waka panyengo ya Adamu na Eva, Satana wakukhumba kuti ŵanthu ŵaŵe ku chigaŵa chake m’malo mwa kuŵa ku chigaŵa cha Ufumu wa Yehova. Para tikuŵa ku chigaŵa cha Yehova, tikulongora pakweru kuti Satana ni mutesi. Yehova wakukondwa chomene para tili na chipulikano kweniso ndise ŵakugomezgeka. Ivi vikutovwira kuti tiŵe na mtima wakujipeleka. (Zinth. 23:15, 16) Vinthu viwemi ivyo tikuchita vikovwira Yehova kuti wamuzgore Satana uyo wakumunena. (Zinth. 27:11) Chithu chakuzirwa chomene icho tingamupa Yehova, nkhupulikira na kuchita ivyo wakukhumba. Para tachita nthena, wakukondwa chomene.

17. Kasi lemba la Ŵeruzgi 5:31, likulongora kuti ntchivichi chizamuchitika munthazi?

¹⁷ Sonosono apa, charu chose chizamuzura na ŵanthu awo ŵakukhumba nadi kuchita khumbo la Yehova. Tikulindilira mwakunweka zuŵa ili. Tikujipulika nga ni Debora na Baraki awo ŵakimba kuti: “Ŵalwani ŵinu wose ŵaparanyike, imwe Yehova, kweni awo ŵakumutemwani ŵaŵe nga ni dazi ilo likufuma mu uchindami wake.” (Ŵeru. 5:31) Mazgu agha ghazamufiskika apo Yehova wazamuwuskapo charu chiheni ichi. Para Aramagedoni yamba, pazamukhumbikwaso ŵanthu yayi kuti ŵajipeleke kukoma ŵanthu ŵaheni. Panyengo iyi, ‘tizamwimilira waka chete, na kuwona chiponosko cha Yehova.’ (2 Mid. 20:17) Kweni pasono, tili na mwaŵi wa kuchitako khumbo la Yehova mwachikanga kweniso na mtima wose.

18. Kasi pangaŵa uwemi wuli para tikujipeleka kuchita uteŵeti?

¹⁸ “Chifukwa chakuti ŵanthu ŵajipeleka, lumbani Yehova.” Lekani Debora na Baraki ŵakati ŵawina nkhondo, ŵakimba sumu yakulumba vilengiwa yayi. Kweni ŵakalumba Yehova uyo Ngwapachanya Nkhanira. (Ŵeru. 5:1, 2) Mazuŵa ghano napo, para tikujipeleka kuchita uteŵeti, tovwirenge ŵanyithu kuti ŵambe ‘kulumba Yehova.’