Pa September 7, 2022, wupu wa United Nations Human Rights Committee (CCPR) ukapeleka chigamuro chakuzirwa chomene pa nkhani yakukhwaskana na boma la Tajikistan, pa ivyo likuŵachitira Ŵakaboni ŵa Yehova. Pa chigamuro icho wupu uwu ukapeleka pa July 7, 2022, pa mulandu wa pakati pa Adyrkhayev na Tajikistan, wupu uwu ukaŵikira kumanyuma Ŵakaboni ŵa Yehova. Mulandu uwu ukaŵa wakuti boma la Tajikistan likakana kuŵazomerezga Ŵakaboni ŵa Yehova kuti ŵalembeske ku boma kweniso kukanizga milimo yawo.

Ŵakaboni ŵa Yehova ŵachita milimo yawo yakukhwaskana na kusopa mu Tajikistan kwa vyaka vyakujumpha 50. Wupu wa Religious Association of Jehovah’s Witnesses (RAJW) ukazomerezgeka na dango mu 1994. Ndipouli, pa October 11, 2007, Unduna Wakuwona vya Mitheto ukasintha vyakuti wupu uwu uŵe wakuzomerezgeka ndipo ukakanizga Ŵakaboni ŵa Yehova kusopa. Boma likatenge ntchito yakupharazga ya Ŵakaboni ŵa Yehova, kuleka kunjira usilikari chifukwa cha njuŵi yawo, kweniso chigomezgo chakuti chisopa chawo ndicho ntchaunenesko, vikaŵa vinthu vyakutalulira. Kanandi waka Ŵakaboni ŵa Yehova ŵakayezga kuti ŵalembeske wupu wa RAJW kweni ŵakaŵakaniranga.

Mu chigamuro chasono cha wupu wa CCPR, wupu uwu ukati boma la Tajikistan likabuda pakukanizga milimo ya Ŵakaboni ŵa Yehova. Chigamuro ichi chikati “palije chifukwa chakupulikikwa” icho boma la Tajikistan likapeleka chakuti likanizgire wupu wa RAJW na kukana kuwuzomerezga na dango.

Wupu uwu ukatiso chifukwa chakuti boma la Tajikistan likakana kuzomerezga wupu wa RAJW, vikapangiska kuti “ŵanthu ŵakakikenge, ŵajalirikenge mu jele, kufumbika mafumbo, kusecha nyumba zawo, kutimbika, kupokeka mabuku na vinthu vinyake vyakukhwaskana na chisopa, kweniso kutumizgika ku charu chinyake mwakuchichizga kwa [yumoza wa] Ŵakaboni ŵa Yehova.” Chifukwa cha nkhaza izi, wupu wa CCPR ukati kuyana na malango gha United Nations International Covenant on Civil and Political Rights, boma ili likaswa wanangwa wa Ŵakaboni ŵa Yehova.

Wupu wa CCPR ukati boma la Tajikistan likwenera kusandaso nkhani yakuzomerezga Ŵakaboni ŵa Yehova kuti ŵalembeske milimo yawo na kulipira wose awo likaswa wanangwa wawo. Boma la Tajikistan likaphalirikaso kuti “likwenera kuchita chilichose icho lingafiska kuti vyanthena ivi vizakaleke kuchitikaso kunthazi.”

Chigamuro icho wupu wa CCPR wapeleka chingakhwaska mulandu wa Mubali wa vyaka 71, zina lake Shamil Khakimov, uyo wali kujalirika mu jele kufuma mu February 2019 chifukwa cha kuchita vinthu vyakukhwaskana na kusopa. Ŵamazaza ŵa charu ichi ŵakamukaka na kumujalira mu jele chifukwa waka chakuti ni Kaboni wa Yehova.

Tikugomezga kuti chigamuro ichi chiwovwirenge kuti Ŵakaboni ŵa Yehova ku Tajikistan ŵaŵe na wanangwa wa kusopa. Tikulomba kuti Yehova walutilire kutumbika kuyezgayezga kwithu apo ‘tikuvikilira na kukhozgera makani ghawemi mwakuyana na dango.’—Ŵafilipi 1:7.