SENDELERANI KWA CIUTA
“Wonani! Nkhupanga Vinthu Vyose Kuŵa Viphya”
Kasi imwe na mbumba yinu mukukhumba kuŵa na umoyo uwemi kweniso wamuyirayira? Panji kasi mukudokera kukhala mu caru cambura vyakuŵinya, masuzgo, na nyifwa? Manyani kuti ŵanthu ŵazamukhala nadi mu caru canthena ici. Cifukwa khumbo la Yehova Ciuta ndakuti wazgore caru kuŵa ciphya. Wonani umo khumbo lake ili lizamufiskikira, nga umo lemba la Uvumbuzi 21:3-5 likuyowoyera.—Ŵazgani.
“[Ciuta] wazamufyura sozi lililose ku maso ghawo.” (Uvumbuzi 21:4) Kasi ni masozi wuli agho Ciuta wazamufyura? Ni masozi agho ghakufuma para ŵanthu ŵakondwa yayi nesi agho ghakuvikilira maso. Kweni ni masozi agho ghakufuma cifukwa ca masuzgo na vitima. Fundo iyi yikung’anamura kuti Ciuta wazamufyura masozi ghanadi yayi, kweni wazamuwuskapo vyose ivyo vikwambiska masuzgo na vitima.
“Nyifwa yizamuŵakoso cara.” (Uvumbuzi 21:4) Nyifwa iyo ni mulwani withu, ndiyo yikucitiska ŵanthu kuti ŵathiskenge masozi. Yehova wazamuŵafwatura ku nyifwa ŵanthu awo ŵakumupulikira. Kasi wazamucita wuli? Taŵanthu tikufwa cifukwa cakuti tili kuhara kwananga kufuma kwa Adamu. Ntheura, Yehova wazamuwuskapo kwananga uku. (Ŵaroma 5:12) Yehova wazamuzgora ŵanthu ŵakupulikira kuŵa ŵakufikapo kwizira mu sembe yakuwombora ya Yesu. * Pamasinda, nyifwa iyo ni mulwani withu waumaliro “yizamumalizgika.” (1 Ŵakorinte 15:26) Ŵanthu ŵakugomezgeka ŵazamuŵa ŵakufikapo nga umo Ciuta wakakhumbiranga pakwamba.
“Vyakuŵinya vizamuŵakoso cara.” (Uvumbuzi 21:4) Kasi ni vyakuŵinya wuli ivyo vizamumara? Ni vyakuŵinya vyose ivyo vilipo cifukwa ca kwananga na kuwura kufikapo, ivyo vyayuzga ŵanthu ŵanandi.
Sonosono apa, kulira, nyifwa, na vyakuŵinya vimalenge. Kweni panji mungajifumba kuti: ‘Kasi vinthu ivi vizamucitika nkhu, kucanya?’ Yayi. Wonani cifukwa ico tikuyowoyera nthena. Cakwamba, wonani kuti layizgo ili likwamba na mazgu ghakuti, “hema la Ciuta lili na ŵanthu.” Nakuti ŵanthu aŵa ŵakukhala pa caru capasi. (Uvumbuzi 21:3) Caciŵiri, lemba la Uvumbuzi ili likuti, “nyifwa yizamuŵakoso cara.” Fundo iyi yikulongora kuti mpha caru capasi, cifukwa ndipo pakucitika nyifwa. Nakuti kucanya kundacitikepo nyifwa. Ntheura, ivyo Ciuta walayizga vizamucitika pa caru penepano.
Ciuta wazamufyura masozi agho ghakuthika cifukwa ca masuzgo na vitima
Yehova wakukhumba kuti tigomezge ivyo walayizga vyakukhwaskana na caru ciphya. Pamanyuma pakuti wayowoya vitumbiko ivyo wazamupeleka, wakayowoyaso kuti: “Wonani! Nkhupanga vinthu vyose kuŵa viphya.” Ndipo wakasazgirapo kuti: “Mazgu agha ngakugomezgeka na ghaunenesko.” (Uvumbuzi 21:5) Mphanyi mwamanya vinandi pa umo imwe na ŵakutemweka ŵinu mungacitira kuti muŵe pa gulu la ŵanthu awo ŵakukondwa pa kusopa Yehova. Ndipo ŵazamuwona para Ciuta wakufiska ivyo walayizga.
Vipaturo Ivyo Mungaŵazga mu Disembala
1 Petrosi 1-5; 2 Petrosi 1-3; 1 Yohane 1-5; 2 Yohane 1-13; 3 Yohane 1-14; Yuda 1-25–Uvumbuzi 1-22
^ ndime 5 Kuti mumanye vinandi pa nkhani ya sembe yakuwombora ya Khristu, wonani cipaturo 5 ca buku la Kasi Baibolo Likusambizgaci Comenecomene? Buku ili likupharazgika na Ŵakaboni ŵa Yehova.
