Pa January 30, 2021, Baibolo la Malemba Ghakupatulika mu Mang’anamuliro gha Charu Chiphya likafumiskika pa Intaneti mu Chitahiti. Ŵabali na ŵadumbu awo ŵali mu mipingo ya ku French Polynesia ŵakachita kuwonelera pulogiramu yakujambura kale yakufumiska Baibolo ili. Mubali Luc Granger, uyo wali mu Komiti ya Munthavi ya Tahiti, ndiyo wakayowoya nkhani ya kufumiska Baibolo.

Chitahiti ndicho chikuyowoyeka na ŵanthu ŵanandi ku French Polynesia. Ku French Polynesia kuli ŵapharazgi ŵakujumpha 1,100 awo ŵasangenge chandulo na Baibolo ili.

Magulu ghaŵiri gha ŵabali na ŵadumbu ghakagwira ntchito ya kung’anamura Baibolo ili kwa vyaka 8. Yumoza wa awo ŵakang’anamurako Baibolo ili wakati: “Mu chigaŵa chithu, Baibolo ilo kanandi ŵakugwiliskira ntchito ndakuti likalembeka pambere chaka cha 1900 chindafike. Mazgu ghake ngakusuzga kughapulikiska. Baibolo la Mang’anamuliro gha Charu Chiphya ili, ndambura kusuzga kupulikiska nanga nkhu ŵana ŵachoko.Ndakupulikikwa makora, likuneneska, kweniso mazgu ghake ngapusu.”

Tikuwonga chomene Yehova chifukwa chakovwira kuti Mazgu ghake ghafike ku vigaŵa vyakutali chomene vya charu chapasi. Tikulindizga mwakunweka kupulika umo Baibolo ili liwovwilirenge ŵanthu ŵa mitima yiwemi.—Yesaya 42:12.